UYONO 10
UNE 31 Nene Ọghẹnẹ Yan Kugbe!
Vwẹrokere Jihova vẹ Jesu vwẹ Iroro Wẹn
“Ọ vwọ dianẹ Kristi rioja vwẹ ugboma na, ovwan komobọ gbe vwo oka rẹ iroro vuọvo yena.”—1 PITA 4:1.
ỌDAVWẸ RẸ UYONO NANA
Oborẹ ọyinkọn Pita yono nẹ oborẹ Jesu roro iroro wan kugbe obo re se vwo ru ọtiọyen.
1-2. E vwo vwo ẹguọnọ ri Jihova, die yen o churobọ si, kẹ mavọ yen Jesu dje ọnana phia?
“WO MI vwo ẹguọnọ ri Jihova Ọghẹnẹ wẹn vẹ ubiudu wẹn eje kugbe erhi wẹn eje kugbe ogangan wẹn eje kugbe iroro wẹn eje.” (Luk 10:27) Jesu tare nẹ ọnana yen ma ghanre vwẹ Urhi ri Mosis na. Jokaphiyọ nẹ ẹguọnọ avwanre kẹ Jihova churobọ si udu rẹ avwanre, kọyen ojevwe, ọdavwẹ, kugbe oborẹ oma ruẹ avwanre. O ji churobọ si ẹga ro nẹ otọ rẹ ubiudu rhe, ogangan rẹ avwanre—ji te ẹgba rẹ avwanre. Ẹkẹvuọvo e vwo vwo ẹguọnọ ri Jihova ji churobọ si iroro rẹ avwanre, kọyen ẹro avwanre vwo nẹ erọnvwọn. Vwọrẹ uyota, avwanre che se vwo ẹruọ rẹ iroro ri Jihova eje vọnvọọn. Jẹ, avwanre se vwo ẹruọ rẹ iroro rẹ Ọghẹnẹ te ẹdia evo womarẹ e vwo yono kpahen “iroro ri Kristi,” kidie Jesu nabọ vwẹrokere iroro rẹ Ọsẹ rọyen gbagba.—1 Kọr. 2:16.
2 Jesu vwo ẹguọnọ ri Jihova vẹ ẹwẹn rọyen eje. Ọ riẹn ọhọre rẹ Ọghẹnẹ vwọ kẹ, o ji vwo owenvwe ro vwo ru nene, dede nẹ o de ru ọtiọyen ọ cha rioja fikirẹ obo ri yovwirin. Jesu tẹnrovi eruo rẹ ọhọre rẹ Ọsẹ rọyen, ọ vwẹ uphẹn kẹ orọnvwọn vuọvo nẹ o mu ẹwẹn rọyen reyọọ.
3. Die yen ọyinkọn Pita yono mie Jesu, kẹ die yen ọ vuẹ Inenikristi nẹ ayen ru? (1 Pita 4:1)
3 Pita vẹ iyinkọn ri chekọ na vwẹ uphẹn ayen vẹ Jesu vwọ ghwọrọ ọke kugbe ji yono kpahen obo ro roro iroro wan. Ọke rẹ ẹwẹn ọfuanfon na vwo mu Pita vwo si ileta rọyen rẹsosuọ, o de jiro kẹ Inenikristi nẹ ayen vwo oka iroro vuọvo ro rhe Kristi.a (Se 1 Pita 4:1.) Vwẹ ephẹrẹ ri Grik rẹ Pita vwo si eta nana, ọ reyọ ‘ovwan choma’ vwo djisẹ rẹ isodje re reyọ ekuakua ra vwọ họnra vwo muegbe kẹ ofovwin. Ọtiọyena, Inenikristi da sa vwẹrokere iroro ri Jesu yẹrẹ obo ro roro emu wan, ayen ke sa reyọ ekuakua ri vwo ẹgba vwọ choma vwọ họnre vwọso urhurusivwe rẹ umwemwu kugbe akpọ rẹ Eshu suẹn na.—2 Kọr. 10:3-5; Ẹfe. 6:12.
4. Mavọ yen uyono nana sa cha avwanre uko vwo nene uchebro ri Pita?
4 A cha fuẹrẹn oborẹ Jesu roro emu wan kugbe obo ra sa vwọ vwẹrokere. A je cha ta ota kpahen obo (1) ra sa vwọ vwẹrokere oborẹ Jihova roro iroro wan, rọ cha nẹrhẹ avwanre eje vwo iroro ọvo, (2) ra sa vwọ vwomakpotọ, kugbe (3) re se vwo vwo iroro ro fiotọ womarẹ a vwọ vwẹroso Jihova vwẹ ẹrhovwo.
