Vwẹrokere Omaevwokpotọ ri Jihova

1. Diesorọ omaevwokpotọ ri Jihova vwọ dia obo ra jokaphiyọ?

WỌ DA mrẹ ihwo ri vwo ogangan usuon nonẹna, wọ mrẹ uruemu rẹ omaevwokpotọ vwẹ oma rayen? Ẹjo kakaka. Jẹ vwọ fẹnẹ ihwo yena, Jihova vwomakpotọ dede nẹ ọyen me vwo ẹgba. (Une 113:5-8) A mrẹ omaevwokpotọ vwẹ iruemu ri Jihova eje; o ji vwo ọke vuọvo rọ vwọ kparomaa. Avwanre cha mrẹ erere a cha vwọ fuẹrẹn iruemu iyoyovwin ri Jihova ẹne vẹ oborẹ iruemu ẹne na vwo dje omaevwokpotọ rọyen phia. Avwanre je cha fuẹrẹn oborẹ Jesu vwọ vwẹrokere omaevwokpotọ rẹ Ọsẹ rọyen. Avwanre che sikẹrẹ Jihova phiyọ je vwẹrokere uruemu rẹ omaevwokpotọ rọyen vrẹ obo ri jovwo siẹrẹ a da fuẹrẹn erọnvwọn nana.

JIHOVA GUỌNỌRE NẸ E BRU ỌYEN RHE

2. Die yen Une rẹ Ejiro 62:8 vuẹ avwanre kpahen Jihova? (Ni uhoho na.)

² Ihwo re kparoma dia ihwo ra sa ruaa. Oborẹ ayen ruẹ nẹrhẹ ihwo no nẹ ayen kparoma, ọnana kọ nẹrhẹ ihwo kẹnoma kẹ ayen kakare yẹrẹ mrẹ bẹnbẹn ayen vwo sikẹrẹ ayen. Jẹ ọ dia ọtiọyen Jihova hephaa! Kidie nẹ Ọsẹ avwanre rọhẹ obodjuvwu ọyen ohwo rọ vwomakpotọ, ọ da vuẹ avwanre nẹ avwanre bru ọyen rhe je vuẹ ọdavwẹ rẹ ubiudu avwanre eje. (Se Une rẹ Ejiro 62:8.) Kirobo rẹ ọsẹ ro vwo ọdavwẹ nabọ kerhọ kẹ emọ rọyen, ọtiọyen Jihova je nabọ kerhọ kẹ ẹrhovwo rẹ ihwo re vwẹ ẹga kẹ. Ọ tobọ mu ihwo vwo si ẹrhovwo rẹ idibo rọyen buebun phiyọ Baibol na. Enana djerephia nẹ ọ guọnọre nẹ e bru ọyen rhe. (Jos. 10:12-14; 1 Sam. 1:10-18) Kẹ, ọ da rha dianẹ o vwo emuọvo rẹ avwanre ruru rọ nẹrhẹ avwanre no nẹ a cha sa nẹrhovwo rhe Jihovaa vwo?

3. Die yen nẹrhẹ o muwẹro nẹ Jihova guọnọre nẹ wọ nẹrhovwo rhe ọyen ọkieje?

³ Avwanre sa nẹrhovwo rhe Jihova ọ da tobọ dianẹ e no nẹ e fo ihwo re dje ẹguọnọ kẹẹ. Diesorọ a vwọ ta ọtiọyen? Vwẹ itẹ rẹ ọmọ osoghoro na, Jesu reyọ Jihova vwo dje ọsẹ ro vwo ẹguọnọ, rẹ ọmọ rọyen bo ghwru, o de rhivwin rhe uwevwin ji no nẹ ọsẹ rọyen che rhiabọreyọ ọyeen. Die yen ọsẹ na ruru ọke rọ vwọ kparo mrẹ rọ vwọ cha? Jesu tare nẹ “ọ da djẹ yanran, ọ da gbanọ, ọ da fiọnfiọn vwọrẹ ẹguọnọ.” (Luk 15:17-20) Jihova pha kerẹ ọsẹ yena. Ugege ro vwo nyo ẹrhovwo rẹ ihwo rẹ udu rayen kuọrọnre fikirẹ ẹnwan kugbe abe rẹ umwemwu, omaevwokpotọ rọyen ko muo vwọ kpahanphiyọ ẹrhovwo rayen kpakpata. (Uvwe. 3:19, 20) Erorokẹ ji mu Jihova vwọ djẹ bru ihwo tiọyena ra kirobo re se dje, vwọ vwẹ imuẹro vẹ uchebro vwọ kẹ ayen, nẹ ọyen vwo ẹguọnọ vẹ arodọnvwẹ rayen. (Aiz. 57:15) Idjerhe vọ yen Jihova vwọ djẹ bru avwanre cha nonẹna? Ọke buebun na, o ru ọtiọyen womarẹ ekpako, ihwo rẹ orua kugbe iniọvo rẹ ukoko na. (Jems 5:14, 15) Jihova ru ọrhuẹrẹphiyotọ nana kidie ọ guọnọre nẹ avwanre sikẹrẹ ọyen.

