Oborẹ Avwanre Yono Mie Oyono Rode na Vwẹ Akpeyeren rẹ Avwanre.

UDJE RẸ ỌSẸ VẸ ONI MẸ

Vwẹ oba rẹ ukpe ri 1950, ọsẹ vẹ oni mẹ da kua nẹ Italy kpo Kindersley, rọhẹ Saskatchewan, Canada. Ọyena vwọ wan nu okririi, ayen da mrẹ uyota na vughe, ọ da rhe dia obo re ma ghanre vwẹ akpeyeren avwanre. Me vwọ hẹ emọ, me karophiyọ nẹ me vẹ orua mẹ ghwọrọ ọke buebun vwẹ iruo rẹ aghwoghwo na, ọtiọyena ke me jehwẹ kẹ ayen ọkiọvo nẹ me cha dia “ọkobaro ubrọke” me vwọ hẹ ẹgbukpe ẹrenren!

Ọsẹ vẹ oni mẹ ivwiogbere; dedena, ayen phi uvi rẹ udje ra vwọ vwẹ oma vwo ze kẹ Jihova phiyotọ vwọ kẹ avwanre. Kerẹ udje, vwẹ ukpe ri 1963 ayen da shẹ ekuakua rayen rere ayen sa vwọ mrẹ igho vwo kpo ọghwẹkoko rẹ akpọeje vwẹ Pasadena, California, U.S.A. Vwẹ ukpe ri 1972, avwanre da kua kpo Trail, British Columbia, Canada, rọ reyọ avwanre iroko 1,000 yẹrẹ (omarẹ imaili 620) ra vwẹ ukẹcha phia vwẹ ekogho ra da jẹ ephẹrẹ rẹ Italia. Owian rẹ ọsẹ mẹ ọyen ọ ro vwo ruẹ orufon je vwẹrote uwevwin. Ọ sen ẹdia ride ra vwọ kẹ rere ọ sa vwọ tẹnrovi ẹga ri Jihova.

Oma rẹ udje rẹ ọsẹ vẹ oni mẹ phi phiyotọ kẹ vwẹ vẹ iniọvo mẹ erha vwerhen ovwẹ oma. Ọyena da rhe dia uchivwo rẹ uyono kẹ vwẹ vwẹ ẹga ri Jihova, ji te iyono eghanghanre efa nẹ: Me da vwẹ Uvie na ka obaro, Jihova cha vwẹrote vwe.—Mat. 6:33.

ỌTONPHIYỌ RẸ ẸGA ỌKIEJE

Vwẹ 1980, me da rọvwọn Debbie, oniọvo aye vẹ erhuvwu ro vwo obo rọ vwọtua vwẹ ẹga ri Jihova. Avwanre guọnọ ro ẹga ọkieje, ọtiọyena emeranvwe erha vwọ wan rẹ avwanre vwọ rọvwọn nu, Debbie da ton iruo ọkobaro phiyọ. Ẹgbukpe ọvo avwanre vwọ rọvwọn nu, avwanre de kpo ukoko otete ọvo ra da guọnọ ukẹcha, me da vwomaba vwẹ iruo ọkobaro na.

