Eshare, Ovwan Muọghọ kẹ Eya rẹ Ovwan

1. Diesorọ Jihova vwo ru ọrhuẹrẹphiyotọ rẹ orọnvwe?

JIHOVA ọyen “Ọghẹnẹ rẹ oma vwerhan,” ọ je guọnọ nẹ oma vwerhen avwanre. (1Ti 1:11) Ọ kẹ avwanre okẹ buebun re sa nẹrhẹ avwanre riavwerhen rẹ akpeyeren. (Jem 1:17) Ọvo usun rẹ okẹ yena yen orọnvwe. Ọke rẹ ọshare vẹ aye da rọvwọn, ayen ve nẹ ayen che vwo ẹguọnọ, muọghọ, je vwẹ ẹro ọghanghanre vwo ni ohwohwo. Siẹrẹ aye vẹ ọshare da nabọ vwo oyerinkugbe rọ kpẹkpẹre, ayen che vwo uvi rẹ omavwerhovwẹn.​—Isẹ 5:18.

2. Die yen phia vwẹ orọnvwe buebun nonẹna?

² Ọ da ohwo mamọ nẹ, ive rẹ eya gbe eshare buebun nonẹna ve kẹ ohwohwo vwẹ ẹdẹ orọnvwe rayen chọrọ ayen ẹro re. Ọtiọyena, oma rha vwerhen ayeen. Okrinọ naa, iyẹnrẹn ọvo ro nẹ World Health Organization rhe tare nẹ eshare buebun hwe eya rayen, ta erharhe eta kẹ ayen yẹrẹ gboja kẹ ayen. Ọshare ro vwo iruemu nana re djunute na se ru omeru nẹ ọyen muọghọ kẹ aye rọyen siẹrẹ ọ da hẹ ohri rẹ ihwo efa, jẹ ọ vwẹ oja ria aye rọyen vwẹ obo uwevwin. Erọnvwe buebun nonẹna vwo ebẹnbẹn kidie eshare buebun nẹ ihoho rẹ ihwo re banphiyọ.

3. Erhọ yen erọnvwọn evo re sa nẹrhẹ ọshare vwẹ oja re aye rọyen?

³ Diesorọ eshare evo vwọ vwẹ oja re eya rayen? Ọ sa dianẹ esẹ rayen vwẹ oja re ini rayen, ọnana kọ nẹrhẹ ayen no nẹ uruemu ọtiọyena shephiyọ. Ẹkuruemu rẹ asan rẹ evo dia ghwanre titi uruemu ọchọchọ tiọyena nẹ ohwo vwọ dia “obọdẹn rẹ ọshare,” ọ cha reyọ ẹgba vwo dje kẹ aye rọyen nẹ ọyen yen ọga. Eshare evo herọ re yonori obo re sun omaa, ọtiọyen ji te ophu rayen. Eshare evo vwẹ ẹro abavo vwo nẹ eya vẹ ehwaree, kidie ọkieje ayen vwo nẹ ihoho rẹ ihwo re banphiyọ. Vwọba, iyẹnrẹn buebun djerephia nẹ vwẹ ọke rẹ ọga ri COVID-19 na yen ebẹnbẹn nana ma vwọ ganphiyọ. Vwọrẹ uyota, ọshare rọ vwẹ oja ria aye rọyen cha sa riase fikirẹ erọnvwọn nana re djunute naa.

4. Die yen ofori nẹ eshare re dia Inenikristi re rọvwọnre kẹnoma kẹ, kẹ diesorọ?

⁴ Ofori nẹ eshare re dia Inenikristi re rọvwọnre, kẹnoma kẹ uruemu ra vwọ vwẹ ẹro ọchọchọ vwo nẹ eya.a Diesorọ? Kidie ọke buebun iroro rọhẹ evunrẹ ohwo yen muo vwo ru obo ro ruẹ. Ọyinkọn Pọl si Inenikristi rehẹ Rom orhọ nẹ ayen ‘rhe gbe nene eyeren nanaa.’ (Ro 12:1, 2) Ọke rẹ Pọl vwo si rhe Inenikristi rehẹ Rom, jẹ a vwẹ ukoko na vwo mu vwẹ ikpe evo re. Jẹ, eta ri Pọl na djerephia nẹ o ji vwo ihwo evo vwevunrẹ ukoko na ri gbe nene ẹkuruemu vẹ iroro rẹ akpọ na. Kọyensorọ o vwo jiro kẹ ayen nẹ ayen wene iroro vẹ uruemu rayen. O ji fo nẹ eshare re dia Inenikristi re rọvwọnre ji nene uchebro yena nonẹna. Ọ da ohwo mamọ nẹ, evo usun rayen gbe nene iroro rẹ akpọ na, je vwẹ oja ria eya rayen.b Mavọ yen Jihova guọnọre nẹ eshare nene eya rayen yerin wan? Ẹkpahọnphiyọ rẹ onọ yena hẹ ẹkpo ri Baibol re mu uyono nana kpahen.

