Ọkieje Yen “Ọghẹnẹ rẹ Uyota” Na Vwo ru Ọhọre Rọyen

1. Vwo nene obo rehẹ Une rẹ Ejiro 31:2-5, diesorọ avwanre sa vwọ vwẹroso Jihova?

AVWANRE yerẹn vwẹ akpọ rẹ Eshu suẹn, ra da phiẹn ihwo, gun efian, je shẹ ihwo. Ọtiọyena kọ bẹn re se vwo vughe ohwo ra sa vwẹroso. Ineki ke ghwa ihwo re vẹ ayen gba chueki ria. Ihwo buebun ri titẹ oborẹ ayen shẹ vwẹ intanẹti vuẹ ihwo uyota kpahen oborẹ ayen shẹẹ. Ihwo evo je rhe mrẹvughe nẹ ayen cha sa vwẹroso oborẹ ugbeyan rọ kẹrẹ ayen taree. Ẹkẹvuọvo, mavọ ọ vwerhen oma te ra vwọ riẹn nẹ a sa vwẹroso Jihova ọkieje! Ọyehẹ “Ọghẹnẹ rẹ uyota” na. (Se Une rẹ Ejiro 31:2-5.) Ọyen ohwo rẹ uyota, kidie uyota ọyen ọvo usun rẹ iruemu rọyen. A sa vwẹroso Jihova vwẹ kemu kemu rọ ruẹ kugbe obo rọ tare.

2. Die yen a cha ta ota kpahen vwẹ uyono nana?

² Vwẹ uyono nana, a cha ta ota kpahen iroro evo re sorọ ra sa vwọ vwẹroso Jihova vẹ ubiudu rẹ avwanre eje. A je cha ta ota kpahen oborẹ Ọghẹnẹ rẹ uyota na che vwo phioba phiyọ akpọ umwemwu rẹ Idẹbono na kugbe oborẹ Ọghẹnẹ ruẹ enẹna o se vwo ruẹ ọhọre Rọyen gba. Ọnana cha cha avwanre uko oshọ vwo jẹ avwanre emuo ji fiudugberi soseri kpahen Jihova.

OBORESORỌ RA SA VWỌ VWẸROSO ỌGHẸNẸ RẸ UYOTA NA

3. Diesorọ avwanre sa vwọ vwẹroso Jihova kakare?

³ Avwanre sa vwẹroso Jihova kidie ọ yehẹ Ọmemama na. Ọyen yen Ma idjuvwu vẹ akpọ na, ọyen jehẹ Esiri rẹ arhọ eje. (Jẹn. 1:1; Une 36:9; Ẹvwọ. 4:11) Ọyen je vwẹrote arhọ rẹ avwanre. Ọ ma erọnvwọn sansan phiyọ akpọ na re nẹrhẹ arhọ sa rhe dia. Ọyen yen suẹn erọnvwọn eje vwẹ akpọ te odjuvwu, ọkieje o ji che vwo ru ọtiọyen. Ọtiọyena, a sa vwẹrosuọ nẹ o che sun avwanre je vwẹ uvi rẹ akpeyeren vwọ kẹ avwanre vwẹ obaro na kidie ọyen Ọmemama ro vwo aghwanre vẹ ẹgba rọ basaan.

4. Mavọ yen e ru riẹn nẹ Jihova vwo ẹguọnọ rẹ avwanre?

⁴ Avwanre sa vwẹroso Jihova kidie o vwo ẹguọnọ rẹ avwanre. Jihova ma ihworakpọ kidie ọ guọnọre nẹ ayen dia akpọ je riavwerhen rọyen bẹdẹ. Jihova dje ọhọre rọyen phia womarẹ eta nana: “E jẹ avwanre ma ohworakpọ họhọ oma rẹ avwanre, rere ayen dia kerẹ avwanre.” (Jẹn. 1:26) Ọ kẹ avwanre ugbomọphẹ. Ọ ma akpọ na yoyovwin vwọ kẹ avwanre. (Une 115:16) Ọ vwẹ owian kẹ ọsẹ vẹ oni rẹ avwanre rẹsosuọ nẹ ayen wene otọrakpọ na kpo iparadaisi. (Jẹn. 1:28; 2:15) O phi efe vẹ erọnvwon rehẹ akpọ na eje phiyọ obọ rayen. Vwọrẹ uyota, enana djerephia nẹ “ẹguọnọ ro jẹ rhẹriẹ rẹ Ọrovwohwo na herọ rhiri bẹdẹ bẹdẹ.”​—Une 103:17.

5. (a) Idjerhe vọ yen Jihova vwo ru nene obo rọ tare dede nẹ Idẹbono davwẹngba vwọ ghwọrọ ihworakpọ? (b) Erhọ yen ive rẹ Ọghẹnẹ evo ri rugba re? (Ni ekpeti na “Ive ri Jihova ri Rugba ri Djerephia nẹ Ọyen Ohwo rọ Ta Uyota.”)