Ọke vwọ yanran na, avwanre rha mrẹ aghọghọ vwẹ iruo naa avwanre de brorhiẹn avwanre vwọ kparoma. Jẹ, ẹsosuọ, avwanre de nene oniruo okinriariẹ ta ota kpahọn. O de rhie evun je vuẹ avwanre vwọrẹ ẹguọnọ nẹ: “Ovwan ji toroba ebẹnbẹn rẹ ovwan na. Ebẹnbẹn rẹ ovwan ọvo yen ovwan tẹnroviẹ. Ẹkẹvuọvo, ovwan da tẹnrovi obo ri yovwirin, ovwan cha mrẹ ayen.” Ọnana ghwa hẹ ọkpọvi rẹ oborẹ avwanre guọnọre. (Une 141:5) Kpakpata avwanre da reyọ obo rọ vuẹ avwanre na vwo ruiruo, okririi, avwanre da rhe mrẹvughe nẹ erọnvwọn iyoyovwin buebun ghini herọ. O vwo erọnvwọn buebun rẹ iniọvo na guọnọ ru vwọ kẹ Jihova vwẹ ẹga rọyen, te imitete te iniọvo evo rẹ irivẹ rayen hẹ ukoko naa. Ọyena uyono ọghanghanre vwọ kẹ avwanre. Avwanre guọnọ erhuvwu je hẹrhẹ Jihova nẹ ọ rhuẹrẹ ebẹnbẹn rẹ avwanre niri nẹ e vrẹ avwanre oma phiyọ. (Maika 7:7) Avwanre da rhoma rhe mrẹ aghọghọ rẹ avwanre, erọnvwọn de rhi yovwinphiyọ.

Iyono avwanre vwẹ isikuru rẹ ekobaro rẹsosuọ avwanre ra re gare vwẹ ẹkuotọ efa jovwo re. Rẹ ayen vwo dje ihoho rẹ islidi je ta ota kpahan ebẹnbẹn rẹ ayen rhiẹromrẹ vẹ ebruphiyọ ri te ayen obọ, ọnana da nẹrhẹ owenvwe rẹ avwanre vwọ ga kerẹ imishọnare ganphiyọ. Ọtiọyena avwanre de brorhiẹn nẹ avwanre che ruiruo rẹ imishọnare.

Rere e se vwo ru ọnana wiẹn, vwẹ 1984 avwanre da kua kpo ubrakpọ ri Quebec ra da jẹ ephẹrẹ ri French, rọ vwẹ iroko re vrẹ 4,000 yẹrẹ (imaili 2,485) vwo sheri kẹ British Columbia. Ọyena mudiaphiyọ nẹ avwanre che yono ephẹrẹ vẹ ẹkuruemu kpokpọ. Obẹnbẹn ọfa rẹ avwanre vwori yen ọkanrovwẹ rẹ igho. Uvwre ọkievo, ikpekpeduke rẹ avwanre gbori vwẹ udju rẹ ọghwẹrẹ ọvo yen avwanre re re. Debbie da rhe tẹn ona sansan rẹ obo re chere ikpekpeduke! Dede nẹ avwanre hirharoku ebẹnbẹn nana eje, avwanre chirakon vẹ aghọghọ. Vwọba, avwanre mrẹre nẹ Jihova vwẹrote avwanre.—Une 64:10.

Ẹdẹ ọvo vwo te, e de se avwanre vwẹ ifonu use rẹ avwanre rhẹro rọyeen. E durhie avwanre nẹ avwanre rhe ga vwẹ Bẹtẹl ri Canada. Ọ vwọ dianẹ avwanre ghwobọphiyọ ifọmu rẹ Isikuru ri Giliẹd jovwo re na, ẹwẹn de kpokpo avwanre kpahen ẹga ri Bẹtẹl. Dedena avwanre de rhiabọreyọ edurhie na. Avwanre vwo te oboyin, avwanre da nọ Oniọvo Kenneth Little, ọvo usun iniọvo rẹ Umẹ Rọvwẹrote Oghọn Ukoko nẹ, “Kẹ ifọmu ri Giliẹd avwanre rha ghwobọphiyọ na vwo?” Ọ da kpahen, “E de te agbada yena a cha wanvrẹ.”

