Ota ra tare vẹ ọghọ yen isimeti rọ sa yọnre orọnvwe wẹn kugbe
VWỌ KẸ IHWO RE RỌVWỌNRE
3 Ọghọ
OBORẸ O MUDIAPHIYỌ
Aye gbe ọshare ri muọghọ kẹ ohwohwo vwo ẹguọnọ rẹ oma rayen tobọ vwẹ ọke rẹ ẹghwọ. “Eya gbe eshare tiọna tinka muẹ iroro romobọ raye-en. Ukperẹ ọtiọyen, ayen ihwo ivẹ ke ta ota kpahen ebẹnbẹn na. Ayen nabọ kerhọ rẹ ohwohwo, je guọnọ idjerhe rẹ ayen sa vwọ nuẹ nene iroroẹjẹ rẹ ohwohwo” eriyin ọbe rẹ Ten Lessons to Transform Your Marriage tare.
UCHEBRO RI BAIBOL: “Ẹguọnọ . . . ghwe churu obọ muẹ ọrọye ọvo-o.”—1 Kọrẹnt 13:4, 5.
“Mi vwo brọghọ phiyọ aye mẹ oma mudiaphiyọ nẹ mi che dje ọdavwaro phia kpahen iruemu rọyen, me je guọnọ ru emu vuọvo rọ cha wan oma yẹrẹ guọghọ orọnvwe avwanre-e.”—Micah.
OBORESORỌ Ọ VWỌ GHANRE
Ọghọ rha herọ-ọ, otaẹtakuẹgbe rẹ ihwo ivẹ re rọvwọnre cha vọn vẹ ekan, ehwẹjẹ vẹ uruemu re vwo ni ohwo sakamu—enana iruemu rẹ ihwo ri ru ehiahiẹ tare nẹ i suẹn kpo orọnvwe ẹfan.
“Aye wẹn gbe cha vwẹroso owẹ-ẹ, o ji che rhe ni oma rọyen kueku siẹrẹ wọ da vwọ jehwẹ je ta eta ebrabra kpahọn, ọnana sa guọghọ orọnvwe wẹn.”—Brian.
OBO WO SE RU
DAVWEN OMA WẸN NI
Vwo oniso rẹ ota vẹ uruemu wẹn vwẹ udughwrẹn ọvo. Rere wọ nọ oma wẹn:
‘Brabọ mi jiri ọrivẹ rẹ orọnvwe mẹ, brabọ me hanrhe rọ ekan?’
‘Erhọ yen idjerhe evo kiriguo mi vwo brọghọ phiyọ ọrivẹ mẹ oma?’
NENE ỌRIVE WẸN TA OTA KPAHEN ENỌ NANA
Die yen avwanre sa ta yẹrẹ ru ro se djephia nẹ avwanre muọghọ kẹ ohwohwo?
Iruemu vọ yẹrẹ eta vọ yen se djephia nẹ avwanre muọghọ kẹ ohwohwo-o?
IROROẸJẸ
Si idjerhe erha ru wọ guọnọ nẹ ọrivẹ wẹn vwo dje ọghọ kẹ wẹ phiyotọ. Jẹ ọrivẹ wẹn ji ru ọtiọyen. Ovwan ni oborẹ ohwohwo siri rere ovwan wian kpahen oborẹ ovwan siri na.
Si iruemu ri je we vwẹ oma rẹ ọrivẹ wẹn phiyotọ rere wọ vuẹ oborẹ iruemu na je we te.
“Mi vwo muọghọ kẹ ọshare mẹ mudiaphiyọ nẹ mi che djephia womarẹ iruemu mẹ nẹ mi vwo ọdavwẹ rọyen, me je guọnọ nẹ oma vwerhọn. E se dje ọghọ phia womarẹ erọnvwọn itete re ruẹ, ọ dia erọnvwọn ride ọvo-o.”—Megan.
Oborẹ a ta na kẹ ona, o torori sẹ wo niro nẹ wẹwẹ ohwo vẹ ọghọ-ọ ẹkẹvuọvo, ẹro tiọyena yen ọshare yẹrẹ aye wẹn vwo ni we?
UCHEBRO RI BAIBOL: “Ovwan gba vwẹ uruemu esiri rhuo oma riarie . . . vẹ udu ọlọlọhọ rọ vọnre vẹ aruẹdọn, oma evwo kpotọ, ufuefu kugbe odiri.”—Kọlose 3:12.