⁵ Avwanre sa vwẹroso Jihova kidie kemu kemu rọ tare eje ruẹgba. Ọ dia Jihova di mu akpọ na maa, “ẹkẹvuọvo ọ marọ rere a vwọ dia.” (Aiz. 45:18, 19) Ọke rẹ Adam vẹ Ivi vwo gbevwọso Ọghẹnẹ nu, ayen da re abe rẹ ughwu. Kọ ghwa họhọ nẹ e gbowọphiyọ ọhọre rẹ Ọghẹnẹ. Ẹkẹvuọvo, Jihova ọyen ohwo ro ruẹ orugba rẹ ive rọyen eje. (Aiz. 46:10, 11) Ọhọre rọyen rẹ akpọ na vwọ vọn vẹ evwata rẹ ihwo wenerii. Ọnana yen sorọ Jihova vwọ vwẹ uphẹn kẹ Adam vẹ Ivi nẹ ayen vwiẹ emọ. Emọ rẹ Adam se vwo sivwinrhọ ji vwo iphiẹrophiyọ rẹ arhọ ri bẹdẹ, Jihova da vwẹ ọmọ Rọyen vuọvo vwọ kpahotọ rere ọ vwọ tan ayen hirhe.​—Jọn 3:16.

ỌGHẸNẸ RẸ UYOTA NA RUẸ ỌHỌRE RỌYEN GBA

6. Die yen Jihova mraro rọyen kpahen ẹvwọsuọ rọ vwomaphia vwẹ Idẹn?

⁶ Ohwo rọ nẹrhẹ Adam vẹ Ivi gbevwọso Ọghẹnẹ yen “ọrọdekọ awanre na, ọ re se Idẹbono kugbe Eshu.”a (Ẹvwọ. 12:9; Jẹn. 3:4, 5; Jọn 8:44) Jihova brorhiẹn hwe rọ vwọ tanẹ ọyen cha ghwọrọ. (Jẹn. 3:15) Tavwen ọnana ke rhe phia, ihwo buebun che gbe nene Eshu je vwẹrokere. Ẹkẹvuọvo ihwo evo cha fuevun tinkamu Jihova.

7. Amono yen nene Idẹbono, kẹ die yen cha phia kẹ ayen?

⁷ Ihwo ri nene Eshu rọ dia Idẹbono na, eyen emekashe vẹ ihworakpọ ri gbevwọso Jihova. Kidie nẹ ayen gbevwọso ọhọre rẹ Ọghẹnẹ, ayen de phi oma rayen phiyọ ẹdia rẹ emọ rẹ Eshu. Ẹkẹvuọvo, ọke rẹ Ọghẹnẹ ve phiyọ de te, kọ cha ghwọrọ Eshu vẹ ihwoeje ri gbe nene.​—Dan. 2:44; Rom 16:20.

8. Die yen Jesu ruru vwẹ ukpe ri 1914? (Ni ifoto na.)

⁸ Die yen kẹ avwanre imuẹro nẹ ọhọre rẹ Ọghẹnẹ rọ vwọ ghwọrọ Eshu vẹ ihwo ri nene che rugba? Vwẹ 1914, Jesu da kpare ofovwin vwọso Eshu rọ dia Idẹbono na vẹ emekashe rọyen, ọ da djẹ ayen rhe otọrakpọ na. (Ẹvwọ. 12:7-9) Dede nẹ obodjuvwu yen e de phi ofovwin na, jẹ obo ri nẹ obuko rọyen rhe ji te ihworakpọ oma. Baibol na da ta, “Okpetu rode vwọ kẹ akpọ na kugbe abadi na, kidie Idẹbono wontọ bru ovwan rhire, o muophu gangan kidie ọ riẹnre nẹ ọke rọyen pha krẹkrẹ.” (Ẹvwọ. 12:12) Vwo nẹ 1914 rhe yen Eshu vwọ tẹnrovi otọrakpọ na, fikirẹ ọtiọyena erọnvwọn ki miovwẹnphiyọ miovwẹnphiyọ. Vwọrẹ uyota, ‘okpetu rode ghini herọ vwọ kẹ akpọ na’! Jẹ, vwẹ ọmọke krẹn, Jesu che “phikparobọ karekare,” ka cha ghwọrọ Eshu vẹ ihwo ri biẹcha eje. (Ẹvwọ. 6:2) Jesu ko che ru odẹ ri Jihova fon ẹsiẹvo goi. (Une 45:4-6) Ihwoeje ke cha rhe riẹn nẹ Jihova yen Ọghẹnẹ rẹ uyota na!​—Izi. 38:23.