Udughwrẹn ọvo vwọ wan nu, avwanre de rhi te agbada yena kidie e durhie uvwe vẹ Debbie kpo Giliẹd. Ọtiọyena avwanre vwo orhiẹn rẹ avwanre che bru. Oniọvo Little da vuẹ avwanre nẹ: “O toro ojẹ ovwan jẹree, ẹdẹ ọvo cha ovwan cha vwọ tanẹ manẹ kẹ ọ ro chekọ na yen a jẹre. Ọvo yovwin nẹ ọvoo; Jihova che bruba erhiẹn ivẹ na.” Avwanre de rhiabọreyọ ọ rẹ Giliẹd, vwẹ ikpe buebun rhire na, avwanre mrẹre nẹ oborẹ Oniọvo Little tare na ghini uyota. Ọkieje yen avwanre vwọ vwanriẹn eta rọyen vwọ kẹ ihwo efa re mrẹ bẹnbẹn ayen vwọ jẹ ọvo usun rẹ ewian ra vwọ kẹ ayen.

AKPEYEREN RẸ IMISHỌNARE

Oma vwerhen avwanre nẹ, avwanre usun iniọvo 24 re durhie kpo iklasi 83 ri Giliẹd re ruro vwẹ Brooklyn, New York, vwẹ April 1987. Oniọvo Ulysses Glass kugbe Jack Redford yen iyono rẹ avwanre. Kpakpata emeranvwe iyorin da wanvrẹ, avwanre de wontọ vwẹ September 6, 1987. E de ji avwanre kpo Haiti, ji te John vẹ Marie Goode.

Ukpe ri 1962 yen a djẹ imishọnare ri wontọ nẹ Giliẹd nẹ ẹkuotọ na, rhanvwẹ ọke yena e ji rhi ji efa kpo Haitii. Udughwrẹn erha rẹ avwanre vwo wontọ nu, avwanre da ton owian phiyọ vwẹ Haiti vwẹ ukoko otete ọvo ro vwo ighwoghwota 35 rọhẹ ekogho rẹ igbenu hepha. Avwanre ighene re je rhe riẹn erọnvwọn buebuun, avwanre ọvo yen je dia uwevwin rẹ imishọnare na. Ihwo na ivwiogbere, buebun rẹ ayen je riẹn obo re see. Vwẹ ọke rẹsosuọ rẹ iruo rẹ imishọnare avwanre, avwanre rhiẹromrẹ ozighi, ihwo ri gborho usuon, erọnvwọn re la re mu gbere idjerhe kugbe odju ọgangan.

Avwanre yono erọnvwọn buebun mie iniọvo eya vẹ eshare rehẹ Haiti ri chirakon mamọ rẹ oma je vwerhan na. Buebun rayen hirharoku uweren ọgangan, dedena ayen vwo ẹguọnọ ri Jihova vẹ iruo rẹ aghwoghwo na. O vwo oniọvo aye ọvo rọ kpakore rọ riẹn obo re see; dedena, ọ riẹn ẹkpo ri Baibol sansan ri te omarẹ 150 ku uyovwin. Ẹdia sansan rẹ avwanre hirharokuẹ kẹdi kẹdẹ nẹrhẹ imuẹro rẹ avwanre vwo ghwoghwo ovuẹ rẹ Uvie na nẹ ọyen ọvo yen che si ebẹnbẹn rẹ ihworakpọ no ganphiyọ. Ọ vwerhoma rẹ avwanre vwọ mrẹ ihwo rẹ avwanre vwẹ Baibol yono re rhe dia ekobaro ọkieje, ekobaro oghẹresan kugbe ekpako.

Avwanre vwọ hẹ Haiti, me da mrẹ Trevor, eghene ọvo ro ruiruo rẹ imishọnare vwẹ ẹga ri Mormon, avwanre nabọ ghwọrọ ọke vwọ ta ota nẹ Baibol na rhe ọke buebun. Ikpe buebun vwọ wan nu, o de si ileta ọvo re me rhẹro rọyeen rhe vwe. Ọ da ta: “Mi che bromaphiyame vwẹ osikoko rọ cha na! Me guọnọ rhivwin rhe Haiti je ga kerẹ ọkobaro oghẹresan vwẹ asan vuọvo re me da ka ga kerẹ imishọnare vwẹ ẹga ri Mormon.” Ọyen ghwa hẹ obo ro ruru vwẹ ikpe buebun, te te aye rọyen.

