Yono Mie “Ọghẹnẹ rẹ Uchebro Ejobi” Na

1. Diesorọ a vwọ vwẹ uchebro kẹ ihwo efa?

AVWANRE ejobi hirharokuẹ ‘edavwini sansan re lagha’ avwanre, ọtiọyena avwanre guọnọ uchebro vẹ ọbọngan ọkievo. (1 Pita 1:6) Oma vwerhen avwanre siẹrẹ a da vwẹ uchebro kẹ avwanre vwẹ ọke ebẹnbẹn, ọtiọyena o ji fo nẹ avwanre fobọ vwẹ uchebro kẹ ihwo efa ri hirharokuẹ ebẹnbẹn. (Mat. 7:12) Jihova rọ dia “Ọghẹnẹ rẹ uchebro ejobi” na, dje oborẹ avwanre sa “vwọ vwẹ uchebro . . . kẹ ihwo efa rehẹ koka koka rẹ edavwini.” E se nene udje rọyen womarẹ e vwo “brẹ ohwohwo uche.” (2 Kọr. 1:3, 4; 1 Tẹsa. 4:18) Ẹguọnọ re vwo kpahen iniọvo rẹ avwanre yen mu avwanre vwo ruẹ ọtiọyen, ọ dia kidie nẹ a vuẹ avwanre nẹ e ruoo. Vwẹ uyono nana, a cha ta ota kpahen (1) oborẹ uchebro mudiaphiyọ kirobo rẹ Baibol na djisẹ rọyen, (2) obo ra sa vwọ vwẹ uchebro kẹ ihwo efa, kugbe (3) obo re se ru siẹrẹ a da guọnọ uchebro.

OBORẸ BAIBOL NA DJISẸ RẸ UCHEBRO

2. Die yen ota ri Grik ra fan phiyọ “uchebro” se mudiaphiyọ vwẹ Baibol na?

² Vwẹ Baibol na, ota ri Grik ra fan phiyọ “uchebro” se mudiaphiyọ erọnvwọn sansan vwo nene eta re riarierẹ phiyọ. O se mudiaphiyọ “ọbọngan,” “re vwo bru ihwo uche,” yẹrẹ “jiri emu kẹ ohwo.” (Rom. 12:8) Oborẹ ota ri Grik na mudiaphiyọ dẹn yen e vwo sikẹrẹ ohwo je vwẹ ukẹcha kẹ. Ọtiọyena, avwanre sa vwẹ ẹwẹn roro ohwo ro brokpakpa rọ vwọ vwẹ ukẹcha kẹ ugbeyan rọyen rọ rioja. O toro oka rẹ ukẹcha rẹ ohwo yena vwọphiaa, o che vwo imuẹro nẹ ugbeyan rọyen na mrẹ ọbọngan vẹ uduephiophiyawọ rọ guọnọre.

3. Idjerhe vọ yen Banabas vwo dje udje rẹ obo ra vwẹ uchebro kẹ ihwo efa? (Ni ifoto na.)

³ Roro kpahen udje ri Baibol ọvo. Onenikristi ọvo re se Josẹf vwo uruemu ra vwọ vwẹ ọbọngan vẹ uchebro vwọ kẹ ihwo efa te ẹdia rẹ iyinkọn na de se Banabas, ro mudiaphiyọ “Ọmọ rẹ Obruche.” (Iruo 4:36) Odẹ yena foro mamọ te ẹdia rẹ Baibol na rha vwẹ oderhi rọyen vwo se ọfaa. Vwẹ ẹdia sansan, Banabas djerephia nẹ ọyen yerin mu odẹ rọyen na womarẹ ọ vwọ vwẹ ukẹcha kẹ iniọvo rọyen re guọnọ ukẹcha. Kerẹ udje, Sọl ro kurhẹriẹ obọ guọnọ vwomaba idibo na ọke ro vwo te Jerusalẹm. Ẹkẹvuọvo, oshọ rọyen mu idibo na kidie ayen riẹnrẹ phiyọ ohwo ro mukpahen Inenikristi. Dedena, Banabas vwẹroso Sọl, o de ji dje vwọ kẹ iyinkọn na.​—Iruo 9:26-28.

