Emekpeti rọ Chọn Ihwo Uko Vwọ Sẹro rẹ Esegbuyota Rayen

Enẹna Iseri ri Jihova vwo ẹbe vẹ ividio buebun vwẹ intanẹti vrẹ obo ri jovwo. Jẹ, asan buebun vwẹ akpọ na, iniọvo rẹ avwanre vwo igho rẹ ayen sa vwọ dẹ idata vwọ ro intanẹti-i. Efa dia ekogho rẹ irhukpẹ rẹ ẹlẹtriki kpokpo, nẹtwọk rẹ evo ganre-e, evo tobọ vwo nẹtwọk kakaka-a.

Ẹkẹvuọvo, enẹna iniọvo rẹ avwanre buebun ke sa danlodu rẹ ẹbe, ividio kugbe ekuakua efa vwẹ intanẹti ọ da tobọ dianẹ ayen vwo nẹtwọk dede-e. Mavọ yen ayen se vwo ru ọnana?

JW Box ọyen emekpeti ra vwọ kẹ ikoko rehẹ ekogho ri ghwe vwo omamọ ri nẹtwọku-u. O vwo obo re hwarhiẹ nẹtwọk (router device) ra dẹ phiyọ, software rẹ Akon Iruo rẹ Ikọmputa rọhẹ Bẹtẹl ru phiyọ kugbe ẹbe vẹ ividio sansan re ru phiyọ intanẹti ra danlodu phiyọ evun rọyen. Ọvuọvo rẹ ekpeti na se te $75 rẹ igho ri U.S.

Vwẹ Ọguan Ruvie, iniọvo ke sa kọnẹti rẹ ifonu rayen fi JW Box na re ayen sa vwọ danlodu re ẹbe, ividio kugbe ekuakua efa sansan. Ihwo ri tobọ vwo ifonu rẹ awanre re ghwa ghanre-e sa kọnẹti rẹ ifonu rayen fi ekpeti na. Kẹ, ọ da rha dia nẹ nẹtwọk hẹ asan rẹ Ọguan Ruvie na hepha na-a, kẹ mavọ yen ẹbe, ividio kugbe ekuakua efa kpokpọ sa vwọ ro JW Box na? Nọke ra ruọke yen oghọn rukoko vwọ sẹndi rẹ obo re se USB keys rẹ ọvuọvo rọyen te omarẹ $4 rẹ igho ri U.S vwo rhe ukoko tiọyena. USB keys na vwo ẹbe, ividio kugbe ekuakua efa kpokpọ rehẹ jw.org re se lodu phiyọ JW Box na.

Mavọ yen JW Box na sa vwọ chọn iniọvo rẹ avwanre uko re? Nathan Adruandra rọ dia ọsẹ rọ dia Democratic Republic of Congo da nabọ djefiotọ nẹ, “Ọke grongron rhire yen me vwọ davwengba re me vwọ danlodu rẹ eha rudje rẹ, ‘E Jihova, . . . Wẹ Me Vwẹroso’ kugbe Karophiyọ Aye rẹ Lọt. Ẹkẹvuọvo, me sa danlodu raye-en, ọnana nẹrhẹ ofu dje vwe. Enẹna, ke me sa danlodu rẹ ividio tiọyena phiyọ ifonu mẹ, ọnana je chọn avwanre uko kerẹ emiọvwọn vwo yono emọ rẹ avwanre.”

Oniọvo ọshare ọvo rọ vwẹ ukẹcha kẹ ikoko vwẹ Nigeria vwọ rhuẹre JW Box phiyọ da ta: “Iniọvo na mrẹ JW Box kerẹ okẹ roghẹrẹsan ro nẹ obo ri Jihova rhe. Oma vwerhen ayen nẹ enẹna kẹ ayen sa danlodu rẹ ẹbe vẹ ividio rehẹ Ekpeti rẹ Uyono na.”

Asaọkiephana, emekpeti na re vrẹ 1,700 yen vwo rhe iniọvo rẹ avwanre rehẹ Africa, Oceania, kugbe South America re, iroroẹje je herọ re ji vwo mu kpo ikoko efa buebun. Tivọ yen a da mrẹ igho re vwo ruẹ enana eje na? Womarẹ utoro re ruẹ vwọ kẹ iruo rẹ akpọeje na rẹ ihwo buebun ruẹ vwẹ donate.jw.org. Ovwan kobiruo vwọ kẹ utoro ri ghwologhwolo rẹ ovwan.