“ Sẹro rẹ Okugbe rẹ Ẹwẹn Na”
Ọyinkọn Pọl jiriro kẹ Inenikristi rehẹ Ẹfesọs nẹ ayen ‘rhe chirakon rẹ ohwohwo vwọrẹ ẹguọnọ, je rha davwẹngba rẹ ayen eje vwọ sẹro rẹ okugbe rẹ ẹwẹn na nẹrhẹ e vwo, womarẹ ufuoma ro churu ihwo kuẹgbe.’—Ẹfe. 4:2, 3.
“Okugbe” rẹ avwanre riavwerhen rọyen na ọ “rẹ ẹwẹn.” Ẹwẹn ọfuanfon rẹ Ọghẹnẹ yen nẹrhẹ e vwo okugbe nana. Jẹ, kirobo rẹ Pọl tare, o ji fo ra vwọ sẹro rẹ okugbe nana. Amono yen cha sẹro rọyen? Uyota nẹ o fori Onenikristi ọvuọvo vwo ru ẹkẹn ro tere vwọ “sẹro rẹ okugbe rẹ ẹwẹn na.”
Re vwo rudje rọyen, e gbe dje nẹ ohwo ọvo vwẹ imoto kpokpọ vwo ruẹse kẹ wẹ. Ono yen cha rha vwẹrote imoto na? Ẹkpahọnphiyọ na phẹnre. Wọ rha vwẹrotee, imoto na de miovwin, wọ cha sa hanrhe ohwo rọ vwẹ imoto na ruẹse kẹ wẹẹ.
Vwẹ idjerhe vuọvo na, dede nẹ okugbe rẹ Inenikristi ọyen okẹ ro nẹ obọ rẹ Ọghẹnẹ rhe, avwanre ohwo ọvuọvo vwo oghwa ra vwọ sẹro rọyen. Ọ da dianẹ a vẹ oniọvo ọvo vwo ẹghwọ, ofori a vwọ nọ oma rẹ avwanre, ‘Mi ruẹ ẹkẹn ro te vwe me vwọ sẹro rẹ okugbe rẹ ẹwẹn na womarẹ me vwọ davwẹngba mẹ vwọ rhuẹrẹ ẹghwọ na phiyọ?’
‘DAVWẸNGBA WẸN EJE’ VWỌ SẸRO OKUGBE NA
Kirobo rẹ Pọl tare, a sa mrẹ bẹnbẹn ọkievo ra vwọ sẹro okugbe rẹ ẹwẹn na. Ma rho ọ da dianẹ oniọvo yen gbe avwanre ku. Ra vwọ sẹro okugbe mudiaphiyọ nẹ ọkieje yen e che vwo bru ohwo ro gbe avwanre ku na ra da ra ta ota kpahen obẹnbẹn na? Ẹjo. Nọ oma wẹn, ‘Mi de si ufi rẹ ota na ọ cha ghwa okugbe rhe gbanẹ ọ cha nẹrhẹ erọnvwọn rhoma braphiyọ?’ Ọkievo, ọyen emu aghwanre ra vwọ kpairoro vrẹ ota na yẹrẹ reyọ vwo ghovwo.—Isẹ 19:11; Mak 11:25.
Nọ oma wẹn, ‘Mi de si ufi rẹ ota na ọ cha ghwa okugbe rhe gbanẹ ọ cha nẹrhẹ erọnvwọn rhoma braphiyọ?’
Kirobo rẹ ọyinkọn Pọl siri, e jẹ avwanre “rhe chirakon rẹ ohwohwo vwọrẹ ẹguọnọ.” (Ẹfe. 4:2) Ọbe ọvo ra rionbọ ra tare nẹ a je fan eta yena vwẹ idjerhe ọtiọna “reyọ ayen phiyọ oborẹ ayen hepha.” Ọnana mudiaphiyọ nẹ avwanre che rhiabọreyọ iniọvo avwanre kerẹ irumwemwu kirobo rẹ avwanre je hepha. Vwọrẹ uyota, avwanre davwan re vwo ku “uruemu ọkpokpọ na” phiyọ. (Ẹfe. 4:23, 24) Dedena, o vwo ohwo vuọvo ro che se ru ọtiọyen gbagbaa. (Rom 3:23) Vẹ ẹwẹn yena, kọ cha lọhọ re vwo chirakon rẹ ohwohwo, vwo ghovwo je “sẹro rẹ okugbe rẹ ẹwẹn na.”
Siẹrẹ a da rhuẹrẹ ẹghwọ rọhẹ ohri rẹ avwanre phiyọ—ọ da tobọ diane vwẹ evunrẹ ubiudu avwanre, ka cha riavwerhen rẹ “ufuoma ro churu ihwo kuẹgbe.” Ota ri Grik ra fan phiyọ “churu” vwẹ Ẹfesọs 4:3 yen a fan phiyọ “iriẹn” vwẹ Kọlose 2:19. Iriẹn eyen ifi oma re pha gangan ri churu ibeku sansan fi ohwohwo. Vwẹ idjerhe vuọvo na, ọtiọyen ufuoma kugbe ẹguọnọ rẹ iniọvo nẹrhẹ avwanre siẹkẹrẹ ohwohwo ọ da tobọ dianẹ ayen ruẹ erọnvwọn evo ri je avwanree.
Ọtiọyena, oniọvo de gbe we ku yẹrẹ ru obo ri miovwo uwe ivun, wọ reyọ vwo guẹdjọọ, ukperẹ ọtiọyen gbe arodọnvwẹ kẹ. (Kọl. 3:12) Rọ vwọ dianẹ avwanre eje gbaree na, o ji vwo ọkiọvo wo vwo gbe ohwo ọfa ku re. Wo de vwo ọyena vwẹ ẹwẹn, ọ cha cha wẹ uko vwọ “sẹro rẹ okugbe rẹ ẹwẹn na.”