Enọ rẹ Ihwo ri Se Ẹbe Avwanre Nọre
“Iroro” vọ yen Jihova che phi phiyọ ubiudu rẹ isun rẹ akpọ na vwẹ obaro na?
Vwọ kpahen ọtonphiyọ rẹ ukpokpogho rode na, Ẹvwọphia 17:16, 17 da ta: “Idjo ihwe ru wọ mrẹre kugbe eranvwe rẹ aghwa na, enana che vwo utuoma kpahen igberadja na, ayen cha kua fiotọ je banphiyọ, ayen cha re uvwo rọyen je vwẹ erhanre torhẹ karekare. Kidie Ọghẹnẹ phiro phiyọ ubiudu rayen rẹ ayen vwo ru nene iroro rọyen, e, rẹ ayen vwo ru nene iroro ọvuọvo rẹ ayen vwori rẹ ayen vwọ vwẹ uvie rayen vwọ kẹ eranvwe rẹ aghwa na.” Vwẹ obuko re, ẹbe rẹ avwanre tare jovwo nẹ “iroro” rẹ Jihova che phi phiyọ ubiudu rẹ isun rẹ akpọ na yen ayen vwọ ghwọrọ ẹga refian.
Ẹkẹvuọvo e ru ewene phiyọ oborẹ avwanre riẹnre jovwo. “Iroro” rẹ Jihova che phi phiyọ ubiudu rẹ isun rẹ akpọ na yen ayen vwọ vwẹ “uvie rayen vwọ kẹ eranvwe rẹ aghwa na.” Ra vwọ nabọ vwo ẹruọ oborẹ ọnana che rugba wan, e jẹ a fuẹrẹn enọ rehẹ obotọ na.
Amono yen aroẹmrẹ nana ta ota kpahen? E ji se “igberadja” na “Babilọn Rode”; ro mudiaphiyọ okugbe rẹ ẹga refian. “Eranvwe rẹ aghwa . . . rọ pha vwavware” na mudiaphiyọ ukoko rẹ ufuoma re vwo mu vwẹ 1919 ra riẹn phiyọ League of Nations jovwo, rọ rhe dia United Nations enẹna. (Ẹvwọ. 17:3-5) “Idjo ihwe” na de rhe mudiaphiyọ ẹgba rẹ usuon eje ri biẹcha eranvwe aghwa na.
Die yen igberadja na vẹ eranvwe rẹ aghwa rọ pha vwavware na gbe vwo kugbe? Ọmọrhiẹ ọke yen igberadja na “chidia enu” rẹ eranvwe rẹ aghwa na ree, ro vwo brẹba kẹ je reyọ vwo ruẹ obo rọ guọnọre.
Die yen cha phia kẹ igberadja na? Eranvwe rẹ aghwa kugbe igberadja na ri biẹcha na, ki “che vwo utuoma kpahen igberadja na.” Kidie nẹ ayen vwo utuoma kpahọn mamọ, ayen ke cha ghwa efe rọyen eje reyọ rere ihwo vwọ mrẹ aphiphẹn rẹ umiovwo rọyen. Ayen ke cha ghwọrọ fiotọ kirobo ri Jihova tare. (Ẹvwọ. 17:1; 18:8) Ọyena kọ cha dia oba rẹ ẹga refian eje. Jẹ, tavwen ọyena ke rhe phia, Jihova che mu isun rẹ akpọ na vwo ru emuọvo ra je mrẹ dẹvoo rhanvwẹ ọke rẹ akpọ na vwọ tonphiyọ.
Die yen Jihova che mu isun rẹ akpọ na vwo ru? O che phi “iroro rọyen” phiyọ ubiudu rẹ eranvwe ro vwo idjo ihwe na, rere ayen vwọ “vwẹ ẹgba kugbe ogangan rayen vwọ kẹ eranvwe rẹ aghwa [rọ pha vwavware] na”—ra riẹn phiyọ United Nations. (Ẹvwọ. 17:13) Roro kpahen oborẹ ọyena mudiaphiyọ. Iroro rẹ isun rẹ akpọ na ọvo yen che mu ayen vwo siobọ nẹ ẹgba vẹ ogangan rayen vwọ kẹ eranvwe rẹ aghwa na? Ẹjo kakaka! Aroẹmrẹ na djerephia nẹ Ọghẹnẹ yen cha nẹrhẹ ayen ru ọtiọyen. (Isẹ. 21:1; ni Aizaya 44:28.) Ememerha yen ayen che vwo siobọnẹ ẹgba rayen vwọ kẹ? Ẹjo! Kpregede na yen ewene na cha vwọ vwomaphia. Ọtiọyena, eranvwe rẹ aghwa, ra ghwa vwẹ ẹgba vwọ kẹ na ko che ru ọhọre ri Jihova vwọ ghwọrọ ẹga refian eje no karekare.
Kẹ, die yen e se rhẹro rọyen? Ofori avwanre vwo rhẹro iyẹnrẹn ro che nẹ obọ rẹ isun rẹ akpọ na rhe nẹ ayen vwẹ ememerha vwo biẹcha United Nations ree. Obo re se rhẹro rọyen kọna: Kpregede na, Jihova ko che phio phiyọ ubiudu rẹ isun rẹ akpọ na rẹ ayen vwo siobọnẹ ẹgba rayen vwọ kẹ eranvwe rẹ aghwa na. Ọyena da phia re, ka cha riẹn nẹ o rhe che kri ukpokpogho rode na ke tonphiyọọ. Jẹ, bẹsiẹ ọ ke rhe, “e jẹ avwanre rhẹrẹ ọkieje je sẹro rẹ iroro rẹ avwanre” kidie ewene sa rhe kpregede!—1 Tẹsa. 5:6