Oma Vwerhen Ovwẹ nẹ Me Jẹ Ojẹ rọ Gbare

A yọnrọn ovwẹ ghwanre vwẹ ọko ọvo vwẹ Australia. Ọsẹ vẹ oni mẹ kugbe esẹ vẹ ini rayen mrẹ uyota na vughe vwẹ ikpe re kpahen 1950. Me ton aghwoghwo phiyọ me vwọ hẹ ẹgbukpe 6, mi de rhe bromaphiyame vwẹ ẹgbukpe 13. Kọke kọke yen me vwọ ga kerẹ ọkobaro rẹ ubrọke vwẹ ọke avwanre da ro họlide. Mi vwo ẹguọnọ ri Jihova, me je guọnọ ga bẹdi bẹdẹ.

Ọke me vwọ hẹ ẹgbukpe 15, iyono rẹ isikuru mẹ de noso nẹ mi ruẹ yovwẹn vwẹ ehaẹha. Fikirẹ ọtiọyena, rugby league team de ji ihwo ivẹ bru vwe rhe rhe vwe iskọlashipi vwọ kẹ vwẹ. Mi vwo titi vwẹ ehaẹha nana je vwe mamọ, ẹkẹvuọvo me vwẹ oma mẹ kpahotọ kẹ Jihova re. Ọsẹ mẹ de jiro kẹ vwẹ nẹ ofori mi roro kpahen ive ri mi ve kẹ Jihova tavwen mi ki brorhiẹn sẹ me cha vwọtua ehaẹha. Mi de ru nene oborẹ Ọsẹ mẹ vuẹ vwẹ na je mrẹvughe nẹ mi che se ru ivẹ na kugbee, ọtiọyena mi rhe rhiabọreyọ iskọlashipi naa. Emeranvwe evo vwọ wan nu, Australian Institute of Sport vwẹ Canberra da vwẹ iskọlashipi ọfa vwọ kẹ vwẹ nẹ mi yono kpahen onẹ ri marathon rere mi se vwo mudia vwọ kẹ Australia vwẹ Igemu rẹ Commonwealth yẹrẹ Igemu rẹ Olympic. Obọfa, me da sen karekare kidie me guọnọ ru oborẹ mi ve kẹ Ọghẹnẹ mẹ rẹ mi vwo ẹguọnọ rọyen na gba.

O rhe krii, mi de wontọ nẹ isikuru je ton iruo rẹ ọkobaro phiyọ, rọ dia obo rehẹ ẹwẹn mẹ jovwo. Ẹkẹvuọvo, orua mẹ de rhi vwo ebẹnbẹn rẹ igho, ọtiọyena me da dobọ rẹ iruo rẹ ọkobaro ji je ton iruo phiyọ vwẹ asan me da gua imoto ra vwọ wiowian rẹ aghwa. Mẹvwẹ ọvo yen dia jẹ mi ji te ẹgbukpe ujee. Dede nẹ me je ga Jihova, jẹ mi rhe mu ẹwẹn kpahen ẹga na ọfaa. Ọnana da nẹrhẹ mi muomaphiyọ, oyerinkugbe mẹ vẹ ọ ri Jihova rha je gaan. Mi de mu erharhe rẹ igbeyan re da udi vroma ji vwobọ vwẹ iruemu ri jẹfuọn, mi de vwo ẹwẹn me vwọ vwẹrokere ayen. Oyerinkugbe mẹ vẹ ọ rẹ Jihova rha gaan fikirẹ erọnvwọn re cha tọọn re me vwọtua.

Ofori nẹ mi wene akpeyeren mẹ, ọtiọyena me da kua kpo orere ọfa ro sherabọ vwọ kẹ erharhe rẹ igbeyan ri mi vwori jovwo. Mi de rhi sikẹrẹ Jihova je rhoma guọnọ ton iruo rẹ ọkobaro phiyọ. Ọke vwọ yanran na, me da mrẹ Leann McSharry, ọmọtẹ rẹ oma vua rọ ga kerẹ ọkobaro re, avwanre ihwo ivẹ na da rhe dia igbeyan. Avwanre ta ota kpahen oborẹ avwanre guọnọ ru vwẹ ẹga ri Jihova, ọvo rọyen yen iruo rẹ imishọnare. Avwanre rọvwọnre vwẹ ukpe ri 1993. Avwanre guọnọre nẹ Jihova sun akpeyeren rẹ avwanre.

