Muọghọ kẹ Erhiẹn rẹ Ihwo Efa

1-2. Diesorọ erhiẹn avwanre vwọ fẹnẹ ohwohwo ọkievo?

A VWẸ owẹ guẹdjọ fikirẹ orhiẹn ru wo bruru jovwo re? Wọ vwẹ oniọvo ọfa guẹdjọ fikirẹ orhiẹn ro bruru jovwo re? Aphro herọọ nẹ, buebun rẹ avwanre cha kpahenphiyọ enọ ivẹ na nẹ e.

² Ọtiọyena, e jẹ o gbe avwanre unu siẹrẹ erhiẹn rẹ avwanre vẹ e rẹ iniọvo rẹ avwanre da fẹnẹ ohwohwo ọkievoo. Diesorọ? Kidie avwanre fẹnẹre. Dohwo dẹro ro vwo nẹ emu. Ẹkuruemu, asan ra dia ghwanre kugbe obo re rhiẹromrẹ vwẹ akpeyeren re se toroba oborẹ avwanre roro iroro wan. Ẹkẹvuọvo, e jẹ a vwẹ uphẹn kẹ ẹro avwanre ohwo ọvuọvo vwo nẹ emu nẹ o gbowọphiyọ ufuoma kugbe okugbe rọhẹ ukoko naa.—Ẹfe. 4:3.

3. Die yen sa nẹrhẹ a vwẹ oniọvo vwo guẹdjọ fikirẹ orhiẹn ro bruru?

³ Oniọvo de brorhiẹn rọ vẹ ọ rẹ avwanre shephiyọ ọvoo, a sa davwẹngba vwọ vuẹ nẹ o wene ẹwẹn rọyen yẹrẹ vuẹ ihwo efa kpahọn. Ọ sa dianẹ omamọ rẹ ẹwẹn yen mu avwanre vwo ru ọtiọyen. Avwanre guọnọ erhuvwu iniọvo rẹ avwanre, kidie avwanre vwo ẹguọnọ rayen. (Isẹ 17:17) Ọtiọyena, avwanre guọnọre nẹ ayen brorhiẹn rẹ ayen cha viẹ idiekpọvwẹ kpahen vwẹ obaro naa, ro che ji miovwo oyerinkugbe rayen vẹ ọ rẹ Jihovaa.

4-5. Die yen ofori nẹ e ru siẹrẹ orhiẹn rẹ oniọvo vẹ ọ avwanre rhe shephiyọ ohwohwoo?

⁴ Ofori nẹ a vuẹ oniọvo rẹ avwanre kpahen ọdavwẹ rẹ avwanre vwori siẹrẹ orhiẹn rọyen vẹ ọ rẹ avwanre rhe shephiyọ ọvoo? Erọnvwọn buebun herọ re sa nẹrhẹ avwanre ru ọtiọyen yẹrẹ jẹ ọtiọyen eruo. Kerẹ udje, ọ da dianẹ avwanre riẹnre nẹ ọ guọnọ jowọ ro vwo ru orọnvwọn ọvo rọ vwọso iji ri Baibol, fikirẹ ẹguọnọ re vwo kpahọn, avwanre cha davwẹngba vwọ vwẹ ukẹcha kẹ vwọ kpọ iroro rọyen vi. (Isẹ 27:5, 6) Kẹ, die yen avwanre che ru siẹrẹ orhiẹn rẹ oniọvo na bruru rha vwọso oborẹ Baibol na taree, jẹ ọ vẹ ọ rẹ avwanre di jẹ ohwohwo eshephiyọ? A sa mrẹ ẹkpahọnphiyọ na vwẹ ẹkpo ri Baibol re mu uyono na kpahen. Avwanre “reyọ vwo guẹdjọ fikirẹ iroro rọyen rọ fẹnẹre-e.”—Rom 14:1.

⁵ Dedena, a je sa mrẹ bẹnbẹn re vwo muọghọ kẹ orhiẹn rọyen na. Vwẹ uyono nana, a cha ta ota kpahen oboresorọ re vwo muọghọ kẹ erhiẹn rẹ ihwo efa kugbe obo re se vwo ru ọtiọyen. Ẹsosuọ, e jẹ a ta ota kpahen ẹdia sansan ri shekpahen erhiẹn romobọ re sa nẹrhẹ a vwẹ iniọvo avwanre vwo guẹdjọ.

ERHIẸN ROMOBỌ VỌ YEN SA NẸRHẸ A VWẸ IHWO EFA VWO GUẸDJỌ?