World War I: U.S. National Archives photo; bomb: USAF photo; pandemic: blvdone/stock.adobe.com; riot: inhauscreative/E+ via Getty Images

ỌGHẸNẸ RẸ UYOTA NA KOKO IHWOEJE RI VWO ẸGUỌNỌ RẸ UYOTA NA

9. Amono yen Jihova koko nonẹna?

⁹ Enẹna, Jihova koko ‘erọnvwọn ejobi kuẹgbe vwẹ Kristi, erọnvwọn rehẹ obodjuvwu kugbe erọnvwọn rehẹ akpọ na.’ (Ẹfe. 1:10) “Erọnvwọn rehẹ obodjuvwu” na yen ihwo ra jẹreyọ rẹ Jihova sanere nẹ i nene Kristi sun vwẹ odjuvwu. “Erọnvwọn rehẹ akpọ na” yen ihwo re cha dia otọrakpọ na bẹdi bẹdẹ vwẹ Iparadaisi. Idibo ri Jihova nana tueghe efian rẹ Eshu phia je vwẹ ukẹcha kẹ ihwo ri vwo ẹwẹn esiri ayen se vwo vwo erianriẹn rẹ uyota na.

10. Idjerhe vọ yen Jihova vwọ vwẹ ukẹcha kẹ ihwo vwọ vrabọ rẹ uyono rẹ ẹga refian? (Ẹvwọphia 14:6, 7)

¹⁰ Jihova womarẹ iruo aghwoghwo rọ ma rho kparobọ ra je mrẹ oghẹre rọyen dẹvoo vwo koko ihwo ri vwo ẹguọnọ rẹ uyota na. (Se Ẹvwọphia 14:6, 7.) Dede nẹ Jihova reyọ ihworakpọ vwo ghwoghwo iyẹnrẹn esiri na, emekashe na ji vwobọ vwẹ ekoko rẹ ihwo ri vwo ẹwẹn esiri rhe ukoko na. Iruo aghwoghwo nana je nẹrhẹ a mrẹ aphiphẹn ri Babilọn Rode, rọ dia okugbe rẹ ẹga refian rẹ Idẹbono reyọ vwọ hrahra efian kpahen Jihova ikpe uriorin buebun re. (Ẹvwọ. 18:2, 4) Kẹrẹkpẹ, a cha ghwọrọ ẹga refian eje kakare, ihwo ri vwo ẹguọnọ rẹ Ọghẹnẹ rẹ uyota na ke cha vwẹ urinrin ro foro vwọ kẹ.​—Ẹvwọ. 17:16.

11. Mavọ yen e se vwo vughe ihwo re ga Jihova vwọrẹ uyota?

¹¹ Ihwo ri vwo ẹguọnọ rẹ uyota na nẹ ẹkuruemu vẹ asan sansan rhe vwẹ akpọ na. (Ẹvwọ. 7:9, 10) Ayen vwo nyo “iyẹnrẹn esiri na,” ayen da rhe mrẹ uyota na vughe, oma da vwerhen ayen, ayen da vwomaba ihwo ri Jihova. (Mak 13:10) Ọke vwọ yanran na, a da rhe mrẹ ofẹnẹ rẹ ihwo re ga Ọghẹnẹ vwẹ idjerhe ro rhiabọreyọ vẹ ihwo ri ruẹ ọtiọyeen phephẹn. Ọmraro Malakae da ta: “Kẹ ovwan che vughe ofẹnẹ rọ hẹ ohri rẹ ọvwata vẹ oruimwemwu, vwẹ uvwre rẹ ohwo rọ ga Ọghẹnẹ vẹ ọ ro jẹ ẹga.” (Mal. 3:18) Womarẹ uruemu rayen vẹ iruo aghwoghwo na, idibo ri Jihova djephia nẹ ayen vwẹ ẹga kẹ Ọghẹnẹ rẹ uyota na.

12. Idjerhe vọ yen Jihova vwọ reyọ iruo aghwoghwo na vwọ ruẹ ọhọre rọyen?

¹² Avwanre ru orugba rẹ aroẹmrẹ ji nene iji ri Jesu siẹrẹ avwanre de ghwoghwo “iyẹnrẹn esiri rẹ Uvie na.” (Mat. 24:14; 28:18-20) Ihwo buebun vwẹ asan sansan vwẹ akpọ na rhe dia idibo ri Kristi re fikirẹ iruo nana, ayen nẹ kiọkiọkiọ kpo obaro rẹ ayen cha vwọ ga Ọghẹnẹ rẹ uyota na bẹdi bẹdẹ. Ọyen okpuphẹn rode nẹ Jihova reyọ avwanre vwo ruẹ ọhọre rọyen!

