Ru Oyerinkugbe Wẹn vẹ ọ ri Jihova Gan Ọke Wo de Yono Ẹbe

1-2. (a) Die yen ofori nẹ wo ru wọ da jojẹ wo vwo yono ẹbe kpobaro? (b) Die yen o mudiaphiyọ ra vwọ “yan obaro vwẹ idjerhe vuọvo na”? (Filipae 3:16)

IDIBO ri Jihova evo ri wontọ nẹ ikọleji re brorhiẹn rẹ ayen vwo yono ẹbe kpobaro. Ayen se no nẹ ẹbe eyono tiọyena cha vwẹ ukẹcha kẹ ayen vwọ mrẹ iruo vwọ vwẹrote oma rayen vwẹ ẹga rẹ ayen vwọ kẹ Jihova. Ọ da dianẹ wọ jojẹ wo vwo yono ẹbe kpobarophiyọ, mavọ yen wo se vwo ru oyerinkugbe wẹn vẹ ọ ri Jihova rọ vwọ dia kpẹkpẹkpẹ? (Jems 4:8a) Aphro herọọ nẹ wo hirharoku ẹdia sansan re davwen esegbuyota wẹn ni wo vwo kpo isikuru vwẹ obuko re. Enẹna a je guọnọ nẹ wọ “yan obaro vwẹ idjerhe vuọvo na”—kọyen wọ vwọ ga Jihova ọkieje kirobo wo ji ruẹ jovwo.—Se Filipae 3:16.

² Ọkieje ra da reyọ ota ri Grik ra fan phiyọ “yan obaro vwẹ idjerhe vuọvo na” vwo ruiruo, a reyọ vwo djisẹ oyan rẹ isodje ro nene ọrhuẹrẹphiyotọ. Wo de brorhiẹn wo vwo yono ẹbe kpobaro, o ji fo nẹ wọ “yan obaro” vwẹ ẹga ri Jihova ọkieje, ọ dianẹ wo che mudje vwẹ asan ọvo yẹrẹ sioma ukoo. Vwẹ uyono nana, a cha ta ota kpahen odjekẹ ri Baibol ẹne re sa vwẹ ukẹcha kẹ wẹ. Odjekẹ nana dia emu ọrhorha kẹ wẹẹ. Ọ vwọ dianẹ wọ reyọ ayen vwo ruiruo vwẹ obuko re na, a je guọnọ nẹ wọ reyọ ayen vwo ruiruo ọkieje asaọkiephana, ọtiọyen ji te ọke wo de wontọ nu.

VWOBỌ VWẸ ERỌNVWỌN RE CHA NẸRHẸ OYERINKUGBE WẸN VẸ Ọ RI JIHOVA GAN

3. Erhọ yen egbabọse evo ri se gbowọphiyọ oyerinkugbe wẹn vẹ ọ ri Jihova ru wo vwo yono ẹbe kpobarophiyọ na?

³ Egbabọse re herọ. Ẹbe eyono sa nẹrhẹ eghwa ru wo vwori bunphiyọ rọ sa nẹrhẹ oyerinkugbe ru wo vwori vẹ Jihova dogho obọ. Kidie nẹ wọ guọnọ yanphiaro vwẹ ẹbe eyono wẹn na, ọnana sa nẹrhẹ wọ vwẹ ẹro okueku vwo nẹ ẹga wọ vwọ kẹ Jihova. Wọ sa tobọ gbe ẹdẹ rẹ uyono, iruo rẹ aghwoghwo na, uyono ri Baibol romobọ kugbe ẹrhovwo ẹnẹ.—Ẹvwọ. 2:4.

4. Die yen sa vwẹ ukẹcha kẹ wẹ vwo vwo ‘iruo buebun vwevunrẹ Ọrovwori na’? (1 Kọrẹnt 15:58)

⁴ Se 1 Kọrẹnt 15:58. Kirobọ rẹ idjighere nabọ muẹdia ọke ra da djẹ ye, ọtiọyen oyerinkugbe wẹn vẹ ọ ri Jihova je cha dia wo de vwo ‘iruo buebun ru wo ruẹ vwevunrẹ Ọrovwori na,’ kọyen ẹga ri Jihova. Ọnana diẹ wọ de vwọ ghwọrọ ọke vwẹ irueru ẹga na ọvoo, ofori nẹ wo nẹ ayen ghanghanre. Ẹsosuọ ni oma wẹn kerẹ odibo ri Jihova wo ki nẹ oma wẹn kerẹ ohwo ro kpo isikuru. (Mat. 22:37) Oniọvo aye ọvo re se Samantha da ta, “Me vuẹ oma mẹ nẹ me cha dobọ rẹ isikuru ji siẹrẹ ẹbe eyono mẹ de gbowọphiyọ ẹga re me vwọ kẹ Jihova.”