OBO RA SA VWỌ VWẸ UCHEBRO KẸ IHWO EFA

4. Ọrhọ yen ọvo usun rẹ idjerhe ro me yovwin ra sa vwọ vwẹ uchebro kẹ ihwo efa? (Rom 1:11, 12)

⁴ Bru ayen te uwevwin ọ da dia obo wo se ru. Jihova womarẹ idibo rọyen vwọ vwẹ uchebro kẹ ihwo efa. Kerẹ udje, ọke rẹ ofu vwo dje ọmraro Ẹlaijah, Jihova da reyọ amakashe vwọ vwẹ ọbọngan kẹ. (1 Ivie 19:4-7) Ọyinkọn Pọl je riẹn obo ro yovwin te rọ vwọ kọn bru iniọvo rọyen ra rere ọ vwẹ ọbọngan kẹ ayen. (Se Rom 1:11, 12.) Siẹrẹ wọ da kọn bru ohwo ra wọ vwọ vwẹ uchebro kẹ, wẹ vẹ ọyen nabọ ghwọrọ ọke kugbe. (1 Kọr. 16:7) Jẹ, wọ rha sa kọn bru ohwo rọ guọnọ ukẹcha raa, wọ sa vwẹ ifonu se, si ileta, ikadi yẹrẹ ovuẹ ri ifonu vwo rhe wọ sa vwọ vwẹ ọbọngan kẹ. Wọ cha vwẹ uphẹn kẹ Jihova nẹ ọ reyọ owẹ vwọ vwẹ uchebro kẹ ihwo efa?

5. Ebẹnbẹn vọ yen e se rhẹro rọyen nẹ e che hirharoku?

⁵ Ẹdẹ oba na vwọ braphiyọ na, a sa mrẹ bẹnbẹn ra vwọ kọn bru iniọvo rẹ avwanre ra je vwẹ uchebro kẹ ayen. Uvwre rẹ ọke re vwo mu Pọl phiyọ uwodi vwẹ Rom, Onisiforọs, ro nẹ Ẹfesọs rhe da ra guọnọ Pọl, dede nẹ ọnana sa nẹrhẹ e muo phiyọ uwodi yẹrẹ tobọ hwe. (2 Tim. 1:16-18) Iseri ri Jihova rehẹ Russia ji dje ọkpọ rẹ ẹwẹn tiọyena phia ọke re vwo mukpahen iniọvo na fikirẹ esegbuyota rayen. Siẹrẹ e de mu Iseri na kpo aguare, iniọvo eya vẹ eshare ji kpo aguare na rere ayen vwo djephia nẹ ayen bicha iniọvo na, dede nẹ e ji se mu ayen phiyọ uwodi. Ọtiọyena, wo se nene udje rẹ uduefiogbere rẹ iniọvo nana, womarẹ wo vwo yono kpahen oborẹ idibo rẹ Ọghẹnẹ vwẹ awanre vẹ ọke nana vwo bicha ohwohwo je mrẹ aghọghọ vwẹ ọke rẹ omukpahen?