VWO NẸ EUROPE—KPO AFRICA

E ji avwanre kpo ẹbẹre ọvo ri Europe rẹ iruo rẹ Uvie na da hẹrhabọ phiyọ. Vwẹ ukpe ri 1992 avwanre de te Ljubljana, Slovenia, rọ kẹrẹ asan ra da yọnrọn ọsẹ vẹ oni mẹ ghwanre ayen ke kua kpo Italy. Ofovwin jehẹ otọ vwẹ ubrakpọ ra riẹn phiyọ Yugoslavia jovwo. Oghọn ukoko rọhẹ Vienna, Austria, vẹ ọfisi rehẹ Zagreb, Croatia, kugbe Belgrade, Serbia, yen vwẹrote iruo rẹ ekogho yena. Enẹna o fori rere ẹkuotọ vuọvo vwo uwevwin ri Bẹtẹl romobọ rayen.

Ọnana mudiaphiyọ nẹ avwanre ji che yono ephẹrẹ vẹ ẹkuruemu kpokpọ ọfa. Emotọ na ke ta, “Jezik je težek,” ro mudiaphiyọ nẹ “Ephẹrẹ na ganre.” Vwọrẹ uyota ọ ghene gan! Oma rẹ iniọvo nana re fuevun re nama hwọke ayen ke rhiabọreyọ ewene rẹ ukoko na vwọphiaa na vwerhen avwanre mamọ, avwanre je jokaphiyọ oborẹ Jihova bruba kẹ ayen. Vwọba, avwanre je mrẹ oborẹ Jihova rhuẹrẹ erọnvwọn phiyọ vwẹ ọke ro fori. Ikpe buebun rẹ avwanre ghwọrọ vwẹ Slovenia vwẹ ukẹcha kẹ avwanre vwo chirakon ji rhie uphẹn phiyọ avwanre vwo yono erọnvwọn kpokpọ buebun.

Ẹkẹvuọvo ewene efa jehẹ obaro. Vwẹ ukpe ri 2000 e de ji avwanre kpo Côte d’Ivoire, vwẹ West Africa. Fikirẹ ofovwin rọ vwomaphia vwẹ ẹkuotọ na, avwanre da djẹ kpo Sierra Leone vwẹ November 2002. Ofovwin na ro krotọ te ẹgbukpe 11 na, ghwe re obọ. Ọ pha bẹnbẹn ra vwọ kparoma nẹ Côte d’Ivoire ugege yena. Ẹkẹvuọvo, oborẹ avwanre yonori vwẹ ukẹcha kẹ avwanre vwọ sẹro rẹ aghọghọ avwanre.

Avwanre tẹnrovi oborẹ avwanre sa vwọ vwẹ ukẹcha kẹ ihwo rehẹ ekogho rẹ avwanre de ghwoghwo kugbe iniọvo avwanre ri vwo ẹguọnọ ri chirakon rẹ ofovwin vwẹ ikpe buebun re. Uyota nẹ ayen ivwiogbere, jẹ ayen vwo owenvwe rẹ ayen vwo nene ihwo efa ghare oborẹ ayen vwori. Oniọvo aye ọvo da vwẹ iwun kẹ Debbie. Ọke rẹ Debbie vwo siobọ uko rọ vwọ reyọ ayen, oniọvo aye na da tanẹ: “Uvwre ọke rẹ ofovwin na, iniọvo avwanre rehẹ ẹkuotọ efa bicha avwanre. Enẹna avwanre kọyen o rhe te re vwọ vwẹ ukẹcha phia.” Ọnana nẹrhẹ avwanre vwo ẹwẹn ra vwọ vwẹrokere udje rayen.