VWẸROKERE OBORẸ JIHOVA RORO IRORO WAN
5. Die yen Pita ruru vwẹ ẹdẹ ọvo vwo djephia nẹ o vwo ẹro rẹ Jihova vwo nẹ emuu?
5 Roro kpahen obo re phiare vwẹ ẹdẹ ọvo rẹ Pita rhe dje iroro ri Jihova phiaa. Jesu vuẹ iyinkọn rọyen nẹ ọyen che kpo Jerusalẹm, vwẹ oboyin e che siobọ no kẹ ilori ẹga na, o che chirakon rẹ oja, e mi ji hwe ghwu. (Mat. 16:21) Ọ sa dianẹ o mu Pita ẹro nẹ Jihova cha vwẹ uphẹn kẹ ihwo nẹ ayen hwe Jesu ghwuu—rọ dia iphiẹrophiyọ rẹ Izrẹl kugbe Mesaya re veri na. (Mat. 16:16) Ọtiọyena Pita de se Jesu kpo akọkọ je vuẹ nẹ: ‘Wọ ta oka rẹ ota ọtiọyena kpahen oma wẹẹn Ọrovwori; erọnvwọn nana cha phia kẹ wẹ kakakaa.’ (Mat. 16:22) Kidie nẹ Pita rhe dje iroro ri Jihova phia naa, iroro rọyen vẹ ọ ri Jesu rha dia ọvoo.
6. Idjerhe vọ yen Jesu vwo djephia nẹ iroro rọyen vẹ ọ ri Jihova ọvuọvo?
6 Iroro ri Jesu vẹ ọ rẹ Ọsẹ rọyen ọvuọvo. Ọtiọyena, Jesu da ta kẹ Pita nẹ: ‘Wan nẹ etinẹ, Eshu! Wẹwẹ ekprowọ vwọ kẹ vwẹ, kidie ọ dia iroro rẹ Ọghẹnẹ yen wo roroo, ẹkẹvuọvo ọ rẹ ihworakpọ.’ (Mat. 16:23) Ọ sa dianẹ omamọ ẹwẹn yen Pita vwori rọ vwọ ta eta yena, ẹkẹvuọvo Jesu da sen uchebro rọyen na. Oborẹ avwanre yono norhe. Re vwo jẹ ẹwẹn rẹ omaevwoze evwo dia ọhọre ri Jihova vwọ kẹ Jesuu. Vwẹ ẹdẹ yena, Pita de yono uyono ọghanghanre ọvo nẹ ofori ọyen vwo vwo oka rẹ iroro ro rhe Jihova.
7. Mavọ yen Pita vwo djephia ọke vwọ yanran na nẹ ọyen vwo ẹro rẹ Jihova vwo nẹ emu? (Ni rọhẹ opharo ọbe na.)
7 Ọke vwọ yanran na, Pita de rhi djephia nẹ ọyen guọnọ riẹn iroro rẹ Ọghẹnẹ vwẹ emu ejobi. Ọke tere rẹ Ọghẹnẹ cha vwọ reyọ Igiye re yanvweree vwọba ihwo rọyen. Ọtiọyena, e de ji Pita nẹ o re ghwoghwo ota vwọ kẹ Kọniliọs rọ dia Ọgiye, rọ cha dia ọvo usun rẹ ihwo rẹsosuọ vwẹ ẹko rẹ egọghẹnẹ kpokpọ nana. Ihwo ri Ju vẹ Igiye na vwo emu vuọvo kugbee, ọtiọyena o rhe gbe ohwo unuu nẹ Pita guọnọ ukẹcha ro vwo muegbe kẹ iruo rọyen na. Ọke rẹ Pita vwọ riẹn ẹro rẹ Ọghẹnẹ vwo nẹ ota nana, o de wene ẹwẹn rọyen. Ọtiọyena, ọ “rha sen” ọke re vwo ji ohwo re see. (Iruo 10:28, 29) O ghwoghwo ota kẹ Kọniliọs vẹ evwruwevwin rọyen eje, ayen de bromaphiyame.—Iruo 10:21-23, 34, 35, 44-48.
