Vwẹ Ẹro Abavo Vwo nẹ Ebẹnbẹn

1-2. Die yen e se ru vwo yerin ghene ebẹnbẹn avwanre efẹrọvo? (Ni ifoto na.)

WO HIRHAROKUẸ oshenyẹ, omukpahen ro nẹ obọ rẹ orua cha, yẹrẹ ẹvwọsuọ asaọkiephana fikirẹ esegbuyota wẹn? Wo nene omakpokpọ yẹrẹ ebẹnbẹn rẹ ọghwo ghwa cha muabọ? Okpemu ọvo phia kẹ wẹ ru wo nene muabọ gbanẹ ughwu rẹ ohwo ru wo vwo ẹguọnọ kpahen? Ọ sa dianẹ akpeyeren wẹn vọnre vẹ “okpetu kugbe omaemuophiyọ” kerẹ idibo ri Jihova buebun.​—Une 90:10.

² E se vwo yerin ghene ebẹnbẹn rẹ avwanre efẹrọvo, ofori nẹ a vwẹ ẹro abavo vwo nẹ ayen. Diesorọ ọnana vwọ ghanre? E se djudje rọyen ọtiọna: Ebẹnbẹn wo hirharokuẹ vwẹ akpeyeren pha kerẹ imuoshọ ru wọ djẹ mrẹ vwẹ idjerhe siẹrẹ wọ da djẹ imoto. Imuoshọ ru wọ mrẹ vwẹ idjerhe yen cha nẹrhẹ wọ riẹn sẹ wọ kpọ imoto na kpo obọrhen yẹrẹ obohwẹre, yọnrọn ibreki yẹrẹ domaji vwẹ ọmọke. Jẹ, wọ vwọ riẹn obo ru wo che ru, ofori nẹ wọ mrẹ imuoshọ rehẹ obaro na fiotọ. Wọ cha sa mrẹ imuoshọ na fiotọ siẹrẹ evwru de mu yẹrẹ ibehre da sare kuẹ ughegbe rẹ obaro rẹ imoto wẹẹn. Ọtiọyen ọ je hepha nẹ e se vwo yerin ghene ebẹnbẹn avwanre efẹrọvo, ofori nẹ a vwẹ ẹro rẹ Jihova vwo nẹ ayen ji vwo no. Vwẹ uyono nana, a cha ta ota kpahen (1) ẹro ro fori nẹ e vwo nẹ ebẹnbẹn avwanre, (2) obo re sa phia kẹ avwanre a da vwẹ ẹro ọchọchọ vwo nẹ ebẹnbẹn, kugbe (3) owọẹjẹ evo re sa nẹrhẹ avwanre vwo ẹro rẹ abavo siẹrẹ ebẹnbẹn da vwomaphia.

ẸRO RO FORI NẸ E VWO NẸ EBẸNBẸN

3. Die yen a cha sa vrabọ rọyen vwẹ eyeren umwemwu nanaa?

³ A cha sa vrabọ rẹ ebẹnbẹn vwẹ eyeren umwemwu nanaa. Ebẹnbẹn che te avwanre oma ọ vwọ dianẹ avwanre ihwo re gbaree ri ji yerẹn vwẹ akpọ rẹ Eshu suẹn na. Vwọba, eyeren nana vwo siẹkẹrẹ oba phiyọ na, e che hirharoku ebẹnbẹn buebun, owenẹ e rẹ ihworakpọ vwẹ obọ so, i ri mu phia kpregede, yẹrẹ i ri nẹ obọ rẹ ihwo umwemwu rhe. (Mat. 24:8; 2 Tim. 3:13) Jihova da rhuẹrẹ ebẹnbẹn re phia asaọkiephana phiyọ, kọ cha họhọ nẹ ọ vwẹ ukẹcha kẹ Eshu vwo suẹn akpọ na. Vwẹ eyeren nana, o vwẹ ọke vuọvo okpetu che vwo jẹ avwanre oma e tee.​—Aghwo. 9:12.

