UKẸCHA VWỌ KẸ ORUA
Oborẹ wo se Vwo Sun Ophu Wẹn
Ọrivẹ orọnvwe wẹn ta ota yẹrẹ ru orọnvwọn ọvo rọ nẹrhẹ ophu mu we, wọ da davwẹngba wo vwo si ophu na nu. Ẹkẹvuọvo ọrivẹ wẹn da rhe mrẹvughe nẹ emuọvo shechọ, ọtiọyena kọ nọ enọ. Ọ da nẹrhẹ ophu na ganphiyọ. Mavọ yen wo se vwo sun ophu wẹn vwẹ ẹdia tiọyena?
Oborẹ ofori nẹ wọ riẹn
Ophu sa so imuoshọ kẹ omakpokpọ wẹn. Ehiahiẹ djerephia nẹ ophu re se suẹẹn so omaemuophiyọ ọgangan, ọga rẹ ubiudu, ọga ri BP, je nẹrhẹ ọ bẹn rẹ emu vwọ fobọ ro ohwo oma. A je rhe mrẹvughe nẹ ophu ọgangan sa nẹrhẹ ohwo vwerhẹẹn, ọ so ẹnwan ọgangan, ọga rẹ obọ gbẹ owọ, je nẹrhẹ ohọroma na shephiyọọ. Fikirẹ enana Baibol na da ta: “Jẹ ivuemiovwo vwo . . . , ọ da nẹrhẹ owẹ ru imwemwu.”—Une rẹ Ejiro 37:8, eta rehẹ obotọ.
Re vwo si ophu nẹ je sa so imuoshọ. Ophu ra vwẹ uphẹn kẹ nẹ ọ dia ọke grongron sa họhọ ọga rọ so omaẹwan kẹ ohwo vwẹ obevun. Kerẹ udje, ọnana sa nẹrhẹ wo vwo uruemu re vwo brenu vwọ kpahen kemu kemu. Oka rẹ ẹwẹn ọtiọyena sa nẹrhẹ ọ bẹn rẹ ihwo vwo nene uwe dia, ọ je sa so imuoshọ ọgangan vwẹ orọnvwe wẹn.
Obo wo se ru
Guọnọ asan rẹ ọrivẹ wẹn de ruẹ yovwẹn. Si erọnvwọn erha ri je we vwọ kpahen ọrivẹ orọnvwe wẹn phiyotọ. Ọke ọfa ophu de mu we kpahen oborẹ ọrivẹ wẹn ruru, gbe roro kpahen iruemu iyoyovwin rẹ wọ jokaphiyọ na. Ọnana sa vwẹ ukẹcha kẹ wẹ vwo sun ophu wẹn.
Odjekẹ ri Baibol: “Ovwan me rha kpẹvwẹ.”—Kọlose 3:15.
Vwo uruemu re vwo ghovwo. Ẹsosuọ, davwẹngba vwo vwo ẹruọ rẹ ọrivẹ wẹn. Ọnana cha vwẹ ukẹcha kẹ wẹ vwo vwo “erorokẹ.” (1 Pita 3:8) Ọyena da wan nu, gba nọ oma wẹn, ‘Obo re nẹrhẹ ophu mu vwẹ na gan tẹdia mi rhe se vwo ghovwo ọrivẹ mẹ na?’
Odjekẹ ri Baibol: “[Ọyen] ọrho rode kẹ ro de kuaro fia kẹ oruchọ.”—Isẹ 19:11.
Vwẹ erorokẹ vẹ ọghọ vwọ ta oborẹ oma ru we. Reyọ ubiota ri “Mẹvwẹ” vwo ruiruo. Kerẹ udje, ukperẹ wọ vwọ ta nẹ, “Wọ nama roro kẹ vwẹ wo vwo se vwe vuẹ vwe kpahen asan rẹ wọ hephaa,” gba ta nẹ, “Ọke de she nu ẹwẹn mẹ gbi te otọọ, kidie me ghwa riẹn se wọ hẹ ẹdia rẹ imuoshọọ.” Wọ da vwẹ idjerhe rẹ ọghọ vwọ ta ẹwẹn wẹn phia, ọnana sa vwẹ ukẹcha kẹ wẹ vwo sun ophu wẹn.
Odjekẹ ri Baibol: “E jẹ eta rẹ ovwan dia vwevwerhen ọkieje, kirobo re phi ughwanka phiyọ.”—Kọlose 4:6.
Kerhọ vẹ ọghọ. Wọ da ta obo rehẹ evunrẹ ẹwẹn wẹn nu, gba vwẹ uphẹn kẹ ọrivẹ orọnvwe wẹn, wọ me je kẹnoma kẹ e vwo gbota phiyọ unu. Siẹrẹ ọrivẹ wẹn da ta ota nu, gba rhoma vwanriẹn obo rọ tare na sẹ wo ghini vwo ẹruọ rọyen. A vwọ kerhọ vẹ ọghọ sa vwẹ ukẹcha kẹ wẹ vwo sun ophu wẹn.
Odjekẹ ri Baibol: “Kohwo kohwo fobọ nyo, ọ fobọ ta ota-a.”—Jems 1:19.