6. Idjerhe vọ yen a sa vwọ vwẹrokere Jihova siẹrẹ a da vwẹ uchebro kẹ ihwo efa? (Ni ifoto na.)

⁶ Kerhọ rẹ ayen. Ọke rẹ ọmraro Ẹlaijah vwo roro nẹ arhọ rọyen hẹ ẹdia rẹ imuoshọ, ọ da ta ẹwẹn rọyen eje vwọ kẹ Jihova. Dede nẹ Ọghẹnẹ riẹn obo ri kpokpo Ẹlaijah ẹwẹn, jẹ ọ je kerhọ rọyen rọ vwọ ta ọdavwẹ rọyen vwọ kẹ. Jihova je vwẹ erhiorin kerhọ rẹ Ẹlaijah dede nẹ o dje eta rọyen na ẹvwẹvwariẹn! (1 Ivie 19:9, 10, 14) Jihova je vwẹ uphẹn kẹ ọmraro Habakọk nẹ ọ ta ọdavwẹ rọyen kugbe ẹwẹn ivivẹ ro vwori, dede nẹ eta rọyen pha kerẹ asan ra da mrẹ nẹ ọ nọ Ọghẹnẹ orhiẹn. (Hab. 1:2, 3) Nonẹna, Jihova je kerhọ rẹ ẹrhovwo rẹ avwanre ọ da tobọ dianẹ ọ riẹn oborẹ avwanre guọnọre. Avwanre sa vwẹrokere Jihova womarẹ a vwọ nabọ kerhọ vwẹ idjerhe rẹ ọghọ siẹrẹ iniọvo rẹ avwanre da ta ọdavwẹ rayen. E jẹ a ‘fobọ kerhọ’ siẹrẹ ayen da ta ota, je kẹnoma kẹ uruemu re vwo muophu yẹrẹ gbe ota phiyọ ayen unu, ọ da tobọ dianẹ eta rayen pha gbaegbae yẹrẹ ayen dje ayen ẹvwẹvwariẹn.​—Jems 1:19; Aghwo. 7:9.

7. Mavọ yen avwanre sa vwọ riẹn oborẹ ohwo rọhẹ ẹdia ọgangan ghene guọnọ?

⁷ Davwẹngba vwọ riẹn oborẹ ohwo ghene guọnọ. A cha sa riẹn obo rehẹ evunrẹ ubiudu rẹ ihwo kirobo rẹ Jihova ruẹẹ, ọtiọyena a sa riẹn oka rẹ uchebro rẹ ohwo guọnọre siẹrẹ a da nabọ kerhọ vwọ kẹ. Wo roro nẹ wọ riẹn oborẹ ohwo cha guọnọ kidie ọyen oborẹ wọ cha guọnọ wọ dahẹ ẹdia rọyeen. Avwanre eje fẹnẹre. Ọtiọyena, ghwọrọ ọke vwọ nabọ kerhọ rọyen, wọ je vwẹ aghwanre nọ enọ re sa vwẹ ukẹcha kẹ wẹ vwọ riẹn obo rehẹ evunrẹ ẹwẹn rọyen.​—Isẹ 20:5.

8. Idjerhe vọ yen Jesu vwọ vwẹ uchebro kẹ Mata vẹ Meri ọke rẹ Lazarọs vwo ghwu nu? (Ni ifoto na.)  

⁸ Roro kpahen idjerhe rẹ Jesu vwọ vwẹ uchebro kẹ Mata kugbe Meri ọke rẹ oniọvo rayen Lazarọs vwo ghwu nu. Emu vuọvo yen phia kẹ eya ivẹ nana, ẹkẹvuọvo Jesu vwẹ uchebro kẹ ayen vwẹ idjerhe rọ fẹnẹre. Ọke rẹ Mata vwo nene Jesu ta ota nu, Jesu da vuẹ kpahen iphiẹrophiyọ rẹ evrẹnushi na je bọn esegbuyota rọyen gan kpahọn. Jẹ ọ sa dianẹ ọke rẹ Meri vwọ viẹ bro rhe, Jesu ta ota kpahen evrẹnushi naa. Ukperẹ ọtiọyen, o de nene Meri viẹ je nọ asan re mu Lazarọs phiyọ. (Jọn 11:20-35) Die yen ọnana yono avwanre? A da vwẹ uchebro kẹ ihwo ri hirharokuẹ ebẹnbẹn, e jẹ a davwẹngba vwọ riẹn oborẹ ohwo ọvuọvo ghene guọnọ ukperẹ a vwọ vwẹ uchebrọ kẹ ayen vwẹ idjerhe vuọvo.