4. Erhọ yen ebẹnbẹn efa rẹ Inenikristi hirharokuẹ?

⁴ Ebẹnbẹn efa herọ rẹ Inenikristi hirharokuẹ. Ọkieje yen Jesu vwọ vuẹ idibo rọyen nẹ ayen che hirharoku omukpahen fikirẹ esegbuyota rayen. (Mat. 24:9; Jọn 16:2) Ọtiọyena esegbuyota rẹ avwanre rhe kpogho siẹrẹ e de muẹkpahan avwanree. (1 Tẹsa. 3:3, 4) A da fuevun chirakon kidie nẹ avwanre vwo esegbuyota rọ ganre, ke se vwo imuẹro nẹ avwanre jehẹ idjerhe ro suẹn ohwo kpo arhọ ri bẹdẹ na. Vwọba, avwanre ki se dje ẹbẹre rẹ avwanre hepha vwẹ okpota rode rọhẹ otọ vwẹ uvwre ri Jihova vẹ Idẹbono. Ọvo usun rẹ efian rẹ Eshu mu bare Jihova yen ihworakpọ vwẹ ẹga kẹ Ọghẹnẹ fikirẹ obo ro ruẹ kẹ ayen. Ọtiọyena kọ vwọso idibo ri Jihova gangan rere esegbuyota rayen vwo shekpotọ, o se vwo djephia nẹ obo rọ tare na uyota. (Job 1:9-11) E se ru ubiudu ri Jihova ghọghọ siẹrẹ e de chirakon fikirẹ ẹguọnọ re vwo kpahọn.​—Isẹ 27:11.

5. Die yen e se yono vwo nẹ Aghwoghwo 7:13, 14? (Ni ifoto na.)

⁵ Jihova vwẹ uphẹn kẹ ebẹnbẹn. Jihova ru obo re braree, ọ je reyọ obo re brare vwọ davwan avwanre nẹẹ. (Jems 1:13) Dedena, Ovie Solomọn siri nẹ “ẹdẹ rẹ ukpokpogho” ọyen “iruo rẹ Ọghẹnẹ rẹ uyota na.” (Se Aghwoghwo 7:13, 14.) Ọke buebun na, Baibol na sa tanẹ Jihova yen ru orọnvwọn na, jẹ ọ de vwẹ uphẹn kẹ nẹ ọ phia. Solomọn vwẹ omamọ uchebro vwọphia rọ sa cha avwanre uko vwọ vwẹ ẹro abavo vwo nẹ edavwini rẹ avwanre. Ẹsosuọ, ofori nẹ avwanre vwo ọmrẹvughe nẹ ọ dia ọkieje yen erọnvwọn che vwo yovwin kẹ avwanre vwẹ akpọ rẹ Eshu avwanre de yerẹn naa, o ji vwo ọke rẹ erọnvwọn cha vwọ bra. “Vwẹ ẹdẹ ro yovwin kẹ” avwanre, e se dje ọdavwaro phia kẹ Ọghẹnẹ ji ni ẹdẹ yena kerẹ okẹ ro nẹ obọ rọyen rhe. Ọrivẹ, Solomọn karophiyọ avwanre nẹ o vwo ohwo vuọvo rọ riẹn obo re cha phia vwẹ obaro naa, ọtiọyena a cha sa riẹn sẹ ẹdẹ avwanre cha bra yẹrẹ yovwiin. Ọtiọyena, ebẹnbẹn re rhẹro rọyeen se te ọvwata vẹ ohwo ro jẹ ọvwata ẹdia oma.