5. Vwo nene obo rehẹ 1 Pita 3:7, mavọ yen ofori nẹ ọshare nene aye rọyen yerin wan?

⁵ Se 1 Pita 3:7. Jihova jurhi kẹ eshare nẹ ayen brọghọ phiyọ eya rayen oma. Ọshare ro brọghọ phiyọ aye rọyen oma nabọ nene yerẹn dẹndẹn vwọrẹ ẹguọnọ. Vwẹ uyono nana, a cha ta ota kpahen oborẹ ọshare se vwo brọghọ phiyọ aye rọyen oma. Ẹsosuọ, e jẹ a ta ota kpahen iruemu evo ri dje ọghọ phia kẹ eyaa.

SEN IRUERU RI BRỌGHỌ PHIYỌ AYE WẸN OMAA

6. Ẹro vọ yen Jihova vwo nẹ eshare ri hwe eya rayen? (Kọlose 3:19)

⁶ Re vwo hwe aye. Jihova vwo utuoma kpahen kohwo kohwo ro gbe ozighi. (Un 11:5) Ọ vwọso eshare ri gboja kẹ eya rayen. (Mal 2:16; se Kọlose 3:19.) Vwo nene obo rehẹ 1 Pita 3:7 rọ dia ẹkpo ri Baibol re mu uyono nana kpahen, ọ da dianẹ ọshare rhe nene aye rọyen yerẹn vwẹ idjerhe ro forii, o che miovwin oyerinkugbe rọyen vẹ ọ rẹ Ọghẹnẹ. Ọkiọvo dede, Jihova se jẹ ẹrhovwo rọyen ẹkpahọnphiyọ.

7. Vwo nene obo rehẹ Ẹfesọs 4:31, 32, oka rẹ eta vọ yen ofori nẹ eshare re rọvwọnre kẹnoma kẹ? (Ni “Oborẹ Ota Nana Mudiaphiyọ.”)

⁷ Ra vwọ ta erharhe eta. Eshare evo ta eta ophu vẹ eta re da ohwo vwọ kẹ eya rayen. Ẹkẹvuọvo Jihova vwo utuoma kpahen “ophu, ophu ọgangan, ovan kugbe ekan ẹhanrhọn.”c (Se Ẹfesọs 4:31, 32.) O nyo oborẹ avwanre ta eje. Jihova vwo oniso rẹ oborẹ ọshare ta ota kẹ aye rọyen wan, ọ da tobọ dianẹ ayen ọvo yehẹ uwevwin. Ọshare rọ ta ota gbaegbae kẹ aye rọyen miovwẹ orọnvwe rọyen, ji te oyerinkugbe rọyen vẹ ọ rẹ Ọghẹnẹ.​—Jem 1:26.

8. Ẹro vọ yen Jihova vwọ nẹ ihoho rẹ ihwo re banphiyọ, kẹ diesorọ?

⁸ Re vwo nẹ ihoho rẹ ihwo re banphiyọ. Ẹro vọ yen Jihova vwo nẹ ihoho rẹ ihwo re banphiyọ? O vwo utuoma kpahọn. Ọtiọyena ọshare ro nẹ ihoho ri je fo miovwẹ oyerinkugbe rọyen vẹ ọ ri Jihova o ji muọghọ kẹ aye rọyeen.d Jihova guọnọre nẹ ọshare fuevun kẹ aye rọyen womarẹ obo ro ruẹ kugbe iroro rọyen. Jesu tare nẹ ọshare ro nẹ aye ọfa vẹ urhurusivwe ro vwo nene vwerhẹn gbe igberadja “vwevunrẹ ubiudu” rọyen nure.e​—Mt 5:28, 29.