4. Idjerhe vọ yen Jesu vwo djephia nẹ ọyen ohwo re se bru ra?

⁴ Jesu vwẹrokere Ọsẹ rọyen. Jesu vwomakpotọ kerẹ Ọsẹ rọyen. Ọnana yen sorọ ihwo se vwo bro ra ọke rọ vwọ hẹ otọrakpọ na. Oshọ mu ayen rẹ ayen vwọ nọ Jesu enọọ. (Mak 4:10, 11) Ọtiọyena Jesu sa nọ ayen oborẹ ayen rorori, ayen me je vuẹ oborẹ evunrẹ ẹwẹn rayen. (Mat. 16:13-16) Ọke rẹ ayen da tobọ ru chọ dede, oshọ mu ayeen kidie ayen riẹnre nẹ Jesu ọyen ohwo esiri ro gbe arodọnvwẹ, ji vwo edirin. (Mat. 17:24-27) Kidie nẹ Jesu nabọ vwẹrokere udje rẹ Ọsẹ rọyen, ọ da nẹrhẹ idibo rọyen vughe oka rẹ ohwo ri Jihova hepha. (Jọn 14:9) Ayen mrẹvughe nẹ Jihova fẹnẹ ilori rẹ ẹga rẹ ọke yena re kparoma, re djoma, ri vwo ọdavwẹ rẹ ihwoo, re ji se siẹkẹrẹẹ. Vwọ fẹnẹ ayen, Jihova ohwo rọ vwomakpotọ re se brẹ ra.

5. Mavọ omaevwokpotọ sa vwọ nẹrhẹ a dia ihwo ra sa rua?

⁵ Mavọ yen a sa vwọ vwẹrokere Jihova? Avwanre de vwo uruemu rẹ omaevwokpotọ, ka cha dia ihwo ra sa rua vrẹ obo ri jovwo. Omaevwokpotọ cha nẹrhẹ a kẹnoma kẹ omaẹriọ, omaẹkparọ kugbe uruemu re vwo jẹ ihwo efa evwoghovwo—iruemu re nẹrhẹ ihwo kẹnoma kẹ avwanre. Ẹkẹvuọvo, omaevwokpotọ cha cha avwanre uko vwo vwo edirin, vwo ghovwo ji dje uruemu esiri phia—iruemu re cha nẹrhẹ ihwo sikẹrẹ avwanre. (Kọl. 3:12-14) Ofori nẹ ekpako na nabọ davwẹngba vwọ dia ihwo ra sa rua. Ayen vẹ iniọvo na da ghwọrọ ọke kuẹgbe, kọ cha lọhọ iniọvo na vwo bru ayen ra. Ọnana mudiaphiyọ nẹ ayen cha davwẹngba ayen vwo kpo uyono vwẹ Ọguan Ruvie ukperẹ ayen vwo churu si uyono na womarẹ vidio kọnfrẹsin. O fori nẹ ayen nene iniọvo na wian kugbe vwẹ iruo aghwoghwo rẹ nẹ uwevwin kpo uwevwin vwo nene oborẹ ẹgba rayen muru. Enana cha nẹrhẹ iniọvo na nabọ vughe ekpako na vrẹ obo ri jovwo, ọ rha cha bẹn rẹ ayen vwo bru ayen ra siẹrẹ ayen da guọnọ ukẹchaa.