9. Mavọ yen avwanre sa vwọ reyọ Baibol na vwọ vwẹ uchebro kẹ ihwo efa? (Rom 15:4, 5)

⁹ Vwẹ Baibol na vwo ruiruo. Wọ da vuẹ ohwo kpahen “uchebro ro nẹ Isiesi Ọfuanfon na rhe,” ọ sa nẹrhẹ o vwo iphiẹrophiyọ. (Se Rom 15:4, 5.) Iphiẹrophiyọ yena cha nẹrhẹ ohwo na mrẹ uchebro vẹ ọbọngan vrẹ obo ri jovwo. (Aiz. 40:31) Mavọ yen wọ sa vwọ mrẹ ẹkpo ri Baibol wọ che vwo phiuduphiyọ ohwo awọ? Ihwo evo si awọreta ri Baibol sansan phiyotọ rẹ ayen che vwo ruiruo ọke rẹ ayen da guọnọ, kerẹ awọreta rehẹ obotọ uyovwinrota na “Uchebro” vwẹ ọbe rẹ Ẹkpo ri Baibol vwọ kẹ Akpeyeren rẹ Inenikristi. Rẹ Jihova nẹ ọ vwẹ ukẹcha kẹ wẹ vwọ reyọ Ota rọyen vwo ruiruo vwẹ idjerhe ro me yovwin wo de se phiuduphiyọ ihwo awọ. Ẹwẹn ọfuanfon rọyen sa vwẹ ukẹcha kẹ wẹ vwọ karophiyọ ẹkpo ri Baibol ri fori vwẹ ọke wọ da guọnọ ayen.​—Jọn 14:26.

10. Diesorọ eta avwanre vwọ dia dẹndẹn siẹrẹ a da davwẹngba re vwo phiuduphiyọ ohwo awọ?

¹⁰ Ta ota dẹndẹn. Ọkievo ofori nẹ a vwẹ uchebro vwọ kẹ ihwo womarẹ a vwọ vwẹ ukẹcha kẹ ayen vwo wene ẹro rẹ ayen vwo nẹ ebẹnbẹn rayen. Ọ da dianẹ wo che ru ọtiọyen, nabọ roro eta wẹn wọ kẹ ta rere eta wẹn vwo phiuduphiyọ ihwo awọ ukperẹ ọ vwọ kuọrọn ẹwẹn rayen. (Isẹ 12:18) Jihova phi udje rẹ ọnana phiyotọ ọke rọ vwọ ta ota kẹ Ẹlaijah, rọ vwọ vwẹ ẹro ọchọchọ vwo nẹ ọghanrovwẹ rẹ iruo rọyen kugbe oborẹ ẹga refian hrabọ nene Izrẹl te. Jihova tẹnrovi oruchọ rẹ Ẹlaijaah, ukperẹ ọtiọyen ọ da vwẹ ukẹcha kẹ vwọ kpọ iroro rọyen vi vwẹ idjerhe rẹ dẹndẹn. (1 Ivie 19:15-18) Wẹ komobọ ji se ru ọtiọyen siẹrẹ wo de roro eta wẹn tavwen wọ ke ta, je vwọphia vwẹ idjerhe rẹ dẹndẹn. Jẹ eta wẹn dia dẹndẹn ji shephiyọ ọkieje ọke wọ da davwẹngba wọ vwọ bọn iniọvo na gan ji phiuduphiyọ ayen awọ womarẹ ota yẹrẹ ẹkpahanphiyọ wẹn vwẹ uyono.

