Obo re se Vwo Yerin Ghene Ọga rọ Vwomaphia Kpregede

Ẹdia rẹ omakpokpọ wẹn rhoma miovwẹnphiyọ? Ọ da dia ọtiọyen kọyen wọ riẹn igho obuebun rẹ ọga reyọ mie ohwo vẹ oborẹ rọ ghwọrọ ohwo oma ji djobọte iroro rẹ ohwo te. Die yen sa cha wẹ uko vwo yerin ghene ẹdia na? Mavọ yen wọ sa vwọ vwẹ ukẹcha kẹ ohwo rẹ orua wẹn yẹrẹ ugbeyan rọ muọga? Dede nẹ Baibol na dia ọbe rẹ omaesivwọọn, uchebro rehẹ evun rọyen sa cha wẹ uko vwo yerin ghene ebẹnbẹn.

Iroroẹjẹ re sa cha wẹ uko vwo yerin ghene ọga

• Kpo omaesivwon

  Oborẹ Baibol na tare: “Ihwo rẹ oma rayen ganre guọnọ ọbo-o, ẹkẹvuọvo ihwo rẹ oma rayen jẹ gan yen guọnọ ọbo.”—Matiu 9:12.

  Obo ro mudiaphiyọ: Guọnọ ukẹcha rẹ ihwo ra rhọnvwe kẹ nẹ i se sivwin ihwo siẹrẹ wọ da guọnọ.

  Davwen ọnana ni: Guọnọ omaesivwon ro me yovwin rẹ obọ se te. Ọkievo, ọyen emu rẹ aghwanre ra vwọ guọnọ ukẹcha rẹ idọktọ efa. (Isẹ 14:15) Nabọ rhievun nene idọktọ na ta ota​—⁠jẹ o muwẹro nẹ wo vwo ẹruọ rayen, ayen je nabọ riẹn oborẹ oma na ru we wan. (Isẹ 15:22) Ru ehiahiẹ kpahen ọga wẹn, ji te ena rẹ omaesivwon wẹn eje. Wo de vwo ẹruọ rẹ oborẹ re cha phia, o che muegbe wẹn vwo hirharoku ẹdia wẹn na ji bru emamọ rẹ erhiẹn ri shekpahen omakpokpọ wẹn.

• Nabọ vwẹrote oma wẹn

  Oborẹ Baibol na tare: “Omaẹsasọ yovwin kẹ oma wẹn.”​—1 Timoti 4:8, Contemporary English Version.

  Obo ro mudiaphiyọ: O yovwẹn kẹ ugboma na siẹrẹ wọ da vwẹrote, kerẹ a vwọ sasoma ọkieje.

  Davwen ọnana ni: Ru ọrhuẹrẹphiyotọ rẹ omaẹsasọ wọ je yanmuo, re omamọ emu, wọ je nabọ vwerhẹn. Ọ sa dianẹ wo ji nene ewene rẹ ọga na soro vwẹ akpeyeren wẹn muabọ, jẹ dedena egbaerianriẹn tare nẹ ọke vẹ ẹgba ra ghwọrọ phiyọ erọnvwọn nana vwo erere. Jẹ obo rọ wanre eje, karophiyọ ẹdia rẹ omakpokpọ vẹ omaesivwọn wẹn ọke wo de brorhiẹn oborẹ wo che ru.

• Guọnọ ukẹcha rẹ ihwo efa

  Oborẹ Baibol na tare: “Igbeyan vwo ẹguọnọ kpahe ohwo kọke kọke, e vwiẹ oniọvo kpahe ohwo fiki rẹ ẹdoja.”—Isẹ 17:17.

  Obo ro mudiaphiyọ: Igbeyan wẹn sa cha wẹ uko vwẹ ọke egangan.

