Iruo rẹ Ukẹcha Vwẹ 2023​—“Avwanre Nabọ Rhiẹromrẹ Ẹguọnọ ri Jihova”

Baibol na mraro rọyen nẹ “ẹkuotọ [cha] vwọso ẹkuotọ” ọtiọyen ji te oghwọrọ ri kpregede re cha phia vwẹ “okuphiyọ rẹ eyeren na.” (Matiu 24:​3, 7) Avwanre mrẹ orugba rẹ eta nana vwẹ Ukpe rẹ Ẹga ri 2023.a Dede nẹ ifovwin vẹ oghwọrọ ri kpregede phiare vwẹ ẹkuotọ re joma te 100, Iseri ri Jihova vwẹrokere ẹguọnọ ri Jihova. Vwẹ idjerhe vọ?

Vwẹ ukpe rẹ ẹga ri 2023, oghwọrọ ri kpregede re vrẹ 200 djobọte iniọvo avwanre. Ikoko rẹ irhi rẹ Iseri ri Jihova reyọ vwo ruiruo, ghwọrọ igho ri bun vrẹ idọla oduduru ihweb vwo nẹ itetoro rẹ akpo eje re ruru, vwọ vwẹ ukẹcha vwọ kẹ ihwo rẹ oghwọrọ te oma. E ji kere igho nana vwọba igho rẹ iniọvo buebun reyọ vwọ cha ihwo re guọnọ ukẹcha uko vwẹ ekogho rayen. Mrẹ obo ra reyọ itetoro wẹn vwọ vwẹ ukẹcha vwọ kẹ iniọvo avwanre rẹ oghwọrọ ri kpregede ivẹ phia kẹ.

“Uvi rẹ Ẹguọnọ Ghene Herọ”

Ọkieje yen oghwe vwo ku ekogho evo vwẹ Nigeria. Ẹkẹvuọvo, ọ rọ phiare vwẹ October 2022 yen oghwe rọ ma bra kparobọ rẹ ẹkuotọ na rhiẹromrẹ vwẹ ẹgbukpe ihwe re wanre. Otọ ra kọn ekankọn phiyọ rọ rho vrẹ 1,670,432 acres yen oghwe na kuru, ihwo ri bun vrẹ oduduru ivẹ yen ame na djẹ nẹ uwevwin rayen. O kriri-i, oghọn ukoko ri Nigeria da vwẹ Ume rẹ Ukẹcha vwo mu rere ayen sa vwọ kẹ iniọvo na oborẹ ayen guọnọre je cha ayen uko vwọ sẹro rẹ esegbuyota rayen.

Obo ro Djobọte Iniọvo Avwanre Wan

• Ame na djẹ iniọvo ri te 7,505 nẹ iwevwin rayen

• Iwevwin ri te 860 yen guọghọre

• Eguan Ruvie ri te 90 vẹ Ọguan rẹ Omẹvwa ọvo yen oghwe na kuru

Obo ra Reyọ Utoro na Vwo Ru

Idọla ro bun vrẹ 250,000 yen a ghwọrọ phiyọ iruo rẹ ukẹcha na, ọnana churobọ si:

• Emuọre kerẹ irosu, ẹwa, spagẹti vẹ idomi

• Ekuakua re vwo sherhẹn kerẹ ehwa vẹ imọskito nẹti

• Ẹrhuẹrẹ vẹ ẹrhomabọn rẹ iwevwin re guọghọre

Mavọ yen iniọvo avwanre vwọ nabọ reyọ igho re torori na vwo ruiruo vwẹ idjerhe rẹ aghwanre? Idjerhe ọvo rẹ ayen vwo ru ọtiọyen yen ayen vwọ frẹkotọ nẹ uwevwin ọvuọvo sẹ e guọnọ ẹrhuẹrẹ. Ọ da dianẹ a cha rhoma bọn uwevwin na, ena re lọhọre ra vwọ bọn iwevwin vwẹ ekogho na yen a cha vwọ bọn.

Oma vwerhen iniọvo rẹ avwanre ra vwẹ ukẹcha kẹ mamọ. Oniọvo aye ọvo da ta: “Oghwe na yanghan akpeyeren avwanre kidie ekankọn avwanre guọghọre, ji te uwevwin rẹ avwanre. Ẹwẹn avwanre totọ ọke rẹ iniọvo na vwọ rhe ẹdẹdẹ yena rhe vwẹ ukẹcha kẹ avwanre je kẹ avwanre uwevwin avwanre cha dia. Oma vwerhen avwanre mamọ ọke rẹ oghọn rukoko vwo mu emuọre bru avwanre rhe. O gbe avwanre unu rẹ avwanre vwọ mrẹ orugba eta ri Jọn 13:​34, 35 vwẹ akpeyeren rẹ avwanre. . . . Uvi rẹ ẹguọnọ ghene herọ. Mẹvwẹ vẹ orua mẹ eje kpẹvwẹ iniọvo [na] vwo nẹ otọ ẹwẹn rẹ avwanre rhe vwọ kẹ ukẹcha ro fo aruọke.”