11. Die yen ihwo ri hirharokuẹ ebẹnbẹn guọnọre vwẹ ọke buebun? (1 Jọn 3:18)

¹¹ Vwẹ ukẹcha ra guọnọre phia. Ọke buebun ihwo ri hirharokuẹ ebẹnbẹn guọnọ ukẹcha ro fori ukperẹ eta rẹ uchebro ọvo. (Se 1 Jọn 3:18.) Banabas phi omamọ udje phiyotọ rọ vwọ shẹ otọ rọyen je vwẹ igho na vwọ kpahotọ ro se vwo bicha iniọvo ri bromaphiyame nu obọ re guọnọ ukẹcha. (Iruo 4:36, 37) Iniọvo avwanre buebun vwẹrokere omamọ rẹ udje rọyen na womarẹ ayen vwọ vwẹ ukẹcha rẹ ihwo guọnọre vwọ kẹ ayen. Ofu dje Gabriela, ro nẹ Poland rhe hwe ọke rẹ oghwe vwọ guọghọ uwevwin rayen totọ. Ọ da ta: “Oshọ mu vwe mamọ, me ro ẹnwan gangan, ọtiọyen ji te ọsẹ vẹ oni mẹ re vẹ ovwẹ gba dia. Me ghwa riẹn oborẹ mi se vwo yerin ghene ẹdia nanaa. Ẹkẹvuọvo, iniọvo de nẹ ikoko re kẹrẹ avwanre rhe, je vwẹ ẹdẹ ọvo vwọ rhuẹrẹ uwevwin rẹ avwanre. Obo re phiare na nẹrhẹ esegbuyota mẹ gan nẹ Jihova mu idibo rọyen vwọ vwẹ uchebro vwọ kẹ ihwo rẹ ebẹnbẹn teri oma.”

12. Mavọ wọ sa vwọ vwẹ ukẹcha kẹ iniọvo na siẹrẹ wọ da fuevun chirakon rẹ ebẹnbẹn wẹn?

¹² Chirakon rẹ ebẹnbẹn wẹn. Pọl vuẹ iniọvo rẹ Tẹsalonaika nẹ ọyen mrẹ uchebro vẹ ọbọngan ọke ro vwo nyo kpahen oborẹ ayen fuevun chirakon. Ọ riẹnre nẹ owian rọ wianre vwẹ ohri rayen dia ofefee. (1 Tẹsa. 3:5-8) Vwẹ idjerhe vuọvo na, Pọl je riẹn nẹ ọyen sa vwẹ uchebro kẹ iniọvo rọyen​—tobọ te ihwo rọ je mrẹẹ siẹrẹ ọ da fuevun chirakon fikirẹ ayen. (Kọl. 2:1, 2) Ọtiọyen ọ je hepha nẹ, siẹrẹ iniọvo na da mrẹ oborẹ Jihova vwẹ ukẹcha kẹ avwanre vwo chirakon rẹ ebẹnbẹn avwanre efẹrọvo, ọnana sa bọn ayen gan.

13. Die yen ofori nẹ avwanre rhe ruẹ siẹrẹ e de phiuduphiyọ ihwo efa awọ?

¹³ Vwo edirin. Ọkievo iniọvo avwanre rẹ ẹwẹn rayen kuọrọnre sa mrẹ bẹnbẹn rẹ ayen vwo rhiabọreyọ uchebro ra vwọ kẹ ayen ugege yena. Ẹkẹvuọvo, Baibol na jiriro kẹ avwanre nẹ e “rhe phiuduphiyọ ohwohwo awọ.” Ọnana mudiaphiyọ nẹ e che rhe phiuduphiyọ ihwo efa awọ ọkieje. (1 Tẹsa. 5:11) Ọtiọyena, vwẹ ọkieje vwo vwo edirin ọke wọ da vwẹ uchebro kẹ ihwo rẹ ẹwẹn rayen kuọrọnre. (1 Tẹsa. 5:14) Vwọrẹ uyota, avwanre ohwo vuọvo je cha guọnọ uchebro ọkievo. Kẹ die yen e se ru siẹrẹ a da guọnọ uchebro?