5. Die wo se ru vwo muomaphiyọ ẹga ri Jihova?

⁵ Obo wo se ru wọ ke ton ẹbe eyono wẹn phiyọ. Vwẹ ẹga ri Jihova vwọ ka obaro. Nọ ọma wẹn, ‘Ọrhuẹrẹphiyotọ vọ yen mi vwori mi se vwo kpo uyono, aghwoghwo, ji ru uyono romobọ ọkieje?’ (Jos. 1:8; Mat. 28:19, 20; Hib. 10:25) Ji kperan: Mavọ yen me sa vwọ vwẹ ẹga ri Jihova vwọ kobaro ọke mi vwo kpo isikuru vwẹ obuko re? Wo de no nẹ o vwo asan evo ro fori nẹ wo de ru yovwinphiyọ, erhọ yen ewene evo wo se ru enẹna? Ọtiọyena vwo owenvwe wo vwo muomaphiyọ ẹga ri Jihova wo vwo yono ẹbe kpobarophiyọ na. Gbẹrophiyọ ẹbe eyono wẹn—jẹ ọ dia ọyen wọ cha vwọ reyọ ẹga ru wọ vwọ kẹ Jihova vwo gbe otọọ.a—Mat. 6:24.

6. Enọ vọ yen wọ sa vwọ fuẹrẹn oma sẹ wọ je vwẹ ẹga ri Jihova ka obaro? (Ni ifoto na.)

⁶ Vwẹ ọkieje vwọ fuẹrẹn oma wẹn kemeranvwe kemeranvwe wo vwo yono ẹbe na. Nọ oma wẹn, ‘Ẹga ri Jihova yen me je vwọ ka obaro?’ Nomaso sẹ wo gbe kpuko—kerẹ udje, mi gbe ẹdẹ uyono yẹrẹ mi kruko, me dahẹ evunrẹ uyono, ẹwẹn mẹ djẹ kpo ewian ra vwọ kẹ vwẹ vwẹ obẹ isikuru, yẹrẹ zoom ọvo yen me da guọnọ vwomaba uyono? Vwọba, ji vwo oniso sẹ ẹrhovwo ẹnẹ wẹn vẹ isese ri Baibol wẹn dogho obọ re yẹrẹ sẹ wo di kpo aghwoghwo vẹ ẹwẹn nẹ e ru kpakpata rere mi rhivwin kpo. Wọ da mrẹ iruemu tiọyena re vwomaphia, gbe ru ewene kpahọn kpakpata. Wọ vwẹ uphẹn kẹ ẹbe eyono wẹn rere wo vwo jẹ ẹga ri Jihova ẹ vwọ ka obaroo.

“SẸRO RẸ ẸGBA RẸ IRORO WẸN”

7. Mavọ yen ẹbe eyono se vwo gbowọphiyọ obo ru wo roro iroro wan?

⁷ Egbabọse re herọ. Vwọ kpahen oborẹ wọ guọnọ yono vwẹ isikuru, e se yono uwe kpahen “aghwanre kugbe ophiẹnvwe ofefe” rẹ akpọ na, ọtiọyen ji te uyono rẹ Ọghenẹ herọọ kugbe arhọ mamarhe. (Kọl. 2:8) Ọnana se titẹ ẹwẹn ra vwọ vwẹroso omobọ. Oniọvo eghene ọvo da ta: “Ọ dia obo ra tẹn ona ọvo yen e yono avwanree; e ji yono avwanre obo re roro iroro, jẹ ọke buebun na, ọ vẹ iroro ri Jihova shephiyọ ọvoo. Kerẹ udje, e yono avwanre nẹ a da guọnọ oyovwen vwẹ akpeyeren obọ avwanre yen ọ hepha. Oka iroro nana sa nẹrhẹ e no nẹ ọ dia obọ ri Jihova yen oyovwen nẹchaa. Ọnana nẹrhẹ me mrẹ bẹnbẹn me vwọ vwẹrosuọ.”

