Uvi Omavwerhovwẹn re Vwo Siẹrẹ a da Kokẹ

1-2. Diesorọ Jihova vwọ ma avwanre ra vwọ mrẹ omavwerhovwẹn siẹrẹ a da kokẹ?

JIHOVA vwọ ma ihworakpọ, ọ ma ayen vẹ ẹgba rẹ ayen vwọ mrẹ uvi rẹ omavwerhovwẹn siẹrẹ ayen da kokẹ vrẹ ọ rẹ ayen da reyọ. (Iru 20:35) Ọnana ko mudiaphiyọ nẹ ohwo de ruẹse kẹ avwanre oma rha vwerhen avwanree? Ẹjo. Avwanre riẹnre nẹ oma vwerhen avwanre siẹrẹ e de ruẹse kẹ avwanre. Ẹkẹvuọvo, a mrẹ uvi rẹ omavwerhovwẹn ọ da dianẹ avwanre yen kokẹ na. Vwọrẹ uyota, ọyen obo ri yovwirin nẹ Jihova ma avwanre vwẹ idjerhe ọtiọna. Diesorọ?

² Kidie nẹ Jihova ma avwanre vwẹ idjerhe ọtiọna, ọnana kọ nẹrhẹ oma vwerhen avwanre phiyọ. E se toroba aghọghọ avwanre siẹrẹ a da guọnọ idjerhe sansan ra vwọ kokẹ. Ọnana dia emu rẹ omavwerhovwẹn nẹ Jihova ma avwanre vwẹ idjerhe ọtiọna?​—Un 139:14.

3. Diesorọ e vwo djisẹ ri Jihova kerẹ “Ọghẹnẹ rẹ oma vwerhan”?

³ Baibol na kẹ avwanre imuẹro nẹ a da kokẹ, ọ ghwa omavwerhovwẹn cha, a gbe ta ri Baibol na vwọ tanẹ Jihova ọyen “Ọghẹnẹ rẹ oma vwerhan.” (1Ti 1: 11) Ọyen ohwo rẹsosuọ ro ke ruẹse, ọ ke rha dia ohwo ro me Ruẹse kparobọ. Kirobo rẹ ọyinkọn Pọl djere, fikirẹ ọyen “yen avwanre vwo vwo arhọ, rẹ avwanre vwọ yan, avwanre ji vwo yerẹn.” (Iru 17:28) Vwọrẹ uyota, “emu esiri eje kugbe okẹ ọgbagba ejobi” obọ ri Jihova yen i nurhe.​—Jem 1: 17.

4. Die yen cha nẹrhẹ oma vwerhen avwanre phiyọ?

⁴ Avwanre eje guọnọ mrẹ omavwerhovwẹn ro te ohwo obọ siẹrẹ a da dia ihwo re kokẹ. E se ru ọtiọyen siẹrẹ a da vwẹrokere ẹse eruo ri Jihova. (Ẹf 5:1) A cha vwọ ta ota kpahen ẹse eruo ri Jihova na, e jẹ a jokaphiyọ obo re se ru ọ da dianẹ ihwo dje ọdavwaro phia kpahen ẹse rẹ avwanre ru kẹ ayeen. Ẹkarophiyọ nana cha cha avwanre uko vwo vwo aghọghọ je serọ rọyen siẹrẹ a da dia ihwo re kokẹ.

VWẸROKERE ẸSE ERUO RI JIHOVA

5. Ekuakua rẹ ugboma vọ yen Jihova vwọ kẹ avwanre?

⁵ Erhọ yen idjerhe evo ri Jihova vwo ruẹse kẹ avwanre? Jẹ a ta ota kpahen evo rayen. Jihova kẹ avwanre ekuakua rẹ ugboma. Ọ dia ọkieje yen erọnvwọn vwo yovwẹn kẹ avwanre vwẹ akpeyereen, jẹ a kpẹvwẹ Jihova nẹ ọ kẹ avwanre oborẹ avwanre guọnọre. Kerẹ udje, o ruo rere avwanre se vwo vwo emuọre, iwun, kugbe asan ra dia. (Un 4:8; Mt 6:31-33; 1Ti 6:6-8) Jihova de kẹ avwanre oborẹ avwanre guọnọre kidie nẹ ọyen obo ro fori nẹ o ru? Ẹjo kakaka! Diesorọ o vwo ruẹ ọtiọyen?

