Ọghẹnẹ Durhie Uwe nẹ Wọ Rhe Dia Ugbeyan Rọyen

Ọghẹnẹ guọnọre nẹ wọ dia ugbeyan rọyen. Wo rori nẹ wọ sa dia ugbeyan rẹ Ohwo rọ marho vwẹ akpọ vẹ odjuvwu? E sẹ Ebraham ro yerin ọke grongron rọ wanre ugbeyan rẹ Ọghẹnẹ. (Jems 2:23) Baibol na ji djunute ihwoefa re mrẹ omavwerhovwẹn vẹ ebruphiyọ vwo nẹ ugbeyan rayen vẹ Ọghẹnẹ rhe. Nonẹna, ihwo vwi kasan kasan vwẹ akpọ na, rhe dia igbeyan rẹ Ọghẹnẹ. Wọ je sa dia ugbeyan rẹ Ọghẹnẹ.

Ravwọ dia ugbeyan rẹ Ọghẹnẹ yovwin nẹ ravwọ dia ugbeyan rẹ ohworakpọ. Ọghẹnẹ kuẹ igbeyan rọyen re fuevun kẹ phiyotọ-ọ. (Une Rẹ Ejiro 18:25) Ravwọ dia ugbeyan rẹ Ọghẹnẹ, yovwin nẹ revwo vwẹ efe buebun. Ọdafe de ghwu, ihwoefa ke re erere rẹ igho rọyen. Jẹ, ihwo ri vwo omamọ oyerinkugbe vẹ Ọghẹnẹ, vwo efe rẹ ohwo vuọvo che se mie aye-en.—Matiu 6:19.

Ihwoevo sa davwẹngba vwọ dobọ rẹ uyono wẹn kpahen Ọghẹnẹ ji. Ihwo nana sa dia igbeyan vẹ ihwo rẹ orua wẹn. (Matiu 10:36, 37) Ọ da dianẹ ihwo reyọ owẹ vwọ jehwẹ yẹrẹ djẹ oshọ mu we, gba nọ oma wẹn, ‘Ono yen me guọnọre nẹ oma vwerhen—ihworakpọ gbanẹ Ọghẹnẹ?’ Di roro: Ọ da dianẹ ohwo ọvo vuẹ wẹ nẹ wọ rha re emu-u, wọ cha kerhọ rọyen? Kakaka! Kiridie wọ guọnọ emu rere wọ sa vwọ rhọ. Ọghẹnẹ sa chọnwuko vwọ dia bẹdẹ bẹdẹ! Ọtiọyena, wo gbi jẹ ohwo vuọvo dobọ rẹ uyono wẹn kpahen obo ru wọ sa vwọ dia ugbeyan rẹ Ọghẹnẹ jẹ-ẹ.—Jọn 17:3.