JIHOVA ỌYEN OHWO RỌ NUẸ

6-7. Djudje oborẹ Jihova vwo dje uruemu ra vwọ nuẹ phia vwọ kẹ oyare rẹ idibo rọyen.

⁶ Siẹrẹ ihwo buebun re kparoma de nene ihwo efa ru erọnvwọn, ọ bẹn rẹ ayen vwọ nuẹ. Jẹ, Jihova ọyen ohwo rọ vwomakpotọ, rọ je nuẹ dede nẹ ọ rho vrẹ kohwo kohwo. Roro kpahen obo ro ruẹ Miriam, oniọvo ri Mosis, ọke rọ vẹ Erọn vwo gun iguegun kpahen Mosis rọ dia ohwo ro mudia kẹ Jihova. Kọyen Jihova yen Miriam jẹ ọghọ emuo kẹ. Fikirẹ ọnana, ophu rẹ Miriam de mu Jihova mamọ, ọ da vwẹ oti vwo muo. Kẹ, die yen Jihova ruru ọke rẹ Erọn vwo yovwunu, rẹ Mosis je vwọ rẹ Jihova nẹ o sivwin oniọvo rayen? Kidie nẹ Jihova ọyen ohwo rọ vwomakpotọ, ọ rha sen kẹ ayeen, o de sivwin Miriam.—Ukeri 12:1-15.

⁷ Jihova ji dje uruemu rẹ omaevwokpotọ phia womarẹ obo ro nene Ovie Hẹzikaya yerin wan. Ọ womarẹ ọmraro rọyen vwọ vuẹ ovie na nẹ o che ghwu. Hẹzikaya da viẹ gangan je rẹ Jihova nẹ o sivwin ọyen. Jihova de gbe arodọnvwẹ kẹ ovie na womarẹ ro vwo phi ẹgbukpe 15 ba ikpe rọyen. (2 Ivie 20:1, 5, 6) Aphro herọọ nẹ omaevwokpotọ yen mu Jihova vwo gbe arodọnvwẹ je nuẹ.

8. Idje vọ yen djerephia nẹ Jesu ọyen ohwo rọ nuẹ? (Mak 3:1-6)

⁸ Jesu vwẹrokere Ọsẹ rọyen. Ọke ri Jesu vwọ hẹ akpọ na, ọ reyọ kuphẹn kuphẹn ro rhiephiyọ vwo ru obo ri yovwirin vwọ kẹ ihwo efa. Kerẹ udje, o sivwin ihwo vwẹ ẹdẹ urovwoma na dede nẹ ilori ẹga na vwọso obo ro ruru na. (Se Mak 3:1-6.) Vwẹ ọke avwanre na, Jesu ji dje uruemu ra vwọ nuẹ vwọphia kerẹ ọgbuyovwin rẹ ukoko na. Kerẹ udje, ọke rẹ ohwo de ru umwemwu ọgangan vwevunrẹ ukoko na, o vwo edirin rọyen womarẹ ọ vwọ kẹ ohwo na uphẹn ro vwo wene idjerhe rọyen.—Ẹvwọ. 2:2-5.

9. Mavọ yen avwanre se vwo vwo oka rẹ ẹro rẹ Jihova vwo nẹ erọnvwọn vẹ obo ro ruẹ erọnvwọn wan? (Ni ihoho na.)

⁹ Mavọ yen a sa vwọ vwẹrokere Jihova? O fori nẹ avwanre vwomakpotọ vwo vwo oka rẹ ẹro rẹ Jihova vwo nẹ erọnvwọn vẹ obo ro ruẹ erọnvwọn wan. (Jems 3:17) Kerẹ udje, emiọvwọn re vwẹrokere Jihova che rhẹro rẹ erọnvwọn rẹ emọ rayen che se ruu vwo mie ayeen. Vwẹ Jẹnẹsis 33:12-14 a mrẹ oborẹ Jekọp nabọ djudje ọnana kẹ avwanre. Emiọvwọn re vwomakpotọ re je nuẹ cha davwẹngba vwọ kẹnoma kẹ uruemu rẹ ayen vwọ vwẹ emọ rayen vwọ vwanvwan ohwohwo. O ji fo nẹ ẹkpako rẹ ukoko dje uruemu ra vwọ nuẹ vwọphia. Idjerhe ọvo rẹ ayen se vwo ru ọtiọyen, ọyen ayen vwọ nuẹ vwo nene orhiẹn rẹ ekpako ri me bun bruru, ọ da dianẹ ọ vwọso odjekẹ ri Baibol naa. (1 Tim. 3:2, 3) Avwanre eje je sa davwẹngba vwo vwo ẹruọ rẹ ẹro rẹ ihwo efa vwo nẹ emu, tobọ vwẹ ọke iroro avwanre da fẹnẹ ọrayen. (Rom 14:1) Ọtiọyena, e jẹ avwanre eje vwẹ ukoko na davwẹngba rere ‘ihwo ejobi mrẹvughe nẹ avwanre ihwo re nuẹ.’—Fil. 4:5.