6. Die yen Matiu 6:25, 26 yono avwanre?

⁶ Jihova ruẹ ọdavwẹ rẹ ugboma rẹ avwanre vwọ kẹ avwanre kidie o vwo ẹguọnọ rẹ avwanre. Roro kpahen eta ri Jesu rehẹ Matiu 6:25, 26. (Se.) Jesu reyọ emama vwo ru udje. Rọ vwọ ta ota kpahan ephran, ọ da ta: “Ayen kọn ibi yẹrẹ vuẹn yẹrẹ koko phiyọ iwevwin ra da sẹro rẹ erọnvwọ-ọn.” Ẹkẹvuọvo, vwo oniso rẹ obo rọ rhoma ta: “Ọsẹ rẹ ovwan rọhẹ obodjuvwu ghẹrẹ ayen.” Ọtiọyena Jesu da nọ: “Ovwan rha ghanre vrẹ ayen?” Die yen ẹkpo na? Jihova ni idibo rọyen re vwẹ ẹga kẹ ghanghanre vrẹ eranvwe rọ mare. Ọ da dianẹ Jihova vwẹrote ọdavwẹ rẹ eranvwe, e se vwo imuẹro nẹ ọ cha vwẹrote avwanre! Kerẹ ọsẹ ro vwo ọdavwẹ rẹ emọ rọyen, ọtiọyen Jihova je vwẹrote orua rọyen kidie o vwo ẹguọnọ rayen.​—Un 145:16; Mt 6:32.

7. Ọrhọ yen idjerhe ọvo a sa vwọ vwẹrokere ẹse eruo ri Jihova? (Ni uhoho na.)

⁷ Kerẹ Jihova, avwanre ji se ruẹse kẹ ihwo efa kidie avwanre vwo ẹguọnọ rayen. Kerẹ udje, wo vughe oniọvo ọvo ro vwo emu yẹrẹ iwuun? Jihova sa reyọ owẹ vwọ vwẹ ukẹcha kẹ. A riẹn Iseri ri Jihova phiyọ ihwo ri ruẹse ọke rẹ emu ri kpregede da vwomaphia. Kerẹ udje, uvwre rẹ ọke rẹ ọga ri COVID-19, iniọvo na vwẹ emu, iwun kugbe erọnvwọn efa vwọ kẹ ihwo re guọnọ ukẹcha. Buebun ji ru itetoro vwo bicha iruo rẹ akpọeje. Ọnana nẹrhẹ a mrẹ igho vwo bicha iniọvo re guọnọ ukẹcha rẹ emu ri kpregede phia kẹ. Iniọvo na ru nene obo rehẹ Hibru 13:16 rọ tare nẹ: “Ovwan jẹ erhuvwu eruo chọrọ ovwan ẹro-o, ovwan ji nene ihwo efa ghare oborẹ ovwan vwori, kidie oka rẹ izobo ọtiọyena nabọ je Ọghẹnẹ.”

8. Idjerhe vọ yen a vwọ mrẹ erere vwo nẹ ẹgba ri Jihova vwọ kẹ avwanre? (Filipae 2:13)

⁸ Jihova yen vwẹ ẹgba kẹ ohwo. Oma vwerhen Jihova rọ vwọ reyọ ẹgba rọyen rọ basaan na vwọ kẹ idibo rọyen re fuevun ga. (Se Filipae 2:13.) Wọ nẹrhovwo jovwo re nẹ Jihova kẹ wẹ ẹgba wọ vwọ sen ọdavwini yẹrẹ wo vwo chirakon rẹ ebẹnbẹn? Ọ je sa dianẹ wọ nẹrhovwo rhe Jihova nẹ ọ kẹ wẹ ẹgba wo se vwo ru obo wọ guọnọ ru ukpẹdọke. Wọ da mrẹ ẹkpahọnphiyọ rẹ ẹrhovwo wọ nẹ rhe Jihova nẹ ọ vwẹ ẹgba vwọ kẹ wẹ, wọ sa rhọnvwephiyọ oborẹ ọyinkọn Pọl siri nẹ: “Mi vwo ẹgba mi vwo ru erọnvwọn ejobi womarẹ ohwo rọ kẹ vwẹ ogangan.”​—Fil 4:13.

