Vwo nẹ Ọkiemọ Rhe Yen Jihova Vwo Yono Uvwe

Jẹ, ukperẹ mi vwo bru ovwan te idjerhe, je me ton ikuegbe na phiyọ nẹ ọtonphiyọ rhe. E vwiẹ vwẹ uvwre Ofovwin rẹ Akpọeje II vwẹ Calgary, Canada. Vwẹ oba rẹ ukpe ri 1940, ọkobaro ọvo re se Donald Fraser da vwẹ obọ kare ẹchẹ rẹ avwanre, oni mẹ da rhọnvwe nẹ ọ vwẹ uyono ri Baibol vwo mu kẹ ọyen. O vwo omavwerhovwẹn kpahen uyota ro yono na, jẹ ọga sa nẹrhẹ o kpo uyono ọkiejee. Dedena, ọ je yanphiaro ji bromaphiyame vwẹ 1950. Ọ da ohwo mamọ nẹ, o te ẹgbukpe ivẹ o ki ghwuu. Dede nẹ ọsẹ mẹ je rhe dia Oseri vwẹ ọke yenaa, jẹ ọ vwẹ uphẹn kẹ iniọvo na nẹ i sho.

Ẹdẹ evo vwọ wan re vwo ru isheshi na nu, oniọvo aye ọvo ra jẹreyọ rọ kpakore re se Alice de durhie uvwe kpo uyono. O vughe vwe kidie mi nene oni mẹ kpo uyono ọke rẹ oma da vwẹ uphẹn kẹ nẹ ọ ra. Me da nọ ọsẹ mẹ sẹ me sa ra. Ọ da rhọnvwe je tanẹ ọyen guọnọ nene uvwe “obọ ọvo” rere o se yeren oniọvo rọ ta ota rẹ ughworivwin rẹ oni mẹ na. Ason yena yen e ruẹ Isikuru rẹ Iruo Ruvie Na vẹ Omẹvwa Rẹga Na. Ọ rha bẹn ra sa vwọ sane uyono ro fo aruọke vwọ kẹ ọsẹ mẹ nẹ ọ ra. Obo ro nyori vwẹ uyono na vwerhenrọ oma kidie o yono kpahen obo ra ta ota vwẹ azagba. Ọtiọyena, ọsẹ mẹ ko kpo uyono re ruẹ vwẹ uvwre rẹ udughwrẹn, kudughwrẹn kudughwrẹn. Ememerha na, ọ da rhe ton uyono ẹra eje phiyọ.

Vwẹ ọke yena, ese rẹ edẹ rẹ iniọvo ri vwo eta yen odibo rẹ Isikuru rẹ Iruo Ruvie Na ka vwọ ton uyono na phiyọ, ayen me kpahen “Mẹvwẹ na.” Vwẹ ason yena, me da nọ sẹ e se se odẹ mẹ vwẹ uyono rọ vwọ kpahọn. Oniọvo na da nabọ jiri uvwe, jẹ ọ nọ vwẹ sẹ mi vwo ẹruọ rẹ oborẹ ọnana mudiaphiyọọ.

Me nama riẹn nẹ odẹ mẹ me tanẹ e se na mudiaphiyọ nẹ me guọnọre nẹ a vwẹ ota kẹ vwẹ vwẹ isikuru naa! Udughwrẹn rọ vwọ kpahọn, e de se odẹ mẹ, me da kpahen gorigori nẹ “Mẹvwẹ na.” Uyono na vwo kuphiyọ nu, iniọvo na de jiri uvwe mamọ. Udughwrẹn evo vwọ wan nu, a da vwẹ ọmọbe re me ta ota kpahen obenu na vwọ kẹ vwẹ.