A Vwọ Yanmuẹ Ẹkẹn re Bru kẹ Oma

Vwẹ ukpe rẹ avwanre vwọ rọvwọn na, me da vwomaba Leann vwẹ iruo rẹ ọkobaro rẹ ọkieje. Rere avwanre vwo jẹ osa ẹriọ ji yeren akpọ ri kekpe, avwanre da dẹ ikaravani rẹ awanre ra sa gua vwo nẹ asan kpo asan, evun rọyen kọyen avwanre dia. Vwẹ ẹgbukpe esan yen avwanre vwo kpo kasan kasan rẹ ukoko ri Jihova ji avwanre ra, rẹ avwanre vwo ruẹ kiruo kiruo vwọ vwẹrote oma rẹ avwanre. Avwanre nene ukoko rẹ ighwoghwota rọyen ghwe buun ruiruo rẹ aghwoghwo na kugbe vwẹ ekogho rọ pha rhuarho vwẹ Queensland. Ọke buebun, avwanre kpo asan ri sherabọ de siomakoko, avwanre mi ru emẹvwa rẹ avwanre vwẹ aghwa yẹrẹ ọguan rẹ ekogho na. Ọ kẹ avwanre omavwerhovwẹn. Dedena jẹ avwanre ji roro, ‘Avwanre se ru bunphiyọ kẹ Jihova?’ O kririi, avwanre da mrẹ ẹkpahọnphiyọ rẹ onọ na.

Ukoko ri Jihova durhie avwanre kpo ẹkuotọ ọfa ra ga kerẹ imishọnare! Ẹkẹvuọvo oshọ mu avwanre, avwanre ji no nẹ avwanre muwaan kidie avwanre niro nẹ avwanre cha sa dia omamọ rẹ imishọnaree jokpanẹ kẹ avwanre kpo Isikuru ri Giliẹd. Avwanre vwo ẹguọnọ rẹ iruo rẹ aghwoghwo na, jẹ kidie nẹ avwanre rhe vwo ihwo rẹ avwanre vwẹ Baibol vwo yono vwẹ ekogho rẹ avwanre de ghwoghwo naa, avwanre rhe nẹ oma rẹ avwanre kerẹ iyono re tẹn onaa.

Avwanre da vuẹ oniọvo Max Lloyd rọ dia ọvo usun rẹ iniọvo re ga vwẹ Umẹ Rọvwẹrote Oghọn Ukoko kpahen oborẹ oma ru avwanre.a Ọ da kẹ avwanre imuẹro nẹ ọ da tobọ dianẹ avwanre niro nẹ e muwaan, Jihova cha nẹrhẹ avwanre se ru kiruo kiruo rọ vwọ kẹ avwanre siẹrẹ avwanre da vwẹ oma rẹ avwanre vwọ kpahotọ kẹ. Uchebro rẹ ọsẹ rọ vwọ kẹ avwanre na de mu avwanre vwo rhiabọreyọ iruo rẹ avwanre vwo kpo Sri Lanka.

Iruo rọ Vọnre vẹ Egbabọse

Vwẹ ukpe ri 1999, avwanre de te Colombo, rọ dia otorere ri Sri Lanka. Ọnana asan rọ fẹnẹ ọko rẹ oma de fu avwanre vwẹ Australia! Avwanre rhiẹromrẹ ofovwin vẹ ọbẹnvwẹ kugbe ephẹrẹ buebun re bẹn jẹ vwẹ etiyin, avwanre je mrẹ ihwo re yara igho, vwọ vrẹ enana, ihwo rẹ ẹkuotọ na ji bun nọ. Dedena, erhuvwu buebun je vọn Sri Lanka—avwanre vwo omamọ iniọvo rẹ eya vẹ eshare vwọ, ọtiọyen ji te ihwo ri vwo omamọ rẹ ẹwẹn re je rhe riẹn Jihovaa.

