Obo ra sa Vwọ Vwẹ Ukẹcha kẹ Ihwo ri Vwo Ọga Iroro

Oborẹ Ọyena Mudiaphiyọ

Ọga iroro rẹ ugbeyan avwanre nene muabọ sa nẹrhẹ e muomaphiyọ. Ẹkẹvuọvo, avwanre se dje oborẹ avwanre vwo ọdavwẹ rọyen te womarẹ a vwọ vwẹ ukẹcha kẹ o se vwo yerin ghene ọga rẹ iroro ro nene muabọ na. Vwẹ idjerhe vọ?

Ukẹcha rẹ Ọnana sa Vwọphia

“Kohwo kohwo fobọ nyo ẹme.”​—JEMS 1:19.

Idjerhe ọvo ro me yovwin wọ sa vwọ vwẹ ukẹcha kẹ ugbeyan wẹn, ọyen wọ vwọ kerhọ kẹ siẹrẹ ọ da guọnọ ta ota. Ọ ghwa dia kota kota rọ tare eje yen wọ cha kpahenphiyọ-ọ. Jẹ ọ mrẹvughe nẹ wọ kerhọ rọyen, wo ji vwo ọdavwẹ rọyen. Davwẹngba vwo vwo ẹruọ rẹ oborẹ oma ruo, wọ je reyọ vwo guẹdjọ-ọ. Karophiyọ nẹ ọ sa ta eta evo ri fori nẹ ọ ta-a re cha nẹrhẹ ọ viẹ idiekpọvwẹ.​—Job 6:​2, 3.

“Yono otu rẹ oma rhọ.” ​—1 TẸSALONAIKA 5:14.

Ọ sa dianẹ ugbeyan wẹn ro ẹnwan yẹrẹ o nẹ oma rọyen kueku. Ọ da tobọ dianẹ wọ riẹn oborẹ wọ cha vuẹ-ẹ, wo se djephia kẹ nẹ wo vwo ọdavwẹ rọyen womarẹ wo vwo phiuduphiyawọ ji bro uche.

“Igbeyan vwo ẹguọnọ kpahe ohwo kọke kọke.”​—ISẸ 17:17.

Vwẹ iroroẹjẹ re sa chọn uko vwọ kẹ. Ukperẹ wọ vwọ vuẹ oma wẹn nẹ wọ riẹn obo ra vwẹ ukẹcha phia, nọ obo wo se ru. Ọ da bẹn kẹ ugbeyan wẹn rọ vwọ ta obo rọ ghene guọnọ phia, wo se jiri orọnvwọn rẹ ovwan ihwo ivẹ se ru kugbe kerẹ a vwọ yan oyan vwọ kẹ. Yẹrẹ wọ sa vwẹ ukẹcha kẹ vwọ dẹ erọnvwọn rọ guọnọre kẹ, nene ru orufon yẹrẹ ru erọnvwọn efa kẹ.​—Galesha 6:2.

“Chirako.”​—1 TẸSALONAIKA 5:14.

Ọ sa dianẹ ọ dia ọkieje yen oma vwo muẹ ugbeyan wẹn ọ vwọ ta ota-a. Vwẹ imuẹro kẹ nẹ wọ cha kerhọ rọyen siẹrẹ ọ da guọnọ ta ota. Fikirẹ ọga rọ mwa na, ugbeyan wẹn sa ta eta yẹrẹ ru erọnvwọn re cha da wẹ. Ọ sa yangha ọrhuẹrẹphiyotọ rẹ ovwan yẹrẹ nẹrhẹ ophu me we. Chirakon ji dje erorokẹ phia wọ vwọ vwẹ ukẹcha rọ guọnọre vwọ kẹ.​—Isẹ 18:24.

Obicha Wẹn sa Chọn Ugbeyan Wẹn Uko

“Me davwẹngba vwo jẹ ugbeyan mẹ riẹn nẹ ọ sa vwẹroso ovwẹ. Dede nẹ me cha sa rhuẹrẹ ebẹnbẹn rọye-en, jẹ me davwẹngba vwọ kerhọ kẹ obo rọ cha ta. Ọkiọvo, obo rọ ghwa guọnọ, ọyen ohwo rọ sa kerhọ rọyen, ọyena nẹrhẹ ẹwẹn rọyen totọ.”​—Farrah,a rẹ ugbeyan rọyen vwo ọga rẹ iroro rọ djẹ emu ẹriọ, je sua ẹnwan vẹ ofudjevwe ọgangan kẹ.

“O vwo ọvo usun rẹ igbeyan mẹ rọ nabọ roro kẹ ohwo ro ji bru vwe uche. O durhie uvwe kpo uwevwin rọyen vwọ kẹ emuọre. Fikirẹ ẹguọnọ ro djephia, ke me sa vuẹ oborẹ oma ru vwe. Ọyena ghene bọn vwẹ gan!”​—Ha-eun, ro nene ofudjevwe ọgangan muabọ.

“Akoechiro pha ghanghanre mamọ. Ọke rẹ aye mẹ de ru obo re nẹrhẹ ophu mu vwe, ke me karophiyọ oma mẹ nẹ ọga ro kpokpo yen nẹrhẹ o ruẹ ọtiọyen, ọ dia uruemu nana yen rhere jovwo-o. Ọnana chọn vwẹ uko vwo jẹ ophu emuo ji dje erorokẹ phia kẹ.”​—Jacob, rẹ aye rọyen nene ofudjevwe ọgangan muabọ.

“Aye mẹ ghene chọn vwẹ uko je bọn vwẹ gan. Ọke rẹ ẹnwan de mu vwe rọ, ọ rha gba vwẹ vwo ruẹ oborẹ me guọnọ ru-u. Ọyena mudiaphiyọ nẹ ọkiọvo o gbobọnyẹ erọnvwọn evo ro rhe ru jovwo. Uruemu rọ vwọ nuẹ, ro ji vwo ruẹse na je vwe mamọ.”​—Enrico, ro vwo ọga rẹ iroro rọ sua ẹnwan ọgangan kẹ.