JIHOVA VWO EDIRIN

10. Idjerhe vọ yen Jihova vwo dje erhiorin phia?

¹⁰ Ọ sa dianẹ wo niroso re nẹ ihwo re kparoma guọnọ nẹ e hwe ọke rayeen. Ayen se vwo erhioriin kidie ayen kparoma. Jẹ ọ dia ọtiọyen Jihova hephaa, o vwo ohwo vuọvo ro vwo erhiorin tee! Kerẹ udje, vwẹ ọke ri Noa, Jihova tare nẹ ọyen cha hẹrhẹ te ẹgbukpe 120 tavwen ọ ke ghwọrọ irumwemwu rẹ ihwo. (Jẹn. 6:3) Ọnana nẹrhẹ Noa mrẹ ọke vwọ yọnrọn emọ rọyen ghwanre je kare okọ na womarẹ ukẹcha rẹ orua rọyen. Vwẹ ọke ọfa, amakashe ri Jihova vwo edirin rẹ Ebraham womarẹ ọ vwọ nabọ kerhọ rọyen ọke rọ vwọ nọ enọ vwọ kpahen oghwọrọ ri Sọdọm vẹ Gomora. Ohwo rọ kparoma sa van je ta nẹ, ‘Ono yen owẹ rọ nọ vwẹ enọ!’ Ẹkẹvuọvo, amakashe na vwẹrokere Jihova vwo vwo edirin rẹ Ebraham.—Jẹn. 18:20-33.

11. Vwo nene obo rehẹ 2 Pita 3:9, diesorọ Jihova vwo vwo edirin vwẹ ọke avwanre na?

¹¹ Jihova ji vwo edirin vwẹ ọke avwanre na womarẹ ọ vwọ hẹrhẹ ọke ro bruphiyọ ro che vwo phioba eyeren nana. Diesorọ o vwo vwo edirin? “Kidie ọ guọnọre nẹ ohwo vuọvo ghwọrọ-ọ, ukperẹ ọtiọyen ọ guọnọre nẹ ihwo eje kurhẹriẹ.” (Se 2 Pita 3:9.) Kẹ Jihova vwo edirin kufia? Ẹjo! Edirin rọyen nẹrhẹ iduduru rẹ ihwo ri vwo ẹwẹn esiri rhe dia igbeyan rọyen. Avwanre je rhẹro rọyen nẹ iduduru rẹ ihwo ji che ru ọtiọyen vwẹ obaro na. Dedena, o vwo asan rẹ edirin ri Jihova bare. Jihova vwo ẹguọnọ rẹ ihwo, jẹ ọ dia ọyen ọ cha vwọ vwẹ uphẹn vwọ kẹ ayen svwo ru obo ri je ayeen. Ọ cha vwẹ uphẹn kẹ umwemwu nẹ ọ dia bẹdẹẹ.—Hab. 2:3.

