A Vwọ Vwẹ Ukẹcha kẹ Ihwo rẹ Oghwọrọ ri Kpregede Phia Kẹ

Oghwọrọ ri kpregede buebun phiare vwẹ ukpe ri 2020, ukpe yena yen ọga rẹ akpọeje ri COVID-19 na je vwọ tonphiyọ. Mavọ yen Iseri ri Jihova vwọ vwẹ ukẹcha phia kẹ ihwo rẹ ebẹnbẹn rẹ oghwọrọ yẹrẹ ọga na teri oma?

Vwẹ ukpe rẹ ẹga ri 2020,a Umẹ rẹ Erevwẹrote rẹ Ẹko Rọvwẹrote na da rhọnvwephiyọ nẹ a ghwọrọ 28 million dollars (₦11,498,200,000)b phiyọ iruo rẹ ukẹcha. Igho nana vwẹ ukẹcha phia kẹ ihwo rẹ ebẹnbẹn rẹ oghwọrọ ri kpregede re vrẹ 200 teri oma—enana churobọsi ọga rẹ akpọeje ri COVID-19, ogiribo rọ sua oghwe rode sansan, oghwe ro kuru vwẹ Africa, ọkanrovwẹ rẹ emu vwẹ Venezuela, kugbe ọkaronvwẹ rẹ ame vwẹ Zimbabwe. Utoro nana yen a vwọ hwa osa rẹ emu, ame, asan ra dia, iwun, kugbe ẹroẹvwote rẹ oma kpokpọ rẹ ihwo na, utoro na yen a je vwọ dẹ erọnvwọn sansan re vwo ru asan na fuan, ji ruiruo rẹ ẹrhuẹrẹ vẹ ẹrhoma bọn. Jẹ a fuẹrẹn evo usun rẹ iruo rẹ ukẹcha tiọyena.

COVID-19. Ọga rẹ akpọeje nana djobọte oma kpokpọ, iroro kugbe uweren rẹ iniọvo rẹ avwanre rehẹ akpọeje. A sa vwọ vwẹ ukẹcha kẹ ayen, a da vwẹ Umẹ rẹ Ukẹcha (DRCs) re vrẹ 800 vwo mu vwẹ akpọeje. Iniọvo rehẹ umẹ nana de vwo oniso rẹ ọdavwẹ rẹ iniọvo na, ayen me vwẹ ovuẹ vwọ kẹ Umẹ rẹ Erevwẹrote na rere ayen sa vwọ riẹn idjerhe ro me fo rẹ ayen vwọ vwẹ ukẹcha phia kẹ iniọvo na.

Vwẹ ukpe rọ wanre na, Umẹ rẹ Ukẹcha chọn ihwo buebun uko vwo vwo emu, ame, ekuakua rẹ orufon, kugbe ihuvwun rẹ ayen ghene guọnọ. Vwẹ ekogho evo, Umẹ rẹ Ukẹcha ji nene ekpako rehẹ ukoko sansan wian rere ukẹcha rẹ igọmẹti vwọ phia vwẹ ekogho rẹ ayen hepha na ji se vwo te iniọvo rẹ ukoko na obọ.

Ihwo re dia Iseri ri Jihova-a rhi vwo oniso rẹ iruo rẹ ukẹcha rẹ avwanre re. Kerẹ udje, Field Simwinga rọ dia ohwo ro suẹn vwẹ ubrakpọ rẹ Nakonde vwẹ Zambia, da vuẹ iniọvo rẹ avwanre: “Obo ovwan ruru ovwan sa vwọ vwẹ ukẹcha phia kẹ orua sansan rẹ ebẹnbẹn rẹ ọga na teri oma na nabọ da avwanre ẹro dẹn.”

Ọkanrovwẹ rẹ Emu Vwẹ Angola. Oga ri COVID-19 nẹrhẹ emu kanre vwẹ Angola, ọ da je nẹrhẹ ememu rọ herọ ghanre. Iniọvo rẹ avwanre buebun mrẹ bẹnbẹn mamọ vwẹ ọke nana rẹ ayen vwọ de emu.

A vuẹ oghọn ukoko ri Brazil nẹ ayen vwẹ ukẹcha phia vwo mu ekuakua rẹ emu vwo rhe iniọvo rẹ Angola. A sa vwọ nabọ vwẹ igho re toro vwọ kẹ iruo rẹ ukẹcha na vwo ruiruo vwẹ idjerhe rẹ abavo, iniọvo na ke frẹkotọ guọnọ idjerhe ro me yovwin ayen sa vwọ dẹ ji mu emu na vwo rhe iniọvo rẹ Angola, ayen da je dẹ emu na ẹkuẹko buebun. Ẹdẹ vẹ emuo rẹ ẹko rẹ emu na ọvuọvo da dia omarẹ $22 (₦8,386.40) ọvo, jẹ irosu, ire kugbe evwri re vwo chere emu rehẹ evunrẹ ẹko rẹ emu na vwo ọnyẹ te 20 kilograms (44 lb). Rhi duvwun nonẹna, omarẹ ekru rẹ eghwa rẹ emu ri te 33,544 yen e mu kpo Angola re​—enana eje vwo ọnyẹ te 654 metric tons (721 U.S. tons). Ekuakua na eje rẹ ayen mu bru ayen ra na vwẹ ukẹcha kẹ ihwo re vrẹ 50,000.

