Ẹgborho na Sa Wiankugbe Vwọ Kẹnoma kẹ Oghwọrọ rẹ Aruọke ro Wene Sua?​—Die Yen Baibol na ta Kpahọn?

Vwẹ Sunday, November 20, 2022, COP27 United Nations Climate Change Conference de rhi vwoba. Ihwo ri suẹn vẹ ewena re vwoma vwẹ echidiotọ yena rhọnvwere nẹ ayen cha vwẹ igho kẹ ẹkuotọ ri vwo igho kakaka-a, rere ayen sa vwọ chọn ayen uko vwọ rhuẹrẹ oghwọrọ rẹ aruọke ro wene soro. Ẹkẹvuọvo, buebun rayen tare nẹ ọyena cha sa dobọ rẹ ebẹnbẹn na ji-i.

• Vwẹ November 19, 2022, António Guterres rọ dia osiọbe ri United Nations da ta: “Oma vwerhen ovwẹ nẹ avwanre brorhiẹn re vwo phi igho phiyọ akọkọ ra cha vwọ vwẹrote ihwo re rioja fikirẹ oghwọrọ rẹ aruọke ro wene sua. Ẹkẹvuọvo, avwanre riẹnre nẹ ọnana ọvo teri-i . . . Akpọ na jehẹ ẹdia rẹ imuoshọ.”

• Vwẹ November 20, 2022, Mary Robinson, rọ dia prẹsidẹnti rẹ Ireland jovwo, rọ je dia UN High Commissioner for Human Rights jovwo da ta: “Akpọ na se rhiẹromrẹ ewene ro muoshọ vwẹ aruọke na, rọ cha so okpetu kẹ ihwo eje kẹrẹkpẹ.”

Ighene yen ma ro ẹnwan kpahen oborẹ akpọ na cha dia vwẹ obaro obọ. Ẹkẹvuọvo, ẹgborho na sa wiankugbe ji ru ive rayen gba vwọ rhuẹrẹ oghwọrọ rẹ aruọke ro wene sua? Die yen Baibol na tare?

Ẹgborho na cha wiankugbe ji phikparobọ?

Baibol na vuẹ avwanre nẹ ọ da tobọ dianẹ ihwo ri suẹn davwẹngba vwọ rhuẹrẹ ebẹnbẹn rẹ aruọke ri wene soro phiyọ, ayen cha sa rhuẹrẹ ebẹnbẹn rẹ akpọ na phiyọ kare kare-e. Jokaphiyọ iroro ivẹ re sorọ:

• “Emu ro gunuru nure asan phiọ-ọ.”​—Aghwoghwo 1:15.

  Otọ rọyen: O vwo asan rẹ ẹgba rẹ ihwo ri suẹn teri kidie a ma ihworakpọ rẹ ayen vwo sun oma raye-en. (Jerimaya 10:23) Ẹgborho na da tobọ wiankugbe dede, ayen je cha sa rhuẹrẹ ebẹnbẹn rẹ akpọ na phiyọ-ọ, o toro oborẹ ayen davwẹngba te-e.

• “Kidie ihwo cha guọnọ omaobọ rẹ ayen nọ, e cha guọnọ igho nọ, . . . e gbi se fue ọhọre rẹ aye-en.”​—2 Timoti 3:​2, 3.

  Otọ rọyen: Baibol na tarọphiyotọ gbagba nẹ ihwo buebun vwẹ ọke avwanre na cha dia ivwurhuru, ayen je cha rhọnvwe ru obo ri che fierere vwọ kẹ ihwo efa-a.

Obo re sa nẹrhẹ avwanre vwo iphiẹrophiyọ

Ọ dia ive rẹ isun rẹ akpọ na veri yen e mu oborẹ obaro rẹ akpọ na cha dia kpahe-en. Ọghẹnẹ vwẹ Jesu Kristi rọ dia Osun ro me yovwin kparobọ vwo mu. Vwọ kpahen Jesu, Baibol na da ta:

• “Isuesun na kẹ igabọ rọye ọ cha dia, ke se odẹ rọye ọgba-Aghwanre, Ọghẹnẹ ro vwo ogangan, Ọsẹ ri Bẹdẹ, Ọmọ rẹ ovie rẹ Ufuoma.”​—Aizaya 9:6.

Jesu yen Ovie rẹ Uvie yẹrẹ usuon rẹ Ọghẹnẹ rọhẹ odjuvwu. (Matiu 6:10) O vwo ẹgba, aghwanre vẹ owenvwe rọ vwọ rhuẹrẹ akpọ na phiyọ je vwẹrote ihwo re dia evun rọyen. (Une rẹ Ejiro 72:​12, 16) Vwẹ otọ rẹ usuon rọyen, Jesu cha ghwọrọ ihwo re “ghwọrọ . . . akpọ na,” o mi ji ru akpọ na yoyovwin.​—Ẹvwọphia 11:18; Aizaya 35:​1, 7.

Wọ sa vwọ riẹn erọnvwọn efa kpahen obo ri che phioba phiyọ oghwọrọ rẹ aruọke ro wene sua, se uyovwinrota na, “Climate Change and Our Future​—What the Bible Says.”