9. Mavọ yen avwanre sa vwọ vwẹrokere obo ri Jihova vwẹ ẹgba rọyen vwo ruiruo wan? (Ni uhoho na.)

⁹ A sa vwẹrokere obo ri Jihova reyọ ẹgba rọyen vwo ruiruo, dede nẹ avwanre ihworakpọ re gbaree. Avwanre cha sa vwẹ ẹgba yẹrẹ ogangan vwọ kẹ ihwo efaa. Ẹkẹvuọvo avwanre sa reyọ ẹgba rẹ avwanre vwọ vwẹ ukẹcha kẹ ayen. Kerẹ udje, a sa yan uwevwin vwọ kẹ iniọvo re kpakore yẹrẹ e rẹ oma rayen ganree ji nene ayen wian owian rẹ uwevwin. Ọ da dia oborẹ avwanre se ru, a sa vwomakpahotọ vwo ru orufon je vwẹrote Ọguan Ruvie. A da vwẹ ẹgba rẹ avwanre vwo ruiruo vwẹ idjerhe ọtiọna, o che fierere vwọ kẹ iniọvo rẹ avwanre efa.

10. Mavọ yen avwanre sa vwọ reyọ eta rẹ avwanre vwọ bọn ihwo efa gan?

¹⁰ Wo jẹ ọ chọrọ owẹ ẹroo nẹ, eta wẹn sa vwẹ ọbọngan vwọ kẹ ihwo efa. Wọ sa vwẹ ẹwẹn roro ohwo rọ sa mrẹ ọbọngan siẹrẹ wo de jiro fikirẹ obo ro ruru? Wo vughe ohwo rọ guọnọ uchebro? Ọ da dia ọtiọyen, diesorọ wọ rha vuẹ ohwo na nẹ wo vwo ọdavwẹ rọyeen? Wọ sa kọn bro ra, se vwẹ ifonu, vwẹ ikadi rhe, vwẹ ovuẹ rhe vwẹ ifonu yẹrẹ womarẹ imel. Wo kpokpo oma wẹn kpahan obo ru wọ cha taa. Emeta ra ta nẹ ubiudu rhe sa ghwa dia oborẹ oniọvo na guọnọre rọ vwọ fuevun ọkieje yẹrẹ vwẹ ukẹcha kẹ vwo yerin ghene ebẹnbẹn rọyen.​—Isẹ 12:25; Ẹf 4:29.

11. Mavọ yen Jihova reyọ aghwanre rọyen vwo ruiruo wan?

¹¹ Jihova yen vwẹ aghwanre vwọ kẹ ohwo. Odibo Jems siri nẹ: “Ọ da dianẹ aghwanre kanre ọvo vwẹ usun rẹ ovwan, e jẹ ọ nọ mie Ọghẹnẹ ọkieje . . . kidie o siobọnẹ kẹ ihwo eje ghwologhwolo o gbugbon rẹ oruchọ-ọ.” (Jem 1:5; eta rehẹ obotọ.) Kirobo rẹ eta nana djere, Jihova vwẹ aghwanre rọyen vwọ djahen ihwoo, o siobọno ghwologhwolo. Je jokaphiyọ nẹ Jihova da kẹ ohwo aghwanre, “ọ vwọ wanriẹ ohwo-o,” yẹrẹ “o gbugbon rẹ oruchọ-ọ.” Ọ guọnọ nẹ e ni oma rẹ avwanre kueku kidie nẹ a guọnọ odjekẹ rọyeen. Vwọrẹ uyota, ọ guọnọre nẹ a nokpẹn rẹ ukẹcha rọyen.​—Isẹ 2:1-6.

