Mrẹ Ọbọngan Vwẹ Ọbe rẹ Aizaya

1-2. Idjerhe vọ yen Jihova vwọ vwẹ ukẹcha kẹ avwanre ọke re de muomaphiyọ?

VWẸ ẹwẹn roro ọmọ ro muomaphiyọ gangan jẹ ọ viẹ patapata. Ọkiọvo ayen guọnọ kua kpo uwevwin ọfa rọ cha nẹrhẹ ọ yanjẹ igbeyan rọyen vwo. Yẹrẹ ọ sa dianẹ o muomaphiyọ fikirẹ oruchọ ọvo ro ruru vwẹ obuko re. Die yen oni ro vwo ẹguọnọ che ru vwẹ ẹdia nana? Ọ cha gbane ọmọ rọyen na, nabọ kerhọ rọyen je vwẹ imuẹro kẹ nẹ o vwo ẹguọnọ rọyen.

² Vwẹ Baibol na, a vwẹ Jihova vwo dje oniọmọ ro bru ọmọ rọyen uche kidie o vwo ọdavwẹ vẹ ẹguọnọ rọyen. Jihova da ta: “Kerẹ ohwo rẹ oni rọye bruche, eriyin Mi bru we uche.” (Aiz. 66:13) Ẹguọnọ ri Jihova vwo kpahen avwanre rho vrẹ ọ rẹ oni vẹ ọsẹ vwo kpahen ọmọ rayen. (Aiz. 49:15) Jihova reyọ Ota rọyen rọ dia Baibol na vwọ kẹ avwanre ọbọngan vẹ ẹgba rẹ avwanre guọnọre ọke re de muomaphiyọ yẹrẹ ofu de dje avwanre.​—Rom 15:4.

3. Die yen a cha ta ota kpahen vwẹ uyono nana?

³ Ẹbe rẹ Aizaya vọnre vẹ eta rẹ ọbọngan ri nẹ obọ ri Jihova rhe. (Aiz. 40:1) Ọsẹ avwanre ro vwo ẹguọnọ yen vwẹ ẹwẹn ọfuanfon rọyen vwo mu Aizaya vwo si ẹbe na nẹ ọ vwẹ ọbọngan kẹ ihwo rọyen vwẹ Judia ri hirharokuẹ ọke ọgangan. Avwanre dede je guọnọ ọbọngan kidie avwanre hẹ “ọke ọgangan rọ bẹn eyeren.” (2 Tim. 3:1) E jẹ a fuẹrẹn awọreta evo vwẹ ẹbe rẹ Aizaya re sa sasa udu avwanre je vwẹ ọbọngan kẹ avwanre ọke (1) akpeyeren avwanre de wene kpregede, (2) ẹwẹn rẹ abe de kpokpo avwanre, yẹrẹ (3) e de vwere ohwo e vwo ẹguọnọ kpahen ro ghwuru.

AKPEYEREN AVWANRE DE WENE KPREGEDE

4. Mavọ yen oma se ru avwanre akpeyeren rẹ avwanre de wene kpregede?

⁴ Obo re rhẹro rọyeen sa phia kẹ avwanre vwẹ akpeyeren. (Aghwo. 9:11; 1 Kọr. 7:31) Avwanre se she ro ọga, hirharoku uweren ọgangan, oseghe sa vwomaphia vwẹ ẹkuotọ na yẹrẹ iruo avwanre se wene vwẹ ẹga ri Jihova. Ewene tiọyena sa so ẹnwan je nẹrhẹ ẹwẹn rẹ avwanre tighi. Ọtiọyena e se roro: ‘Die mi che ru?’ Oniọvo ọshare ọvo re se Joseph, rọ gare vwẹ Bẹtẹl te ẹgbukpe 17 re, ra vuẹre nẹ o kpo otafe da ra ga kerẹ ọkobaro ọkieje tare nẹ: “Me riẹn oborẹ mi che ruu. Kidie nẹ mẹvwẹ hẹ Bẹtẹl kri re, ọ da nẹrhẹ ọ bẹn kẹ vwẹ mamọ me vwọ rhoma ton akpeyeren phiyọ. Me tobọ riẹn asan me da tọnphiyọọ.” Imuẹro vọ yen Jihova womarẹ Aizaya vwọ kẹ avwanre ọ da dianẹ akpeyeren avwanre weneri kpregede?

