Reyọ ‘Okẹ ro nẹ Obọ rẹ Ọghẹnẹ Rhe’ Vwo Ruiruo

Avwanre mrẹ ọbọngan siẹrẹ avwanre vẹ iniọvo rẹ avwanre da ghwọrọ ọke kuẹgbe. Jẹ ọ dia ọke re de siomakoko ọvo yen avwanre da mrẹ ọbọngan tiọyenaa. Baibol na djisẹ ẹgba rẹ avwanre vwori ra vwọ bọn ohwohwo gan kerẹ ‘okẹ ro nẹ obọ rẹ Ọghẹnẹ rhe.’ (Rom 1:11, 12) Mavọ yen a sa vwọ reyọ okẹ yena vwo ruiruo vọnvọn?

Ta eta rẹ bọn ohwo gan. Kerẹ udje, a da kpahanphiyọ enọ vwẹ uyono, e jẹ a tẹnroviẹ oma avwanre ọvoo, ukperẹ ọtiọyen e jẹ a tẹnrovi Jihova, Baibol na kugbe ihwo rọyen. Ọke ra vẹ iniọvo avwanre de gbikun kuẹgbe, e jẹ a ta eta re vwẹ ọbọngan vwọ kẹ ayen.

Jẹ erhiẹn wẹn vẹ oborẹ wo ruẹ dia ọbọngan vwọ kẹ ihwo efa. Kerẹ udje, iniọvo evo jẹ ojẹ rẹ ayen je vwọ dia ẹga ọkieje dede nẹ ayen hirharokuẹ ebẹnbẹn. Efa je herọ rẹ uyono uvwre rẹ udughwrẹn na gbọọ dede nẹ owian rẹ ayen wian lọhọree yẹrẹ ayen ji vwo ẹdia rẹ omakpokpọ rẹ ayen nene muabọ.

Wọ vwẹ eta vẹ oborẹ wo ruẹ vwọ vwẹ ọbọngan kẹ iniọvo na? Wọ je mrẹ ọbọngan vwo nẹ eta vẹ oborẹ iniọvo na ruẹ?