Mavọ yen oma ruẹ iniọvo rẹ avwanre kpahen iruo rẹ ukẹcha nana? Alexandre, rọ dia asan ọvo ro siuvun vwẹ Angola da ta: “Ọnana nẹrhẹ o muvwẹro dẹn nẹ Jihova vwo ẹguọnọ mẹ, nẹ ọ dia omẹvwẹ ọvo yen herọ-ọ. Ukoko ri Jihova ni vwe ghanghanre!” Mariza rọ dia oni rẹ ọyen ọvo vwẹrote emọ rọyen da ta: “Jihova nyo ẹrhovwo mẹ. Me kpẹvwẹ Jihova vẹ ukoko rọyen!”

Ukẹcha ra Vwọphia Fikirẹ Ọkanrovwẹ rẹ Amẹ Vwẹ Zimbabwe. Ame kanre vwẹ Zimbabwe vwẹ ukpe rẹ ẹga ri 2020, ọnana da rhe nẹrhẹ iduduru rẹ ihwo rioja rẹ owẹnvwe ọgangan. Vwẹ ọke yena, Iseri ri Jihova buebun ghwe vwo emu ro te ayen ria vwẹ Zimbabwe-e.

Umẹ rẹ Ukẹcha iyorin yen e vwo mu nẹ e vwẹ ukẹcha phia vwọ ghare emu vwọ kẹ iniọvo rẹ avwanre. Ighwoghwota ujorin buebun yen vwẹ ukẹcha phia vwọ rhuẹrẹ ekuakua rẹ emu re che mu bru iniọvo na ra phiyọ.c Vwẹ ukpe rẹ ẹga ri 2020, $691,561 (₦284,003,630.59) yen a vwọ vwẹ ukẹcha phia vwọ ghẹrẹ ihwo ri bun vrẹ 22,700!

Vwẹ ẹdia evo, tavwen emu rẹ iniọvo rehẹ umẹ na mu bru ayen ra na ki rhi te obọ iniọvo na, jẹ emu romobọ rayen re re. Emu na vwo te ayen obọ, iniọvo rẹ avwanre da kpẹvwẹ Jihova. Evo vwẹ usun rayen da rhe ton ẹsuọ rẹ ine rẹ ukoko na phiyọ.

Vwẹ ekogho ọvo, eyauku ivẹ re dia Iseri ri Jihova de kpo aguare ọvo vwẹ orere rayen, a rhuẹrẹ aguare na phiyọ rere ayen vwọ ta ota kpahen ekuakua rẹ ukoko ọvo rọ vwẹ ukẹcha phia kẹ ihwo (NGO) veri nẹ e che mu bru ayen rhe. Ẹkẹvuọvo, echidiotọ na da rhoma rhi hirhephiyọ echidiotọ rẹ oseghe rẹ usuon, iniọvo ivẹ na da sen nẹ ayen cha sa rhọnvwephiyọ oborẹ ihwo na guọnọ mie ayen tavwen ekuakua na ki se te ayen obọ-ọ. Ayen vwo vrẹ nẹ echidiotọ na nu, eya ichekọ na ke vwẹ ayen vwọ jehwẹ, je vuẹ ayen nẹ, “Ovwan nama bru avwanre cha rhe yare emu siẹfa rẹ!” Ẹkẹvuọvo, Udughwrẹn ivẹ vwọ wan nu, iniọvo rẹ avwanre de krun emu vwo rhe iniọvo rehẹ ekogho yena, enana tobọ te ayen obọ bẹnbẹn tavwen e rẹ ukoko ochekọ na veri ke rhe!

Ukẹcha ra vwọphia kẹ ihwo rẹ emu phia kẹ vwẹ Zimbabwe ji se omamọ rẹ oseri. Kerẹ udje, roro kpahen oborẹ Prisca rọ dia orere otete ọvo rhiẹromrẹ. Dede nẹ ọkanrovwẹ rẹ ame na so ebẹnbẹn vwẹ ekogho na, jẹ Prisca je vwẹ Wednesday vẹ Friday rẹ kudughwrẹn kudughwrẹn vwọ kpahotọ vwọ kẹ iruo rẹ aghwoghwo na, tobọ vwẹ ọke re vwo vorophiyọ ekankọn. Ihwo rehẹ ọko na ke vwọ jehwẹ, ayen ke ta: “Wọ cha vwẹ owẹnvwe vwo hwe ihwo rẹ orua wẹn fikirẹ iruo rẹ aghwoghwo wẹn na.” Prisca me kpahen kẹ ayen: “Jihova je rhe vwẹ ọke ọvuọvo vwọ kpairoro vrẹ idibo rọye-en.” O kriri-i, ukoko rẹ avwanre de mu emu vwo rhe oniọvo nana. Ọnana gbe ihwo re dia ekogho na unu, ayen da vuẹ Prisca: “Ọghẹnẹ je rhe kpairoro vrẹ wẹn devo-o, ọtiọyena, avwanre guọnọ yono kpahọn kpobarophiyọ.” Ihwo ighwrẹn re dia ekogho na kerhọ rẹ uyono re ruẹ vwẹ iredio enẹna.

E vwo siẹkẹrẹ oba na phiyọ na, a cha rha mrẹ oghwọrọ ri kpregede. (Matiu 24:​3, 7) Avwanre nabọ vwo ọdavwaro kpahen utoro ri ghwologhwolo rẹ ovwan womarẹ ena sansan ra mrẹ vwẹ donate.jw.org ro ovwan vwo ruiruo na. A vwẹ ayen vwọ vwẹ ukẹcha kẹ ihwo re rioja re guọnọ ukẹcha vwẹ idjerhe ọvo yẹrẹ ọfa.