9. Diesorọ Jihova vwo vwo utuoma kpahen uruemu rẹ ọshare vwọ gba aye rọyen vwo vwobọ vwẹ ehware rọ guọnọree?

⁹ Ra vwọ gba aye vwo vwobọ vwẹ ehware rọ guọnọree. Eshare evo gba eya rayen vwo vwobọ vwẹ ehware rọ nẹrhẹ ayen nẹ oma rayen gbegbe kerẹ ihwo re vwo ẹguọnọ rayeen. Jihova vwo utuoma kpahen orharhe uruemu ọtiọyen ro dje ẹguọnọ phiaa na. Jihova guọnọre nẹ ọshare vwọ ẹguọnọ rẹ aye rọyen, vwẹrote, ji muọghọ kẹ ọdavwẹ rọyen. (Ẹf 5:28, 29) Kẹ, ọ da rha dianẹ ọshare rọ dia Onenikristi gba aye rọyen vwo vwobọ vwẹ ehware rọ guọnọree jovwo re, ọ je vwẹ oja riọ yẹrẹ nẹ ihoho rẹ ihwo re banphiyọ vwo? Mavọ yen o se vwo wene uruemu kugbe iroro rọyen?

OBO RE SE VWO PHI IRUEMU RI DJE ỌGHỌ PHIAA KPAROBỌ

10. Mavọ yen eshare sa vwọ mrẹ erere nẹ udje ri Jesu rhe?

¹⁰ Die yen sa vwẹ ukẹcha kẹ ọshare vwo phi erharhe iruemu ra vwọ vwẹ oja ria aye je gba vwo vwobọ vwẹ ehware rọ guọnọree kparobọ? Ọ sa davwẹngba vwọ vwẹrokere Jesu. Dede nẹ Jesu rọvwọnree, jẹ obo ro nene idibo rọyen yerin wan ọyen uvi rẹ udje rẹ obo ro fori nẹ eshare nene eya rayen yerin wan. (Ẹf 5:25) Kerẹ udje, vwo oniso rẹ oborẹ eshare se yono vwo nẹ oborẹ Jesu nene idibo rọyen yerin kugbe obo rọ ta ota kẹ ayen wan.

11. Mavọ yen Jesu nene idibo rọyen yerin wan?

¹¹ Jesu nene iyinkọn na yerin vwẹ idjerhe rẹ ọghọ, ọ je ta ota kẹ ayen bọrọbọrọ. Ọ djoma ku yẹrẹ sianro kẹ ayeen. Dede nẹ Jesu yen Ọrovwori kugbe Onini rayen, ọ reyọ ogangan rọyen vwo ruiruo vwẹ idjerhe ayen de nẹ oma rayen kuekuu. Ukperẹ ọtiọyen, ọ vwomakpotọ ga ayen. (Jọ 13:12-17) Ọ vuẹ idibo rọyen nẹ: Ovwan “yono mie vwe, kidie me pha dẹndẹn, me je vwomakpotọ vwevunrẹ ubiudu, kẹ ovwan cha mrẹ omaerovwon kẹ oma rẹ ovwan.” (Mt 11:28-30) Jokaphiyọ nẹ Jesu pha dẹndẹn. Ohwo dẹndẹn dia ọvwiẹrẹẹ. Ẹkẹvuọvo, o vwo ẹgba ro se vwo suẹn oma rọyen. Siẹrẹ a da kpare ophu rọyen, ọ vwẹ ẹwẹn kpotọ ji sun oma rọyen.

12. Mavọ yen Jesu nene ihwo efa ta ota?

¹² Jesu reyọ eta rọyen vwọ bọn ihwo efa gan je nẹrhẹ ẹwẹn rayen totọ. Ọ ta ota kẹ idibo rọyen gbaegbaee. (Lu 8:47, 48) Ọke ihwo re vwọsua vwọ tobọ hanrhọ je davwẹngba vwọ kpare ophu rọyen, ‘ọ hanrhe ayen rhivwi-in.’ (1Pi 2:21-23) Ọkievo, Jesu tobọ fotovwin ukpe rọ vwọ kpahen ota gbaegbae. (Mt 27:12-14) Ọnana uvi rẹ udje vwọ kẹ eshare re rọvwọnre re dia Inenikristi!

