Umri rẹ Ihwunu re Nyo Vwẹ Akpọneje, re Nẹrhẹ Oshọ Mu Ihwo​—Die Yen Baibol na ta Kpahọn?

Vwẹ July 2022, umri rẹ ihwunu re nyo vwẹ akpọneje ghwa oshọ ro ihwo buebun oma:

• “Ughwu rẹ ọshare ọvo ro muẹ ekpeti rẹ usuon ro titiri mamọ vwẹ Japan [re se Shinzo Abe rọ dia Prime Minister jovwo] nẹrhẹ oshọ mu ihwo rehẹ ẹkuotọ na, oshọ nana ro asan eje kidie Japan ọyen ẹkuotọ rẹ ozighi egbe de shekpotọ mamọ, ayen ji vwo urhi ro suẹn obo ra reyọ ihwunu vwo ruiruo wan.”​—July 10, 2022, The Japan Times.

• “Oshọ muẹ ihwo ri Denmark mamọ ọke rẹ eshare evo ri muẹ ihwunu vwọ sa ihwo erha hwe vwẹ asan ra da she erọnvwọn sansan vwẹ Copenhagen.”​—July 4, 2022, Reuters.

• “South Africa: Ẹko eshare evo sa ihwo 15 hwe vwẹ asan ọvo ra da da udi vwẹ otorere ri Soweto.”​—July 10, 2022, The Guardian.

• “A sa ihwo re vrẹ 220 hwe vwẹ U.S. vwẹ ẹdẹ uronvwoma vwẹ oba rẹ udughwrẹn ri July 4.”​—July 5, 2022, CBS News.

Iphiẹrophiyọ herọ nẹ ozighi tiọyena che vwoba? Die yen Baibol na ta kpahọn?

Oba rẹ Ozighi Egbe

Baibol na djisẹ ọke avwanre de yerẹn na kerẹ “oba rẹ ẹdẹ na,” rọ dia ọke rẹ ihwo che vwo sianro je djoma. (2 Timoti 3:​1, 3) Ozighi egbe tiọyena nẹrhẹ oshọ muẹ ihwo buebun. (Luk 21:11) Ẹkẹvuọvo, Baibol na veri nẹ ozighi egbe che vwoba, ihwo “ke cha dia asan rẹ ufuoma, asan rẹ egbemọphẹ, ẹdia rẹ omaerovwo fuefu.” (Aizaya 32:18) Mavọ yen ozighi egbe che vwoba wan?

Ọghẹnẹ che si irumwemwu no, ọ je cha ghwọrọ ekuakua rẹ ofovwin eje.

• “A cha nyavwe iruimwemwu kufia nẹ evun rẹ otọ na.”​—Isẹ 2:22.

• “[Ọghẹnẹ] nẹrhẹ ofovwi fue re te oba rẹ akpọ na; o vwirhi umurhabọ, o de wurhu ubiri, ọ vwẹ erhanre torhẹ ẹkpẹre rẹ ofovwi.”​—Une Rẹ Ejiro 46:9.

Ọghẹnẹ che si ozighi eje no, womarẹ o vwo yono ihwo oborẹ ayen se vwo yerin vwọrẹ ufuoma.

• “Ayen cha wan ohwohwo oma-a vwẹ ugbenu ọfuanfon mẹ-ẹ; kidie akpọ na cha vọn vẹ erianriẹn rẹ Ọrovwohwo kirobo rẹ ame vọn urhie na.”​—Aizaya 11:9.

• Asaokiephana, Ọghẹnẹ yono ihwo rẹ akpọeje nẹ ayen “duvwu elọkọ rayen phihọ ighwro, ibiri rayen phihọ egbage re vwo fru odi” womarẹ ayen cha vwọ kẹnoma kẹ ozighi egbe je dobọ rẹ ekuakua rẹ ofovwin re vwo ruiruo ji.​—Maika 4:3.

Wọ da guọnọ riẹn erọnvwọn efa ri Baibol na veri kpahen akpọ rẹ oshọ kanre, se uyovwinrota na “Freedom From Fear​—Is It Possible?”

Wọ da guọnọ riẹn erọnvwọn efa kpahen oborẹ ozighi egbe che vwo no kare kare, se uyovwinrota na “Peace on Earth at Last!”