12. Uphẹn vọ yen avwanre vwori rẹ avwanre vwo yono ihwo efa oborẹ avwanre riẹnre?

¹² Kẹ avwanre vwo? A sa vwẹrokere Jihova womarẹ e vwo jẹ aghwanre rẹ avwanre ẹ vwọ djahen ihwo? (Un 32:8) Idibo ri Jihova vwo uphẹn buebun ayen vwo yono ihwo efa oborẹ ayen riẹnre. Kere udje, ọkieje yen avwanre vwo yono ighwoghwota kpokpọ vwẹ iruo rẹ aghwoghwo na. Ekpako vwẹ edirin vwo yono idibo rowian kugbe iniọvo eshare ri bromaphiyame re, ayen sa vwọ riẹn obo ra vwẹrote iruo sansan vwevunrẹ ukoko na. Ihwo re tẹn ona rẹ ebanbọn vẹ ẹroevwote vwẹ ukẹcha phia womarẹ ayen vwo yono ihwo re ghwa riẹn kpahen obo re ruiruo naa, ayen sa vwọ tẹn ona rẹ ebanbọn rẹ iwevwin rẹ ukoko na.

13. Rọ vwọ dianẹ Jihova vwẹ aghwanre rọyen vwọ djahen ihwo naa, mavọ yen a sa vwọ vwẹrokere siẹrẹ e de yono ihwo efa?

¹³ Davwẹngba vwọ vwẹrokere Jihova siẹrẹ wo de yono ihwo efa. Karophiyọ nẹ Jihova vwẹ aghwanre rọyen vwọ djahen ihwoo. Ọtiọyena, o ji fo nẹ e yono ihwo efa oborẹ avwanre riẹnre odedede. Avwanre je reyọ oborẹ avwanre riẹnre vwọ djahen ihwoo, vẹ oshọ nẹ ohwo re yono na cha riẹn nọ avwanre je reyọ ẹdia rẹ avwanree. E jẹ a kẹnoma kẹ iroro nana: O vwo ohwo vuọvo ro yono uvwee! Ọtiọyena e jẹ ohwo na yono oma rọyen.’ A guọnọ oka rẹ uruemu ọtiọyena vwẹ ohri rẹ idibo ri Jihovaa. Ọtiọyena, ọ dia oma de cha vwerhen avwanre vwo yono ayen oborẹ avwanre riẹnre ọvoo a je cha “vwẹ arhọ rẹ avwanre vwọ kpahotọ” kẹ ayen. (1Tẹ 2:8) Avwanre rhẹro rọyen nẹ, ayen ke je cha nabọ “muwan rẹ ayen ji vwo yono ihwo efa.” (2Ti 2:1, 2) Ọ da dianẹ avwanre eje se yono ihwo efa, ka sa mrẹ omavwerhovwẹn ro te ohwo obọ siẹrẹ a da kokẹ.

IHWO RHA KPẸVWẸ ẸSE RE RU KẸ AYEEN

14. Die yen ihwo buebun ruẹ siẹrẹ avwanre de ruẹse vwọ kẹ ayen?

¹⁴ Avwanre de ruẹse, ma rho vwọ kẹ iniọvo rẹ avwanre, ọkieje yen ayen vwo dje ọdavwaro phia. Ayen se si ovuẹ rẹ akpẹvwẹ yẹrẹ dje ọdavwaro phia vwẹ idjerhe ọfa. (Kọl 3:15) Ọdavwaro ọtiọyena rẹ ihwo djephia nẹrhẹ oma vwerhen avwanre.

15. Die yen ofori nẹ a karophiyọ ọ da dianẹ ihwo evo dje ọdavwaro phiaa?

¹⁵ Vwọrẹ uyota, ọ dia ọkieje yen ihwo evo vwọ kpẹvwẹ ẹsee. Ọkievo, avwanre sa vwẹ ọke rẹ avwanre, ẹgba yẹrẹ igho vwọ vwẹ ukẹcha phia, jẹ ihwo rẹ avwanre vwẹ ukẹcha kẹ na tobọ riẹn sẹ e ru emu vuọvoo. Emu ọtiọyen da phia, mavọ yen avwanre sa vwọ kẹnoma kẹ ivun miovwe? Karophiyọ eta rehẹ Iruo rẹ Iyinkọn Na 20:35 re mu uyono nana kpahen. Ọ dia ọdavwaro rẹ ihwo djephia kpahen ẹse rẹ avwanre ruru yen cha nẹrhẹ oma vwerhen avwanree. A sa mrẹ omavwerhovwẹn ọ da tobọ dianẹ ihwo dje ọdavwaro phiaa. Vwẹ idjerhe vọ? Jẹ a ta ota kpahen idjerhe evo avwanre sa vwọ mrẹ omavwerhovwẹn.