Oshọ mu vwe mamọ! Kidie vwẹ ọke yena, e rhẹro nẹ iniọvo ri vwo ota cha reyọ ibrẹro esan fiẹ ẹrenren vwọ ta ota na. Ọke yena, a vwẹ isese ri Baibol kẹ ohwo nẹ o ruu. Ọsẹ mẹ vwẹ ukẹcha kẹ vwẹ vwo muegbe rẹ ota na je cha vwẹ uko vwọ vwanriẹn abọ 20 soso tavwen me ke ta vwẹ obẹ uyono. Mi vwo ruo nu, a da vwẹ ọkpọvi ro fori vwọ kẹ vwẹ. Uvwre rẹ ikpe nana eje na, Jihova reyọ ọsẹ mẹ, iniọvo na kugbe ukoko Rọyen vwo yono uvwe.

UYONA NA JEHẸ OTỌ

Alice ri mi djunute siẹvure na, yen yono uvwe me ka vwọ ton iruo aghwoghwo na phiyọ. Vwẹ ọke yena, e jiriro kẹ avwanre nẹ ẹkpo ri Baibol erha yen e se kẹ ọrovwuwevwin na tavwen a ke vwẹ ọbe kẹ. Ọke me cha vwọ ta ota vwẹ anurhoro de te, Alice ko dje oma kẹ ọrovwuwevwin na, tuẹn ota phiyọ je vuẹ vwẹ nẹ mi se ẹkpo ri Baibol rẹsosuọ na. Mẹvwẹ kọyen ta ota nẹ etiyin yanran, se ẹkpo ri Baibol rivẹ vẹ ọrerha, ji phi ọbe na phiyọ ada. Ọke vwọ yanran na, me da rhe riẹn obo ra ton ota phiyọ vwẹ anurhoro. Ọsẹ mẹ vwo bromaphiyame vwẹ oba rẹ ukpe ri 1954 nu, kọyen rhi yono uvwe vwẹ iruo aghwoghwo na. Kerẹ ọsẹ rẹ aye ghwu jovwo, ọ davwẹngba rọyen eje vwo yono uvwe uyota na. Siẹrẹ a da ta ota kpahen irueru rẹ ẹga na, ọ vwọ hehaa. A vuẹ vwẹ tavween, kidie me riẹnre nẹ avwanre che kpo uyono ji vwobọ vwẹ iruo aghwoghwo na vwẹ Saturday ọtiọyen ji te urhiọke ri Sunday.

Me ghwa riẹn ẹbe mamọọ, jẹ erọnvwọn evo mi yonori ẹgbukpe 12 vwẹ isikuru vwẹ ukẹcha kẹ vwẹ vwẹ akpeyeren mẹ. Kerẹ udje, Mi yono kpahen obo re ruẹ isọmu kugbe obo ra nabọ jẹ Oyibo. Uyono rẹ obo ra jẹ Oyibo vẹ obo re siẹ ikuegbe wan vwẹ ukẹcha kẹ vwẹ vwẹ Akon Iruo Rosiẹ re me da ga enẹna.

Ọkieje yen ihwo vwọ nọ vwẹ kpahen oboresorọ mi vwo vwo omavwerhovwẹn kpahen ihwehworo. Ọsẹ vẹ oni mẹ vwo omavwerhovwẹn kpahen ihwehworo. Me vwọ hẹ ẹgbukpe ighwrẹn, mi de yono obo re hworo ipianu, jẹ oyono mẹ niro nẹ me je rhe tẹn onaa. Ọtiọyena, ọ da vuẹ ọsẹ mẹ nẹ me dobọ rẹ uyono na ji kidie vwẹ ọke yena owenvwe na ji rhi rhe vwee.

