Wọ Reyọ JW Library Vwo Ruiruo?

JW Library ọyen aplikeshọni rẹ ọphẹ rọ sa nẹrhẹ wọ danlodu rẹ Baibol, ẹbe, ividio, kugbe isese vẹ eha rẹ udje rẹ uhworo ọvo phiyọ ifonu, itablẹti yẹrẹ ikọmputa wẹn.

OBO WỌ SA VWỌ MRẸ: Rhie intanẹti, rere vwọ danlodu rẹ JW Library vwevunrẹ asan ra da danlodu rẹ aplikeshọni. Aplikeshọni na herọ vwọ kẹ ifonu sansan. Wo de rhie intanẹti, kpo aplikeshọni na rere wọ sane erọnvwọn rẹ wọ guọnọ danlodu reyọ. Ọ da dianẹ wo vwo intanẹti vwẹ uwevwi-in, wọ sa danlodu erọnvwọn nana vwevunrẹ Ọguan Ruvie, laibri re de se ẹbe, yẹrẹ asan ra da shẹ ikọfi rọ kẹrẹ asan wọ dia. Wọ da sa danlodu rẹ ẹbe vẹ erọnvwọn efa phiyọ ifonu wẹn nu, wo rhe che rhie intanẹti tavwen wọ ke mrẹ aye-en. Kidie nẹ kọke kọke yen e vwo phi erọnvwọn kpokpọ phiyọ JW Library na, ko fori nẹ wo rhe rhie intanẹti nọke ra ruọke rere wọ danlodu rayen.

DIESORỌ O VWO FO NẸ WO VWO? JW Library nẹrhẹ ọ dia lọlọhọ kẹ avwanre e vwo ru uyono romobọ, ọ je nẹrhẹ e se nene ohwo rọ ta ota vwevunrẹ uyono. O ji yovwin mamọ vwọ kẹ iruo rẹ aghwoghwo na, ọ vwẹ ukẹcha kẹ ihwo evo mamọ vwẹ aghwoghwo rẹ kpregede.