Iruo rẹ Ebanbọn rọ Cha Avwanre Uko Vwo Ghwoghwo

Ẹko Rọvwẹrote na vwo owenvwe rẹ ayen vwọ reyọ itetoro rẹ ukoko na vwo ru iruo rẹ ebanbọn re sa cha avwanre uko vwo ghwoghwo ovuẹ rẹ Uvie na. Kerẹ udje, vwẹ ukpe rẹ ẹga ri 2023, ikoko rẹ irhi, rẹ eghọn ukoko rẹ Iseri ri Jihova reyọ vwo ruiruo, ghwọrọ idọla re vrẹ 500,000,000 vwọ dẹ, bọn, rhuẹrẹ, je vwẹrote Eguan Ruvie vẹ Eguan rẹ Omẹvwa vwẹ akpọneje.a A vwẹ igho nana vwọba igho rẹ ikoko sansan vwẹ akpọneje ghwọre vwọ vwẹrote Eguan Ruvie rayen.

Vwọba, a je vwẹ itetoro rẹ ukoko na vwọ bọn je vwẹrote eghọn ukoko, ọnana cha avwanre uko vwo ruiruo rẹ aghwoghwo na vwẹ akpọneje. E ruẹ ewian rẹ eghọn ukoko lọhọ, rere a sa vwọ reyọ evo usun rẹ igho na vwo bicha iruo rẹ ebanbọn vẹ ẹrhuẹrẹ rẹ Eguan Ruvie kugbe Eguan rẹ Emẹvwa. Ẹkẹvuọvo, a je guọnọ igho obuebun ra vwọ rhuẹrẹ yẹrẹ kua eghọn ukoko kpo asan ọfa. Diesorọ owian nana vwọ ghanre? Mavọ yen eghọn ukoko vwo biẹcha iruo ọghanghanre nana? Jẹ a guọnọ otọ rọyen.

“Ebanbọn ra Rhuẹrẹphiyọ Tọn”

Eghọn ukoko buebun ghwo vrẹ ẹgbukpe 30 yẹrẹ 40 re! Nicholas ro nẹ Akon Iruo Rọvwẹrote Ebanbọn Vwẹ Akpọeje da ta: “Iwevwin ra nabọ vwẹrote dede je ghwa, i mi ji miovwin ọke vwọ yanran na. A da rhuẹrẹ ebanbọn phiyọ, kọ nẹrhẹ ọ tọn.

Ofori nẹ e ru ewene phiyọ iwevwin sansan rehẹ evun rẹ Bẹtẹl vwo nene ọdavwẹ rẹ ukoko na. Vwẹ akpọnẹje, uchunu rẹ ighwoghwota na rhi kpenu phiyọ rhanvwe ọke ra vwọ bọn eghọn ukoko buebun nu. Fikirẹ ọnana, a da rhe guọnọ ihwo buebun re cha vwomakpahotọ wian vwẹ eghọn ukoko sansan. Ọtiọyena, iwevwin re rhoro jovwo na da rhe hanvwe!

Omaẹkẹnẹ ọyen orọnvwọn ọfa ro fori nẹ e roro kpahen. Ọ vwọ dianẹ avwanre yerẹn vwẹ ẹdẹ re koba rẹ eyeren nana, kẹ avwanre rhiẹromrẹ oghwọrọ ri kpregede re vọnre vẹ imuoshọ. (Luk 21:11) Kidie nẹ avwanre reyọ ena kpokpọ vwo ruiruo ọke ra da rhuẹrẹ iwevwin na, kọ nẹrhẹ ihwo re wian vwẹ etiyen vrabọ rẹ omaẹwan. Ena kpokpọ nana je sa nẹrhẹ ọ lọhọ kẹ iniọvo na rẹ ayen vwọ reyọ ebanbọn tiọyena vwọ cha ihwo uko ji bicha iruo rẹ aghwoghwo na siẹrẹ oghwọrọ rẹ ikpregede da phia nu.

“Jihova ku Ebruphiyọ Rọyen ku Orhiẹn Nana”

Vwo nene odjekẹ rẹ Ẹko Rọvwẹrote na, vwẹ ukpe rẹ ẹga ri 2023, iniọvo na de ruiruo rẹ ebanbọn vwẹ eghọn ukoko ri te 43. Ọnana mudiaphiyọ nẹ a rhoma rhuẹrẹ iwevwin ri Bẹtẹl ri joma te ubro vwẹ akpọneje. Vwo oniso rẹ idje evo ri dje ọghanrovwẹ rẹ iruo nana phia.