12. Idjerhe vọ yen Jesu vwọ vwẹrokere edirin ri Jihova?

¹² Jesu vwẹrokere Ọsẹ rọyen. Ikpe uriorin buebun yen Jesu vwọ vwẹrokere edirin ri Jihova cha re. Jesu mrẹ Idẹbono ọke ro vwo mu efian bare Jihova vẹ ihworakpọ re fuevun. (Jẹn. 3:4, 5; Job 1:11; Ẹvwọ. 12:10) Jesu ji rhiẹromrẹ oja ọgangan rẹ ihworakpọ ria. Vwẹ ẹwẹn roro Jesu ro nẹ kiọkiọkiọ kpahen ọke rọ cha “vwọ guọghọ iruo rẹ Idẹbono”! (1 Jọn 3:8) Die yen nẹrhẹ Jesu se vwo erhiorin hẹrhẹ te ọke ri Jihova bruphiyọ, rọ cha vwọ guọghọ iruo rẹ Eshu kakare? Omaevwokpotọ yen nẹrhẹ Jesu yanjẹ erọnvwọn eje vwẹ obọ ri Jihova.—Iruo 1:7.

13. Mavọ yen Jesu vwo edirin rẹ idibo rọyen wan, kẹ diesorọ?

¹³ Ọke ri Jesu vwọ hẹ otọrakpọ na, o nene iyinkọn rọyen yerin vwọrẹ edirin. Kerẹ udje, iyinkọn rọyen na vwọ phraphro kọke kọke kpahen ohwo rọ ma rho, ofu rayen djeree. Ukperẹ ọtiọyen, o vwo edirin rayen. (Luk 9:46; 22:24-27) Ọ vwẹroso ayen nẹ ayen che ru ewene ri fori ọke vwọ yanran na. Kẹ owẹ vwo, o vwo echobọ evo wo dje erueruo? Ọ da dia ọtiọyen, o muẹro nẹ oma cha vwerhen owẹ nẹ wo vwo Ovie rọ vwomakpotọ, ro ji vwo edirin wẹn!

14. Die yen sa cha avwanre uko vwo vwo edirin phiyọ?

¹⁴ Mavọ yen a sa vwọ vwẹrokere Jihova? Avwanre de vwo “iroro ri Kristi,” jẹ avwanre vwẹrokere oborẹ Jihova roro ji ruẹ erọnvwọn wan. (1 Kọr. 2:16) Mavọ yen e se vwo vwo ẹruọ iroro ri Jesu? O vwo idjerhe ọfaa. Avwanre che se ikuegbe rẹ akpeyeren ri Jesu. A me je frẹkotọ roro kokodo kpahen oborẹ Jesu ruru vẹ oboresorọ o vwo ru ọtiọyen. O ji fo nẹ a rẹ Jihova nẹ ọ cha avwanre uko vwo vwo iroro ri Kristi. Avwanre vwo vwo ẹruọ rẹ iroro ri Kristi phiyọ ye, ọnana kọ cha nẹrhẹ a vwẹrokere Jihova vwo vwo ji nene ihwo efa yerin vwọrẹ edirin.—Mat. 18:26-30, 35.

JIHOVA BRỌGHỌ PHIYỌ IHWO RE VWOMAKPOTỌ OMA

15. Idjerhe vọ yen Jihova vwo ru nene eta rehẹ Une rẹ Ejiro 138:6?

¹⁵ Se Une rẹ Ejiro 138:6. Ọyena okpuphẹn rẹ Jihova rọ dia ohwo ro me kpenu vwẹ akpọ vẹ idjuvwu vwo brọghọ phiyọ ihwo re vwomakpotọ oma! Ja mrẹ udje rẹ ihwo evo re vwomakpotọ ri Jihova brọghọ phiyọ oma vwẹ awanre. Evo usun rayen ghwa dia ihwo rẹ ẹwẹn rẹ avwanre fobọ djẹ raa, dedena, ikuegbe rayen jehẹ evunrẹ Baibol na. Jihova reyọ ẹwẹn ọfuanfon rọyen vwo mu Mosis vwo si kpahen ọyọnrọmọ ọvo re se Dẹbora phiyọ Baibol na. Ọyen odibo rọ fuevun vwọ kẹ orua rẹ Aizik vẹ Jekọp te omarẹ ẹgbukpe 125! Dede nẹ a ghwa riẹn erọnvwọn buebun kpahen aye nanaa, jẹ Jihova mu Mosis vwo si ikuegbe rẹ aye nana re vwo ẹguọnọ kpahen mamọ na phiyọ Baibol na. (Jẹn. 24:59; 35:8, eta rehẹ obotọ.) Ikpe ujorin buebun vwọ wanvrẹ nu, Jihova de si Devid nẹ ẹdia rọ hepha kerẹ osuigodẹ, o de vwo mu ovie rẹ ẹgborho rẹ Izrẹl. (2 Sam. 22:1, 36) E ghwe vwo vwiẹ Jesu nu, o kririi Ọghẹnẹ de brọghọ phiyọ isuigode evo oma ro vwo ji emekashe ra vuẹ ayen nẹ e vwiẹ Mesaya na re vwẹ Bẹtlẹhẹm, ayen yen ihwo ri ke nyo kpahen evwiẹ ri Mesaya na. (Luk 2:8-11) Ọke ri Josẹf vẹ Meri vwo mu Jesu vwo kpo uwevwin rẹ ẹga na, Jihova de brọghọ phiyọ Simiọn vẹ Anna re dia ihwo re kpakore oma womarẹ ọ vwọ kẹ ayen uphẹn nẹ ayen mrẹ Ọmọ rọyen. (Luk 2:25-30, 36-38) Dede nẹ Jihova kpenu mamọ, “o ji se ohwo ro kpotọ gbe ohwo”!