6-7. Djudje evo re sa nẹrhẹ a vwẹ ihwo efa guẹdjọ fikirẹ erhiẹn rayen.

⁶ Kirobo ra ta ota kpahen siẹvure, avwanre se si ufi rẹ eta evo fikirẹ asan rẹ avwanre dia ghwanre yẹrẹ obo re rhiẹromrẹ vwẹ akpeyeren. Avwanre se roro nẹ ẹro avwanre vwo nẹ erọnvwọn yen ihwo efa ji vwo no. Jẹ, ọyena dia uyotaa. Jẹ a mrẹ idje evo. 1: Ọsẹ ọvo rọ da idi vroma yen yọnrọn oniọvo ọshare ọvo ghwanre tavwen ọ ke rhe mrẹ uyota na vughe. Ọke ọ vẹ iniọvo efa vwo kpo akpọẹriọ, ọ da mrẹ ayen re da idi. Ivun de miovwo je vuẹ ayen nẹ oborẹ ayen ruẹ na chọre. 2: Oniọvo ọvo ro mu okpọga sivwinro kpo efẹrọvo. Ọke vwọ yanran, ọ da rhe mrẹvughe nẹ oniọvo aye ọfa ji vwo ọkpọ rẹ ọga ro muro jovwo na. Oniọvo aye rẹsosuọ na guọnọ vwẹ ukẹcha phia, ọtiọyena ko kpokpo nẹ ọ je reyọ oka rẹ omaesivwon vuọvo na vwo sivwin ọrọyen na—owenẹ ọ cha kẹnoma kẹ oka rẹ emu evo yẹrẹ reyọ ihuvwun rẹ iyibo yẹrẹ e rẹ urhobo. 3: Oniọvo ọshare herọ ro kpo ẹga rẹ efian jovwo. O vwo utuoma kpahen oka rẹ akpọ ro yerin vwẹ obuko re. O vwo nyo nẹ oniọvo ọvo kpo ughworivwin vwevunrẹ ishọshi, ivun de miovwo.a

⁷ Idje efa je herọ. 4: Oniọvo ọshare ghwanre mrẹ ọke rẹ ukoko na vwọ vwẹ ẹro ọchọchọ vwo nẹ eshare ri muẹ ẹtuegban yẹrẹ eya ri kuẹ itrasa phiyọ vwo kpo uyono, aghwoghwo, ọtiọyen ji te osikoko. Dede nẹ oniọvo nana rhiẹromrẹ ewene re ruru o krinọọ na, jẹ o ji si ufi nẹ ofori iniọvo eshare vwo mu ẹtuegban yẹrẹ eya vwo ku itrasa phiyọ vwo kpo asan tiọyenaa. 5: O vwo ọkpako ọvo ro vughe oniọvo ọvo ro yono ẹbe kpobarophiyọ ro vrẹn nẹ ukoko na. Enẹna, eghene ọvo rọhẹ ukoko rẹ ọkpako yena guọnọ yono ẹbe kpobarophiyọ. Kidie nẹ oshọ muẹ ọkpako na, ọ da davwẹngba vwọ vuẹ eghene na kugbe ọsẹ vẹ oni rọyen nẹ ayen wene ẹwẹn rayen.

8. (a) Die yen sa nẹrhẹ ọmiọvwọn reyọ esẹ vẹ ini efa vwo guẹdjọ? (b) Idjerhe vọ yen uruemu ra vwọ reyọ ihwo efa vwo guẹdjọ se vwo miovwo okugbe rẹ ukoko na?

