UKẸCHA VWỌ KẸ ORUA | ORỌNVWE
A Vwọ Vwẹ Ẹro Abavo Vwo nẹ Iruemu ri Miovwo Uwe Ivun
Wẹwẹ ohwo ro ruẹ erọnvwọn vwo nene obo re ghwa ro wẹ uyovwin; ọrivẹ rẹ orọnvwe wẹn ọyen ohwo rọ nabọ jiroro rẹ obo ro che ru phiyotọ tavwen o ki ruo.
Wẹwẹ ohwo rọ ta ota buẹ-ẹn, rọ je guọnọ otu-u; ọrivẹ rẹ orọnvwe wẹn ọyen ohwo rọ ghwa otu je ta ota mamọ.
Ọrivẹ rẹ orọnvwe wẹn vwo uruemu ọvo ro miovwo uwe ivun? Wọ da tẹnrovio ganọ, ọ sa yanghan orọnvwe wẹn. Vwọrẹ uyota, Baibol na tare nẹ, “ohwo rọ vwariẹn ota ọ fan ugbeyan”—Isẹ 17:9.
Ukperẹ wọ vwọ vwẹ uphẹn kẹ uruemu ro miovwo uwe ivun na nẹ ọ so ebẹnbẹn kẹ wẹ vẹ ọrivẹ rẹ orọnvwe wẹn, wo se yono oma phiyọ obo ra vwẹ omamọ rẹ ẹro vwo nẹ uruemu na.
Vwẹ uyono nana
A vwọ vwẹ ẹro abavo vwo nẹ iruemu ri miovwo uwe ivun
Uruemu ro kpare owẹ ophu vwẹ oma rẹ ọrivẹ rẹ orọnvwe wẹn se churobọ si uwan ọvo ro je we vwẹ oma rọyen. Roro kpahen idje erha:
“Ọkieje yen ọshare mẹ vwo hwe ọke siẹrẹ o de ruẹ erọnvwọn yẹrẹ o de muegbe ro vwo kpo asan. Ẹkẹvuọvo uruemu yena nẹrhẹ o se vwo odirin mẹ vẹ ihwo efa. Ọkievo, ọke ẹghwọrọ rọyen na kpare ovwẹ ophu, ẹkẹvuọvo, ọyena orọnvwọn ọvo rọ nẹrhẹ mi vwo ẹguọnọ rọyen.”—Chelsea.
“Aye mẹ guọnọre nẹ emu vuọvo shechọ vwẹ ọrhuẹrẹphiyotọ rọye-en; ọtiọyena, kọ guọnọ suẹn erọnvwọn eje, ọnana sa nẹrhẹ ophu mu vwe. Ẹkẹvuọvo, ọ vwọ dianẹ o nenesi rẹ erọnvwọn eje te erọnvwọn itete dede, emu vuọvo rhe pho wa-an.”—Christopher.
“Ọshare mẹ nama kpokpo oma rọyen vwẹ orọnvwọn vuọvo-o, ọnana nẹrhẹ ofu dje vwe. Vwẹ ọke vuọvo na, uruemu nana yen ọvo usun rẹ iruemu ri mu vwe vwo sikẹrẹ ẹsosuọ. Oborẹ ẹwẹn rọyen sa vwọ dia dọe ọke rẹ ebẹnbẹn da herọ je vwe mamọ.”—Danielle.
Kirobo rẹ Chelsea, Christopher, kugbe Danielle mrẹvughe, ọke buebun na, uruemu rọ dia ovwiẹre rẹ orivẹ rẹ orọnvwe avwanre je sa dia asan rọ da gan, kidie ọyen ẹbẹre sansan rẹ uruemu vuọvo yena. Ọ da dia ọtiọyen ọ hepha, kọyen wo che se si ovwiẹre na nọ rẹ wọ da yanjẹ asan rọ da gan vwo-o, ọtiobọ ru wo che se do ẹbẹre ọvo rẹ ikọbọ kufia je sẹro ẹbẹre ochekọ-ọ.
Vwọrẹ uyota, iruemu evo vwo ẹbẹre rẹ ayen de yovwi-in. Kerẹ udje, Baibol na rhọnvwephiyọ nẹ ihwo evo “fobo muẹ ophu.” (Isẹ 29:22) Ọtiọyena, e jẹ a davwẹngba avwanre eje vwo “siobọ nẹ ivuemiovwo kugbe ẹghwọ kugbe ophu kugbe oseghe kugbe ophọphọvwe.”a—Ẹfesọs 4:31.
Ẹkẹvuọvo siẹrẹ uruemu ọvo da kpare owẹ ophu, yan nene uchebro ri Baibol nana: “Ohwohwo chirako kẹ ohwohwo . . . ohwohwo vwo ghovwo ohwohwo nẹ otọ rẹ evun rhe.”—Kọlose 3:13.
Vwọba, davwẹngba vwọ guọnọ ẹbẹre ro yoma vwẹ uruemu yena—ọ sa dia obo re tobọ si we kẹrẹ ọrivẹ rẹ orọnvwe wẹn ẹsosuọ ye. Ọshare ọvo re se Joseph da ta: “A vwọ tẹnroviẹ uruemu yena rọ kpare ohwo ophu, pha kerẹ ohwo rọ tẹnroviẹ unu ri diamond rọ pha piọpiọpiọ ukperẹ erhuvwu rọyen.”
Oborẹ ovwan ta ota kpahen
Ẹsosuọ, ovwan ohwo vuọvo se roro kpahen enọ nana komobọ. Ovwan de ru ọtiọyen nu, ovwan me ta ota kpahen ẹkpahọnphiyọ rẹ ovwan kugbe.
Ọrivẹ rẹ orọnvwe wẹn vwo uruemu ọvo rẹ wo rorori nẹ ọ sua ẹghwọ vwẹ orọnvwe na? Ọ da dia ọtiọyen, ọrhọ yen uruemu na?
Uruemu na ghene bra mamọ, gbanẹ ọ de nẹrhẹ ivun miovwo uwe?
Uruemu na vwo ẹbẹre ro de yovwin? Ọ da dia ọtiọyen, ọrhọ yen ẹbẹre yena, kẹ, diesorọ ẹbẹre rẹ uruemu rẹ ọrivẹ wẹn yena vwo je we?
a Ni iyovwinreta na “Oborẹ Wo Se Vwo Sun Ophu Wẹn,” “How to Avoid Hurtful Speech,” kugbe “How to Stop Arguing.”