Angola. Matt, rọ ga kerẹ ọvo usun rẹ Umẹ Rọvwẹrote Oghọn Ukoko vwẹ Angola da ta: “Oma vwerhen avwanre rẹ avwanre vwọ mrẹ oborẹ aroẹmrẹ ri Hegae 2:7 rugba wan vwẹ idjerhe rẹ oghẹresan. Ighwoghwota rẹ avwanre vwẹ ẹkẹn 60 rẹ ujorin vwo bun vwẹ ẹgbukpe ihwe ọvo! Avwanre se vwo bicha ighwoghwota na, kẹ ofori nẹ orua ri Bẹtẹl vwẹ ẹkẹn erha vwo bun vrẹ obo ri jovwo. Ẹkẹvuọvo, kidie nẹ iwevwin ri Bẹtẹl na hanvwere, ọ rha sa nẹrhẹ avwanre durhie ihwo buebun rẹ avwanre ghene guọnọ-ọ. Ọnana de kru oghwa ọhọhọhọ nyẹ iniọvo re wian vwẹ Bẹtẹl, je nẹrhẹ ayen wian ọke vrẹ.”

A vwẹ iniọvo eshare vwo mu rere ayen guọnọ obo re se vwo ru oghọn ukoko na rho phiyọ. Ẹsosuọ, ayen ke roro nẹ e se phi ebẹnbẹn nana kparobọ je fobọ ruo nẹ otọ siẹrẹ ayen da rhuẹrẹ iwevwin ri Bẹtẹl na. Jẹ ọke rẹ ayen vwọ nabọ ru ehiahiẹ nu, ayen da mrẹvughe nẹ ọ dia a vwọ rhuẹrẹ iwevwin rẹ Bẹtẹl yen che me yovwi-in. Ukperẹ ọtiọyen, iniọvo eshare na de jiro nẹ a dẹ iwevwin re kẹrẹ Bẹtẹl rere a rhuẹrẹ ayen phiyọ. Matt da ta: “Ọke rẹ avwanre vwo mu ota na vwo rhe iniọvo re ga vwẹ Umẹ Rọvwẹrote Oghọn Ukoko, e de no nẹ iwevwin na che se yovwin tẹ e rẹ avwanre bọnre komobọ-ọ. Jẹ enẹna, avwanre rhe mrẹ oborẹ iwevwin na yovwin te. Jihova ku ebruphiyọ rọyen ku orhiẹn nana.

Oghọn ukoko ri Angola sa rhophiyọ vwẹ obaro obọ. Ẹkẹvuọvo, iwevwin kpokpọ vẹ iwevwin efa vwevunrẹ otọ ri Bẹtẹl re se ru ewene phiyọ vwẹ obaro na, kugbe iwevwin ra hwosa phiyọ vwẹ otafe ri Bẹtẹl, yen oghọn ukoko na ghwa guọnọ enẹna ayen vwo bicha iruo rẹ aghwoghwo na.

Japan. A je re rhuẹrẹ eghọn ukoko buebun ra bọnre omarẹ ẹgbukpe 40 re wanre na-a. Ọ dia ọmọriẹ owian yen a wianre sa vwọ vwẹrote iwevwin na-a, dede nẹ iniọvo na wianre gangan ayen vwọ vwẹrote ebanbọn na, iwevwin na diarọ vrẹ ọke rẹ ofori nẹ ọ dia te. Ọnana yen sorọ a vwọ rhoma rhuẹrẹ iwevwin na enẹna.

Akpeyeren ri Bẹtẹl weneri rhanvwe ikpe evo rhire na. Tavwen a ke mrẹ 2015, e chere emu vwọ kẹ orua ri Bẹtẹl eje. Ọtiọyena, “umukoni” kọyen hẹ uvun ri Bẹtẹl buebun vwẹ Japan. Jẹ enẹna, iniọvo re ga vwẹ Bẹtẹl yen chere emu rẹ obọ rayen evo. Iwevwin ra rhoma rhuẹrẹ phiyọ na da nẹrhẹ ọ lọhọ kẹ iniọvo na ayen vwo chere emu rẹ obọ rayen kidie a vwẹ ikoni efa buebun vwọba ivun rẹ Bẹtẹl. Kumiko rọ dia oniọvo aye rọ ga vwẹ oghọn ukoko ri Japan da ta: “Ukoni na nabọ shephiyọ kẹ vwẹ, ọ da nẹrhẹ mi se bicha ọrhuẹrẹphiyotọ kpokpọ re vwo mu vwẹ Bẹtẹl.”

