Vwẹ Urinrin kẹ Jihova

1. Die yen ihwo buebun tẹnroviẹ nonẹna?

WO VWO oniso nẹ ihwo buebun nonẹna vwo ọdavwẹ romobọ rayen ọvo? Kerẹ udje, ayen ruẹ oborẹ ayen se ru eje ihwo vwo ni ayen vẹ oborẹ ayen vwori so. Jẹ, imihwo krẹn yen vwẹ urinrin kẹ Jihova Ọghẹnẹ nonẹna. Vwẹ uyono nana, a cha ta ota kpahen obo ro mudiaphiyọ a vwọ vwẹ urinrin kẹ Jihova kugbe obo ri se mu avwanre vwo ru ọtiọyen. E ji che yono kpahen obo ra sa vwọ vwẹ urinrin ro fo Ọghẹnẹ vwọ kẹ kugbe obo rọ cha vwọ vwẹ urinrin kẹ odẹ rọyen vwẹ obaro na kẹrẹkpẹ.

A VWỌ VWẸ URINRIN VWỌ KẸ JIHOVA DIE YEN O MUDIAPHIYỌ?

2. Idjerhe vọ yen Jihova vwo dje urinrin rọyen phia vwẹ ugbenu ri Sinae? (Ni uhoho rọhẹ opharo ọbe na.)

² Die yen urinrin? Vwẹ Baibol na, ota na “urinrin” mudiaphiyọ kemu kemu rọ sa nẹrhẹ a vwẹ okpẹro vwo ni ohwo. Jihova dje urinrin rọyen phia ọmọke krẹn e ghwe vwo siobọnẹ ihwo rẹ Izrẹl vwo nẹ eviẹn vwẹ Ijipt nu. Vwẹ ẹwẹn roro: Ihwo rẹ Izrẹl bigba vwẹ obotọ rẹ Ugbenu ri Sinae vwẹ obaro rẹ Ọghẹnẹ. Egho de rhi mu enu rẹ ugbenu na hwi. Siẹvuọvo na, otọ na ko kpogho, o de kpogho ro ayen oma jẹ enu nyavwaro, agbraran van kugbe edo rẹ owanre rọ mra nene asan eje. (Ey 19:16-18; 24:17; Un 68:8) Vwẹ ẹro roro obo ro gbe ihwo rẹ Izrẹl unu te ọke rẹ Jihova vwo dje urinrin rọyen phia.

3. Die yen o mudiaphiyọ a vwọ vwẹ urinrin kẹ Jihova?

³ Kẹ ihworakpọ vwo? Avwanre ghene sa ghwa urinrin rhe Jihova? E, e se ru ọtiọyen. Idjerhe ọvo a sa vwọ vwẹ urinrin kẹ Jihova yen, a vwọ vuẹ ihwo efa kpahen ẹgba rọyen rọ basaan kugbe iruemu iyoyovwin ro vwori. A je vwẹ urinrin kẹ Ọghẹnẹ siẹrẹ e de jiro fikirẹ erọnvwọn rọ cha avwanre uko vwo ru. (Aiz 26:12) Ovie Devid ọyen uvi rẹ udje rẹ ohwo rọ vwẹ urinrin kẹ Jihova. Vwẹ ẹrhovwo rọ nẹre vwẹ obaro ẹgborho rẹ Izrẹl eje, Devid da vuẹ Ọghẹnẹ nẹ: “Wẹ, E Ọrovwohwo, vwo ọrho, kugbe ogangan, vẹ urinrin vẹ ephiokparobọ vẹ ẹgba; fikiridie emu rẹ obo odjuvwu vẹ akpọ ejobi ewẹn.” Ọke ri Devid vwo ku ẹrhovwo na phiyọ nu, “ọghwẹgbe na ejobi de bruphihọ kẹ Ọrovwohwo.”—1Ik 29:11, 20.

