Ọshare Mẹ Kurhẹriẹ “Ababọ rẹ Ota”

E vwiẹ vwẹ vwẹ Romania vwẹ ukpe ri 1952. Oni mẹ muomaphiyọ irueru rẹ ukoko naa dede nẹ o bromaphiyame re, ọtiọyena me rhe se kpo emẹvwa rẹ Inenikristii. Vwọba, Romania hẹ otọ rẹ usuon re se Communist, ọtiọyena a da dobọ rẹ irueru rẹ ẹbe ẹteyọn vẹ iruo rẹ aghwoghwo rẹ Iseri ri Jihova ji. Fikirẹ ọtiọyena, me riẹn ohwo re se Jihova yẹrẹ obo ri Baibol na yonorii mi ki rhi te ẹgbukpe 36. Ẹkẹvuọvo vwẹ ukpe ri 1988, mẹvwẹ vẹ ọshare mẹ István vwọ dia orere ri Satu-Mare, emuọvo ro wene akpeyeren mẹ da phia.

Edurhie rẹ Me Sa Seen

Ẹdẹ ọvo oni mẹ da kọn bru vwe rhe. Ọ da ta: “Me kọn brẹ oniọvo mẹ ra. Wọ guọnọ nene uvwe? E de ru nu, ke se kpo ẹki ra dẹ erọnvwọn evo kugbe.” Kidie nẹ mi vwo uphẹn, me da rhọnvwe.

Avwanre vwo te uwevwin rẹ oniọvo rẹ oni mẹ, me da mrẹvughe nẹ, ọyen vẹ ihwo irhirin efa re dia Iseri ri Jihova ruẹ uyono vwẹ uwevwin rọyen. Womarẹ ọnana kọyen me wan riẹn nẹ oni mẹ rhoma ton uyono ẹra phiyọ re. Obo ri mi nyori vwẹ urhiọke yena te vwẹ ubiudu mamọ ọtiọyena o cha sa chọrọ ovwẹ ẹro kakakaa.

Omẹvwa na vwo kuphiyọ nu, ọ rọ vwẹrote omẹvwa na de bru vwe rhe ji dje oma rọyen kẹ vwẹ. Ọ da ta: “Odẹ mẹ János. Me mrẹ wẹ wọ vwọ nabọ kerhọ rẹ ota na. Obo ru wo nyori nonẹna je we?” Me da vuẹ nẹ mi ji rhi kpo uyono tiọna dẹvoo, nẹ me je guọnọ rhe ọke ọfa. Ọ da nọ vwẹ, “Wọ guọnọ yono Baibol na?” Ọnana edurhie re me sa seen. Me da rhe riẹn nẹ Ọghẹnẹ yen si vwe bru ihwo nana rhe.

Vwẹ ẹdẹ rọ vwọ kpahọn, János de dje vwe kẹ Ida, avwanre da tọn uyono ri Baibol phiyọ. Ẹkẹvuọvo, oshọ mu vwe kidie me riẹn oborẹ oma che ru ọshare mẹ siẹrẹ ọ da riẹn nẹ mẹvwẹ vẹ Iseri ri Jihova yono Baibol na kuẹgbee. Me davwẹngba vwọ ta ota kẹ abọ buebun kpahen oborẹ mi yono na ẹkẹvuọvo ọ davwerhọ mẹẹ. Me riẹnre nẹ obo ri mi ruẹ na jee.

Dede na, mi ji muomaphiyọ eyono ri Baibol na ọtiọyena vwẹ August 1989 mi de bromaphiyame. Ẹgbukpe ẹne vwọ wan nu, usuon re se Communist rọhẹ ọtọ rẹ Romania de she, ọtiọyena e de hwe osun rọyen.

Egbabọse na Rhoma Ganphiyọ

Usuon na vwo she, Iseri ri Jihova de rhi vwo ugbomọphẹ buebun. Avwanre ki se koko ji ghwoghwo ota odedede. Ẹkẹvuọvo, vwẹ ẹdia mẹ, ugbomọphẹ na cha ghwa omukpahen rhe vwe. Ọshare mẹ István da vuẹ vwẹ nẹ, “Oborẹ vwo segbuyota te vwee, takpe nẹ wọ kpo aghwoghwo rẹ nuwevwin ri kpuwevwin wẹn naa.”