  Davwen ọnana ni: Nene ugbeyan rẹ wọ vwẹroso, wo ji se rhievun kẹ ta ota. Ọnana sa nẹrhẹ wo si ẹnwan wẹn evo kpotọ je nẹrhẹ oma vwerhen owẹ. Igbeyan vẹ ihwo rẹ orua se vwo ẹwẹn rẹ ayen vwọ vwẹ ukẹcha kẹ wẹ, jẹ ọ sa dianẹ ayen riẹn oborẹ ayen che ruu. Ọtiọyena, vuẹ ayen oborẹ ayen se ru vwọ cha wẹ uko. Wo rhẹro rẹ obo re vrẹ ẹgba rayen mie ayeen, wọ me je kpẹvwẹ ayen vwọ kẹ ukẹcha rẹ ayen vwọ kẹ wẹ na. Je karophiyọ nẹ dede nẹ igbeyan wẹn guọnọ vwẹ ukẹcha kẹ wẹ, jẹ ayen se ru erọnvwọn re sa nẹrhẹ ofu dje we. Ọtiọyena wọ sa vwẹ irhi evo vwo mu, kerẹ uchabọ vẹ ọke rẹ ayen cha kọn brẹ owẹ rhe.

• Vwẹ omamọ ẹro vwo ni oma wẹn

  Oborẹ Baibol na tare: “Udu sasasa yẹ omamọ rẹ uhuvwu, ẹkẹvuọvo erhi ro muomaphihọ nẹrhẹ ibeku rẹ oma ya muẹ.”—Isẹ 17:22.

  Obo ro mudiaphiyọ: Wọ da vwẹ omamọ ẹro vwo nẹ oma wẹn, ọ sa nẹrhẹ ẹwẹn wẹn te otọ, je nẹrhẹ wo yerin ghene ọga na.

  Davwen ọnana ni: Wo ji vwo nene ewene rẹ ọga na soro vwẹ akpeyeren wẹn muabọ na, tẹnrovi oborẹ wo se ru ukperẹ oborẹ wo che se ruu. Kẹnoma kẹ a vwọ vwẹ oma vwọ vwanvwan ihwo efa yẹrẹ reyọ oborẹ oma na hepha jovwo vwọ vwanvwan obo rọ hepha asaọkiephana. (Galesha 6:4) Bru ẹkẹn wọ sa yanmu kẹ oma wẹn, ọnana cha cha wẹ uko vwo vwo omamọ rẹ ẹwẹn kpahen obaro na. (Isẹ 24:10) Ni asan rẹ ẹgba wẹn teri vwọ vwẹ ukẹcha kẹ ihwo efa. Omavwerhovwẹn ro nẹ ukẹcha ra vwọ kẹ ihwo cha sa nẹrhẹ wo si ẹwẹn nẹ ebẹnbẹn wẹn na.—Iruo rẹ Iyinkọn Na 20:35.

Ọghẹnẹ cha cha wẹ uko vwo yerin ghene ọga?

Baibol na djerephia nẹ Jihova Ọghẹnẹa sa vwẹ ukẹcha kẹ ohwo vwo yerin ghene ọga. Dede nẹ e che se rhẹro rọyen mie Jihova nẹ o sivwin avwanre vwẹ idjerhe rẹ igbevwunuu, ihwo re vwẹ ẹga kẹ sa mrẹ ukẹcha rọyen vwẹ idjerhe nana:

Ufuoma. Jihova sa vwẹ ‘ufuoma rọyen rọ vrẹ ẹruọ ejobi’ vwọ kẹ avwanre. (Filipae 4:6, 7) Ufuoma rẹ ẹwẹn nana sa vwẹ ukẹcha kẹ ohwo vwọ kẹnoma kẹ ẹnwan rẹ ọkamuka. Ọghẹnẹ vwẹ ufuoma rọyen na vwọ kẹ ihwo re nẹrhovwo bro rhe je ta ọdavwẹ rayen vwọ kẹ.—1 Pita 5:7.

Aghwanre. Jihova sa kẹ avwanre aghwanre re vwo bru emamọ rẹ erhiẹn. (Jems 1:5) Aghwanre tiọyena che te ohwo obọ siẹrẹ o de yono Baibol na je reyọ iyono rọyen vwo ruiruo.

Omamọ rẹ iphiẹrophiyọ kpahen obaro na. Jihova veri nẹ vwẹ obaro na, o gbi vwo “ohwo rẹ orere na ọvuọvo rọ sa tanẹ, Me mwọga-a.” (Aizaya 33:24) Iphiẹrophiyọ nana cha ihwo buebun uko re vwọ vwẹ omamọ ẹro vwo nẹ oma rayen, tobọ te ihwo ri vwo ọga ro muoshọ.—Jerimaya 29:11, 12.