5. Kirobo rehẹ Aizaya 42:16, imuẹro vọ yen Jihova vwọ kẹ avwanre? (Ni ifoto na.)

⁵ Se Aizaya 42:16. Jihova veri nẹ ọyen che sun ihwo ri rhuẹro vwọrẹ udje wan idjerhe rẹ ayen vugherii je rhẹriẹ ebri rọhẹ obaro rayen phiyọ elo. Eta na “irhuẹro,” ‘idjerhe re vugherii,’ “ebri,” kugbe “idjerhe re pha chohri chohri” se dje ẹro avwanre vwo nẹ obaro na siẹrẹ ẹdia avwanre de wene kpregede. E se no nẹ avwanre yan vwevunrẹ oghwaghwo ro muoshọ, jẹ a riẹn obo rehẹ obaroo. Dedena, Jihova vwẹ imuẹro kẹ avwanre nẹ o toro ẹdia avwanre hirharokuu, ọyen cha vwẹ ukẹcha avwanre guọnọre vwọ kẹ avwanre, nẹ o vwo ọke vuọvo ọyen che vwo chukoku avwanree. Ọ cha yọnrọn obọ avwanre ji sun avwanre wan ebri na, nẹ ọyen cha vwẹ elo mu idjerhe na ji ru idjerhe re pha chohri chohri na riẹriẹriẹ o vwo jẹ avwanre wan. Mavọ yen Jihova ru ọnana wan? Ọyen ọ vwọ womarẹ Ota vẹ ukoko rọyen vwọ vwẹ uchebro rẹ aghwanre vwọ kẹ avwanre. (Une 119:105; Aiz. 30:21) Ọ je vwẹ ukẹcha kẹ avwanre womarẹ iniọvo rẹ ukoko na ọtiọyen ji te ihwo efa. Ọ da tobọ dianẹ obo rehẹ obaro na bẹn evughe, ọ je pha bẹnbẹn, a sa vwẹroso Jihova nẹ o che sun avwanre vwẹ idjerhe rẹ ẹguọnọ je vwẹrote avwanre.​—Aiz. 41:10; 1 Pita 5:6, 7.

6. Ẹdia avwanre de wene kpregede, imuẹro vọ yen avwanre se vwo?

⁶ Joseph ra ta ota kpahen siẹvure na, vuẹ avwanre oborẹ Jihova vwẹ ukẹcha kẹ vẹ aye rọyen ọke rẹ ayen vwo nẹ Bẹtẹl nu. Ọ da ta: “Avwanre mrẹ obọ ri Jihova uvwre ọke rẹ ewene nana. Ọ vwẹ ukẹcha kẹ avwanre womarẹ iniọvo na. Ọ vwẹ ọbọngan kẹ avwanre je vwẹrote ọdavwẹ rẹ ugboma avwanre vwẹ ọke ro fori, ọ je dobọjii.” Ẹdia wẹn de wene kpregede, jẹ o muwẹro nẹ Jihova cha kẹ wẹ ẹgba vẹ ọbọngan ru wọ guọnọre, o toro oborẹ ewene na gan tee. (Aiz. 54:10; 58:11) Joseph da je ta: “Irhiẹ rẹ eta rẹ une avwanre ọvo tare nẹ, ‘O vw’ohwo rọ ri’odẹ rọ chaa, J’ Ọghẹnẹ mẹ v’ovwẹ je herọ dẹn.’a Ọ da tobọ dianẹ erọnvwọn phia vwo nene obo ra jiroro rayeen, jẹ emuọvo muẹro: Jihova vẹ avwanre herọ ọkieje.”