⁸ Ni ẹdia ọvo ro shekpahen emiọvwọn. 6: Kerẹ ọmiọvwọn, wọ wian gangan wo vwo yono emọ wẹn “vwẹ ọghwọku kugbe uchebro ri Jihova.” (Ẹfe. 6:4) Jẹ emiọvwọn efa re dia Inenikristi vwẹ uphẹn kẹ emọ rayen vwo ruẹ obo ri je ayen jẹ ọ dia ọtiọyen wọ ruẹẹ. Kerẹ udje, ayen vwẹ uphẹn kẹ emọ rayen nẹ e dia ada kri, te ividio gemu rẹ ozighi hephaa, yẹrẹ emọ na ghwanra te emuọvo ayen kẹ dẹ ifonu kẹ ayeen. Ọnana me rhe nẹrhẹ ọmọ wẹn no nẹ wọ djoma. Ayen sa ta, “Diesorọ wo rhe ruẹ kirobo rẹ ọsẹ vẹ oni rẹ ugbeyan mẹ ruẹẹ?” Ẹdia nana sa nẹrhẹ wọ vwẹ ọsẹ vẹ oni rẹ emọ ri chekọ na vwo guẹdjọ. Uyota nẹ, ẹghwọ sa vwomaphia siẹrẹ orhiẹn rẹ oniọvo ọfa vẹ ọ rẹ avwanre rhe shephiyọ ohwohwoo. Kerẹ udje, a sa reyọ vwo guẹdjọ fikirẹ obo rọ ghwọrọ igho wan, uchabọ ro kpo omaerovwon kugbe oka rẹ erọnvwọn rọ reyọ vwọ diotọ. Ọtiọyena, ọ dia oborẹ oma ruẹ avwanre yen ma ghanre vrẹ okugbe rọhẹ ukoko naa.

9. Die yen ofori nẹ a karophiyọ? (Ni ifoto na.)

⁹ Dede nẹ erhiẹn rẹ Onenikristi ọvo sa fẹnẹ ọ rẹ ọfa, ọ dia ọyen o vwo mudiaphiyọ nẹ o rẹ ohwo ọvo chọre, ọ ro chekọ gbaree. (Rom 14:5) Siẹrẹ a da ta ota kpahen iwan ri Jihova, a vuẹ Inenikristi nẹ ayen “vwo iroro ọvo” jẹ ọ dia ọyen o vwo mudiaphiyọ nẹ ayen che vwo ọkpọ iroro ọvo vwẹ kẹdia kẹdiaa. (2 Kọr. 13:11) A sa reyọ erhiẹn romobọ avwanre vwo dje ojẹ rẹ avwanre jẹ siẹrẹ a da guọnọ kpo asan. Ọke buebun na, o vwo idjerhe sansan ra sa wan vwo kpo asan ọvo. Avwanre sa jẹ ojẹ ra vwọ wan ọ ro me yovwin yẹrẹ ọ je avwanre. Ọtiọyen ọ je hepha nẹ, siẹrẹ e de bru erhiẹn romobọ, Inenikristi sa jẹ ojẹ re fẹnẹ ohwohwo, jẹ oborẹ avwanre tẹnrovi ọvuọvo, kọyen re vwo ru obo re vwerhan Jihova oma. Ọtiọyena, avwanre vwẹ ihwo efa vwo guẹdjọ fikirẹ erhiẹn rẹ ayen bruruu.—Mat. 7:1; 1 Tẹsa. 4:11.

DIESORỌ E VWO MUỌGHỌ KẸ ERHIẸN RẸ IHWO EFA?

10. Vwo nene obo rehẹ Jems 4:12, die yen avwanre vwo uturhi re vwo ruu, kẹ diesorọ?

¹⁰ Baibol na vwẹ iroro sansan vwọphia kpahen oboresorọ re vwo muọghọ kẹ erhiẹn rẹ ihwo efa. Jẹ a mrẹ evo rayen. Avwanre vwo uturhi ra vwọ reyọ ihwo efa vwo guẹdjọ kpahen eta romobọ rayeen. (Se Jems 4:12.) Kidie Jihova yen Ojurhi kugbe Oguẹdjọ rẹ avwanre. Ọyen ọvo yen vwo uturhi rọ vwọ reyọ iwan rẹ obo ri yovwirin vẹ obo re brare kugbe iji vwo mu kẹ avwanre vwẹ akpeyeren. Ọtiọyena, Jihova yen iniọvo avwanre cha niyẹnrẹn kẹ, ọ dia avwanree. (Rom 14:10) Avwanre vwo ẹgba rẹ avwanre vwọ reyọ ihwo efa vwo guẹdjo kidie nẹ erhiẹn rẹ ayen bruru fẹnẹ e rẹ avwanree.b