13. Kirobo rehẹ Matiu 19:4-6, mavọ yen ọshare se vwo “churu mu aye rọyen”? (Ni uhoho na.)

¹³ Jesu vuẹ eshare nẹ ayen fuevun kẹ eya rayen ọkieje. Ọ vwanriẹn eta rẹ Ọsẹ rọyen tare nẹ ọshare “churu mu aye rọyen.” (Se Matiu 19:4-6.) Ota ri Grik “churu mu” re vwo ruiruo vwẹ etiyin na, mudiaphiyọ ra vwọ “tanmuẹ.” Ọtiọyena, ofori nẹ oyerinkugbe rọhẹ uvwre rẹ ọshare vẹ aye gan te ẹdia kerẹsiẹ ra da mrẹ nẹ ayen tanmu ohwohwo. O vwo emu vuọvo ro che vwrẹ oyerinkugbe na ro de jẹ obẹnbẹn ẹ suọ kẹ ayen ihwo ivẹ naa. Ọtiọyena, ọshare ro vwo oyerinkugbe ọkpẹkpẹkpẹ vẹ aye rọyen cha kẹnoma kẹ koka koka rẹ ihoho rẹ ihwo re banphiyọ. Kpakpata yen o che kuẹrofia kẹ “ogbegbemrẹ.” (Un 119:37) Vwẹ idjerhe ọtiọna, ọ vẹ ẹro rọyen ke sa re ọphọ nẹ ọyen che nẹ aye ọfa vẹ urhurusivwe ro vwo nene vwerhẹẹn jokparẹ aye rọyen ọvo.​—Job 31:1.

14. Erhọ yen iroroẹjẹ evo ro fori nẹ ọshare rọ vwẹ oja ria aye rọyen nene ọ sa vwọ rhuẹrẹ oyerinkugbe rọyen vẹ Jihova kugbe aye rọyen phiyọ?

¹⁴ O ji vwo erọnvwọn efa rẹ ọshare rọ ta erharhe eta ro ji hwe aye rọyen se ru vwọ rhuẹrẹ oyerinkugbe rọyen vẹ Jihova kugbe ọ rẹ aye rọyen phiyọ. Die yen erọnvwọn nana? Ọrẹsosuọ, ofori nẹ ọ riẹn nẹ ọyen vwo obẹnbẹn. O vwo emu vuọvo ro siomanu kẹ Jihovaa. (Un 44:21; Agh 12:14; Hib 4:13) Ọrivẹ, o che wene uruemu rọyen na, je dobọ rẹ oja rọ vwọ ria aye rọyen ji. (Isẹ 28:13) Ọrerha, ofori nẹ o yovwunu kẹ aye rọyen vẹ Jihova je rẹ ayen nẹ e vwo ghovwo ọyen. (Iru 3:19) O ji fo nẹ ọ rẹ Jihova nẹ ọ cha ọyen uko vwo sun iroro, eta vẹ obo ro ruẹ kugbe owenvwe ro vwo ru ewene. (Un 51:10-12; 2Kọ 10:5; Fil 2:13) Ọrẹne, o che ru nene ẹrhovwo rọyen womarẹ o vwo vwo utuoma kpahen ozighi kugbe erharhe eta. (Un 97:10) Ọriyorin, o che bru ekpako ukoko na ra vwọ kẹ ukẹcha kpakpata. (Jem 5:14-16) Ọresan, e jẹ o ru ọrhuẹrẹphiyotọ re sa vwẹ ukẹcha kẹ vwọ kẹnoma kẹ orharhe uruemu ọtiọyena vwẹ obaro. Ofori nẹ ọshare ro nẹ ihoho rẹ ihwo re banphiyọ ji nene iroroẹjẹ nana. Jihova che bruba ẹgbaẹdavwọn rọyen ro vwo wene uruemu rọyen. (Un 37:5) O teri rẹ ọshare de vwọ kẹnoma kẹ iruemu tiọyena ri dje ọghọ phiaa na. O ji fo nẹ o yono kpahen obo re brọghọ phiyọ aye rọyen oma. Mavọ yen o se vwo ru ọtiọyen?  