Emeranvwe evo vwọ wan nu, ọsẹ mẹ da mrẹ oyono ọfa. Udje nana, mi de yono kpahen obo re hworo ipianu kugbe obo ra so une, je nabọ tẹn ona rayen. Ọke me vwọ hẹ emọ, me da rhe tẹn ona obo ra ghrẹnghrẹn upho, ji mu ẹdia buebun vwẹ ine-ẹsuọ. Obo rehẹ ẹwẹn mẹ yen mi vwo vwo idigri rere me sa vwọ dia oyono rẹ ihwehworo je vwẹrote oma mẹ vwẹ iruo rẹ ẹga ọkieje. Me vwọ joma wontọ re, mi de rhi noso nẹ me cha ghwọrọ ọke buebun vwo muegbe ji si edavwini na. Ọtiọyena, me da dobọ rẹ uyono na ji je ghwobọphiyotọ kerẹ ọkobaro rẹ ọkieje vwẹ ukpe rẹ 1963.

IRUO RẸ ỌKOBARO GHWA AGHỌGHỌ CHA

Mi vwo ruiruo rẹ ọkobaro vwẹ ẹgbukpe ọvo nu, a da vwẹ ovwẹ mu ọkobaro rẹ oghẹresan ji juvwe kpo Kapuskasing, Ontario. Daniel Skinner rẹ me vẹ ọyen gbe ruiruo rẹ ọkobaro na vie vwe krabọ kriwen. O yono uvwe erọnvwọn buebun kpahen obo ra vwẹrote ukoko na. O vwo erọnvwọn buebun mi che yono kidie me vwọ hẹ ẹgbukpe 20, yen a da vwẹ ovwẹ mu nẹ me ga vwẹ Umẹ Rọvwẹrote Iruo rẹ Ẹga Rukoko. Eyono rẹ iniọvo eshare re dia ighene rẹ ukoko na rhoma kanrunumu na vwerhen ovwẹ oma. Ayen da wian gangan, Jihova sa reyọ ayen vwo ruiruo vwẹ ọke eghene rayen!

Egbabọse buebun yehẹ Kapuskasing. Vwẹ ọke ekpahen, aruọke na djiro mamọ. Asan eje yen mẹvwẹ vẹ Dan vwẹ owọ yan. Ẹkẹvuọvo, ọvo usun rẹ aghọghọ ri mi vwori yen me vwọ mrẹ oniọvo aye re se Linda Cole, rọ rhe dia aye mẹ ọke vwọ yanran na.

Linda ọyen oghwoghwota vẹ oruru ro vwo orhivwinbrura buebun. Ọyen ohwo sasasa, ra sa rua rọ je kokẹ ghwologhwolo. Oni rọyen re se Goldie, ọyen oniọvo aye rọ fuevun. Ọsẹ rọyen Allen, ka vwọso uyota na. Dede nẹ ọsẹ rayen vwọsua ayen, ọkieje yen oni rayen vwo muẹ Linda vẹ iniọvo rọyen eshare, John vẹ Gordon vwo kpo Ọguan Ruvie ji yono ayen obo re ghwoghwota vwẹ iruo aghwoghwo na. Ọkievo, Goldie, Linda, John, kugbe Gordon vwobọ vwẹ iruo ọkobaro na. Ikpe evo vwọ wan nu, Allen da rhe mrẹ uyota na vughe je wian gangan vwevunrẹ ukoko na.

Mi se vwo yono kpobarophiyọ, e de durhie uvwe kpo Isikuru rẹ Ekpako vẹ Idibo Rowian vwẹ Bẹtẹl rọhẹ Canada vwẹ ukpe ri 1965. Me vwọ hẹ isikuru yena, a da vuẹ vwẹ nẹ me ghwobọphiyọ ifọmu rẹ Giliẹd. Ẹwẹn mẹ je vwẹ ọke vuọvo djẹ kpo iruo imishọnare dẹvoo, kidie mi niro nẹ mi vwo irhue rọyeen―dedena me da je ghwobọphiyọ ifọmu na. E durhie uvwe kpo iklasi rẹ 42. Vwẹ Giliẹd, nọke ra ruọke yen iyono rẹ avwanre vwọ reyọ iyẹnrẹn oborẹ avwanre yan obaro te vwọ nẹ avwanre. Vwẹ iyẹnrẹn rẹsosuọ ra vwọ nọ vwẹ, e de jiro kẹ vwẹ nẹ mi ru obo ri mi se ru eje vwo yono kpahen ukoko na me vwọ hẹ isikuru na. Ọyena ghwa uchebro ro fo aruọke vwọ kẹ ohwo rọhẹ ẹgbukpe 21.

