Ukẹcha Vwọ kẹ Eya re Gboja Kẹ

Eta yena yen a vwọ ton uyovwinrota na “Ọghẹnẹ Vwo Ọdavwẹ rẹ Eya?​​​​—Obo ri Baibol na Tare” phiyọ. Wọ sa danlodu rẹ ọ re ru phiyọ ọbe vwẹ ilinki rọhẹ obotọ rẹ uyovwinrota yena, ra sa teyen ji kpirhin phiyọ ọmọbe rẹ aruẹbe ẹne. Oniọvo aye ọvo vwẹ United States re se Stacy da ta: “O vwo evo re me teyenre, mẹvwẹ vẹ oniọvo aye ọfa da vwẹ ayen vwo kpo asan ra da vwẹrote eya rehẹ ẹdia rẹ imuoshọ vwẹ ekogho rẹ avwanre de ghwoghwo.”

Aye ọvo rọ wian vwẹ asan na da nọ sẹ a sa vwẹ efa kẹ ọyen rere ọyen mrẹ vwọ kẹ ihwo efa re je dia etiyin na. Ọtiọyena avwanre da vwẹ ẹmẹbe 40 efa vẹ ikadi 30 ra vwọ ruẹ jw.org vwo rhe. Ayen vwọ rhoma ra, ohwo rọ vwẹrote asan na da tanẹ iniọvo na djudje obo re ru uyono ri Baibol wan vwọ kẹ eya re dia asan na.

Stacy vẹ iniọvo eya ivẹ efa je mrẹ erhuvwu vwẹ asan ọfa ra da vwẹrote eya tiọyena, ihwo na da reyọ ẹmẹbe iyorin je nokpẹn rẹ efa. Ọvo usun rẹ ihwo re wian vwẹ etiyin na da ta: “Ọmọbe nana cha vwẹ ukẹcha kẹ eya rehẹ etinẹ na. Oka rẹ ọbe tiọna yen avwanre guọnọre.” Ayen vwọ rhoma ra ọke ọfa, ihwo buebun re dia etiyin na de siomakoko je mrẹ obo re ru uyono ri Baibol wan, ihwo ivẹ usun rayen de dje omavwerhovwẹn phia rẹ ayen vwo kpo uyono vwẹ Ọguan Ruvie vwẹ oba rẹ udughwrẹn na.

Stacy da ta: “O gbe avwanre unu rẹ avwanre vwọ mrẹ oborẹ ihwo dje omavwerhovwẹn phia kpahen uyovwinrota nana. A da teyọn phiyọ ọmọbe ji kpirhon, ọnana idjerhe ọvo re se vwo ghwoghwo ovuẹ rẹ Uvie na vwọ kẹ ihwo tiọyena. Uruemu rẹ ihwo na djephia kpahọn te avwanre ẹwẹn mamọ, avwanre rhẹro oborẹ Jihova che vwo bruba ẹgbaẹdavwọn rẹ avwanre vwo ghwoghwo iyẹnrẹn esiri na vwọ kẹ ihwo tiọyena.