Pita rọ ro uwevwin ri Kọniliọs (Ni ẹkorota 7)
8. Mavọ yen e se vwo djephia nẹ iroro avwanre vẹ ọ ri Jihova ọvuọvo? (1 Pita 3:8 kugbe eta rehẹ obotọ)
8 Ikpe buebun vwọ wan nu, Pita de jiro kẹ Inenikristi nẹ ayen “ku evun gbe.” (Se 1 Pita 3:8 kugbe eta rehẹ obotọ.) Kerẹ ihwo rẹ Ọghẹnẹ, avwanre se ku evun gbe womarẹ e vwo vwo iroro ri Jihova kirobo rọ hẹpha vwẹ Baibol na. Kerẹ udje, Jesu jiriro kẹ idibo rọyen nẹ ayen phi Uvie na phiyọ ẹdia rẹsosuọ vwẹ akpeyeren rayen. (Mat. 6:33) Vẹ ọyena vwẹ ẹwẹn, oghwoghwota vwẹ ukoko wẹn se brorhiẹn rọ vwọ vwomaba ẹga ọkieje vwẹ idjerhe ọvo yẹrẹ ọfa. Ukpe ra vwọ vuẹ nẹ ọyena rha gannọọ, e jẹ a ta eta ri fori kpahen obo rọ guọnọ ruẹ na je vwẹ ukẹcha vwọ kẹ vwo ru ọtiọyen.
VWOMAKPOTỌ
9-10. Idjerhe vọ yen Jesu vwo djephia nẹ ọyen ohwo rọ nabọ vwomakpotọ?
9 Ason rọ koba tavwen e ki hwe, Jesu yono Pita kugbe idibo rọyen efa uyono ọghanghanre ọvo kpahen omaevwokpotọ. Ẹsosuọ, Jesu ji Pita vẹ Jọn nẹ ayen re muegbe erọnvwọn rọ vẹ ayen cha vwọ re emu rọ koba kugbe kerẹ ohworakpọ. Ọ sa dianẹ egbemuo na ji churobọ si erọnvwọn kerẹ itọwẹ vẹ oze rẹ erhorha sa vwọ hworhẹ abọ vẹ awọ tavwen ayen ke re emu. Jẹ, ono yen cha hworhẹ awọ rẹ ihwo na ọke yena de te?
10 Jesu nama ghwọrọ ọkee, ọ da vwomakpotọ wian owian na. Ọnana gbe idibo rọyen unu kidie ọnana owian ro fori nẹ ọviẹn wian. Jesu de ku iwun rẹ obotafe rọyen nu, reyọ itọwẹ vwo mu ehun, o de ku ame phiyọ oze, ọ da hworhẹ awọ rayen. (Jọn 13:4, 5) Ọ sa dianẹ ọ reyọ ọke ọ ke hworhẹ awọ rẹ iyinkọn 12 na eje—ji te Judas, rọ dia ohwo rọ cha shẹ na. Dedena, Jesu da wian owian na eje re. Ọtiọyena, Jesu da vwẹ erhiorin djefiotọ kẹ ayen nẹ: “Ovwan vwo ẹruọ rẹ oborẹ mi ru kẹ ovwan na? Ovwan se vwe ‘Oyono’ kugbe ‘Ọrovwori,’ ọyena gbare kidie ọtiọyen me hepha. Ọtiọyena ọ da dianẹ mẹvwẹ, Ọrovwori kugbe Oyono na hworhẹ awọ rẹ ovwan, ovwan je hworhẹ awọ rẹ ohwohwo.”—Jọn 13:12-14.
Uvi omaevwokpotọ churobọ si . . . iroro rọhẹ obevun avwanre
11. Mavọ yen Pita vwo djephia nẹ ọyen ohwo rọ vwomakpotọ? (1 Pita 5:5) (Ni uhoho na.)
11 Pita yono nẹ omaevwokpotọ ri Jesu. Ọke rẹ Jesu vwo kpo odjuvwu nu, Pita de ru igbevwunu ọvo ro vwo sivwin ọshare rọ dia ukpono nẹ evun rhe. (Iruo 1:8, 9; 3:2, 6-8) Uyota nẹ, igbevwunu nana nẹrhẹ ihwo buebun bigba. (Iruo 3:11) Dede nẹ ẹkuruemu asan rẹ Pita dia ghwanre titi ọrho vẹ ẹdia rode, ọ cha vwẹ uphẹn kẹ ihwo na nẹ i brọghọ phiyọ ọyen oma? Ẹjo, Pita vwomakpotọ bi ujiri na nẹ oma, ọ da vwọ kẹ Jihova vẹ Jesu re dia ihwo rẹ ujiri na fori rọ vwọ ta: “Womarẹ odẹ ri [Jesu], kugbe esegbuyota rẹ avwanre vwo kpahen odẹ rọyen, yen e vwo ru ọshare nana rẹ ovwan mrẹ, rẹ ovwan je riẹn na gan.” (Iruo 3:12-16) Eta rẹ Pita vwo ruiruo vwẹ ileta ro si rhe Inenikristi kpahen oboresorọ ayen vwọ vwomakpotọ sa karophiyọ avwanre ọke rẹ Jesu vwọ reyọ itọwẹ vwo mu ehun rọ vwọ hworhẹ awọ rẹ iyinkọn na.—Se 1 Pita 5:5.