8. Diesorọ ọ vwo ghanre wọ vwọ “sẹro rẹ ẹgba rẹ iroro wẹn”? (Isẹ 5:1, 2)

⁸ Se Isẹ 5:1, 2. Baibol na si we orhọ nẹ wọ “sẹro rẹ ẹgba rẹ iroro wẹn.” Ra vwọ sẹro rẹ orọnvwọn mudiaphiyọ nẹ o vwo ohwo rọ guọnọ miovwo. Uyota nẹ, o ji vwo ohwo rọ guọnọ miovwẹn ẹgba rẹ iroro rẹ avwanre. (1 Pita 5:8) Ẹro rẹ akpọ na vwo nẹ obo ri yovwirin vẹ obo re brare, oborẹ arhọ tonphiyọ wan kugbe sẹ Ọghẹnẹ herọ sa nẹrhẹ esegbuyota rẹ avwanre phieghe. Ihwo evo sa vwẹ iroro rayen phia nẹ iyin me yovwin, jẹ i fie emuọvoo. Vwọrẹ uyota, iroro rayen “emu rẹ ẹkpa vwọ kẹ Ọghẹnẹ.”—1 Kọr. 3:18-20.

9. Die wo se ru vwọ sẹro rẹ ẹgba rẹ iroro wẹn?

⁹ Obo wo se ru wọ ke ton ẹbe eyono wẹn phiyọ. Wọ sa vwọ sẹro rẹ ẹgba iroro wẹn, vwo nẹ imuẹro esegbuyota wẹn kpahen Baibol na ganre tavwẹn wọ ke jowọ ru wo vwo yono ẹbe kpobarophiyọ. Nọ oma wẹn enọ kerẹ: ‘Diesorọ mi vwo vwo imuẹro kpahen Ọghẹnẹ? Mavọ mi ru riẹn nẹ Baibol na Ota rọyen? Die yen kẹ vwẹ imuẹro nẹ iwan rẹ obo ri yovwirin vẹ obo re brare rehẹ Baibol na yovwin vrẹ e rẹ akpọ na?’ Ji kperan: Aphro herọọ nẹ wo ji rhiẹromrẹ iroro rẹ akpọ na ọke wo vwo kpo isikiru vwẹ obuko re. Wọ vwọ mrẹ nẹ ihwo vwo imuẹro kpahen uyono rẹ erọnvwọn mamarhe, ọnana nẹrhẹ esegbuyota wẹn shekpotọ? Iruemu ebrabra rẹ ihwo ru wọ vẹ ayen gbe yono ẹbe kuẹgbe dino nẹrhẹ wo she ro odavwini? Wo de no nẹ o vwo asan evo ro fori nẹ wo de ru yovwinphiyọ vwẹ obuke re, mavọ yen wo se vwo ru esegbuyota wẹn ganphiyọ enẹna? Davwẹngba vwọ sẹro rẹ ẹgba iroro wẹn wo vwo yono ẹbe kpobarophiyọ na.—2 Tim. 2:16-18.b

10. Mavọ yen wọ sa vwọ sẹro rẹ ẹgba iroro wẹn ọkieje?

¹⁰ Vwẹ ọkieje vwọ fuẹrẹn oma wẹn wo vwo yono ẹbe kpobarophiyọ na. Nọ oma wẹn ‘Me vwẹ uphẹn kẹ erharhe iruemu rẹ ihwo re riariẹ ovwẹ phiyọ nẹ e phoriẹn mu vwe oma? Me sa mrẹ aghwanre ofefe rehẹ evunrẹ akpọ na? Mi vwo imuẹro nẹ Uvie rẹ Ọghẹnẹ ọvo yen se si ebẹnbẹn rẹ ihworakpọ no?’ Vwẹ ọkieje vwo yono ota rẹ Ọghẹnẹ wọ sa vwọ sẹro rẹ ẹgba iroro wẹn. Wo de yono Baibol na ji roro kokodo kpahọn, ọnana cha vwẹ ukẹcha kẹ wẹ vwọ riẹn nẹ oborẹ Baibol na tare eje uyota.—1 Tim. 4:15.