6. Diesorọ Jihova vwọ vwẹ uphẹn kẹ edavwini nẹ i te avwanre oma? (Hibru 12:7, 11)

⁶ A da vwẹ ẹro abavo vwo nẹ edavwini avwanre, a cha mrẹvughe nẹ Jihova yono avwanre nẹ a vwẹroso ọyen, ukperẹ omobọ avwanre. Ọkieje yen Jihova vwo vwo oniso rẹ edavwini avwanre, ọtiọyen ji te oja avwanre ria. Ọ da tobọ dianẹ ọ vwẹ uphẹn kẹ avwanre nẹ avwanre yan vwẹ “iyara ro muebri hwi,” ọkieje yen o che vwo sun avwanre, dje ẹguọnọ rọyen kẹ avwanre, je kẹ avwanre ẹgba ra guọnọre re se vwo chirakon. (Une 23:4) Ebẹnbẹn je sa nẹrhẹ a riẹn asan ra da vwiẹrẹ, kugbe asan ro fori nẹ e de ru yovwinphiyọ womarẹ ukẹcha rẹ Ọghẹnẹ. (Se Hibru 12:7, 11.) Kerẹ udje, ofori ri Job vwọ wian phiyọ uruemu rẹ omaevwokpotọ rọyen. Ọ dia Jihova yen so edavwini ri Jobuu; ẹkẹvuọvo, Ọ vwẹ uphẹn kẹ edavwini na rere Job se vwo yono iyono eghanghanre nẹ ayen rhe. (Job 42:1-6) O toro obo re phia kẹ avwanree, avwanre riẹnre nẹ kemu kemu ri Jihova vwẹ uphẹn kẹ nẹ ọ phia kẹ avwanre cha sa so omaẹwan ri bẹdẹ kẹ avwanree. Avwanre da fuevun chirakon rẹ edavwini, ke se ‘phikparobọ’ efẹrọvo.​—Rom 8:35-39.

7. Ọ da dianẹ e muẹkpahen owẹ fikirẹ esegbuyota wẹn, diesorọ oma sa vwọ vwerhen owẹ?

⁷ E se vwo omavwerhovwẹn vwẹ ọke rẹ omukpahen. Siẹrẹ e de muẹkpahen owẹ fikirẹ esegbuyota wẹn, wo no nẹ wo rhe vwo ebruphiyọ ri Jihovaa. Ukperẹ ọtiọyen, gbe no nẹ ọyena odjephia nẹ Jihova rhiabọreyọ owẹ. (Mat. 5:10-12) Wọ da vwẹ ẹro abavo vwo nẹ ẹdia na, wo se vwo omavwerhovwẹn kerẹ iyinkọn na ọ da dianẹ e muẹkpahan owẹ kidie nẹ wẹwẹ Onenikristi. (Iruo 5:40-42) Vwọba, wọ sa vwẹ ukẹcha kẹ ihwo re dia Iseri ri Jihovaa vwọ mrẹ uyota na vughe rere ayen sa vwọ vwẹ “urinrin kẹ Ọghẹnẹ.” (1 Pita 2:12) Kerẹ Josẹf, wo se phikparobọ vwẹ ọke rẹ omukpahen​—ọ dia ọke rọ da wanvrẹ nu ọvoo.​—Jẹn. 39:3, 23.

8. Ọrhọ yen orọnvwọn ọfa ro se mu avwanre vwo chirakon te oba?

⁸ Edavwini rẹ avwanre che vwoba. Oborẹ Job rhiẹromrẹ djerephia nẹ ebẹnbẹn rẹ avwanre che vwoba. Uyota nẹ, ‘Jihova bruba ukuko rẹ akpeyeren ri Job vwọ vrẹ ọtonphiyọ rọyen.’ (Job 42:12) Ọtiọyen Jihova ji ve nẹ ọyen che bruba “ukuko rẹ akpeyeren” wẹn, kọyen wọ vwọ dia bẹdi bẹdẹ vwẹ akpọ kpokpọ na vwọ vrẹ ọ re de yerẹn asaọkiephana rọ vọnre vẹ ukpokpogho na. Ọnana orọnvwọn ọvo ro se mu avwanre vwọ fuevun chirakon te oba!​—Mat. 24:13.

