O Vwo Usuon rọ Nabọ Ghwotọ ro se Sun Akpọ na Eje?—Die Yen Baibol na Tare?

Otighi hẹ igọmẹti sansan vwẹ akpọ na eje. Ẹkuotọ evo ra tobọ vwẹroso usuon rayen ji phieghe cha phieghe kpo fikirẹ iyẹnrẹn rẹ ophọphọvwe, ivotu ro fiotọọ, ẹghwọ rọhẹ uvwre rẹ ihwo ri sivwin oseghe rẹ usuon, vẹ ihwo ri gbe ozighi.

Baibol na jẹ avwanre riẹn nẹ o vwo usuon ọvo rọ nabọ ghwotọ. Ọ sa dianẹ wo nyo kpahen usuon yena jovwo re. Ọyen usuon ri Jesu Kristi ta ota kpahen vwẹ ẹrhovwo rẹ udje na.

• “Enẹ ovwan nẹrhovwo wan: ‘Ọsẹ rẹ avwanre rọhẹ obodjuvwu, e jẹ e ru odẹ wẹn fon. Jẹ Uvie wẹn rhe. Jẹ e ru ọhọre wẹn vwẹ otọrakpọ na kirobo rọ hepha vwẹ obodjuvwu.’”—Matiu 6:9, 10.

Die yen Baibol na ta kpahen Uvie yena?

Uvie na—usuon rọ nabọ ghwotọ

Uvie na suẹn nẹ odjuvwu cha.

• Jesu se usuon yena “Uvie rẹ idjuvwu na.” (Matiu 4:17; 5:3, 10, 19, 20) Fikirẹ ọnana, ọ da ta: “Uvie mẹ dia ẹbẹre ọvo rẹ akpọ nana-a.”—Jọn 18:36.

Uvie na che wene usuon rẹ ihworakpọ.

• Baibol na da ta: “Ọghẹnẹ rẹ odjuvwu na cha vwẹ uvie ọvo mu . . . Ọ cha guọghọ ivie [rẹ ihworakpọ] nana ejobi ibribro ọ me vwẹ ayen te oba, ke mudia bẹdẹ.”—Daniẹl 2:44.

A cha ghwọrọ Uvie na ri Jesu Kristi da cha dia Ovie rọyen naa.

• Baibol na da ta: “Isuesun rọye ọye isuesun ri bẹdẹ, ro che jẹ ẹwanvrẹn, . . . uvie re jẹ sa ghwọrọ.”—Daniẹl 7:13, 14.

Uvie na cha ghwa ufuoma vẹ ofuvwegbe rhe otọrakpọ na.

• Baibol na da ta: “Ihwo eje cha dia vwọrẹ ufuoma vwẹ egba rẹ ivaini vẹ irhe ri fig rayen, o rhe vwo ohwo vuọvo rọ cha djoshọ mu ayeen.”—Maika 4:4, Good News Translation.

Yono kpobarophiyọ kpahen Uvie na

Ọke ri Jesu vwọ hẹ otọrakpọ na, ọ vwẹ ọke rọyen eje vwo “ghwoghwo iyẹnrẹn esiri rẹ Uvie na.” (Matiu 9:35) Ọ je mraro nẹ:

• “E che ghwoghwo iyẹnrẹn esiri rẹ Uvie na vwẹ akpọ na ejobi, rọ vwọ dia oseri vwọ kẹ ẹgborho na eje, ọke yena oba na kọ cha rhe.”—Matiu 24:14.

Nonẹna, e ghwoghwo iyẹnrẹn esiri rẹ Uvie na vwẹ ẹkuotọ re vrẹ 240. Avwanre durhie uwe nẹ wo rhi yono erọnvwọn efa kpahen usuon nana vẹ obo ro se vwo fierere kẹ wẹ.

Biko ni ividio na Die Yen Uvie rẹ Ọghẹnẹ?