REYỌ ỌKE WẸN VWO RUIRUO VWẸ IDJERHE AGHWANRE

11. Egbabọse vọ yen wo se hirharoku kpahen obo wọ sa vwọ reyọ ọke wẹn vwo ruiruo?

¹¹ Egbabọse re herọ. Ọmọrhiẹ ọke yen ẹbe eyono cha reyọ mie wee, ma rho ọ da dianẹ wo muẹgbe rẹ ọdavwini yẹrẹ o vwo ọke re bru kẹ wẹ wọ vwọ wian owian ra vwọ kẹ wẹ re. Ọtiọyena wọ rha vwẹ aghwanre vwọ reyọ ọke wẹn vwo ruiruoo, oma se bru we ku te ẹdia rẹ ẹgba vuọvo re che rhe wee. Ọnana yen sorọ o vwo fo wọ vwọ vwẹrote oma wẹn.

12. Erhọ yen erọnvwọn evo ro fori nẹ wo ru wọ vwọ reyọ “ọke wẹn vwo ruiruo vwẹ idjerhe ro me yovwin”? (Ẹfesọs 5:15, 16)

¹² Se Ẹfesọs 5:15, 16. Wọ sa mrẹ bẹnbẹn wọ vwọ reyọ ‘ọke wẹn vwo ruiruo vwẹ idjerhe ro me yovwin.’ Ọtiọyena ofori nẹ wo vwo ẹro abavo kidie o vwo erọnvwọn buebun wọ cha reyọ ọke wẹn vwo ru. Kerẹ udje, vwọ vrẹ ẹbe eyono wẹn, o ji fo nẹ wo nene iniọvo na kugbe ihwo orua wẹn ghwọrọ ọke kugbe. (Une 133:1; Isẹ 18:1) Ẹkẹvuọvo, erọnvwọn re cha nẹrhẹ oyerinkugbe wẹn vẹ ọ rẹ Jihova ganphiyọ yen ofori nẹ wọ vwọ kobaro. (Mat. 6:33) Vwọba, ọ sa dianẹ wo vwo iruo vẹ orua wọ vwẹrote. O ji fo wọ vwọ vwẹrote ẹdia rẹ omakpokpọ wẹn womarẹ wọ vwọ sasa oma je nabọ rovwoma. (Aghwo. 4:6; 1 Tim. 4:8) Wọ sa vwọ nabọ vwobọ vwẹ erọnvwọn nana eje, ofori nẹ wọ rhuẹrẹ ọke phiyọ.

13. Die yen wo se ru vwọ reyọ ọke wẹn vwo ruiruo vwẹ idjerhe ro me yovwin?

¹³ Obo wo se ru wọ ke ton ẹbe eyono wẹn phiyọ. Baibol na tare nẹ, erere nocha siẹrẹ a da jiroro phiyotọ. (Isẹ 21:5) Vẹ ọyena vwẹ ẹwẹn, vwo ọrhuẹrẹphiyotọ ru wọ sa yanmu tavwen wọ ke ton ẹbe eyono wẹn phiyọ. Wo se vwo ru ọtiọyen, kperan rẹ obo re vwẹ ukẹcha kẹ wẹ vwẹ obuko re: Mavọ yen wọ reyọ ọke wẹn vwo ruiruo wan wo vwo kpo isikuru vwẹ obuko re? Wo de no nẹ o vwo asan evo ro fori nẹ wo de ru yovwinphiyọ, erhọ yen ewene evo wo se ru enẹna? Ọtiọyena, davwẹngba vwo sun ọke wẹn, ukperẹ wọ vwọ vwẹ uphẹn kẹ ọke nẹ o sun we.c

14. Enọ vọ yen sa vwẹ ukẹcha kẹ wẹ vwọ fuẹrẹn oma wẹn?

¹⁴ Vwẹ ọkieje vwọ fuẹrẹn oma wẹn wo vwo yono ẹbe kpobarophiyọ na. Nọ oma wẹn: ‘Ọrhuẹrẹphiyotọ ri mi vwori vwẹ uphẹn kẹ vwẹ me vwọ sasa oma je nabọ rovwoma? Mi ji vwo ọke me vẹ iniọvo ukoko na sa ghwọrọ kugbe? Me fobọ mrẹ ọke vwo ruiruo ra vwọ kẹ vwẹ vẹ ewian efa re? Ọ rha dia ọtiọyeen, ewian bun vwe abọ yen sorọ gbanẹ mi bibe? Ihwo orua vẹ ihwo efa che no nẹ ofori nẹ mi ruẹ ewene?’ Owenẹ ọrhuẹrẹphiyotọ wẹn na guọnọ ewene yẹrẹ wọ cha nabọ gbomavwra, ruo kpakpata. Wọ sa tobọ nokpẹn rẹ ukẹcha mie ihwo efa re riẹn obo ra reyọ ọke vwo ruiruo.—Isẹ 11:14.