Vwọ kẹ vwẹ, mi cha sa dobọ rẹ iruo aghwoghwo jii. (Iruo 4:20) Ọtiọyena, ke me bẹbẹ kpo iruo aghwoghwo na. Vwẹ ẹdẹ ọvo, igbeyan rẹ István da mrẹ vwẹ mi vwo ghwoghwo ota nẹ uwevwin kpo uwevwin, ayen da vuẹ István. Mi rhi vwo te uwevwin, ọshare mẹ da van ku vwe, “Wọ phọphọ ovwẹ vẹ orua na!” O de phi aphia phiyọ upho mẹ ji djuguegue mu vwe nẹ ọyen che hwe vwe kufia siẹrẹ me ra dobọ rẹ iruo aghwoghwo na jii.

Me da davwẹngba vwo nene István ta ota, je vuẹ nẹ me vwo ẹguọnọ rọyen mamọ. Eta mẹ da nẹrhẹ ẹwẹn rọyen totọ vwẹ uvwre rẹ ọke evo. Ẹkẹvuọvo, ọke me vwọ sen nẹ mi che kpo irueru rẹ orọnvwe rẹ ohwo orua rẹ avwanre ọvoo, ophu rọyen da rhoma ganphiyọ. Ọ da ji hanrhọ ovwẹ ekan buebun.

Ọ da ohwo nẹ, ẹgbukpe 13 yen mi chirakon rẹ ophu rẹ István. Vwẹ uvwre rẹ ọke na, o de djuguegue mu vwe nẹ ọyen cha fan orọnvwe na. Ọkievo, ọ me kanre ẹchẹ na je vuẹ vwẹ nẹ mi ru uwevwin naa. Vwẹ ọke efa, ọ me ra vuẹ vwẹ nẹ mi krun eghwa mẹ ji vrẹ nẹ uwevwin na.

Die yen vwẹ ukẹcha kẹ vwẹ vwo chirakon rẹ edavwini egangan yena eje? Me nẹrhovwo rhi Jihova je rẹ nẹ ọ vwẹ ukẹcha kẹ vwẹ vwo vwo ẹwẹn ri dọe, ọ da ghene kpahenphiyọ ẹrhovwo mẹ. (Une rẹ Ejiro 55:22) Iniọvo rẹ ukoko na ji bicha vwẹ mamọ. Ekpako na vẹ iniọvo rẹ eya ri tedje vwẹ ukoko na bọn vwẹ gan womarẹ uchebro rayen rere mi se vwo muomaphiyọ ẹga ri mi vwọ kẹ Jihova. Ayen karophiyọ ovwẹ kpahen oborẹ rẹ Baibol na tare nẹ “ababọ rẹ ota” eya sa nẹrhẹ eshare rayen kurhẹriẹ womarẹ uruemu rayen siẹrẹ ayen da fuevun ke Jihova. (1 Pita 3:⁠1) Ọke vwọ yaran na, eta yena ghini rugba vwẹ oma mẹ.

Erọnvwọn Eje Weneri

Vwẹ ukpe ri 2001, István rha sa yaan fikirẹ ọga ri strok ro muro. Ọ ghwọrọ emeranvwe ọvo vwẹ họspito, e de rhe muo kpo asan ra da vwẹrote ihwo ri muọga ri strok. Uvwre rẹ ọke yena eje, o vwo ọke vuọvo me vwọ yan jovwoo. Mi vwo emu kẹ ria, nene ta ota kuẹgbe je vwẹ kemu kemu rọ guọnọre vwọ kẹ.

Iniọvo re ukoko na jẹ kọn bru ọshare mẹ rhe. István rhiẹromrẹ ẹguọnọ vẹ ọdavwẹ rẹ iniọvo na dje vwọ kẹ. Buebun rayen cha avwanre uko vwọ wian ewian sansan vwẹ uwevwin rẹ avwanre. Ekpako na muegbe rẹ ayen vwo bicha ji vwo ọbọngan kẹ avwanre ọkieje.

