ENỌ RẸ IGHENE NỌ
Ọ da Dianẹ Ugbeyan Mẹ Gbe Vwe ku Vwo?
Obo ro fori nẹ wọ riẹn
O vwo oyerinkugbe rẹ ihworakpọ vuọvo ro jẹ ebẹnbẹn evwoo. Kidie nẹ a gbaree, ugbeyan wẹn—tobọ te ugbeyan rọ ma kẹrẹ owẹ—se gbe we ku. Wẹ komobọ gbaree. Vwọrẹ uyota, wọ sa karophiyọ ọke ọvo rẹ wo vwo gbe ohwo ọfa ku?—Jems 3:2.
Intanẹti sa nẹrhẹ wo muomaphiyọ. Kerẹ udje, eghene ọvo re se David tare nẹ: “Ọke wọ da mrẹ ifoto rẹ igbeyan wẹn ri siomakoko vwẹ intanẹti, jẹ e durhie uwee, wo se roro kpahen oboresorọ e vwo jẹ uwe edurhie. Wo se roro nẹ e ku we phiyotọ, ọ me nẹrhẹ wo muomaphiyọ.”
Wọ sa rhuẹrẹ ebẹnbẹn na phiyọ.
Obo wo se ru
Fuẹrẹn oma wẹn. Baibol na da ta: “Wọ fobọ mu ophu-u kidie udu rẹ ẹkpa ọye ophu dia.”—Aghwoghwo 7:9.
“Ọkievo wọ me rhe mrẹvughe nẹ obo re so ivun emiovwo na tobọ te emuọvoo.”—Alyssa.
Obo re se roro kpahen: Erọnvwọn fobọ da wẹ? Wo se yono kpahen obo re chirakon rẹ oruchọ rẹ ihwo efa?—Aghwoghwo 7:21, 22.
Roro kpahen erere rọhẹ evwoghovwo. Baibol na da ta: “Ọrho rode [re vwo] kuaro afi kẹ oruchọ.”—Isẹ 19:11.
“Ọ da tobọ dianẹ ohwo ọvo gbe we ku, o yovwin wọ da reyọ vwo ghovwo ohwo ọtiọyena ọphọphẹ, ọnana mudiaphiyọ nẹ wọ rha cha karophiyọ ohwo na kpahen obo ro ruruu, yẹrẹ ruo rere o vwo yovwunu kẹ wẹ kọke kọke wo de ghwie ota na rhee. Wo de vwo ghovwo nu, gba kpairoro vrẹn.”—Mallory.
Obo re se roro kpahen: Obo re phiare na ghene bra dẹn? Wọ sa reyọ vwo ghovwo fikirẹ ufuoma?—Kọlose 3:13.
Wọ da ta ota kpahen obẹnbẹn rọhẹ uvwre wẹn vẹ ugbeyan wẹn ọkieje họhọ ohwo ro rhie ẹchẹ phiyọ vwẹ ọke rẹ ohwahwa, ọnana cha ghwa ekpahen rhe
Roro kpahen ohwo ochekọ na. Baibol na da ta: “Ovwan guọnọ erhuvwu romobọ rẹ ovwan ọvo-o, ẹkẹvuọvo ovwan je guọnọ erhuvwu rẹ ihwo efa.”—Filipae 2:4.
“Wẹ vẹ ugbeyan wẹn de muọghọ ji dje ẹguọnọ kẹ ohwohwo, jẹ ọnana mu we wọ fobọ rhuẹrẹ ebẹnbẹn phiyọ, kidie wo ru erọnvwọn buebun oyerinkugbe rẹ ovwan ki se te ẹdia rọ hepha na. Wọ ghwọrọ ọke vẹ ẹgba phiyọ re, wọ guọnọre nẹ ọ hraa.”—Nicole.
Obo re se roro kpahen: Wọ sa mrẹ ẹkpo evo ri yoma vwo nẹ ota rẹ ugbeyan wẹn na?—Filipae 2:3.
Obo ra ta na kọna: Wọ da riẹn obo re chirakon rẹ erọnvwọn rẹ ihwo ru we re da wẹ mamọ, ọnana cha cha wẹ uko wo de te omiragua re. Ofori nẹ wo yono uruemu yena asaọkiephana.