Ọvo usun rẹ iyono re yono avwanre vwẹ Giliẹd yen obo ra reyọ ekuakua re ghwa iyẹnrẹn vwo ruiruo, kerẹ iredio, itẹlivishọni, kugbe ẹbe. Oma vwerhen ovwẹ kpahen uyono nana dẹn. Me nama riẹn nẹ uyono nana che fierere kẹ vwẹ vwẹ obaro naa, me cha ta ota kpahọn ẹsiẹfa obọ.

E JI VWE KPO SENEGAL

Ẹdẹ evo vwọ wan rẹ avwanre vwo wontọ nu, e de ji vwe vẹ Michael Höhle kpo Senegal vwẹ Africa da ra ga kerẹ imishọnare. Vwẹ ọke yena, omarẹ ighwoghwota 100 yehẹ evunrẹ ẹkuotọ na.

Me vwọ ga emeranvwe evo vwẹ asan re juvwe ra nu, a da vuẹ vwẹ nẹ me rhe wian vwẹ obọ ọvo udughwrẹn vwẹ oghọn rẹ ukoko. Ubruwevwin ọvo yen e vwo ru “oghọn rẹ ukoko” na vwẹ asan rẹ imishọnare dia. Dede nẹ owian ra wian vwẹ etiyin pha kekpe, jẹ ọkieje yen odibo rẹ oghọn ukoko re se Emmanuel Paterakis vwọ karophiyọ ovwẹ nẹ oghọn ukoko na mudia kẹ ukoko ri Jihova rọhẹ ẹkuotọ yena. Ẹdẹ ọvo vwo te, oniọvo Paterakis da tanẹ avwanre si ileta vwo rhe imishọnare na vwo phiuduphiyọ ayen awọ. Vwẹ ọke yena, ra vwọ teyen ileta ibuebun pha bẹnbẹn, ọ je reyọ igho, ọtiọyena, itaipraita kọyen a reyọ vwọ teyen ayen ọvuọvo. Ọyena dia ọmọrhiẹ owiaan, ma rho rọ vwọ dianẹ o vwo idjerhe vuọvo re se phoro obo re si chọ noo na!

Mi vwo muegbe mi vwo rhivwin kpo vwẹ ovwọnvwọn rẹ ẹdẹ yena, Oniọvo Paterakis da riẹn ọmọbe ọvo kẹ vwẹ. Ọ da tanẹ, “Mie David, ukoko si ileta rhe we.” Ọke mi vwo rhie, me da mrẹ ọvo usun rẹ ileta me vwẹ obọ mẹ teyen na! Obo re phiare vwẹ ẹdẹ yena yono uvwe nẹ me vwẹ ẹro ọghanghanre vwo ni ukoko na o torori sẹ asan re de ruiruo na rhoro yẹrẹ hanvweree.

Me da rhe dia ugbeyan rẹ iniọvo rẹ ukoko na buebun ji nene erua evo ghwọrọ ọke kuẹgbe vwẹ ovwọnvwọn ri Saturday. Oma vwerhen ovwẹ me da karophiyọ ọke yena! Avwanre ji nene ohwohwo ta ota. Kidie nẹ me riẹn obo ra jẹ French vwẹ Senegal, ọnana vwẹ ukẹcha kẹ vwẹ ọke mi de kpo eghọn rẹ ukoko vwẹ ẹkuotọ sansan ra da jẹ ephẹrẹ ri French.