16. Die yen ofori nẹ a tẹnrovi siẹrẹ e de ruẹse?

¹⁶ Tẹnrovi obo ru wọ sa vwọ vwẹrokere Jihova. O ruẹ emu esiri vwọ kẹ ihwo eje te ọ dianẹ ayen dje ọdavwaro phia yẹrẹ ayen djere phiaa. (Mt 5:43-48) Jihova tare nẹ avwanre de ji ruẹse, e “rhẹro rẹ emu vuọvo rhivwi-in,” ‘osa rẹ avwanre kọ cha dia rhuarho.’ (Lu 6:35) Ota na “emu vuọvo” re vwo ruiruo vwẹ etinẹ na sa dia ọdavwaro re djephia. Te e dje ọdavwaro phia kẹ avwanre yẹrẹ e djere phiaa, ọkieje yen Jihova cha vwọ hwosa kẹ avwanre fikirẹ erhuvwu rẹ avwanre ru kẹ ihwo efa,  ‘vẹ omavwerhovwẹn.’​—Isẹ 19:17; 2Kọ 9:7.

17. Ọrhọ yen iroro ọghanghanre ọvo rọ sorọ avwanre vwo ruẹse kẹ ihwo efa? (Luk 14:12-14)

¹⁷ Orọnvwọn ọfa re se ru ra sa vwọ vwẹrokere Jihova siẹrẹ e de ru ẹse yen, e vwo ruẹ nene obo ri Jesu tare rọhẹ Luk 14:12-14. (Se.) Ọ dia ọ chọre re vwo durhie ihwo nẹ i rhi nene avwanre re emu yẹrẹ ruẹse kẹ ayen vwẹ idjerhe efa kidie nẹ ayen ji se ru ọtiọyen kẹ avwanree. Kẹ, ọ da rha dianẹ ẹse rẹ avwanre ruẹ na e ruo kidie nẹ avwanre rhẹro rẹ orọnvwọn ọvo mie ayen vwo? Ọ da dia ọtiọyen e jẹ a davwẹngba re vwo ru nene obo ri Jesu tare. E se durhie yẹrẹ ruẹse vwọ kẹ ohwo rẹ avwanre riẹnre nẹ o che se ru emu vuọvo vwọ kẹ avwanree. E de ru ọtiọyen, oma kọ cha vwerhen avwanre kidie a vwẹrokere Jihova. Ọtiọyena ọ da tobọ dianẹ ihwo efa kpẹvwẹ ẹse rẹ avwanre ruruu, oma je cha vwerhen avwanre.

18. Die yen ofori nẹ avwanre kẹnoma kẹ, kẹ diesorọ?

¹⁸ Kẹnoma kẹ uruemu ra vwọ vwẹ orharhe ẹro vwo ni ihwo efa. (1Kọ 13:7) Ọ da dianẹ ihwo efa dje ọdavwaro phiaa, a sa nọ oma rẹ avwanre: ‘Ayen ghene riẹn obo ra kpẹvwẹ ẹse, gbanẹ ọ chọrọ ayen ẹro?’ Ọ sa dianẹ o vwo erọnvwọn efa re sorọ rọ nẹrhẹ ayen jẹ ẹse na ẹkpẹvwẹ kirobo rẹ avwanre rhẹro rọyen. Ihwo evo se vwo ọdavwaro kpahen obo re ru kẹ ayen na, ẹkẹvuọvo ọ bẹn ayen vwo djephia. Oma sa vo ayen siẹrẹ e de ruẹse kẹ ayen, ma rho ọ da dianẹ ayen yen ruẹse kẹ ihwo efa vwẹ ọke re wanre. O toro obo rẹ ẹdia na hephaa, avwanre de vwo ẹguọnọ rẹ iniọvo rẹ avwanre a rha cha vwẹ orharhe ẹro vwo ni ayeen, ọkieje kọyen avwanre cha vwọ kokẹ vẹ aghọghọ.​—Ẹf 4:2.

19-20. Diesorọ a vwọ guọnọ edirin siẹrẹ e de ruẹse vwọ kẹ ihwo efa? (Ni uhoho na.)