E de ji avwanre kpo orere ri Kandy, orere na vwo erhuvwu dẹn, ọ je vọn vẹ aghwa ri tea kugbe eghwaghwo. Orere na nabọ titi fikirẹ uwevwin rẹ ẹga ri Buddhist re vọnrọ. Ihwo re riẹn Ọmemama rẹ avwanre Jihova ghwe buun. Iniọvo re jẹ ephẹrẹ ri Sinhala vẹ Tamil yehẹ evun rẹ ukoko avwanre, ọtiọyena ephẹrẹ ivẹ na kọyen e vwo ruẹ emẹvwa. E vwo yono ephẹrẹ ri Sinhala pha gangan kẹ avwanre, ẹkẹvuọvo iniọvo rẹ ukoko na vẹ ihwo rẹ avwanre vwẹ Baibol vwo yono dje ọdavwaro phia vwọ kẹ ẹgbaẹdavwọn rẹ avwanre, dede nẹ ọjẹchọ rẹ avwanre nẹrhẹ ayen phiyọ ehwẹ!

Jẹ, ọ dia avwanre vwọ jẹ ephẹrẹ na yen ebẹnbẹn rọ ma rho kẹ avwanree. Obọ rẹsosuọ vwẹ akpeyeren rẹ avwanre, e de mukpahen avwanre gangan fikirẹ uyota na. Vwẹ ẹdia ọvo, ihwo rẹ ophu muẹ da riariẹ avwanre phiyọ. Evo torhẹ ẹbe rẹ avwanre, efa de rhe hwe vwe vẹ oniọvo ọshare ọfa. Vwẹ uvwre rẹ ọke yena, avwanre da nẹrhovwo rhe Jihova nẹ ọ nẹrhẹ ẹwẹn rẹ avwanre totọ je karophiyọ avwanre siẹrẹ ayen da teyen avwanre hwe. O gbe avwanre unu nẹ ihwo na yanjẹ avwanre vwo. Avwanre vwo vrẹn nẹ ọko na vẹ oshọ, avwanre da kpẹvwẹ Jihova kidie ọ sẹro rẹ avwanre.

Ọke vwọ yanran, avwanre da rhe reyọ Sri Lanka phiyọ uwevwin rẹ avwanre. Dede nẹ ofovwin na hẹriẹ ẹkuotọ na, jẹ oma vwerhen avwanre kpahen obo ri Jihova si ihwo rẹ owẹnvwe rẹ uyota na hwe vwọ ro orua rọyen ri ruẹ kuẹgbe. Erọnvwọn re vwerhoma rẹ avwanre rhiẹromrẹ vwẹ ẹkuotọ na cha sa chọrọ avwanre ẹroo. Ẹkẹvuọvo, ẹgbukpe ivẹ vwọ wan nu, ihwo ri vwọ ẹgba rẹ usuon de rhiẹromrẹ okeke ro nẹ obọ rẹ ilori rẹ ẹga na rhe, ọtiọyena imishọnare buebun de vrẹn nẹ ẹkuotọ na.

Idughwrẹn re vwọ kpahọn na yanghan re mamọ, avwanre riẹn oborẹ avwanre che ruu. Kẹ avwanre roro, tivọ yen avwanre cha ra? Ẹko Rọvwẹrote na de ji avwanre kpo Papua New Guinea. Avwanre de te Port Moresby rọ dia otorere rẹ ẹkuotọ na vwẹ September 2001.

Erọnvwọn re Rhẹro Rọyeen Vwẹ Papua New Guinea

Dede nẹ Papua New Guinea yen me sikẹrẹ Australia, jẹ akpeyeren kugbe ẹkuruemu rayen fẹnẹre. Obọfa, avwanre cha rhoma ru ewene. Avwanre de yono ephẹrẹ ri Tok Pisin, rọ dia ephẹrẹ ra ma jẹ vwẹ ẹkuotọ ri vwo ephẹrẹ re vrẹ 800!