16. Idjerhe vọ yen Jesu vwọ vwẹrokere Ọsẹ rọyen vwo brọghọ phiyọ ihwo efa oma?

¹⁶ Jesu vwẹrokere Ọsẹ rọyen. Jesu brọghọ phiyọ ihwo re vwomakpotọ oma kerẹ Ọsẹ rọyen. O yono “ihwo ghevweghe” te ihwo ri kpo isikuruu uyota ro shekpahen Uvie rẹ Ọghẹnẹ. (Iruo 4:13; Mat. 11:25) Jesu sivwin ihwo re muọga vwẹ idjerhe ro de brọghọ phiyọ ayen oma. (Luk 5:13) Vwẹ ason rọ koba tavwen o ki ghwu, Jesu hworhẹ awọ rẹ idibo rọyen rọ dia iruo ro fori nẹ odibo ru. (Jọn 13:5) Tavwen o ki kpo odjuvwu, o brọghọ phiyọ idibo rọyen eje re vwomakpotọ oma, te rẹ ọke nana vẹ e re cha vwẹ obaro oma, rọ vwọ kẹ ayen iruo rọ ma ghanre kparobọ nẹ ayen ru, rẹ ayen vwọ vwẹ ukẹcha kẹ ihwo efa vwo vwo arhọ ri bẹdẹ.—Mat. 28:19, 20.

17. Idjerhe vọ yen e se vwo brọghọ phiyọ ihwo efa oma? (Ni uhoho na.)

¹⁷ Mavọ yen a sa vwọ vwẹrokere Jihova? Avwanre brọghọ phiyọ ihwo oma siẹrẹ avwanre de ghwoghwo iyẹnrẹn esiri na kẹ kohwo kohwo rọ guọnọ kerhọ, o toro ohọroma, asan rẹ ayen nurhe yẹrẹ oborẹ ayen yono ẹbe tee. O toro ona yẹrẹ uphẹn rẹ ẹga rẹ avwanre vworii, e se brọghọ phiyọ iniọvo avwanre oma siẹrẹ e de no nẹ ayen yovwin nọ avwanre. (Fil. 2:3) Avwanre da “kobaro” re vwo muọghọ kẹ kohwo kohwo vwẹ idjerhe tiọna yẹrẹ efa, oma vwerhen Jihova.—Rom 12:10; Zẹf. 3:12.

18. Diesorọ wọ vwọ guọnọ vwẹrokere omaevwokpotọ ri Jihova?

¹⁸ Avwanre vwọ davwẹngba vwọ vwẹrokere omaevwokpotọ rẹ Ọsẹ avwanre ro vwo ẹguọnọ ye, avwanre ke cha dia ihwo ra sa rua, re nuẹ ri ji vwo edirin. Avwanre ki ji che brọghọ phiyọ ihwo efa oma kirobo ri Jihova ruẹ. Ọtiọyena, avwanre ke cha dia ghanghanre vwẹ ẹro Ọghẹnẹ vrẹ obo ri jovwo siẹrẹ a da davwẹngba vwọ vwẹrokere omaevwokpotọ rọyen!—Aiz. 43:4.