Vwẹ 1968, me da sa Linda phiyotọ. Emeranvwe buebun vwọ wan nu, me da davwẹngba vwọ guọnọ iruo rẹ ubrọke rere me vẹ Linda se vwo ruiruo rẹ ọkobaro kugbe vwẹ Senegal, ẹkẹvuọvo ihwo re vwẹ iruo kẹ ihwo reyọ erhorhaa, emotọ ọvo. Ukuko na, mi vwo rhivwin kpo Canada nu, avwanre da rọvwọn, vwẹ oboyin a da vwẹ avwanre mu kerẹ ekobaro rẹ oghẹresan vwẹ Edmundston, New Brunswick, omorere ọvo rọhẹ ughwru rẹ Quebec.

IRUO RẸ ỌKOBARO VWẸ NEW BRUNSWICK KUGBE QUEBEC

Tavwen avwanre ki te orere na, oghwoghwota vuọvo herọọ jokparẹ imihwo evo ra vwẹ Baibol yono. Uruemu rẹ ẹga ri Fada yen ihwo buebun nene. Dino iwevwin eje yen vwo oka na, A Guọnọ Iseri ri Jihovaa. Vwẹ ọke yena a ghwa kanrunumuo nẹ e ghwoghwota vwẹ iwevwin tiọyena kirobo re ruẹ enẹnaa, ọtiọyena avwanre ke vwẹ obọ hworo kanurhoro kanurhoro owenẹ oka herọ yẹrẹ ọ herọọ. O vwo ovuẹ rẹ ishọshi ri Fada phiẹ phiyọ ọbe rọ ghwa iyẹnrẹn vwẹ ẹkuotọ na kudughwrẹn kudughwrẹn nẹ: “E jẹ a ra guọnọ Iseri ri Jihova rẹ erieda na.” Vwevunrẹ orere na Iseri ri Jihova ẹne ọvo yen herọ, ọtiọyena, aphro herọọ nẹ mẹvwẹ vẹ Linda, kugbe Victor vẹ Velda Norberg yen ayen se “erieda” na!

Ẹcha rẹsosuọ rẹ oniruo ọkinriariẹ cha sa chọrọ ovwẹ ẹroo. O vwo nene avwanre ghwọrọ udughwrẹn ọvo nu, ọ da ta, “Ọkiọvo orọnvwọn vuọvo rẹ ovwan se ru ovwan vwọ hẹ etinẹ na yen ovwan vwọ vwẹ ukẹcha kẹ ihwo vwo wene ẹro rẹ ayen vwo nẹ Iseri ri Jihova.” Ọnana yen oborẹ avwanre ghwe ru nẹ ọke yena yanran, ọ ghwa erhuvwu rhe! Ememerha na, ihwo na da rhe mrẹ ofẹnẹ rọhẹ uvwre rẹ Iseri ri Jihova re vwomakpotọ vẹ ilori rẹ ẹga ri Fada re kparoma. Enẹna, ukoko otete ọvo evunrẹ orere yena.

Avwanre vwọ ghwọrọ omarẹ ẹgbukpe ọvo vwẹ asan re ji avwanre ra na nu, a da vuẹ avwanre nẹ avwanre ra vwẹ ukẹcha kẹ ukoko rode ọvo vwẹ orere ri Quebec. Avwanre vẹ iniọvo na diarọ kugbe vwẹ emeranvwe esan soso tavwen avwanre ki kpo iruo rẹ ikiekin.

Vwẹ ẹgbukpe 14 re vwọ kpahọn, avwanre kin ikoko sansan vwẹ ubrakpọ ri Quebec. Avwanre mrẹ omavwerhovwẹn dẹn vwẹ ọke yena! Erhuvwu nẹ iruo aghwoghwo na rhe vwẹ Quebec mamọ, vwẹ ikoko evo rẹ avwanre kinrin, ọkieje yen avwanre vwọ mrẹ erua buebun re wian gangan ayen vwo muwan kẹ omaebrophiyame!