OBORẸ WO SE VWO MUỌGHỌ KẸ AYE WẸN

15. Mavọ yen ọshare se vwo dje ẹguọnọ kẹ aye rọyen?

¹⁵ Dje ẹguọnọ kẹ. Iniọvo eshare evo re rọvwọnre rẹ oma vwerhan vwo ẹkuruemu rẹ ayen vwo ruẹ orọnvwọn ọvo kẹdẹ kẹdẹ vwo djephia kẹ eya rayen oborẹ ayen vwo ẹguọnọ rayen te. (1Jọ 3:18) Ọshare se ru erọnvwọn tutuno vwo djephia nẹ o vwo ẹguọnọ rẹ aye rọyen, kerẹ ọ vwọ yọnrọn obọ yẹrẹ gbanọ ba oma. O se si ovuẹ rhe je vuẹ nẹ “Urhuru wẹn si vwe” yẹrẹ nọ “Kẹ, oma wẹn vwo?” Nọke ra ruọke, o se si ovuẹ phiyọ ikadi vwo rhe vwo djephia nẹ o vwo ẹguọnọ rọyen. Siẹrẹ ọshare de ruẹ erọnvwọn nana, jẹ o djephia nẹ o muọghọ vwọ kẹ aye rọyen, orọnvwe rayen kọ je cha ganphiyọ.

16. Diesorọ o vwo fo nẹ ọshare jiri aye rọyen?

¹⁶ Dje ọdavwaro phia. Ọshare ro muọghọ kẹ aye rọyen phiuduphiyọ awọ je vwẹ ọbọngan kẹ. Idjerhe ọvo ro se vwo ru ọtiọyen yen o vwo dje ọdavwaro phia kpahen kemu kemu ro ruẹ vwo biẹcha. (Kọl 3:15) Siẹrẹ ọshare de jiri aye rọyen nẹ otọ rẹ ubiudu cha, ọ vwerhọn oma. Ọnana cha nẹrhẹ ọ riẹn nẹ ọshare rọyen vwo ẹguọnọ rọyen, o muọghọ kẹ, ẹwẹn rọyen ko ji che totọ.​—Isẹ 31:28.

17. Mavọ yen ọshare se vwo muọghọ kẹ aye rọyen?

¹⁷ Dje uruemu esiri vẹ ọghọ phia. Ọshare ro vwo ẹguọnọ rẹ aye rọyen vwẹrote ji no ghanghanre. O no kerẹ okẹ ro nẹ obọ ri Jihova rhe. (Isẹ 18:22; 31:10) Ọtiọyena, o muọghọ ji dje uruemu esiri kẹ, tobọ te ọke rẹ ayen ihwo ivẹ de nene ohwohwo vwerhẹn. Ọ cha gba vwo vwobọ vwẹ ehware rọ guọnọree, rọ cha nẹrhẹ o nẹ oma rọyen kueku yẹrẹ rọ che kpokpo ẹwẹn rọyeen.f Ọshare na je cha davwẹngba vwọ sẹro rẹ ẹwẹn obrorhiẹn rọ fonro vwẹ obaro ri Jihova.​—Iru 24:16.

18. Die yen ofori nẹ eshare ru? (Ni ekpeti na “Idjerhe Ẹne Ọshare se Vwo Dje Ọghọ Phia.”)

¹⁸ Eshare, ovwan se vwo imuẹro nẹ Jihova mrẹ, o ji vwo ọdavwaro kpahen kemu kemu ovwan ruẹ vwo muọghọ kẹ eya rẹ ovwan vwẹ kẹdia kẹdia rẹ akpeyeren. Davwẹngba vwo brọghọ phiyọ oma womarẹ wo vwo dje ẹguọnọ, ọghọ kugbe uruemu esiri vwọ kẹ, wọ je kẹnoma kẹ erọnvwọn ri dje ọghọ phiaa. Wo de ru ọtiọyen jẹ wo djephia nẹ wo vwo ẹguọnọ rọyen, nẹ wo ji no ghanghanre. Wo de muọghọ kẹ aye wẹn, ku wọ cha sẹro rẹ oyerinkugbe rọ ma ghanre​—rọ dia oyerinkugbe wẹ vẹ Jihova vwori.​—Un 25:14.