ẸWẸN RẸ ABE DE KPOKPO AVWANRE

7. Obẹnbẹn vọ yen ihwo evo se nene muabọ fikirẹ imwemwu rẹ ayen ru vwẹ obuko re?

⁷ Siẹrẹ a da vuẹ ekpako na kpahen umwemwu ọgangan rẹ avwanre ruru, kẹ ayen vwẹ ukẹcha kẹ avwanre vwẹ idjerhe rẹ ẹguọnọ, ka je davwẹngba re vwo jẹ umwemwu tiọyena ẹvwanriẹn. (Isẹ 28:13; Jems 5:14-16; 1 Jọn 1:9) Ẹkẹvuọvo, ọ da tobọ dianẹ e vwo ghovwo avwanre nure, e ji se nene ẹwẹn rẹ abe muabọ. Avwanre se roro, ‘Jihova ghini se vwo ghovwo uvwe fikirẹ oborẹ mi ruru na?’ (2 Kọr. 2:7) Oma se ru avwanre ọtiọyen kidie imwemwu re ru vwẹ obuko re sa nẹrhẹ e muomaphiyọ ọke grongron. Ovie Devid da ta: “Ufuoma vuọvo hẹ evunrẹ ibeku mẹẹ fikirẹ umwemwu mẹ. . . . Oma mẹ ghwodirhẹn, ọ je ghwọrọ totọ re.” (Une 38:3, 8) Ọma de ru we ọtiọyen ọkievo fikirẹ imwemwu wo ru vwẹ obuko re, ọbe rẹ Aizaya na sa vwẹ ukẹcha kẹ wẹ.

8-9. Vwo nene obo re djisẹ rọyen vwẹ Aizaya 1:18, mavọ yen Jihova vwọ ghovwo avwanre wan?

⁸ Se Aizaya 1:18. Jihova djudje obo rọ reyọ vwo ghovwo imwemwu rẹ avwanre kakare. Ọ tare nẹ ọ da tobọ dianẹ imwemwu rẹ avwanre ‘pha vwavware gbai,’ ọ cha nẹrhẹ ayen “fon kerẹ imicho.” Ikọlọ ọvwavware nana de te ewun, ọ fobọ vrẹn noo. Dedena, Jihova kẹ avwanre imuẹro nẹ o de vwo ghovwo avwanre nu, ọ rha cha karophiyọ imwemwu yena bẹdẹẹ.

⁹ Roro kpahen udje rẹ Ovie Devid. Dede nẹ o gbe igberadja je dẹ ozighẹ, Jihova vwo ghovwo, ọke vwọ yanran ọ da je tanẹ Devid ọyen ohwo ọsoso. (2 Sam. 11:3, 4, 14, 15; 12:13; 1 Ivie 9:4, 5) Ọ dia echobọ ri Devid yen Jihova karophiyọọ, ẹkẹvuọvo evun-ẹfuọn rọyen. Ọtiọyena, Jihova ji vwo ghovwo avwanre ọke re de kurhẹriẹ, ọ vwẹ ukẹcha kẹ avwanre vwọ vwẹ ẹga kẹ vẹ ẹwẹn obrorhiẹn rọ fonro. Imuẹro ọfa vọ yen a sa mrẹ vwẹ ẹbe rẹ Aizaya siẹrẹ ẹwẹn rẹ abe de kpokpo avwanre?

10. Imuẹro vọ yehẹ Aizaya 38:17?

¹⁰ Se Aizaya 38:17 kugbe eta rehẹ obotọ. Ota na “wo do imwemwu mẹ eje phiyọ obuko wẹn” ji se mudiaphiyọ “wo si imwemwu mẹ ejobi vwo nẹ obaro wẹn.” Ẹkpo ri Baibol nana djisẹ ri Jihova nẹ ọ reyọ imwemwu rẹ ohwo ro kurhẹriẹ ji do ayen phiyọ obuko Rọyen, asan rẹ Ọ rha cha mrẹ yẹrẹ roro kpahen ayen ọfaa. Ẹbe ọvo ta ota nana vwẹ idjerhe ọtiọna: “Wo ru [imwemwu mẹ] kerẹsiẹ a da mrẹ nẹ e phiaree.” Ọtiọyena Jihova de vwo ghovwo imwemwu rẹ avwanre nu, ko nẹ avwanre kerẹ ihwo ri ji ru umwemwu dẹvoo. Ugege ri Jihova de vwo ghovwo avwanre, o rhe che gboja yẹrẹ brorhiẹn hwe avwanre fikirẹ imwemwu e ru wanree. O phoro imwemwu yena no kakare. O veri nẹ: “Me cha karophiyọ imwemwu wẹẹn.” (Aiz. 43:25) Ọnana nẹrhẹ ẹwẹn avwanre totọ! Ọ da dianẹ Jihova rọ dia Oguẹdjọ Ro Me Kpenu kerẹ imwemwu avwanre ba avwanre abọọ, o rhe fo e vwo ru ọtiọyen kpahen oma rẹ avwanree.