Obore phiare na te ubiudu rẹ István mamọ, ọnana da nẹrhẹ oma vuọ kpahen obo o ru vwe wanre. O je noso nẹ o vwo igbeyan rọyen vuọvo rọ rhe asan re de sivwon naa. Ọtiọyena, o vwo nẹ hosipito, István da ta: “Me guọnọ yono Baibol na je dia Oseri ri Jihova.” Oviẹ rẹ aghọghọ da gba phiyọ upho mẹ!

István de bromaphiyame vwẹ May, 2005. Kidie ọ ra sa yan naa, iniọvo eshare na da reyọ agbara rẹ ukpono vwo ghoriẹn te asan re de bromaphiyame na, ayen de muo dẹndẹn phiyọ ame na, e de brophiyame. István da dia oghwoghwota rọ vọnre vẹ oruru. Me karophiyọ omamọ ọke me vẹ ọyen ghwọrọ kugbe vwẹ iruo rẹ aghwoghwo na. O gbe ohwo unu dẹn! Di roro​—⁠ọnana ohwo rọ vwọso vwe jovwo kidie nẹ me ghwoghwo Ota rẹ Ọghẹnẹ, enẹna me vẹ ọyen kọyen ghwoghwo ota kẹ ihwo efa vẹ aghọghọ!

István de rhi vwo ẹguọnọ ri Jihova mamọ, ọ ghwọrọ ọke vwo yono Baibol na ji se ẹkpo sansan kuyovwin. Oma vwerhon siẹrẹ o de nene iniọvo rehẹ ukoko na ta ota kpahen ẹkpo ri Baibol sansan na. Ọ reyọ uphẹn nana vwọ vwẹ uchebro vwọ kẹ iniọvo na.

Ọga rẹ István kọ rhoma ganphiyọ. Ọga rẹ strok na vwọ kpokpo mamọ na, o rha sa ta ota ọfaa ọ bi ji se vrẹn nẹ ehwaa. Kẹ, ọnana nẹrhẹ ọ dobọ rẹ ẹga ri Jihova ji? Ẹjo kakaka! Ọkieje yen o vwo se ji yono Baibol na te asan rẹ ẹgba rọyen muru. Ọke rẹ iniọvo na da rhe nokpẹn rọyen, ikọmputa kọyen o vwo nene ayen ta ota ji vwo bọn ayen gan. Oniọvo ọshare ọvo tare nẹ: “Oma vwerhen ovwẹ me da mrẹ István kọke kọke. Ọkieje me da rhivwin re uwevwin yen oma vwọ vwerhen ovwẹ.”

Ọ dẹ ohwo mamọ nẹ vwẹ December 2015, István de ghwu. Obo re phiare na nẹrhẹ mi muomaphiyọ mamọ. Ẹkẹvuọvo ọ je nẹrhẹ mi vwẹ ufuoma rẹ ẹwẹn kidie István diẹ ugbeyan ri Jihova ọke grongron tavwen o ki ghwu. Ọnana nẹrhẹ mi vwẹ omavwerhovwẹn. Mi vwo imuẹro nẹ Jihova cha karophiyọ István vẹ oni mẹ. Ọ cha vwerhen oma mamọ ra da cha rhoma dede ayen vwẹ akpọ kpokpọ rẹ Jihova rhuẹrẹphiyọ na.

Ọ vrẹ ikpe 35 rẹ mẹvwẹ vẹ oni mẹ vwo kpo asan rẹ oniọvo rọyen na re, jẹ oyan yena cha sa chọre ovwẹ ẹroo. Mi tẹ ikpe 70 re jẹ me je ga kerẹ ọkobaro ọkieje. O vwẹ idjerhe ọfa me sa vwọ kpẹvwẹ Jihova fikirẹ obo ro ru kẹ vwẹ ree. (Une rẹ Ejiro 116:12) Ọ vwẹ ukẹcha kẹ vwẹ vwọ fuevun ji vwo ẹwẹn ri dọe ọke mi vwo hirharoku omukpahen. Jẹ me rhe mrẹvughe re nẹ o toro omukpahen rẹ ohwo hirharokuu, ẹdia rẹ ohwo se wene. Dede nẹ me rhẹro rọyeen, jẹ ọshare mẹ kurhẹriẹ ababọ rẹ ota.