OBO RE SA PHIA A DA VWẸ ẸRO ỌCHỌCHỌ VWO NẸ EBẸNBẸN

9. Die yen sa phia kẹ avwanre a da vwẹ ẹro ọchọchọ vwo nẹ ebẹnbẹn rẹ avwanre?

⁹ O toro ebẹnbẹn re hirharokuẹẹ, e jẹ a vwẹ ẹro rẹ abavo vwo ni ayen rere e vwo jẹ ebẹnbẹn efa ẹsuọ kẹ oma rẹ avwanre. Kerẹ udje, e se roro nẹ Jihova yen so ebẹnbẹn rẹ avwanre. O vwo ọke ọvo iroro ọchọchọ vwọ kọn ro Job ẹwẹn, o de roro nẹ Jihova yen so ebẹnbẹn rọyen, ọnana da nẹrhẹ ọ davwẹngba vwo “dje oma rọyen phiyọ ọvwata ukperẹ Ọghẹnẹ.” (Job 32:2) Ọtiọyen Naomi ji ru, ọ ka vwẹ Jihova guẹdjọ nẹ ọyen yen so ebẹnbẹn rọyen. (Rutu 1:13, 20, 21) Ọ da dianẹ Job vẹ Naomi phi iroro ọchọchọ yena phiyọ ẹwẹn jovwo, ayen rhe miovwin oyerinkugbe rayen vẹ ọ rẹ Jihova. (Isẹ 19:3) Ẹkẹvuọvo, Jihova da vwẹ ukẹcha kẹ ayen vwọ vwẹ ẹro abavo vwo ni ebẹnbẹn rayen ji bruba kẹ ayen fikirẹ evun-ẹfuọn rayen.

10. Ọke rẹ edavwini de te avwanre oma, die yen ẹwẹn avwanre sa djẹ ra?

¹⁰ Ọ da tobọ dianẹ o mu avwanre ẹro nẹ ọ dia Jihova yen so ebẹnbẹn rẹ avwanree, e ji se vwo ẹwẹn ivivẹ sẹ o ji vwo ọdavwẹ rẹ avwanre. Iroro ọchọchọ tiọyena sa so ofudjevwe kẹ avwanre. (Isẹ 24:10) Ovie Devid kugbe ọmraro Habakọk hirharoku ebẹnbẹn, o ji vwo ọkievo ayen vwo vwo ẹwẹn ivivẹ sẹ Jihova nyo oviẹ rayen. (Une 10:1; Hab. 1:2) Dedena, ayen dobọrẹ ẹrhovwo ẹnẹ jii. Jihova vwẹ imuẹro kẹ eshare nana re fuevun na nẹ o che bicha ayen, o ji che ru ọtiọyen kẹ wẹ.​—Une 10:17.

11. Die yen sa phia kẹ avwanre siẹrẹ a rha vwẹ ẹro abavo vwo ni ebẹnbẹn rẹ avwanree?

¹¹ A rha vwẹ ẹro abavo vwo ni edavwinii, o se gbe avwanre unu siẹrẹ Jihova da vwẹ uphẹn kẹ ayen nẹ i te avwanre oma. (1 Pita 4:12) Idibo ri Jesu mrẹrẹ bẹnbẹn rẹ ayen vwo vwo ẹruọ nẹ Jesu che hirharoku omukpahen ọgangan. (Luk 18:33, 34) Dede nẹ Jesu nabọ djefiotọ kẹ idibo rọyen obo re cha phia kẹ vwẹ obaro na, jẹ Pita niro nẹ Jihova cha vwẹ uphẹn kẹ emu vuọvo tiọyen nẹ ọ phiaa. Jesu riẹnre nẹ oka iroro tiọyena sa nẹrhẹ ọyen jẹ ọhọre ri Jihova eruo, ọtiọyena ọ da ghwọku Pita. (Mak 8:31-33) Jesu vwọ tobọ ghwu nu, ọ dia ọyen idibo rọyen ji vwo vwo ẹruọ obo re phiaree. Dedena, Jesu kpairoro vrẹ ayeen. Ọke rọ vẹ ayen vwọ ta ota ra vwọ kparọ nushi nu, ọ vwẹ ukẹcha kẹ ayen vwo vwo ẹruọ oboresorọ rọ vwọ rioja womarẹ o vwo dje “Isiesi Ọfuanfon na” fiotọ kẹ ayen. (Luk 24:25-27, 32, 44-48) Ayen vwo roro kpahen oborẹ Jesu yono ayen ye, ọnana sa nẹrhẹ ayen muegbe hẹrhẹ omukpahen rẹ ayen che hirharoku kẹrẹkpẹ kerẹ idibo rọyen. A vwọ fuẹrẹn obo ri Baibol na ta kpahen edavwini vẹ omukpahen sa nẹrhẹ e muegbe hẹrhẹ ayen.