11. Ọ da tobọ e ru imwemwu evo vwẹ obuko re, die yen Jihova tẹnroviẹ? (Ni ifoto na.)

¹¹ Kọke kọke ẹwẹn rẹ abe de kpokpo avwanre, ofori nẹ avwanre karophiyọ imuẹro ri Jihova vwọ kẹ avwanre. O vwo ghovwo kakare. Oma avwanre vuọ fikirẹ imwemwu re ru wanree, o ji phi eta phiyọ evun kerẹ ihworakpọ re gbaree. (Aiz. 57:16) Obo re ma ghanre kẹ Jihova yen oborẹ avwanre ruẹ enẹna vẹ obo re che ru vwẹ obaro na, ọ dia oborẹ avwanre ruru vwẹ obuko ree. (Aiz. 55:7) Ọghẹnẹ avwanre vwo ẹguọnọ avwanre, ọ je guọnọ vwo ghovwo avwanre! Ọtiọyena, e jẹ a nama vwẹ uphẹn kẹ oruchọ re ruru vwẹ obuko re nẹ o gbowọphiyọ aghọghọ rẹ avwanre yẹrẹ nẹrhẹ ebruphiyọ rehẹ obaro na va avwanre abọọ.

E DE VWERE OHWO E VWO ẸGUỌNỌ KPAHEN RO GHWURU

12. Mavọ yen oma se ru avwanre siẹrẹ ohwo re vwo ẹguọnọ kpahen de ghwu?

¹² Avwanre muomaphiyọ mamọ siẹrẹ ohwo re vwo ẹguọnọ kpahen de ghwu, ọmiaovwẹ na je sa dia ọke grongron. Ọkievo, avwanre se roro kpahen oboresorọ Jihova vwọ vwẹ uphẹn kẹ ohwo re vwo ẹguọnọ kpahen nẹ o ghwu. Ọsẹ vẹ oni rẹ oniọvo ọshare ọvo re se Michael ghwu phiyọ erhanre. Ọ da ta: “Ubiudu mẹ hra totọ, mi muophu kpahen Jihova rọ vwọ vwẹ uphẹn kẹ ayen nẹ ayen ghwu. Me riẹnre nẹ ọ dia ọyen yen so ughwu rayeen, jẹ ọ je sa dajii.” Ọ sa dianẹ oma ji ru we ọtiọyen jovwo re. Vwẹ ọke rẹ omaemuophiyọ tiọyena, iphiẹrophiyọ vẹ uchebro vọ yen Jihova vwọ kẹ avwanre?

13. Ive vọ yen Jihova ve kẹ avwanre vwẹ Aizaya 25:8?

¹³ Se Aizaya 25:8. Jihova veri nẹ ọyen che “mu ughwu rọ bẹdẹ.” Vwẹ ẹwẹn roro ọke rẹ ughwu rha cha dia ọfaa! Wo rhe che vwere uvweri rẹ ohwo ru wo vwo ẹguọnọ kpahen ro ghwuruu. (Aiz. 35:10) Wo rhe che rhiẹromrẹ ọmiaovwẹ ro no cha wọ da mrẹ asan re shi ohwo ru wo vwo ẹguọnọ kpahen phiyọọ. Ukperẹ ọtiọyen, iphiẹrophiyọ herọ nẹ te owẹ vẹ ihwo ru wo vwo ẹguọnọ kpahen cha dia bẹdi bẹdẹ vwọrẹ omakpokpọ. Ive nana dia evwerhẹn ghevweghee, kidie Ọghẹnẹ komobọ yen ve ive na​—ọyen ovọ yen ohwo ro se ruo.​—Ẹvwọ. 21:4, 5.