Ọke rẹ Pita vwo ru igbevwunu ọvo nu, ọ da vwomakpotọ vwẹ ujiri kẹ Jihova vẹ Jesu. Avwanre ji se dje omaevwokpotọ phia siẹrẹ e de ru emu esiri ọ da tobọ dianẹ e ni avwanre soo yẹrẹ hwosa rẹ obo re ruru na kẹ avwanree (Ni ẹkoreta 11-12)
12. Kerẹ Pita, mavọ yen a sa vwọ vwomakpotọ ọkieje?
12 E se nene udje ri Pita na womarẹ a vwọ vwomakpotọ. Karophiyọ nẹ uvi omaevwokpotọ vrẹ a de vwọ ta eta ri fori. Ota rẹ Pita reyọ vwo djisẹ rẹ omaevwokpotọ churobọ si iroro rehẹ obevun—kọyen re vwo roro kpahen ihwo efa vẹ oma avwanre. Ọtiọyena, kidie nẹ avwanre vwo ẹguọnọ ri Jihova vẹ ihwo efa, kẹ avwanre ru emu esiri vwọ kẹ ayen, ọ dia kidie nẹ a guọnọ nẹ ihwo ni avwanre soo. Siẹrẹ a da davwẹngba eje vwọ vwẹ oma ze kẹ iniọvo avwanre, ọ da tobọ dianẹ ayen vwo oniso rẹ oborẹ avwanre ruẹẹ, jẹ e djephia nẹ avwanre ihwo re vwomakpotọ.—Mat. 6:1-4.
OVWAN “GBE VWO ỌHỌ”
13. Re vwo ‘vwo ọhọ’ die yen o churobọ si? Djekpahọn.
13 Die yen re vwo ‘vwo ọhọ’ yẹrẹ iroro ro fiotọ churobọ si? (1 Pita 4:7) Onenikristi ro vwo ọhọ davwẹngba rọyen eje vwo bru emamọ erhiẹn vwo nene oborẹ Jihova roro iroro wan. Onenikristi tiọyena riẹnre nẹ o vwo emu vuọvo rọ ma ghanre vrẹ oyerinkugbe rọyen vẹ ọ ri Jihovaa. Ọ vwẹ ẹro rẹ abavo vwo ni oma rọyen kidie o vwo ẹkpahọnphiyọ rẹ erọnvwọn ejee. O djephia nẹ ọyen vwẹroso Ọghẹnẹ womarẹ o vwo bru Jihova ra ọkieje vwẹ ẹrhovwo.b
14. Die yen Pita ruru vwẹ ẹdẹ ọvo ro djephia nẹ ọ vwẹroso Jihovaa?
14 Ason rọ koba tavwen Jesu ki ghwu, o si idibo rọyen orhọ nẹ: “Ovwan eje cha kprowọ fikirẹ obo re cha phia kẹ vwẹ vwẹ ason nana.” Pita da kpahen kẹ nẹ: ‘Ọ da tobọ dianẹ ihwo ri chekọ na eje kprowọ fikirẹ obo re cha phia kẹ wẹ, me cha kprowọ bẹdẹẹ!’ Vwẹ ason yena, Jesu vwẹ uchebro kẹ idibo rọyen evo nẹ: “Ovwan rha rhẹrẹ rere ovwan je nẹrhovwo ọkieje.” (Mat. 26:31, 33, 41) Ọ da dianẹ Pita nene uchebro yena jovwo, o rhe se fiudugberi tanẹ ọyen vughe Jesu. Ukperẹ ọtiọyen, Pita da sen Onini rọyen, ọnana da nẹrhẹ ọ viẹ diekpọvwẹ.—Mat. 26:69-75.
15. Die yen nẹrhẹ Jesu fiudugberi vwẹ ason rọ koba rọyen kerẹ ohworakpọ?
15 Jesu nabọ vwẹroso Jihova. Dede nẹ ọyen ohwo rọ gbare, ọ nẹrhovwo abọ buebun. Ọyena kẹrẹ uduefiogbere vwo ru nene oborẹ Jihova guọnọre nẹ o ru. (Mat. 26:39, 42, 44; Jọn 18:4, 5) Uruemu nana rẹ Pita mrẹ vwẹ oma ri Jesu na nẹrhẹ ọ riẹn ọghanrovwẹ rẹ ẹrhovwo.