Ẹgbukpe erha vwọ wan vwẹ orere ri Popondetta nu, avwanre da ton iruo rẹ okinriariẹ phiyọ. Avwanre nama vwẹ ọke vuọvo roro nẹ Jihova cha reyọ avwanre vwo ruiruo vwẹ idjerhe nanaa! Ọkieje yen mi vwo dje ọdavwaro phia vwọ kpahen odjekẹ rẹ iniruo rẹ okinriariẹ vwọ phia, oborẹ ayen yono ihwo wan kugbe oyerinkugbe rẹ ayen vẹ Jihova vwori, ẹkẹvuọvo mi niro nẹ mi muwan me vwọ ga kerẹ oniruo rẹ okinriariẹẹ. Obo re me tẹnrovi yen me vwọ dia imishọnare. Me vwọ dia oniruo rẹ okinriariẹ je ro ẹwẹn mẹ dẹvoo! O ji gbe vwe unu te ọke na nẹ Jihova kẹ vwẹ uphẹn nana.

Orere rẹ avwanre rare na vwo urhukpẹ, ame kugbe uvun rẹ ehwa hepha. Enana erọnvwọn rẹ avwanre se vwo vwẹ ọko rẹ avwanre hepha jovwoo. Avwanre dia umutughẹ, chere emu vwẹ otafe, je họ vwẹ ivwori kugbe urhie—jẹ ọ da dianẹ edjere hẹ ame na, kẹ avwanre vo ame phiyọ ikoroba, avwanre mi muo kpo umutughẹ rẹ avwanre da ra họ.

Iruo nana guọnọ ẹgba rẹ ugbobọ vrẹ e rẹ avwanre ruru jovwo re. Ẹkẹvuọvo o mu avwanre ẹro nẹ avwanre da yanran ‘vẹ ogangan ro rhe avwanre,’ Jihova cha nẹrhẹ avwanre phi kparobọ. (Iguẹdjọ 6:14) Buebun rẹ ikoko vẹ ẹko rẹ avwanre kinrin na bẹn e te kidie nẹ ayen hra nene eghwaghwo, ehwọrhọ, kugbe igbenu re pha chohri chohri. Avwanre reyọ imoto re vwẹ awọ ẹne vwọ djẹ, okọ, kugbe ẹropleni vwo bru iniọvo rẹ avwanre ra, ọke buebun na avwanre je vwẹ awọ yan guọnọ ayen.b

Rere avwanre se vwo kin ukoko ọvo rọ kẹrẹ ughwru rẹ Indonesia, kẹ avwanre reyọ iroko 350 vwọ djẹ vwẹ idjerhe ro miovwirin. Avwanre wan idjerhe yena vrẹ abọ 200, rẹ avwanre vwọ shariẹ asan rẹ amame, urhie vẹ egbada hepha. Vwẹ ikpe nana eje, avwanre ghwọrọ inọke buebun rẹ avwanre vwọ tọn ji gere imotọ rẹ avwanre vwo nẹ ibehre rọ pha tikpan, ukuko na, avwanre da rhe mrẹ iniọvo rẹ avwanre re hẹrhẹ avwanre, opharo rayen vọnre vẹ ehwẹ, ayen ji chere emu phiyotọ hẹrhẹ avwanre.