SIẸRẸ WỌ DA GUỌNỌ UCHEBRO

14-15. Die yen ofori nẹ e ru siẹrẹ a dahẹ ọke ebẹnbẹn yẹrẹ a da ro ẹnwan?

¹⁴ Nẹrhovwo rhe Jihova. Rẹ Jihova nẹ ọ kẹ wẹ ẹwẹn re dọe vwẹ ọke ebẹnbẹn yẹrẹ wọ da ro ẹnwan. (Une 94:19) Vuẹ Jihova oborẹ wọ guọnọre vwẹ ẹrhovwo wẹn, wọ je ta ẹwẹn wẹn eje kẹ. (Une 62:8) Vwọrẹ uyota, Jihova riẹn oborẹ oma ru we tavwen wọ ke tobọ nẹrhovwo rhe. Ẹkẹvuọvo wọ da vuẹ ọdavwẹ rẹ ubiudu wẹn eje vwẹ ẹrhovwo, ju wo djephia nẹ wo vwo esegbuyota kpahọn. Jihova cha vwẹ ọkieje vwọ kpahenphiyọ ẹrhovwo tiọyena vwo nene ọhọre rọyen. (Mak 11:24) Filipae 4:6, 7 tare nẹ: “Ovwan rha ta ọdavwẹ rẹ ovwan kẹ Ọghẹnẹ; ufuoma rẹ Ọghẹnẹ rọ vrẹ ẹruọ ejobi kọ sẹro rẹ ubiudu vẹ ẹgba iroro rẹ ovwan.”

¹⁵ Nokpẹn rẹ ukẹcha mie ihwo efa. Vuẹ ugbeyan ro tedje yẹrẹ ọkpako wọ vwẹroso oborẹ oma ru we. Iniọvo na sa dia esiri rẹ uchebro, jẹ ọkievo ayen cha sa riẹn oborẹ oma ru we yẹrẹ oborẹ wọ guọnọree, jokpanẹ ku wọ vuẹ ayen. (Isẹ 14:10) Wọ sa vuẹ ayen nẹ ayen nabọ kerhọ yẹrẹ dje ẹkpo ri Baibol yẹrẹ uyovwinrota ọvo rẹ ayen riẹnre nẹ ọ sa bọn wẹn gan kẹ wẹ.

16. Die yen sa phia siẹrẹ iniọvo na da vwẹ uchebro kẹ wẹ, jẹ die yen o fori nẹ wọ karophiyọ?

¹⁶ Vwo edirin, wọ je reyọ vwo ghovwo. Iniọvo wẹn se gbe we ku siẹrẹ ayen da davwẹngba ayen vwọ bọn wẹn gan. Kerẹ udje, ayen sa ta ota yẹrẹ ru orọnvwọn rọ cha nẹrhẹ ivun miovwo uwe. Ọyena da phia, vwo edirin rayen. (1 Kọr. 13:4, 7) Wọ je karophiyọ eta rehẹ Jems 3:2: “Ohwo rọ ta chọ-ọ, ohwo yena pha gbagba.” Riẹn nẹ ọdavwẹ rẹ iniọvo wẹn ọyen ayen vwọ vwẹ ukẹcha kẹ wẹ. Karophiyọ nẹ “ẹwẹn na guọnọre, ẹkẹvuọvo ugboma na vwiẹrẹre.”​—Mat. 26:41.

17. Die yen o fori nẹ e vwo owenvwe re vwo ru?

¹⁷ Avwanre eje guọnọ uchebro vẹ uduephiophiyawọ enẹna vrẹ obo ri jovwo rẹ eyeren nana vwọ braphiyọ na, rẹ ẹvwọsuọ ro nẹ obọ rẹ ivwighrẹn rẹ Ọghẹnẹ cha je vwọ ganphiyọ na. E jẹ e vwo owenvwe re vwo ru obo re se ru eje vwo bru ohwohwo uche.