16. Idjerhe vọ yen Pita vwo djephia nẹ ọyen ohwo ro vwo iroro ro fiotọ? (1 Pita 4:7)
16 Ọke vwọ yanran na, Pita da rhe vwẹroso Jihova phiyọ vwọrẹ ẹrhovwo. Jesu ra kpare nushi na vwẹ imuẹro kẹ Pita vẹ iyinkọn ri chekọ na nẹ ọyen che ku ẹwẹn ọfuanfon na ku ayen rere ayen se vwo ruiruo rẹ aghwoghwo na. Dedena, ọ da vuẹ ayen nẹ ayen hẹrhẹ bẹsiẹ ọke vwo te. (Luk 24:49; Iruo 1:4, 5) Die yen Pita ruru rọ vwọ hẹrhẹ na? Pita vẹ Inenikristi ri chekọ de “muomaphiyọ ẹrhovwo ẹnẹ.” (Iruo 1:13, 14) Ukuko na, vwẹ ileta rọyen rẹsosuọ, Pita de jiro kẹ Inenikristi nẹ ayen gbe vwo iroro ro fiotọ je vwẹroso Jihova vwọrẹ ẹrhovwo. (Se 1 Pita 4:7.) Pita de rhi yono obo ra vwẹrosua Jihova je rhe dia uchivwo rẹ ukoko na.—Gal. 2:9.
17. Ọ da tobọ dianẹ e vwo okẹ yẹrẹ ena dede, die yen ofori nẹ e ru ọkieje? (Ni uhoho na.)
17 E se vwo djephia nẹ avwanre ihwo ri vwo ọhọ yẹrẹ iroro ro fiotọ, o fori nẹ a nẹrhovwo rhe Jihova ọkieje. Ọ da tobọ dianẹ avwanre niro nẹ e vwo ena yẹrẹ okẹ dede, o ji fo ra vwọ nẹrhovwo rhe Jihova ọkieje. Ma rho, ofori nẹ a nẹrhovwo rhe Jihova kpahen odjekẹ ọ da dianẹ avwanre vwo erhiẹn eghanghanre re che bru, je vwẹrosuọ nẹ ọyen riẹn obo ri me yovwin kẹ avwanre.
Pita yono obo ra vwẹroso Jihova vwẹ ẹrhovwo. E ji se djephia nẹ avwanre ihwo ri vwo iroro ro fiotọ womarẹ a vwọ nẹrhovwo rhe Jihova vwọ kẹ ukẹcha, ma rho siẹrẹ e de vwo erhiẹn eghanghanre re che bru (Ni ẹkorota 17)c
18. Mavọ yen a sa vwọ kpọ iroro avwanre vwo nene ọ ri Jihova?
18 Ọ vwerhoma ra vwọ riẹn nẹ Jihova ma avwanre vwẹ idjerhe ra da sa vwẹrokere iruemu rọyen. (Jẹn. 1:26) Vwọrẹ uyota, avwanre cha sa vwẹrokere Jihova gbagbaa. (Aiz. 55:9) Dedena, kerẹ Pita, a sa kpọ iroro avwanre vwo nene ọ ri Jihova. E jẹ e ru ọtiọyen womarẹ a vwọ vwẹrokere oborẹ Ọghẹnẹ roro iroro wan, ra vwọ vwomakpotọ, je dia ihwo ri vwo ọhọ.
UNE 30 Ọsẹ Mẹ, Ọghẹnẹ Mẹ Kugbe Ugbeyan Mẹ
a “Oka rẹ iroro,” ra ta ota kpahen vwẹ 1 Pita 4:1, ji se mudiaphiyọ “asan rẹ ẹwẹn ohwo hepha, uruemu, iroro.”
b Wọ da guọnọ evuẹ efa kpahen obo ro mudiaphiyọ ra vwọ dia ohwo ro vwo iroro ro fiotọ, yẹrẹ rọ vẹ Ọghẹnẹ vwo uvi oyerinkugbe, ni “Odjefiotọ rẹ 2 Timoti 1:7—‘Ọghẹnẹ kẹ Avwanre Ẹwẹn rẹ Oshọọ’” vwẹ obotọ rẹ “Iroro ro fiotọ” rọhẹ “Awọreta Ri Baibol Re Dje Fiotọ” vwẹ jw.org yẹrẹ JW Library®.
c IDJEDJE RẸ UHOHO: Oniọvo aye rọ nẹrhovwo phiyọ evun ọke rọ vwọ hẹrhẹ tavwen a ke vwẹ enọ fuẹrẹn ni sẹ o muwan rẹ iruo na.