RA VWỌ KAROPHIYỌ INIỌVO RE WIANRE GANGAN

Iniọvo re dia ẹbẹre ra da jẹ French vwẹ Canada je vwo mu igbeyan. Ayen ihwo vẹ oruru, re ta uyota, rẹ oma vwerhan. Ẹkẹvuọvo, ọ ghwa lọhọ ayen vwo rhiabọreyọ uyota naa, vwọba ẹvwọsuọ ro nẹ obọ rẹ orua cha je pha gangan. Ighene evo rẹ esẹ vẹ ini rayen hẹ uyota naa vuẹ ayen nẹ, “Ovwan rha dobọ rẹ uyono rẹ ovwan vẹ Iseri ri Jihova ruẹ jii, avwanre cha djẹ ovwan nẹ uwevwin!” Dede nẹ ayen hirharoku ẹvwọsuọ tiọyena, ayen yọnregan. Aphro herọọ nẹ oma rayen ghene vwerhen Jihova!

Asaọkiephana, mi che jẹ unu e dje te iniọvo rẹ avwanre rẹ ekobaro ọkieje vẹ e rẹ oghẹresan rẹ fuevun wian gangan vwẹ Quebec ikpe yenaa. Ẹbẹre sansan ri Canada yen buebun rayen nurhe. Vwọ vrẹ ephẹrẹ ri French rẹ ayen yono obo ra jẹ, ayen ji yono kpahen ẹkuruemu vẹ oborẹ ihwo na ru erọnvwọn wan rọ dia asan ẹga ri Fada da vwẹ owọ muotọ.

Ọkieje yen e vwo ji ekobaro rẹ oghẹresan vwo kpo asan rọ bẹn e te rẹ ighwoghwota vuọvo hephaa. Ọ bẹn ra vwọ mrẹ iwevwin ra dia, ma rho kẹ iruo rẹ ubrọke fikirẹ utuoma rẹ ihwo rẹ asan tiọyena vwo kpahen Iseri ri Jihova. Iniọvo evo re tobọ rọvwọn nu obọ sa dia asan ọvo kuẹgbe, ọ sa dia iniọvo ẹne, esan, yẹrẹ ẹrenren rere ayen sa vwọ hwosa rẹ uwevwin na, kidie iwevwin pha ghanghanre. Ekobaro nana re vwomakpahotọ na egbowian yen ayen ruẹ. Siẹrẹ ayen da ton uyono ri Baibol phiyọ, ayen nabọ muomaphiyọ. Asaọkiephana rẹ ighwoghwota vwo bun vwẹ Quebec re na, ekobaro buebun tiọyena ki kpo asan efa ra da ma guọnọ ukẹcha.

Siẹrẹ avwanre de kiẹn ikoko sansan, avwanre davwẹngba vwo nene iniọvo re dia ighene yan vwẹ urhiọke ri Saturday. Ọnana kọ nẹrhẹ avwanre riẹn ebẹnbẹn rẹ ayen hirharokuẹ. Enẹna, evo usun rẹ ighene rẹ avwanre nene wian ga vwẹ ẹkuotọ efa kerẹ imishọnare yẹrẹ vwẹ ẹdia efa vwevunrẹ ukoko na.

Vwẹ ọke yena, ikoko evo sa tobọ hwosa rẹ ofaa, ọtiọyena igho rha dia avwanre obọ vwẹ oba rẹ emeranvwe naa. Vwẹ ọke tiọyena, Jihova ọvo yen avwanre vwẹrosua, rọ vwọ dianẹ ọyen ọvo yen vughe ẹdia rẹ avwanre na. O vwo ọke vuọvo ro vwo ku avwanre phiyotọọ. O vwo idjerhe buebun rẹ Jihova vwo ruo rọ nẹrhẹ avwanre se nẹ ukoko ọvo kpo ọfa.