Ọke rẹ avwanre da ro ẹropleni kpo ọko sansan rehẹ enu rẹ ugbenu na, ọkieje yen ohwo rọ djẹ ẹropleni na vwọ guọnọ amasan ro rhiephiyọ vwẹ evwru na rere ọ sa vwọ daji vwẹ otọ. O mi sikẹrẹ otọ je djẹ wanvrẹ asan ro de che wontọ ro vwo nẹ otọ sua sẹ emọ vẹ eranvwe hẹ etiyin. Kẹ avwanre che muegbe rẹ oma rẹ avwanre, rẹ ẹropleni na cha vwọ daji vwẹ otọ rẹ ibehre rọ ghwa phiọọn, rọhẹ enu rẹ ugbenu ro kpenu te ichiyin 7,000. Ọkievo, idjerhe vuọvo rẹ avwanre se vwo vrẹn nẹ ọko na yen ẹropleni na vwọ djẹ je kpare oma vwẹ ugbenu ro ghwe yovwiin na.c

Vwẹ ọke evo, avwanre yan vwẹ enu rẹ igbenu re ghwrọrọ kpotọ je bẹn eyeren yẹrẹ shue ehwọrhọ wan vwẹ ọke uvo vẹ ekpu rẹ avwanre kru ẹbe vẹ erọnvwọn eghanghanre efa phiyọ. Kidie nẹ avwanre vẹ iniọvo rẹ avwanre yen gba yan kuẹgbe, ọnana de rhie uphẹn phiyọ rẹ avwanre vwọ bọn ohwohwo gan je hwẹ kugbe.

Avwanre rhọnvwe phiyọ eta rẹ ọyinkọn Pọl na rehẹ 1 Tẹsalonaika 2:8: “Kidie nẹ avwanre vwo ẹguọnọ rẹ ovwan mamọ, avwanre de brorhiẹn rẹ avwanre . . . vwẹ arhọ rẹ avwanre vwọ kpahotọ kẹ ovwan dede, kidie ovwan rhe ghanre kẹ avwanre mamọ.” Avwanre da rhe mrẹvughe nẹ iniọvo na muegbe rẹ ayen ji vwo ru ọtiọyen kẹ avwanre, ayen ji tobọ muegbe rẹ ayen vwo ghwu vwọ chochọn rẹ avwanre vwo nẹ abọ rẹ inogbozighi. Vwẹ ẹdẹ ọvo, ọshare ọvo vwẹ oda vwọ djẹ uguegue mu aye mẹ Leann. Me sa cha ukoo kidie mẹvwẹ hẹ ẹbẹre ọfa rẹ ọko na. Oniọvo ọshare ọvo da ro uvwre rayen kpakpata. Kidie nẹ ihwo efa djẹ rhe rhe yọnrọn ọshare ro muophu djọghrọ djọghrọ na, ọ da nẹrhẹ oniọvo rẹ avwanre na sa djẹ vabọ vẹ emera vwẹ oma rọyen. Ọkieje yen avwanre vwọ mrẹ ochọnvwe ri Jihova vwẹ ẹkuotọ ri jurhi ẹyọnrọn na rere iniọvo rẹ avwanre sa vwọ mrẹ emu rẹ ẹwẹn na re.

Kidie nẹ Papua New Guinea ghwe vwo ekuakua rẹ omaesivwon buun, kọ nẹrhẹ ọ bẹn vwọ kẹ avwanre rẹ avwanre vwọ vwẹrote oma rẹ avwanre. Vwẹ 2010, Leann de mu okpọga rẹ imihori sua vwẹ oma na, ọtiọyena avwanre da ro ẹropleni kpo Australia vwọ kẹ omaesivwon rẹ okpakpa. Vẹ ẹgba ri Jihova, avwanre de hwomamu. Ukuko na, a da rhe mrẹ uhuvwun rọ wian vwọ kẹ. Ọvo usun rẹ idọktọ na da ta: “O kriri wọ wian kẹ Ọghẹnẹ re. Enẹna ọyen yen wian kẹ wẹ.” Emeranvwe buebun vwọ wan nu, avwanre de rhivwin kpo iruo rẹ avwanre.