Owian ra wian vwẹ oghọn ukoko ri Japan ọyen ẹbẹre ọghanghanre ọvo rẹ iruo rẹ akpọeje na. (Matiu 28:​19, 20) Vwẹ akpọneje, Japan ọyen ọvo usun rẹ eghọn ukoko ivẹ re teyen ọsoso ri Baibol na vwọphia. Ọtiọyena, ẹbẹre ọvo rẹ iruo rẹ ebanbọn na yen, a vwọ vwẹ imẹshini rọ cha biẹn ji se ighworighwo rẹ ẹbe reyọ vwo vi, rere a sa vwọ vrabọ rẹ omaẹwan vwẹ asan ra da teyen ẹbe na. Uchunu rẹ igho rọ cha reyọ a sa vwọ dẹ je rhuẹrẹ imẹshini nana phiyọ che joma tẹ idọla oduduru ọvo, ẹkẹvuọvo, oma vwerhen avwanre nẹ oghọn ukoko ri Japan sa de rha teyen ẹbe je fan emu rẹ ẹwẹn na.

Ra vwọ teyen Baibol yen oborẹ iniọvo na tẹnrovi uvwre rẹ ọke rẹ ebanbọn na. Trey rọ dia ọvo usun rẹ Umẹ Rọvwẹrote Oghọn Ukoko vwẹ Japan ta da: “Vwẹ ọke rẹ ebanbọn na, ukoko na siobọnẹ efanfan ri Baibol buebun. Vwọba, uchunu rẹ ihwo re guọnọ Baibol ji kpenu phiyọ vwẹ akpọneje. Rere e se vwo vwo ọrhuẹrẹphiyotọ rẹ ọke ra cha vwọ rhuẹrẹ imẹshini kpokpọ phiyọ vẹ ọke ra cha vwọ teyen ẹbe, kẹ ofori nẹ akon iruo vẹ ihwo sansan wian kugbe.” Vwẹ ẹdia nana eje, a je teyen Baibol ri joma te 220,000 kemeranvwe kemeranvwe vwẹ uvwre rẹ March fiẹ August 2023, dede nẹ ọyen ọke rẹ owian rẹ ebanbọn vwẹ asan ra da teyen ẹbe na ma vwọ gan. A wian owian nana eje gba vẹ igho re vwo vwẹ ẹwẹn.

Obo ra sa vwọ sẹro ẹgba rẹ ẹlẹtriki ọyen orọnvwọn ọghanghanre ọfa vwẹ iruo rẹ ebanbon na. Isola panẹ kpokpọ re che phi phiyọ na cha nẹrhẹ a sẹro igho ri bun te omarẹ idọla 120,000 kukpe kukpe. E che phi evakpo (Triple-glazed windows) rọ cha sẹro rẹ ẹgba rẹ ẹlẹtriki phiyọ, ọ me nẹrhẹ a sẹro rẹ igho ro bun te omarẹ idọla 10,000 kukpe kukpe. Dede nẹ erọnvwọn nana ra vwọ sẹro ẹgba rẹ ẹlẹtriki na pha ghanghanre, jẹ ayen sa sẹro igho ri bun vrẹ idọla 3,500,000 vwẹ uvwre ọke ra cha vwọ reyọ ayen vwo ruiruo na. O ji che toroba erhuvwu rẹ ekogho na.

“Ewian je Vọn Otọ re Che Ru”

Iruo re ruru vwẹ eghọn ukoko rẹ ivẹ nana dje owian ro fori nẹ e ru rere iwevwin ri Bẹtẹl se vwo bicha iruo rẹ aghwoghwo na. Ẹkẹvuọvo, owian na ji re-e. Aaron, rọ ga vwẹ Akon Iruo Rọvwẹrote Ebanbọn Vwẹ Akpọeje da ta: “A wian ewian buebun re, ẹkẹvuọvo ewian je vọn otọ re che ru.” Mavọ yen a sa vwọ wian ewian nana eje? Ọ da je ta: “Vwọba itetoro rẹ ighwologhwolo re tori, avwanre je kpẹvwẹ ihwoeje ri vwo ẹwẹn rẹ omaevwoze rẹ ayen vwọ vwomakpahotọ vwẹ ọke re wanre, kugbe ihwo ri ru ewene vwẹ akpeyeren rayen rere ayen sa vwọ vwẹ oma ze vwẹ obaro obọ. Ukẹcha rẹ ugboma vẹ igho rẹ iniọvo rẹ avwanre vwọphia ghwa odjephia rẹ ebruphiyọ ri Jihova.”​—Une rẹ Ejiro 110:3.

Itetoro ro nẹ otọ rẹ ubiudu rhe yen e vwo ruiruo rẹ ebanbọn vẹ ẹrhuẹrẹ rẹ avwanre ruẹ eje, a womarẹ donate.jw.org vwo ruẹ buebun rẹ itetoro na. Ovwan kobiruo mamọ vwọ kẹ okẹ ri ghwologhwolo rẹ ovwan.