¹⁹ Vwo edirin. Vwọ kpahen uruemu re vwo ruẹse, Ovie Solomọn de si: “Kpare ikara wẹn phihọ ame, kidie ẹdẹ buebu da wan nu ku wọ cha mrẹ.” (Agh 11:1) Kirobo rẹ eta nana yono avwanre, ihwo evo se dje ọdavwaro phia siẹrẹ​—“ẹdẹ buebun da wan nu.” Jẹ a ta ota kpahen obo re phia kẹ oniọvo aye ọvo.

²⁰ Vwẹ ikpe buebun re wanre, aye rẹ oniruo okinriariẹ de si ovuẹ rhe oniọvo aye ọvo ro ghwe bromaphiyame nu obọ kpahen obo rọ ghanre te ra vwọ fuevun kẹ Jihova ọkieje. Omarẹ ẹgbukpe ẹrenren vwọ wan nu, oniọvo aye na da kpahenphiyọ ileta na, tanẹ: “Mi niro nẹ ofori nẹ mi si rhe we je vuẹ wẹ kpahen ukẹcha ru wọ vwọ kẹ vwẹ ikpe buebun re wanre re me riẹnre nẹ wo vwo ẹruọ rọyeen. Eta re sasa ohwo oma ru wo si rhe vwe vwerhen ovwẹ oma, ẹkẹvuọvo ẹkpo ri Baibol wọ vwọ tua yen me te vwe ubiudu, e chọrọ ovwẹ ẹroo.”a Ro vwo gbikun ebẹnbẹn evo ro hirharoku nu, ọ da ta: “Ọkievo ẹwẹn mẹ kọ ghwa vuẹ vwẹ nẹ me kpairoro vrẹ erọnvwọn eje, je dobọ rẹ ẹga ri Jihova ji. Jẹ, ọkieje me da karophiyọ ẹkpo ri Baibol ru wo si rhe vwe na, ọ kẹ vwẹ ẹgba re me vwọ fuevun.” Ọ da je ta: “O vwo emu vuọvo vwẹ uvwre rẹ ẹgbukpe ẹrenren na ro te vwe ubiudu kerẹ ileta vẹ ẹkpo ri Baibol ru wo si vwo rhe vwe naa.” Vwẹ ẹwẹn roro oborẹ oma vwerhen aye rẹ oniruo okinriariẹ na te oniọvo aye na vwọ kpahenphiyọ ileta rọyen “ẹdẹ buebun vwọ wan nu”! Ọke grongron je sa wan vrẹ tavwen ihwo ke kpẹvwẹ avwanre fikirẹ ẹse rẹ avwanre ru vwọ kẹ ayen.

21. Diesorọ a vwọ vwẹrokere Jihova rọ kokẹ ghwologhwolo ọkieje?

²¹ Kirobo re djunute siẹvure na, Jihova ma avwanre vẹ ẹgba rẹ oghẹresan. Dede nẹ oma vwerhen avwanre siẹrẹ e de ruẹse kẹ avwanre, jẹ e de ruẹse kẹ ihwo efa yen a da ma mrẹ uvi rẹ omavwerhovwẹn. Oma nabọ vwerhen avwanre siẹrẹ a da vwẹ ukẹcha kẹ iniọvo rẹ avwanre. Oma je vwerhen avwanre siẹrẹ ayen de dje ọdavwaro phia. Dedena, te ọ dianẹ ihwo rẹ avwanre ruẹse kẹ kpẹvwẹ ẹse yẹrẹ ayen ru ọtiọyeen, oma sa vwerhen avwanre kidie avwanre ru obo ri fori. Wo jẹ ọ chọrọ owẹ ẹroo nẹ kemu kemu wo vwo ruẹse, “Ọrovwohwo sa kẹ wẹ bu nọ tiọna.” (2Ik 25:9) Avwanre che se ruẹse vrẹ Jihovaa! A mrẹ vwo dje omavwerhovwẹn ra cha mrẹ siẹrẹ Jihova da hwosa kẹ avwanree. Ọtiọyena, e gbe jẹ a vwẹrokere Ọsẹ rẹ avwanre rọhẹ obodjuvwu rọ kokẹ ghwologhwolo na ọkieje.