Ihwo efa vwẹ ekogho na vwo oniso rẹ iruo rẹ ukẹcha avwanre. Osun ọvo rọ dia Sabagreia, vwẹ Bayelsa State da ta: “O vwo ikoko buebun yẹrẹ ishọshi sansan vwẹ akpọ na, ẹkẹvuọvo Iseri ri Jihova ọvo yen ru orọnvwọn tiọna re. . . . Ukoko [rẹ ovwan] ọyen ọvo usun rẹ ikoko ri me yovwin vwẹ akpọ na.”

“Avwanre Nabọ Rhiẹromrẹ Ẹguọnọ ri Jihova”

Vwẹ February 2023, erhanre re vrẹ 400 yen so oghwọrọ rode vwẹ Chile. Otọ rọ rho vrẹ 1,062,553 acres yen guọghọre vwẹ erhanre na ji te iwevwin, irhukpẹ, kugbe idjerhe. Ihwo ri joma te 8,000 yen djẹ nẹ uwevwin rayen. Okriri-i, oghwọrọ na vwọ phia nu, oghọn rukoko de ru ọrhuẹrẹphiyotọ ra vwọ vwẹ ukẹcha phia kẹ ihwo rẹ oghwọrọ na teri oma.

Obo ro Djobọte Iniọvo Avwanre Wan

• Ighwoghwota ri bun te 222 yen djẹ nẹ uwevwin rayen

• Iwevwin ri te 20 yen guọghọre

Obo ra Reyọ Utoro na Vwo Ru

Idọla ro bun vrẹ 200,000 yen a ghwọrọ phiyọ iruo rẹ ukẹcha na, ọnana churobọ si:

• Emu vẹ ame

• Ipẹtro, ekuakua re vwo ru uwevwin fuan, vẹ ihuvwun

• Ẹrhomabọn rẹ iwevwin re guọghọre

O gbe orua ọvo unu ayen vwọ mrẹ nẹ oborẹ ayen vwori eje ghwru va ayen abọ, ji te uwevwin vẹ eki rayen. Ọnana da nẹrhẹ ọ bẹn rẹ orua na vwọ vwẹrote oma rayen. Ẹsosuọ, ọ da orua na mamọ rẹ ayen vwọ mrẹ asan rẹ uwevwin rayen hepha jovwo rẹ erhanre na torhẹ totọ. Ẹkẹvuọvo ayen vwọ mrẹ nẹ a rhoma bọn uwevwin rayen, ememerha na ẹwẹn rayen de rhi totọ. Ẹguọnọ vẹ ọdavwẹ rẹ iniọvo re vwomakpahotọ na djephia vwẹ ukẹcha kẹ ayen vwo chirakon. Oborẹ orua na rhiẹromrẹ na de mu ayen vwọ vwomaba iniọvo na vwọ bọn uwevwin rẹ oniọvo ọfa rọ je guọghọ.

Iruo rẹ ukẹcha na djobọte iniọvo avwanre buebun. Oniọvo ọshare ọvo da ta: “Ọrhuẹrẹphiyotọ ri Jihova rọ vwọ reyọ Umẹ rẹ Ukẹcha vwo mu na ghene vwerhoma. Vwẹ ẹdẹ rọ vwọ kpahọn rẹ oghwọrọ na vwọ phia nu, jẹ iniọvo na hẹ etiyin re rẹ ayen vwọ ghara ekuakua rẹ ayen ghene guọnọ vwọ kẹ ayen. Avwanre mrẹ ọbọngan siẹrẹ e de se kpahen iruo rẹ ukẹcha vwẹ ẹbẹre efa vwẹ akpọ na. Ẹkẹvuọvo ọ da phia kẹ wẹ re, ọ dia obo ra ta na yen ọ hepha-a. Wo che rhi vwo ọdavwaro kpahen ukoko na phiyọ; oborẹ iniọvo na vwọ vwẹrokere iruemu ri Jihova; vẹ oborẹ ayen vwo djephia nẹ ayen guọnọre nẹ avwanre vwo omakpokpọ, sẹro esegbuyota avwanre ji vwo uruemu abavo. Avwanre nabọ rhiẹromrẹ ẹguọnọ ri Jihova.”

Eyeren na vwo kuẹphiyọ na, e che rhe rhiẹromrẹ oghwọrọ ri kpregede vrẹ obo ri jovwo. (Luk 21:​10, 11) Ẹkẹvuọvo, Ovie rẹ avwanre ro vwo ẹguọnọ rọ dia Jesu Kristi na, reyọ ukoko rẹ Inenikristi na vwo djephia nẹ ọ vẹ avwanre herọ “vwẹ ẹdẹ na eje rhirin re te okuphiyọ rẹ eyeren na.” (Matiu 28:20) Itetoro ri ghwologhwolo rẹ wo ruẹ vwo biẹcha iruo rẹ akpọ eje womarẹ donate.jw.org yẹrẹ ena efa, kugbe ọke vẹ ẹgba rẹ wo vwo ruiruo, djephia nẹ wo biẹcha Ovie na vẹ Uvie rọyen. Wẹ kobiruo vwọ kẹ uruemu ẹse eruo ru wo djephia ọkieje.