11. Mavọ yen e se vwo toroba okugbe rọhẹ ukoko na? (Ni ifoto na.)

¹¹ Jihova guọnọre nẹ ihwo rọyen dia vwọrẹ okugbe, ukperẹ ayen eje vwọ dia abavo. Vwọrẹ uyota, doka doghẹre rẹ erọnvwọn eje yen Ọghẹnẹ vwo omavwerhovwẹn kpahen! A mrẹ ọnana vughe vwẹ obo rọ mare. o vwo ẹbe ivẹ rehẹ urhe re họhọ ọvoo. Gbe ji nẹ ihworakpọ. Ihwo re vrẹ oduduima ẹrenren yehẹ akpọ na jẹ o vwo oborẹ ihwo ivẹ họhọ oma te vwẹ opharo yẹrẹ uruemu, ofẹnẹ di jẹ diaa. Jihova ma avwanre eje vwọ fẹnẹ ohwohwo. Ọ guọnọre nẹ avwanre eje họhọ ohwohwo gbaieen. Ẹkẹvuọvo, ọ guọnọrẹ nẹ e ru kugbe. Ọtiọyena, ukpe ra vwọ vwẹ uphẹn kẹ ofẹnẹ nana nẹ o phi ohra phiyọ uvwre avwanre, ke ruẹ obo re se ru eje rere ufuoma sa vwọ dia ohri rẹ avwanre. Ọ dia ẹro rẹ avwanre vwo nẹ emu vẹ obo ri je avwanre yen ma ghanree, ẹkẹvuọvo okugbe rọhẹ ukoko na.—Rom 14:19.

OBO RE SE VWO MUỌGHỌ KẸ ERHIẸN RẸ IHWO EFA

12-13. Die yen ofori nẹ a kọnphiyọ ẹwẹn e de no nẹ ohwo “jowọ rọ chọre”? (Galesha 6:1; ni ekpeti na “Ovwan rha rhọnvwephiyọ ohwohwoo.”)

¹² Erhiẹn romobọ rẹ ihwo efa. Nọ oma wẹn, ‘Owọ rọ chọre yen ohwo na jẹre gbanẹ orhiẹn rọyen de fẹnẹ ọ mẹ?’ Ọ da dianẹ ọ jowọ rọ chọre rọ vwọso Baibol na, nọ oma wẹn, ‘Mẹvwẹ yen fo ohwo rọ vwẹ ọkpọvi vwọ kẹ gbanẹ o vwo ohwo ọfa ro muwan vrẹ vwẹ ro se ru ọtiọyen?’ Ọtiọyena, wo de no nẹ wo fo ohwo rọ sa vwẹ ukẹcha phia, gba ta ota kẹ vẹ ẹwẹn ri dẹndẹn. (Se Galesha 6:1.) Ọke buebun na, wọ sa mrẹ nẹ ọ dia orhiẹn rẹ ohwo na vwọso Baibol naa, ẹkẹvuọvo ọ de fẹnẹ ọ wẹn. Ọ da dia ọtiọyen, wọ nọ yẹrẹ ta eta ebrabra kpahen orhiẹn rọ bruruu. Muọghọ kẹ, wọ reyọ vwo guẹdjọọ.—Rom 14:2-4.

¹³ Roro kpahen udje nana: E gbe dje nẹ wọ vẹ ugbeyan wẹn kpo asan ra da sa emu ria, wọ cha gba nẹ ọ dẹ oka rẹ emu ru wọ guọnọ re? Ẹjo. Wọ cha vwẹ uphẹn kẹ nẹ ọ dẹ oka ro jere. Kidie, emu vuọvo te we vwẹ ọka rẹ emu rọ guọnọ ree. Ọ da rha dia o wẹwẹ, wọ cha rhọnvwe nẹ ọ gba wẹ vwọ dẹ oka rẹ emu ro je wee. Vwẹ idjerhe vuọvo na, e se muọghọ kẹ ihwo efa womarẹ a vwọ vwẹ uphẹn kẹ ayen vwo bru erhiẹn romobọ rayen, ukpe ra vwọ gba ayen vwo ru oborẹ avwanre guọnọre.