“NENE ỌVWAGHWANRE YAN” ỌKIEJE

15. Egbabọse vọ yen wo se hirharoku wo vwo yono ẹbe kpobarophiyọ na?

¹⁵ Egbabọse re herọ. Wo vwo yono ẹbe kpobarophiyọ na, ihwo rẹ wẹ vẹ ayen gbe kpo isikuru sa vuẹ wẹ nẹ wọ vwomaba ayen vwo ruẹ erọnvwọn rẹ ayen ruẹ siẹrẹ isikuru de kuphiyọ nu. Kidie nẹ ovwan ghwọrọ ọke buebun vwẹ iklasi, o ji vwo erọnvwọn buebun rẹ ovwan ruẹ kuẹgbe, urhurusivwe wọ vwọ vwomaba ayen se rhe we. Wo se no nẹ o vwo erọnvwọn buebun wẹ vẹ ihwo rẹ isikuru wẹn ruẹ kuẹgbe vwọ vrẹ iniọvo ukoko na evo. Ẹkẹvuọvo, ofori nẹ wọ jomaotọ. Dede nẹ iklasi vuọvo yen wẹ vẹ ihwo rẹ isikuru wẹn hepha, jẹ ọ dia esegbuyota vuọvo yen ovwan vworii. Wẹ vẹ ayen vwọ ghwọrọ ọke kuẹgbe phiyọ ye, jẹ uruemu rayen phoriẹn mu we phiyọ. (1 Kọr. 15:33) Michael rọ vwẹ ẹgbukpe ẹne vwo yono iruo rẹ ẹlẹtriki mrẹ uyota rẹ ọnana vughe. Ọ da ta: “Kudughwrẹn kudughwrẹn yen ihwo rẹ me vẹ ayen gba wian vwẹ asan ọvo re vwẹ omamọ ẹro vwo nẹ eyaa, ri hworo erharhe rẹ ine, re je ta eta igbongbon vwọ ghwọrọ inọke re vrẹ 40 kuẹgbe. Ọke vwọ yanran na iruemu rayen na da rhe phoriẹn mu vwe.”

16. Re vwo “nene ọvwaghwanre yan,” die yen o mudiaphiyọ? (Isẹ 13:20)

¹⁶ Se Isẹ13:20. Baibol na si avwanre orhọ kpahen imuoshọ re herọ siẹrẹ e de mu erharhe igbeyan. Vwọ fẹnẹ ọyena, “ohwo ro nene ọvwaghwanre yan che vwo aghwanre.” Obo ra ta na kọna: Iruemu rẹ ihwo re nene ghwọrọ ọke kuẹgbe sa phoriẹn mu avwanre, ọnana sa ghwa erhuvwu yẹrẹ umiovwon rhe. Vwẹ ugbeyan mu ihwo ri vwo ọdavwẹ wẹn—ihwo rẹ vwẹ ubiudu rayen eje vwọ ga Jihova kirobo ru wo ji ruẹ.—Une 101:6, 7; 119:63.

17. Die yen wo se ru vwọ kẹnoma kẹ erharhe igbeyan?

¹⁷ Obo wo se ru wọ ke ton ẹbe eyono wẹn phiyọ. Gbere ughwru phiyọ uchọke wẹ vẹ igbeyan wẹn cha ghwọrọ kugbe. Oniọvo ọvo re se Trenton da ta: “Me vẹ ihwo rẹ isikuru mẹ riẹn yerẹn, ẹkẹvuọvo mi nene ayen ghwọrọ ọke kuẹgbe siẹrẹ isikuru de kuphiyọ nuu. Mi nẹ ayen kerẹ ihwo me vẹ ayen gba hẹ iklasi, ọ dia igbeyan re kẹrẹ ovwẹẹ.” Bro ọke yen wẹ vẹ ayen cha ghwọrọ kugbe? Wọ sa vwọ kpahenphiyọ onọ yena, kperan: Bro ọke yen wẹ vẹ ihwo rẹ isikuru wẹn ghwọrọ kugbe vwẹ obuko re? Wo de no nẹ o vwo asan evo ro fori nẹ wo de ru yovwinphiyọ, erhọ yen ewene evo wo se ru enẹna? Davwẹngba vwo “nene ọvwaghwanre yan” ọkieje, wọ je kẹnoma kẹ igbeyan ri vwo ẹguọnọ ri Jihovaa.d