Avwanre de rhivwin kpo Côte d’Ivoire, jẹ ogidi rọhẹ otọ jovwo na da rhoma rhivwin rhe. Ọtiọyena vwẹ November 2004, a da vwẹ helicopter vwo mu avwanre te ekpu ọvuọvo rẹ ọnyẹ rọyen te ikilo 10 yẹrẹ (22-lb). Otọ diodi yen avwanre sherhẹn vwẹ uwevwin rẹ isodje ri French vwẹ ason yena, a ke vwẹ aropleni mu avwanre kpo Switzerland vwẹ ẹdẹ ro chekọ. Avwanre vwo te oghọn ukoko vwẹ ukperivwin ason, Umẹ Rọvwẹrote Oghọn Ukoko kugbe iyono rẹ Isikuru rẹ Uyono rẹ Ewiowian vẹ eya rayen de dede avwanre sasasa, gbane avwanre boma, chere emu ọrhorhoro kẹ avwanre, je kẹ avwanre ishọkọleti buebun. Ọnana te avwanre ẹwẹn mamọ.

A je vwẹ avwanre kpo Ghana vwẹ ọmọke, avwanre ki rhivwin kpo Côte d’Ivoire ogidi na vwo kpotọ nu. Uruemuesiri rẹ iniovo na nẹrhẹ avwanre chirakon rẹ ebẹnbẹn nana eje ra vwọ kua nẹ asan kpo asan kugbe iruo rẹ ọmọke ra vwọ kẹ avwanre ru. Dede nẹ me vẹ Debbie riẹnre nẹ ẹguọnọ tiọyena ọyen obo ra mrẹ vwẹ ukoko ri Jihova, jẹ avwanre vwo ro vwẹ ẹwẹn nẹ avwanre cha vwẹ ẹro okueku vwo noo. Vwọrẹ uyota, ọke egangan yena da rhe dia ẹbẹre ọghanghanre ọvo vwẹ uyono rẹ avwanre.

VWO KPO MIDDLE EAST

Vwẹ 2006 ileta de nẹ esiri ukoko rhe nẹ a vwẹ avwanre kpo Middle East. Vwẹ obọ ọfa, ọnana mudiaphiyọ nẹ avwanre cha mrẹ egbabọse, erọnvwọn kpokpọ, ji yono ephẹrẹ kugbe ẹkuruemu kpokpọ. O vwo erọnvwọn buebun rẹ avwanre che yono vwẹ ekogho nana rẹ oseghe rẹ usuon vẹ ẹga da vwọsua ohwohwo na. Avwanre vwo omavwerhovwẹn kpahen ephẹrẹ sansan rẹ iniọvo avwanre rehẹ ukoko na kugbe okugbe ro no cha siẹrẹ e de nene odjekẹ rẹ ukoko. Oma rẹ iniọvo na vwerhen avwanre kidie buebun rayen fiudugberi chirakon rẹ omukpahen ro nẹ obọ rẹ ihwo rẹ orua, emọ rẹ isikuru, ihwo re vẹ ayen gbe ruiruo, kugbe irivẹ cha.

Avwanre kpo ọghwẹkoko oghẹresan vwẹ ukpe ri 2012 re ruru vwẹ Tel Aviv, Israel. Ọghwẹkoko nana yen obọ rẹsosuọ rẹ Iseri ri Jihova vwẹ ekogho yena ri siomakoko vwo bun te ọtiọyen rhanvwẹ ukpe ri Pẹntikọst 33 C.E. Ọ cha sa chọrọ ẹroo!

Uvwre rẹ ikpe yena, e ji avwanre kpo ẹkuotọ re de siobọ rẹ iruo avwanre kpotọ. Avwanre da ghwẹ ẹbe rẹ ukoko na evo nene oma, vwobọ vwẹ iruo rẹ aghwoghwo na ji kpo isikoko itete. Isodje ri mu ihwunu vẹ idjerhe re mu erọnvwọn gbere hẹ asan eje, ẹkẹvuọvo oshọ herọọ kidie aghwanre yen avwanre vwo nene iniọvo na vwọ yan.