O Vwo Erọnvwọn Buebun rẹ Avwanre Che ru Vwẹ Australia

Vwẹ ukpe rọ vwọ kpahọn, kẹ avwanre kpo Australia nọke ra ruọke rere e se vwo nenesi rẹ oma ri Leann na. Ukuko na vwẹ 2012, a da vuẹ avwanre nẹ avwanre dia etiyin rere avwanre sa vwọ vwẹrote oma rẹ avwanre. Ọ vwọ dianẹ avwanre nẹ Australia ikpe buebun re na, ọ dia oborẹ oma rẹ avwanre se vwo kpo yen oshọ ro me mu avwanree, ẹkẹvuọvo oborẹ avwanre se vwo wene iroro rẹ avwanre kugbe obo re cha kẹ avwanre omavwerhovwẹn vwẹ etiyin. Ọ da avwanre nẹ avwanre yanjẹ iruo vẹ iniọvo rẹ avwanre eghanghanre na vwo. Kẹ avwanre roro nẹ avwanre ku Jihova phiyotọ, nẹ avwanre rhe fiemu kẹ ọfaa. Kidie nẹ o kriri re rẹ avwanre nẹ etinẹ, kọ bẹn rẹ avwanre vwọ reyọ Australia kerẹ uwevwin. Avwanre ghene guọnọ ukẹcha rẹ iniọvo rẹ avwanre vwẹ ọke yena.

Oma rẹ Leann vwo kpo nu, avwanre da ga kerẹ ekobaro rẹ oghẹresan vwẹ Wollongong, rọhẹ obọrhen ọnre ri Sydney, New South Wales. Vwẹ ukpe rọ vwọ kpahọn, oma da vwerhen avwanre mamọ ọke re vwo durhie avwanre kpo Isikuru rẹ Baibol Vwọ kẹ Eya gbe Eshare re Dia Inenikristi (e se Isikuru rẹ Ihwo ri Ghwoghwo Uvie Na enẹna). Ọtiọyena Oghọn Ukoko rẹ Australia de ji avwanre kpo iruo rẹ okinriariẹ. Vwẹ ikpe buebun na, avwanre kin ikoko vẹ ẹko sansan vwẹ irere re vọnre vẹ ihwo, irere ri sherabọ, vẹ ọko re de hwe iyerin. Ẹbẹre re yare vwẹ Australia vẹ Timor-Leste eje yen a vwọ kẹ avwanre nẹ avwanre kin.

Okẹ rọ ma ghanre ri mi rhẹro rọyeen ri Jihova vwọ kẹ vwẹ, yen aye mẹ rọ nabọ biẹcha vwẹ ro ji vwo ẹguọnọ ri Jihova. Leann je vwẹ ọke vuọvo vwọ sen iruo ra vwọ kẹ avwanree, o toro oborẹ iruo na gan te yẹrẹ obo rọ wanree. Ọke ra vwọ nọ kpahen obo ro se vwo yerin ghene egbabọse, ọ da ta, “Me vuẹ Jihova erọnvwọn eje.” O de se Ota rẹ Ọghẹnẹ, ọ vwẹ uphẹn kẹ Jihova nẹ o yono ọyen kpahen obo ro che ru je kpọ iroro vi.

Me vwẹ ọke vuọvo viẹ idiekpọvwẹ nẹ me yanjẹ ehaẹha rẹ akpọ nana vwo mẹ da vwẹ uphẹn kẹ Jihova nẹ o sun akpeyeren mẹẹ. Me rhe mrẹvughe nẹ Jihova se yono avwanre vwo ru kemu kemu rọ guọnọre, ọ da dianẹ avwanre vwomakpahotọ rhiabọreyọ iruo rọ vwọ kẹ avwanre. Ọke mi de hirharoku egbabọse vẹ erhiẹn rẹ akpeyeren, ke me nẹrhovwo womarẹ me vwọ nokpẹn rẹ aghwanre vẹ ẹwẹn ọfuanfon ri Jihova kẹdi kẹdẹ. Ọsẹ rẹ avwanre Jihova ro vwo ẹguọnọ na nẹrhẹ avwanre yeren akpọ ro me yovwin kparobọ, avwanre ji vwo owenvwe rẹ avwanre vwọ mrẹ oborẹ ọ cha vwẹ “echẹ” kerẹ avwanre vwo ru.—2 Kọrẹnt 4:7.