Pawel Gluza/500Px Plus/Getty Images
OVWAN RHA RHẸRẸ!
Ẹkẹn 27 rẹ 100 rẹ Eranvwe rẹ Aghwa Yen Chekọ Nonẹna Vwo nẹ 1970 re te 2020—Die Yen Baibol na Tare?
Vwẹ October 9, 2024, World Wildlife Fund da vwẹ iyẹnrẹn rọ vwerhomaa vwọphia, ro shekpahen oborẹ irueru rẹ ihworakpọ vwọ so imuoshọ kẹ eranvwe rẹ aghwa. Iyẹnrẹn na djerephia nẹ “ẹkẹn 27 rẹ 100 rẹ eranvwe rẹ aghwa yen chekọ vwo nẹ 1970 re te 2020.” Iyẹnrẹn na da je ta: “Ọtiọyena avwanre sa tanẹ obo re cha phia vwẹ ẹgbukpe iyorin re cha na che dje oborẹ akpọ cha dia vwẹ obaro na.”
Iyẹnrẹn tiọyena sa ghwẹ oshọ phiyọ ihwo buebun oma. Otọrakpọ rọ pha yoyovwin na je avwanre, ọ da avwanre siẹrẹ avwanre da mrẹ eranvwe rehẹ evun rẹ otọrakpọ na re rioja. Oma ruẹ avwanre vwẹ idjerhe ọtiọna kidie Ọghẹnẹ ma avwanre a vwọ vwẹrote eranvwe na.—Jẹnẹsis 1:27, 28; Isẹ 12:10.
Ọtiọyena wo se roro, ‘Avwanre sa ghene sẹro rẹ eranvwe rẹ aghwa rehẹ otọrakpọ na? Die yen Baibol na tare?’
Iphiẹrophiyọ vwọ kẹ obaro na
O toro oborẹ ihworakpọ davwen tee, ẹgba rẹ ayen vwo sivwin eranvwe na rhe ayeen, ẹkẹvuọvo Ọghẹnẹ ọvo yen o rheri. Vwẹ Ẹvwọphia 11:18, Baibol na tare nẹ Ọghẹnẹ cha “ghwọrọ ihwo re ghwọrọ akpọ na.” Owọrota yena yono avwanre erọnvwọn ivẹ:
1. Ọghẹnẹ cha rhọnvwe nẹ e miovwo akpọ na tototoo, ọ cha dobọ rayen ji.
2. Ọghẹnẹ cha jowọ kẹrẹkpẹ. Mavọ yen e ru riẹn? Kidie imuoshọ rẹ ihworakpọ sua kẹ eranvwe rẹ aghwa enẹna rhe gan vrẹ obo ri jovwo.
Die yen Ọghẹnẹ che ru vwọ rhuẹrẹ ebẹnbẹn nana phiyọ? Ọ cha reyọ usuon rọyen rọhẹ odjuvwu vwo sun otọrakpọ na eje. (Matiu 6:10) Usuon yena che yono ihworakpọ re vwomakpotọ oborẹ ayen sa vwọ vwẹrote je sẹro rẹ eranvwe rẹ akpọ na.—Aizaya 11:9.