ERỌNVWỌN RI MI YONO MIE INIỌVO RE FUEVUN

Mi ke djunute erere ro te vwe obọ vwo nẹ uyono ra vwọ kẹ avwanre vwẹ Giliẹd kpahen obo ra reyọ erọnvwọn re ghwa iyẹnrẹn vwo ruiruo. Ọke rẹ avwanre vwọ hẹ Quebec, avwanre vwo uphẹn buebun ra vwọ reyọ iredio, itẹlivishọni, vẹ ẹbe re ghwa iyẹnrẹn vwo se oseri. Ọkieje yen a vwọ vwẹ ovwẹ ba oniọvo Léonce Crépeault, rọ je ga kerẹ oniruo okinriariẹ rọ tẹn ona rẹ obo ra reyọ ekuakua re ghwa iyẹnrẹn vwo ruiruo. Siẹrẹ avwanre de bru ohwo ọvo rọ vwẹrote akon iruo rẹ asan ra da reyọ ekuakua ra vwọ ghwa iyẹnrẹn vwo ruiruo, ukperẹ o vwo dje oma rọyen kerẹ ohwo rọ tẹn ona rẹ iruo na, kọ ta: “Ọga, me vẹ ọrivẹ mẹ ihwo ri ghwoghwota rẹ Ọghẹnẹ. Avwanre ghwa riẹn emuọvo kpahen ekuakua ra vwọ ghwa iyẹnrẹẹn. Ẹkẹvuọvo, ukoko rẹ avwanre ji avwanre nẹ avwanre vuẹ ihwo kpahen ọghwẹkoko rode rẹ Iseri ri Jihova guọnọ ruẹ. Oma cha vwerhen avwanre ovwan de se ru kemu kemu vwọ vwẹ ukẹcha kẹ avwanre.” Obo rọ vwomakpotọ ta ota wan rhie uphẹn buebun phiyọ rẹ avwanre rhe se vwo jovwoo.

Ọke vwọ yanran na, oghọn rẹ ukoko da vuẹ vwẹ nẹ mi nene ọvo usun rẹ ilọya rẹ avwanre re se oniọvo Glen How wian kpahen eta eghanghanre evo rẹ ihwo sa ta ota kpahen vwẹ ekuakua ra vwọ ghwa iyẹnrẹn. Me mrẹ erere vwo nẹ obo mi yonori vwẹ Giliẹd kugbe ọke me vẹ oniọvo Léonce vwọ wian kugbe. Ọyen okpuphẹn me vẹ Oniọvo How vwọ wian kugbe. Siẹrẹ ọ da ta ota kpahen eta rẹ ukoko na ri shekpahen urhi, oshọ muoo, ọ rọ ma ghanre yen ọyen ohwo ro vwo oshọẹdjẹ rẹ Ọghẹnẹ, ro ji vwo ẹguọnọ rẹ Jihova.

Vwẹ 1985, e de ji avwanre kpo okinriariẹ rọ kẹrẹ asan rẹ ọsẹ mẹ dia vwẹ ẹbẹre rẹ ọnre shera ri Canada, ọnana da nẹrhẹ avwanre sa vwẹ ukẹcha rọ guọnọre vwọ kẹ. Emeranvwe erha vwọ wan nu, o de ghwu. Avwanre je ga vwẹ etiyin ri te 1989, tavwen e ki durhie avwanre kpo Bẹtẹl rọhẹ United States, ọnana gbe avwanre unu mamọ. Ọnana mudiaphiyọ nẹ avwanre cha yanjẹ iruo ikiekin avwanre ruru ẹgbukpe 19 vwo. Uvwre rẹ ikpe yena eje, avwanre dia iwevwin iniọvo buebun ji nene ayen riemu rẹ ayen chere kẹ avwanre. Avwanre vwo ọdavwaro kpahen iniọvo na eje ri rhie iwevwin rayen phiyọ kẹ avwanre nẹ avwanre dia, re je vwẹ emu kẹ avwanre!

