Wọd Kọpu na Ghini se ku Ihwo Kugbe?​—Die Yen Baibol na ta Kpahọn?

Omarẹ ihwo oduima iyorin yen e rhẹro rọyen nẹ i che ni FIFA World Cup rọ tonphiyọ vwo nẹ November 20 re te December 18, 2022. Ihwo buebun roro nẹ ibọrọ ẹfa nana se ku ihwo ri no kugbe je tobọ ru vrẹ ọtiọyen.

• “Ehaẹha vwo ẹgba ro vwo wene akpọ na. O vwo ẹgba ro vwo mu ihwo vwo ru emu. O vwo ẹgba ro vwo ku ihwo kugbe vwẹ idjerhe rẹ oghẹresan.”​—Nelson Mandela, rọ dia iprẹsidẹnti ri South Africa jovwo.

• Ibọrọ ẹfa ku ihwo kuẹgbe kidie ọ nẹrhẹ ayen vwo “iphiẹrophiyọ, omavwerhovwẹn vẹ oruru nẹ ayen vwo ẹguọnọ rẹ ihwo efa, ayen je vwọtua emu vuọvo.”​—Gianni Infantino, iprẹsidẹnti ri FIFA.a

A sa womarẹ Wọd Kọpu na yẹrẹ ehaẹha efa vwo vwo erọnvwọn nana eje? Iphiẹrophiyọ vwọ kpahen ufuoma vẹ okugbe herọ?

O ghini ku ihwo kuẹgbe?

Wọd Kọpu rẹ enukpe nana mu ihwo vwo roro kpahen erọnvwọn efa vwọ vrẹ ibọrọ ẹfa. O mu ihwo vwọ ta eta ri shekpahen oyerinkugbe rẹ ihwo vẹ eta rẹ usuon, ri churobọ si uturhi rẹ ohwo vuọvo vwori, ohọroma, kugbe eyeren rẹ ihwo re fẹnẹre.

Dede nẹ o je ihwo buebun rẹ ayen vwo nughe rẹ ehaẹha ra vwọphia vwẹ akpọneje, kerẹ Wọd Kọpu na, jẹ i che se ku ihwo kugbe kirobo re rhẹro rọyen na-a. Ukperẹ ọtiọyen, ọke buebun yen ehaẹha tiọyena vwọ so ohẹriẹ vẹ iruemu ebrabra efa, re dia obo ri Baibol na tare nẹ e cha dia eka rẹ “oba rẹ ẹdẹ na.”​—2 Timoti 3:​1-5.

Obo re cha ghwa obọdẹn rẹ okugbe rhe akpọ na

Baibol na ta ota kpahen obo re cha nẹrhẹ ihworakpọ na eje dia vwẹ okugbe. Ọ tare nẹ ihwoeje cha dia vwọrẹ okugbe vwẹ otọ rẹ usuon rẹ odjuvwu rọ dia “Uvie rẹ Ọghẹnẹ.”​—Luk 4:43; Matiu 6:10.

Ovie rẹ Uvie na, Jesu Kristi, che vwo imuẹro nẹ ufuoma hẹ akpọneje. Baibol na da ta:

• “Jẹn ọvwata dia buebu, rere ufuoma bu.”​—Une rẹ Ejiro 72:7.

• “O sivwi ọ rẹ akpọ bẹn vwẹ ọke ro de kperi se . . . Nẹ oshenyẹ vẹ ogbarogba ọ tan arhọ rayen.”​—Une rẹ Ejiro 72:​12, 14.

Nonẹna, iyono ri Jesu tobọ ku iduduru rẹ ihwo kugbe re, vwẹ ẹkuotọ ri te 239. Ayen yono kpahen oborẹ ayen sa vwọ kẹnoma kẹ utuoma re vwo kpahen ihwo efa. Wọ sa vwọ mrẹ evuẹ efa, se iyovwinrota rehẹ Uwevwin Orhẹrẹ na “E se Phi Utuoma Kparobọ.”