14. Wo de bru erhiẹn romobọ, die wo se ru vwo toroba okugbe rẹ ukoko na? (1 Kọrẹnt 8:12, 13)

¹⁴ Siẹrẹ wo de bru erhiẹn romobọ. Wo se toroba okugbe rẹ ukoko womarẹ wo vwo ru obo wo se ru eje vwọ kẹnoma kẹ erọnvwọn re sa nẹrhẹ ivun miovwẹn iniọvo rẹ avwanre. (Se 1 Kọrẹnt 8:12, 13.) Ọkievo, wọ sa riẹn nẹ obo wọ guọnọ ruẹ chọree kidie “urhi” rhọnvwephiyọ. Kẹ, o rhe “fierere” kẹ oniọvo wẹẹn, ivun rhe che miovwon?c (1 Kọr. 10:23, 24) Vwẹ ẹdia tiọyena, ukperẹ wo vwo si isiesi nẹ wo vwo uturhi wo vwo ru obo ru wọ guọnọ ru, kpairoro vrẹ. (Rom 15:1) Jẹ, ọ dia e ghwe yono nẹ ihwo efa muọghọ kẹ erhiẹn avwanre? E. Ofori ayen vwo muọghọ kẹ erhiẹn rẹ avwanre, ọtiọyen avwanre ji che ru kpahen erayen. Ẹkẹvuọvo, o ji fo nẹ a kọn uchebro rọhẹ Rom 12:18 phiyọ ẹwẹn, rọ tare nẹ: ‘Ọ da dia oborẹ ovwan se ru, ovwan nene ihwo eje yerin vwọrẹ ufuoma.’ Ọtiọyena, e je ru obo re se ru eje vwo nene ihwo efa yerin vwọrẹ ufuoma, je kẹnoma kẹ erọnvwọn rẹ sa nẹrhẹ ivun miovwo ayen.

15. Idjerhe vọ yen ekpako na se vwo toroba okugbe rẹ ukoko na? (1 Kọrẹnt 4:6)

¹⁵ Ekpako muọghọ kẹ erhiẹn rẹ ihwo efa. Ekpako toroba okugbe rẹ ukoko na siẹrẹ ayen rhe se irhi ri shekpahen erhiẹn romobọ rẹ ihwo efaa, ọtiọyena ayen rhe ruẹ “vrẹ obo re si phiyotọ” vwẹ Baibol naa. (Se 1 Kọrẹnt 4:6.) Vwọba, ayen ji ruẹ vrẹ obo re si phiyọ ẹbe rẹ ukoko naa. Ọtiọyena, siẹrẹ oniọvo da nokpẹn rẹ ukẹcha, e jẹ ekpako nomaso siẹrẹ ayen da vwẹ uchebro phia, e jẹ ayen vwẹroso oma rayeen. Ukperẹ ọtiọyen, e jẹ ayen muẹ uchebro na kpahen Ota rẹ Ọghẹnẹ.—Aiz. 48:17, 18.

16. Mavọ yen ọkpako se vwo muọghọ kẹ erhiẹn rẹ ekpako ri chekọ bruru?

¹⁶ O ji fo ọkpako vwo muọghọ kẹ erhiẹn rẹ ekpako ri chekọ bruru. Ekpako na eje da yare ukẹcha rẹ ẹwẹn ọfuanfon na, fuẹrẹn ji nene odjekẹ ri Baibol na ji kunugbe rhọnvwephiyọ oborẹ ayen guọnọre nu, e jẹ ọkpako ọvuọvo bicha orhiẹn rẹ ekpako ri chekọ bruru na, ọ da tobọ dianẹ ọ vwọso obo rọ guọnọre. (Ẹfe. 5:17) Vwọba, ofori nẹ ekpako jomaotọ kpahen oborẹ ayen reyọ Baibol na vẹ ẹbe rẹ ukoko na vwo ruiruo wan. Kerẹ udje, ọ chọre ọkpako vwo rionbọ kpo irhiẹ rẹ eta evo vwẹ ẹbe ukoko vwo djephia nẹ obo rọ ta yen ghene gba jẹ o ji se ọsoso uyovwinrota na ree.

17. Erere vọ yen te avwanre obọ e de muọghọ kẹ erhiẹn rẹ ihwo efa?

¹⁷ Kirobo re yonori, avwanre eje fẹnẹre. Dohwo do obo ri je vẹ ẹro ro vwo nẹ emu. Ọfẹnẹ nana yovwirin mamọ! Asan ra dia ghwanre vẹ uruemu rẹ avwanre rọ fẹnẹ ohwohwo yen nẹrhẹ ukoko na dia uvi rẹ asan rẹ avwanre sa dia. Ọtiọyena, ukpe ra vwọ vwẹ uphẹn kẹ ofẹnẹ nana nẹ o phi ohra phiyọ uvwre rẹ avwanre, ke toroba ufuoma rọhẹ ukoko na. Avwanre kẹnoma kẹ erọnvwọn ri miovwẹn ihwo efa ivun, ji muọghọ kẹ erhiẹn rẹ ihwo efa. Jihova che bruba ẹgbaẹdavwọn rẹ avwanre e de ru ọtiọyen. Ọtiọyena, ka sa riavwerhen rẹ okugbe rẹ ukoko na.—Une. 133:1; Mat. 5:9.