12. Mavọ yen oma se ru avwanre a da vwẹ ẹro ọchọchọ vwo ni ẹdia rẹ avwanre?

¹² Ẹro ọchọchọ sa nẹrhẹ e nẹ ẹdia rẹ avwanre brabra vrẹ obo rọ ghene hepha. Jesu dje idjerhe ọvo rẹ oborẹ ọnana sa phia wan vwẹ udje rẹ ewiowian re wian vwẹ ogba ri ivaini na. Oma vwerhen evo usun rẹ ewiowian naa kidie ayen niro nẹ osa ra hwa kẹ ayen hanvwe nọ, ẹkẹvuọvo onini na da vuẹ ọvo usun rayen nẹ: “Oko, mi ru we emu vuọvo rọ chọre-e.” (Mat. 20:10-13) Ọ dia kidie nẹ e shenyẹ ewiowian na yen sorọ ayen vwo brenuu, ẹkẹvuọvo oborẹ ayen rhẹro rọyen te ayen obọọ. Nonẹna, idibo ri Jihova evo herọ ri vwo oka rẹ ẹwẹn tiọyena​—kerẹ udje, ọ da dianẹ uphẹn rẹ ẹga va ayen abọ yẹrẹ ọ rẹ ayen rhẹro rọyen te ayen obọọ. Erhọ yen erọnvwọn evo ri fori avwanre se ru a sa vwọ vwọ ẹro abavo vwo ni ẹdia egangan tiọyena?

OBO RE SE RU SIẸRẸ EBẸNBẸN DA VWOMAPHIA

13. Die yen sa phia siẹrẹ ebẹnbẹn de te avwanre oma?

¹³ Wọ sa riẹn oborẹ Baibol na ta kpahen ebẹnbẹn. Ọ sa dianẹ wọ tobọ vuẹ ihwo efa kpahan ayen jovwo re, rere ayen se vwo yerin ghene ebẹnbẹn tiọyena. Dedena, siẹrẹ ebẹnbẹn de te we oma komobọ, wọ je sa mrẹ bẹnbẹn wo vwo vwo ẹro abavo. Kerẹ udje, wo se no nẹ Jihova yen gboja kẹ wẹ yẹrẹ o rhe nyo ẹrhovwo wẹẹn. Kẹ erhọ yen erọnvwọn evo rẹ wo se ru wo se vwo vwo ẹro abavo?

14. Die yen wọ sa nẹrhovwo kpahen siẹrẹ wo de hirharoku ebẹnbẹn? (Filipae 4:13)

¹⁴ Nokpẹn rẹ ukẹcha ri Jihova. Vuẹ Jihova kpahen ebẹnbẹn wẹn kugbe oborẹ oma ru we. Wo se djunute ukẹcha ru wọ guọnọre nẹ Jihova vwọ kẹ wẹ vwẹ ẹrhovwo wẹn. Wọ sa vuẹ nẹ ọ kẹ wẹ ẹwẹn ọfuanfon rọyen rere wo se vwo vwo ẹgba vẹ aghwanre wo vwo chirakon. Karophiyọ nẹ Jihova sa kpahenphiyọ ẹrhovwo wẹn vwẹ idjerhe rẹ wo rhẹro rọyeen. (Ẹfe. 3:20) O se ji emekashe yẹrẹ iniọvo ukoko na nẹ e vwẹ ukẹcha kẹ wẹ. (Une 34:7) Ọtiọyena rhiabọreyọ ukẹcha ri Jihova, o toro obo rọ wan rhee. Aphro herọọ nẹ ọ cha kẹ wẹ ẹwẹn ọfuanfon rọyen rere wo se vwo yerin ghene kebẹnbẹn kebẹnbẹn ri te we oma.​—Se Filipae 4:13.

15. Die yen sa vwẹ ukẹcha kẹ wẹ vwo chirakon rẹ ebẹnbẹn? (Ni ifoto na.)

¹⁵ Muomaphiyọ irueru rẹ ukoko na. Ru asan ẹgba wẹn teri ọ da tobọ dianẹ wo rhe se ruẹ te obo wo ruẹ jovwoo. Ofori nẹ wọ reyọ iroro ri Jihova vwọ ghẹrẹ ubiudu wẹn ma rho uvwre rẹ ọke wo de hirharokuẹ “ukpokpogho vẹ ebẹnbẹn.” (Une 119:143) Se Baibol na ọkieje, yono, wo ji roro kpahọn. Vwobọ vwẹ iruo rẹ aghwoghwo na vwo nene asan ẹgba wẹn muru, kpo uyono wo ji vwobọ vwẹ ayen. Wẹ vẹ iniọvo rẹ ukoko na ghwọrọ ọke kugbe. Kẹnoma kẹ uruemu re vwo sioma nẹ ohri rẹ ihwo.​—Isẹ 18:1.