AVWANRE RHOMA KPO AFRICA

Vwẹ 2013, a da vwẹ owian ọfa rọ fẹnẹre vwọ kẹ avwanre—nẹ avwanre ra ga vwẹ oghọn ukoko rọhẹ Kinshasa, Congo, ọnana ẹkuotọ ro vwo erhuvwu mamọ rọ je vọn vẹ ifovwin, ihwo rehẹ herọ ji hirharoku uweren ọgangan. Ẹsosuọ avwanre ka ta nẹ, “Avwanre muegbe, kidie avwanre vughe Africa.” Jẹ, o vwo erọnvwọn buebun rẹ avwanre che yono, ma rho siẹrẹ avwanre de kpo asan rẹ idjerhe vẹ agbada hephaa. Avwanre mrẹ erọnvwọn iyoyovwin buebun ri fori nẹ avwanre tẹnrovi, ji te akoechiro vẹ aghọghọ rẹ iniọvo na dede nẹ ayen hirharoku uweren ọgangan, ẹguọnọ rayen kpahen iruo aghwoghwo na, ẹgbaẹdavwọn rẹ ayen vwo kpo uyono vẹ isikoko. Avwanre mrẹ oborẹ iruo Uvie yan obaro wan ẹsosuọ fikirẹ ebruba kugbe ukẹcha ri Jihova. Ikpe eje avwanre vwọ ga vwẹ Congo nẹrhẹ avwanre yono erọnvwọn eghanghanre buebun je nẹrhẹ orua rẹ avwanre rhophiyọ.

Vwẹ oba rẹ ukpe ri 2017, e ji avwanre kpo asan ọfa—South Africa. Ọnana yen oghọn rẹ ukoko rọ ma rho kparobọ rẹ avwanre da ga, avwanre jẹ erhorha vwẹ iruo avwanre vwẹ Bẹtẹl. Ọke ọfa, erọnvwọn buebun herọ rẹ avwanre che yono, jẹ oborẹ avwanre yonori vwẹ obuko re vwẹ ukẹcha kẹ avwanre. Avwanre vwo ẹguọnọ rẹ iniọvo eya vẹ eshare ri chirakon ikpe buebun cha re. Ọ vwerhoma ra vwọ mrẹ iniọvo rehẹ orua ri Bẹtẹl re wian vwọrẹ okugbe dede nẹ ẹkuruemu sansan kugbe asan sansan yen ayen nurhe! Ebruba rẹ ufuoma ri Jihova bẹn evughee, kidie ihwo rọyen ku ohwo kpokpọ na phiyọ, ayen ji nene odjekẹ ri Baibol.

Vwẹ ikpe nana eje na, ọmọrhiẹ owian yen a vwọ kẹ vwẹ vẹ Debbie ree, avwanre wene nene ẹkuruemu sansan, ji yono obo ra jẹ ephẹrẹ kpokpọ. Ọ dia ọkieje yen ọ vwọ lọhọọ, ẹkẹvuọvo avwanre mrẹ ẹguọnọ ri Jihova ro jẹ rhẹriẹ na womarẹ ukoko rọyen vẹ iniọvo na. (Une 144:2) Avwanre riẹnre nẹ ẹga ọkieje rẹ avwanre hepha na, nẹrhẹ avwanre dia uvi rẹ idibo ri Jihova.

Me vwẹ ẹro ọghanghanre vwo nẹ uyono rẹ ọsẹ vẹ oni mẹ vwọ kẹ vwẹ, ọtiọyen ji te ukẹcha rẹ aye mẹ, Debbie, kugbe uvi udje rẹ iniọvo rehẹ orua rẹ akpọeje. Avwanre vwo nẹ obaro kpahen iruo ọfa rẹ avwanre che ru na, avwanre vwo owenvwe avwanre vwo yono erọnvwọn buebun mie Oyono Rode rẹ avwanre.