14. Mavọ yen oma ru we siẹrẹ wo de roro kpahen iphiẹrophiyọ rẹ evrẹnushi na? (Aizaya 26:19) (Ni ifoto na.)

¹⁴ Se Aizaya 26:19. Ọ dia Jihova che di phioba phiyọ ughwu ovọọ, ọ je cha kpare ihwo rẹ avwanre vwo ẹguọnọ kpahen ri ghwuru nushi. Vwọ kpahen ayen, ọ da ta: “Irivwin mẹ che vrẹn.” Ọnana mudiaphiyọ nẹ Jihova yen vwo ayen. Ayen eje he ẹkarophiyọ rọyen. Vwẹ ọke ro veri, ọ cha kpare ayen eje nushi. Kirobo rẹ irho rẹ urhiọke nẹrhẹ ekankọn dia wọnwọnwọn ye, ọtiọyen Jihova rọ dia Esiri rẹ arhọ na je cha kpare ihwo rẹ avwanre vwo ẹguọnọ kpahen ri ghwuru nushi. A mrẹ vwo dje aghọghọ ra cha mrẹ re vwo dede ihwo rẹ avwanre vwo ẹguọnọ kpahen rhi ghwuru rhivwin rhee!​—Ni Mak 5:42.

15. Idjerhe vọ yen iphiẹrophiyọ rẹ evrẹnushi na vwọ vwẹ ukẹcha kẹ avwanre siẹrẹ ohwo rẹ vwo ẹguọno kpahen de ghwu?

¹⁵ Dede nẹ avwanre vwo iphiẹrophiyọ kpahen evrẹnushi na, jẹ ọ dia ọyen ọnana vwo si ọmiaovwẹ rẹ ughwu ghwa cha noo. Ẹkẹvuọvo oma vwerhen avwanre ra vwọ riẹn nẹ Jihova je rhe kpairoro vrẹ ihwo avwanre vwo ẹguọnọ kpahen rhi ghwuruu. Iphiẹrophiyọ nana yen vwẹ ukẹcha kẹ Michael ra ta ota kpahen siẹvure na. Ọ da ta: “Aizaya 26:19 nẹrhẹ me riẹn nẹ Jihova kugbe ọsẹ vẹ oni mẹ vwo oyerinkugbe komobọ. Ọ karophiyọ ayen ọkieje kidie ayen hẹ afọnrhe rọyen rhi te ọke rọ cha vwọ kpare ayen nushi vwẹ ọke ro ve phiyọ. Ọnana kẹ vwẹ ọbọngan vẹ omavwerhovwẹn.” E jẹ avwanre tẹnrovi iphiẹrophiyọ rẹ avwanre vwori ra cha vwo rhoma mrẹ ihwo rẹ avwanre vwo ẹguọnọ kpahen ri ghuru. E de ru ọtiọyen ọ cha lọhọ re vwo chirakon rẹ ọmiaovwẹ na.

16. Ẹkpo ri Baibol vọ yen vwẹ ọbọngan kẹ wẹ ọke wọ vwọ hẹ ẹdia ọgangan?

¹⁶ Ẹdia rẹ avwanre de wene vwẹ akpeyeren, ẹwẹn rẹ abe de kpokpo avwanre yẹrẹ e de vweri uvweri, o vwo ẹkpo ri Baibol evo re djunute vwẹ ọbe rẹ Aizaya re sa vwẹ ọbọngan kẹ avwanre. Mavọ yen ọ vwerhen oma te nẹ Jihova womarẹ Ota rọyen rọ dia Baibol na vwọ vwẹ ọbọngan kẹ avwanre! (Une 94:19) O vwo ẹkpo ri Baibol ọvo rọ vwẹ ọbọngan kẹ wẹ ọke ru wo vwo hirharoku ẹdia ọgangan? Se ku afọnrhe, sio phiyọ ọmọbe yẹrẹ vwọ tamuẹ asan ru wọ da sa mrẹ kọke kọke. E jẹ wọ mrẹ ọbọngan vwo nẹ eta rẹ avwerhe rẹ Ọsẹ rẹ avwanre Jihova, rọhẹ obodjuvwu rhe.