VWẸROSO IVE RI JIHOVA KPAHEN OBARO NA

13. Amono yen Eshu ma vwọsua, kẹ diesorọ?

¹³ Kidie Eshu rọ dia Idẹbono riẹnre nẹ ọke ro chekọ ra cha vwọ ghwọrọ “pha krẹkrẹ,” ko muophu djọghrọ djọghrọ. (Ẹvwọ. 12:12, 13) Ihwo rọ ma vwọsua yen ihwo ra jẹreyọ ri che nene Jesu sun vwẹ Uvie rọyen, “re yọnrọn iji rẹ Ọghẹnẹ, ri ji vwo iruo rẹ ayen vwo soseri kpahen Jesu.” (Ẹvwọ. 12:17; 14:12) Vwọba, Eshu ji muẹkpahan kohwo kohwo ro bicha ayen, ọtiọyen ji te iruo rẹ ayen ruẹ.

14. Ọke rẹ Eshu da vwọso ihwo ri Jihova re, die yen cha phia? (Ni ifoto na.)

¹⁴ A da ghwọrọ Babilon Rode nu, Ihwo rẹ Eshu reyọ vwo ruiruo cha davwẹngba rayen eje vwo hwe idibo ri Jihova eje. Ọyena yen cha ghwa ofovwin rẹ Amagidọn rhe. (Ẹvwọ. 16:13, 14, 16) Jesu vẹ ituofovwin rẹ odjuvwu che sivwin ihwo ri Jihova, je ghwọrọ kemu kemu ro chekọ vwẹ akpọ rẹ Eshu no kakare. (Ẹvwọ. 19:19-21) Evwọrefian, irumwemwu kugbe ihwo re phiẹn ihwo gbe cha diaa. (Ẹvwọ. 21:8) Ọtiọyena ihwo eje ke cha rhe riẹn nẹ Jihova yen Ọghẹnẹ rẹ uyota na, nẹ ọkieje ro vwo ruẹ obo re gbare.

15. Diesorọ a sa vwọ vwẹroso ive ri Jihova kpahen obaro na? (Aizaya 65:16, 17) (Ni ifoto na.)

¹⁵ Nonẹna, ohẹriẹ rọhẹ akpọ na rhe gan vrẹ obo ri jovwo. Ẹkẹvuọvo womarẹ ukẹcha ri Jihova, idibo rọyen yerẹn kuẹgbe vwọrẹ okugbe. Jihova ji koko ihwo rọyen enẹna. Ọkieje yen Jihova che vwo bruba kẹ ihwo rọyen vẹ iruo rẹ ayen ruẹ, o vwo emu vuọvo rọ sa dobọ rọyen jii. (Se Aizaya 65:16, 17.) A sa vwẹroso ive ri Jihova kpahen obaro na. Eta rẹ ọyinkọn Pọl rehẹ Rom 8:38, 39 kẹ avwanre imuẹro nẹ: “Ughwu yẹrẹ arhọ yẹrẹ emekashe yẹrẹ isuon yẹrẹ erọnvwọn re herọ enẹna yẹrẹ erọnvwọn re cha yẹrẹ ẹgba yẹrẹ erọnvwọn rehẹ obenu yẹrẹ ukokodo yẹrẹ emama ọfa sa hẹriẹ avwanre vwo nẹ ẹguọnọ rẹ Ọghẹnẹ rọhẹ Kristi Jesu Ọrovwavwanre-e.”

16. Diesorọ wọ vwọ vwẹroso Jihova vẹ ubiudu wẹn eje?

¹⁶ O vwo iroro buebun re sorọ a vwọ vwẹroso Jihova, Ọghẹnẹ rẹ uyota na. Ọyen yen Ọmemama rẹ avwanre. O vwo ẹguọnọ rẹ avwanre mamọ. Kidie nẹ ẹgborho rehẹ akpọ na cha da rhe vwẹ ẹga kẹ Jihova, ọnana kọ nẹrhẹ otu gbidi gbidi na buẹnphiyọ buẹnphiyọ. (Aiz. 60:22; Zẹk. 8:23) Avwanre riẹnre nẹ ọkieje yen o vwo ru ọhọre rọyen, nẹ o rhe che krii, kọ cha ghwọrọ akpọ Eshu rọ vọnre vẹ efian kugbe ophiẹnvwe na. Avwanre sa vwẹrokere Devid nẹrhovwo nẹ: “E jẹ e jiri Jihova Ọghẹnẹ, . . . Ohwo rọ ọyen ọvo ruẹ erọnvwọn rẹ igbevwunu. E jẹ e jiri odẹ rọyen rọ vọnre vẹ urinrin na bẹdi bẹdẹ, E jẹ urinrin rọyen je vọn otọrakpọ na eje.”​—Une 72:18, 19.