16. Erhọ yen ẹwẹn ivivẹ evo wo se vwo siẹrẹ ebẹnbẹn de te we oma, kẹ mavọ yen wo se vwo phi ayen kparobọ? (2 Kọrẹnt 10:4, 5)

¹⁶ Wo se phi ẹwẹn ivivẹ kparobọ. Siẹrẹ ebẹnbẹn da vwomaphia, ofori nẹ wo si iroro echọchọ re “tan awọ muotọ” vwo nẹ ubiudu wẹn, ọtiọyen ji te ẹwẹn ivivẹ ru wo vwo kpahen Jihova yẹrẹ oma wẹn. (Se 2 Kọrẹnt 10:4, 5.) Wọ sa vwẹ “erianriẹn rẹ Ọghẹnẹ” rọhẹ Baibol na, ọtiọyen ji te ẹbe rẹ ukoko na vwo phi ẹwẹn ivivẹ tiọyena kparobọ. Kerẹ udje, wo vwo ẹwẹn ivivẹ sẹ oma wẹn je vwerhen Jihova? Fuẹrẹn erọnvwọn sansan re phia kẹ ọyinkọn Pọl. O hirharoku ebẹnbẹn egangan vwẹ iruo aghwoghwo rọyen; ẹkẹvuọvo, ebẹnbẹn nana nẹrhẹ imuẹro rọyen ganphiyọ nẹ ọyen odibo ri Kristi. (2 Kọr. 11:23-27) Wo vwo ẹwẹn ivivẹ sẹ Jihova vwo ghovwo uwe fikirẹ imwemwu wo ruru vwẹ obuko re? Ọ da dia ọtiọyen, gbe si ẹkpo ri Baibol sansan phiyotọ ri djerephia nẹ Jihova vwo ghovwo imwemwu. (Aiz. 43:25) Wo mi se ẹkpo ri Baibol nana wo ji roro kpahen ayen. (Une 119:97) O vwo obo re phiare rọ da nẹrhẹ wo roro sẹ Jihova vwo ẹgba rọ vwọ chochọn rẹ idibo rọyeen? Ru ehiahiẹ kpahen iyovwinreta re ta ota kpahen oboresorọ rẹ Ọghẹnẹ vwọ vwẹ uphẹn kẹ ojaẹriọ kugbe obo rọ chochọn rẹ avwanre wan o toro ebẹnbẹn ri te avwanre omaa. (Une 91:9-12) Vwọba, se kpahen ikuegbe rẹ iniọvo rẹ eya vẹ eshare ri yerin ghene ebẹnbẹn rayen efẹrọvo.a

17. Die yen ofori nẹ e ru siẹrẹ ebẹnbẹn da vwomaphia?

¹⁷ Enẹna, o vwo ẹdẹ ro yovwin kẹ wẹ rẹ ebẹnbẹn kiriguo hephaa? Ọ da dia ọtiọyen, gba kpẹvwẹ Jihova, wọ je reyọ uphẹn nana vwo roro kpahen uyoyovwin rọyen. (Aghwo. 7:14) Jẹ ebẹnbẹn da vwomaphia, gba vwẹ ẹro abavo vwo nẹ ẹdia na, wo ji ru ẹroẹvwọsuọ wẹn kpahen Jihova ganphiyọ. Wo vwo ru ọtiọyen ye, Jihova kọ ‘cha gbẹn idjerhe kẹ wẹ wo se vwo chiro.’ (1 Kọr. 10:13) Kẹ iniọvo avwanre vwo? Mavọ yen avwanre sa vwọ vwẹ ukẹcha kẹ ayen siẹrẹ ayen de hirharokuẹ ebẹnbẹn? Vwẹ uyono rọ vwọ kpahen ọnana, a cha vuẹ avwanre obo re se vwo ru ọtiọyen.