18. Enọ vọ yen ofori nẹ a vwọ fuẹrẹn oma rẹ avwanre? (Ni ifoto na.)

¹⁸ Fuẹrẹn oma wẹn nọke aruọke. Nọ oma wẹn: ‘Oyerinkugbe mẹ vẹ ọ rẹ ihwo me vẹ ayen gbe kpo isikuru kpẹkpẹ phiyọ? Uruemu vẹ oborẹ ayen ta ota wan ghworo uvwe te ẹdia rẹ me da vwẹrokere oborẹ ayen ta ota vẹ oborẹ ayen roro iroro wan? Mavọ yen oma che ru Jihova vwọ kpahen oyerinkugbe mẹ vẹ ọrayen?’ (Une 1:1) Wo de noso nẹ o vwo asan ro fori nẹ wo de ru ewene, ruo kpakpata. Davwẹngba wọ reyọ ihwo ri vwo ẹguọnọ ri Jihova kerẹ owẹ vwo mu igbeyan. Vwọba, wo siomauko wo vwo ghwoghwota kẹ ihwo rẹ isikuru wẹẹn. Wo vwo uphẹn oghẹresan wọ vwọ vwẹ ukẹcha kẹ ayen vwọ riẹn uyota ri Baibol na.

MUEGBE

19. Mavọ yen wo se vwo muegbe rẹ oma wẹn vwo phi egbabọse ri se miovwo oyerinkugbe wẹn vẹ ọ ri Jihova kparobọ wo vwo yono ẹbe na? Djudje rọyen.

¹⁹ Ọvwaghwanre rẹ ohwo rọ guọnọ kpo oyan vwevunrẹ oghwaghwo cha nabọ muegbe rẹ oma rọyen tavwen ọ ke ton oyan phiyọ. Dede nẹ ọ ghwa riẹn kegbabọse kegbabọse ro che hirharoku rọ vwọ yanran naa, ọ cha choma, o vwo obo rọ tẹnrovi, kọyen ọ riẹn asan rọ ra. Wo ji se ru ọtiọyen wo vwo yono ẹbe kpobarophiyọ na. Ru esegbuyota wẹn gan, ku “ekuakua ofovwin ejobi ri nẹ obọ rẹ Ọghẹnẹ rhe phiyọ,” wo ji vwo obo wọ tẹnrovi—kọyen wo vwo ru kemu kemu rọ cha ghwa urinrin rhe Jihova ukperẹ “oyovwen” rẹ akpọ na.—Ẹfe. 6:11-13; 1 Kọr. 9:26, 27; 10:31.

20. Mavọ yen wọ cha ‘rha davwan oma wẹn nẹ sẹ wọ hẹ evunrẹ esegbuyota na’?

²⁰ Baibol na tare nẹ: ‘Wọ rha davwan oma wẹn nẹ sẹ wọ hẹ evunrẹ esegbuyota na.’ (2 Kọr. 13:5) Wo se ru ọtiọyen wo vwo yono ẹbe kpobarophiyọ na. Nọke aruọke, fuẹrẹn oma wẹn vwẹ ẹdia sansan re djunute vwẹ uyovwinrota nana. Wo vwobọ vwẹ erọnvwọn re cha nẹrhẹ oyerinkugbe wẹn vẹ ọ ri Jihova gan? Wọ sẹro iroro wẹn vwo nẹ aghwanre ofefe rehẹ evunrẹ akpọ na? Wọ reyọ ọke wẹn vwo ruiruo vwẹ idjerhe rẹ aghwanre? Wọ vwẹ ugbeyan vwo muẹ iniọvo rẹ ukoko na je kẹnoma kẹ erharhe igbeyan? Enana enọ ofori nẹ wọ nọ oma wẹn owene wọ hẹ isikuru, iruo yẹrẹ asan ọfa. Davwẹngba vwọ yọnrọn esegbuyota wẹn gan vwẹ kẹdia kẹdia ru wọ hepha. Jẹ o muwẹro nẹ Jihova che bruba ẹgbaẹdavwọn wẹn wo vwo ru ọtiọyen.—Isẹ 3:5, 6.