E MU AVWANRE KPO UNITED STATES

Avwanre vwo te Brooklyn, a da vuẹ vwẹ nẹ me wian vwẹ Akon Iruo Rọvwẹrote Iruo rẹ Ẹga Na. Ọkieje yen mi che vwo dje ọdavwaro phia kpahen obo re yono uvwe vwẹ etiyin. Ọvo usun rẹ erọnvwọn ri mi yonori yen, ukperẹ mẹ vwọ vwẹ iroro evun vwo no nẹ mi vwo ẹruọ rẹ erọnvwọn eje, ofori mi vwo ọmrẹvughe rẹ uyota na eje. Vwẹ 1998, e de ji uvwe kpo Akon Iruo Rosiẹ, rọ dia asan mi de ji yono obo re siẹ te ọke na. Vwẹ ikpe buebun, me vwẹ ukẹcha kẹ oniọvo John Barr, rọ dia oniọvo rọ vwẹrote iruo rẹ Umẹ Rosiẹ. Ọkieje me cha vwọ vwẹ ẹro ọghanghanre vwo ni uyono vẹ ọke me vẹ ọyen ghwọrọ kugbe. O vwo uvi rẹ uruemu ra guọnọ mie Onenikristi.

Ọ vwerhen oma nẹ iniọvo re vwomakpotọ re wian vwẹ Akon Iruo Rosiẹ yen mi nene wian. Ọkieje yen ayen vwọ nokpẹn rẹ ukẹcha ri Jihova vwẹ ẹrhovwo kpahen owian rayen, kidie ayen riẹnre nẹ kerhuvwu kerhuvwu ro te ayen obọ dia womarẹ ona yẹrẹ ẹgba romobọ rayeen, ẹkẹvuọvo womarẹ ẹwẹn ọfuanfon ri Jihova.

Ọyen okpuphẹn rode me vẹ Linda vwo kpo ẹkuotọ 110 da ra mrẹ iniọvo rẹ avwanre. Avwanre mrẹ oborẹ imishọnare, iniọvo re ga vwẹ Umẹ Rọvwẹrote Oghọn Ukoko, kugbe iniọvo efa rehẹ ẹga rẹ ọkieje vwo ẹguọnọ rẹ Jihova te. Avwanre mrẹ oruru vẹ ọyọnregan rẹ iniọvo rehẹ ẹkuotọ tiọyena, re vwẹ ọdavwẹ rẹ Uvie na kobaro dede nẹ ayen hirharoku uweren ọgangan, omukpahen kugbe ofovwin. Aphro herọọ nẹ Jihova vwo ẹguọnọ rayen mamọ!

Vwẹ ikpe nana eje na, Linda vwẹ ukẹcha kẹ vwẹ rere me sa vwọ nabọ ruiruo mẹ vọnvọn. Ọyen ohwo ro vwo ẹguọnọ rẹ ihwo mamọ, rọ je gbẹn idjerhe sansan rọ sa vwọ vwẹ ukẹcha kẹ ayen. Ọ je tẹn ona rẹ obo ra ton aghwoghwo ri kpregede phiyọ. Ọ vwẹ ukẹcha kẹ ihwo buebun vwọ mrẹ uyota na vughe, ọtiọyen ji te ihwo re dobọ rẹ ẹga ri Jihova ji vwẹ obuko re. Linda ọyen obọdẹn rẹ okẹ ro nẹ obọ ri Jihova rhe! Avwanre vwọ ghwanra na, oborẹ iniọvo rẹ eya vẹ eshare re dia ighene ruẹ vwọ vwẹ ukẹcha kẹ avwanre da avwanre aro.​—Mak 10:29, 30.

Mi vwo ni kpuko kpo ẹgbukpe 80 re wanre na, ẹkpẹkpẹvwẹ me kpẹvwẹ Jihova. Me rhọnvwephiyọ oborẹ ọbuine na siri nẹ: “E Ọghẹnẹ, wo yono uvwe nẹ ọke eghene mẹ rhe, Rhi te ọke nana, mi ji ghwoghwo iruo rẹ igbevwunu wẹn.” (Une 71:17) Ọnana yen obo ri mi che ru te ẹdẹ ughwu mẹ.