4. Idjerhe vọ yen Jesu vwọ vwẹ urinrin kẹ Jihova?

⁴ Ọke rẹ Jesu vwọ hẹ otọrakpọ na, ọ vwẹ urinrin kẹ Ọsẹ rọyen womarẹ o vwo djephia nẹ Jihova yen kẹrẹ ẹgba ro vwo ru igbevwunu ro ruru. (Mk 5:18-20) Oborẹ Jesu ta ota kpahen Ọsẹ rọyen kugbe obo ro nene ihwo yerin wan je ghwa urinrin rhe Jihova. Ẹdẹ ọvo ri Jesu vwo yono vwẹ sinagọg, o vwo aye ọvo vwẹ usun rẹ ihwo rọ ta ota kẹ na ro vwo ẹwẹn rẹ Idẹbono oma ẹgbukpe 18 soso. Ẹwẹn rẹ Idẹbono na nẹrhẹ oma rọyen gunu, te ẹdia o rhe se muẹdia kpomaviẹẹ. Ọnana brare mamọ! Ehrọre rọyen da re Jesu, ọ da yan bru aye na ra je ta ota kẹ bọrọ bọrọ nẹ: “Aye, e si we nẹ ovwiẹrẹ wẹn na re.” Ọ da ghwa obọ rọyen kpahọn, ugege yena o de mudia kpomavi, ọ da “vwẹ urinrin kẹ Ọghẹnẹ,” kidie ọghọ rọyen rhire, oma rọyen ji kpo re! (Lu 13:10-13) O ghini fo aye na vwọ vwẹ urinrin kẹ Jihova, ọtiọyen ji te avwanre.

DIE YEN MU AVWANRE VWỌ VWẸ URINRIN KẸ JIHOVA?

5. Erhọ yen iroro evo re sorọ o vwo fo e vwo muọghọ kẹ Jihova?

⁵ Avwanre vwẹ urinrin vwọ kẹ Jihova fikirẹ ọghọ okokodo e muẹ vwọ kẹ. O vwo erọnvwọn buebun re sorọ avwanre vwo muọghọ kẹ. Jihova yen ọromevwẹgba na; ẹgba rọyen basaan. (Un 96:4-7) Erọnvwọn rọ mare nabọ dje aghwanre rọyen phia. Obọ rọyen yen arhọ avwanre Nurhe, ọ je vwẹrote avwanre. (Ẹvw 4:11) Ọyen ohwo rọ fuevun. (Ẹvw 15:4) Kemu kemu ro ruẹ eje efẹrọvo, o ji ruẹ nene ive rọyen ọkieje. (Jos 23:14) A gbe ta ọmraro Jerimaya vwọ ta kpahen Jihova nẹ: “Vwẹ uherevie rẹ ẹgborho rẹ ọvwẹghwanre na ejobi kugbe evun rẹ uvie rayen na ejobi Ọ rọ họhọ owẹ herọ-ọ”! (Jer 10:6, 7) Ọtiọyena, o vwo erọnvwọn buebun re sorọ o vwo fo nẹ avwanre muọghọ vwọ kẹ Ọsẹ avwanre rọhẹ odjuvwu. Ẹkẹvuọvo, ọ dia ọghọ avwanre ọvo yen Jihova muwan rọyeen​—ọ je guọnọ nẹ e vwo ẹguọnọ rọyen.

6. Diesorọ avwanre vwo vwo ẹguọnọ rẹ Jihova?

⁶ Avwanre vwẹ urinrin kẹ Jihova kidie avwanre vwo ẹguọnọ rọyen. Avwanre vwo ẹguọnọ rẹ Jihova fikirẹ iruemu iyoyovwin buebun ri rhe re. Ọyen ohwo rẹ arodọnvwẹ rọ je re ehrọre. (Un 103:13; Aiz 49:15) Ọyen ohwo vẹ erorokẹ; siẹrẹ erọnvwọn da miavwẹ avwanre oma, o ji te oma. (Zek 2:8) O ruo lọhọ kẹ avwanre rere e se vwo sikẹrẹ kerẹ Ugbeyan. (Un 25:14; Iru 17:27) Ọyen ohwo rọ vwomakpotọ; ‘ro nẹ otọ vẹ odjuvwu na, Ọ kpara ovwiogbere nẹ iwurhie.’ (Un 113:6, 7) Kẹ, mavọ yen kohwo kohwo vwo jẹ urinrin ẹ vwọ kẹ Ọghẹnẹ ro me kpenu na?​—Un 86:12.

7. Uphẹn ọghanghanre vọ yen avwanre vwori?

⁷ Avwanre vwẹ urinrin kẹ Jihova kidie a guọnọ nẹ ihwo efa riẹn. Ihwo buebun riẹn uyota ro shekpahen Jihovaa. Diesorọ? Kidie Eshu rhuẹro rayen womarẹ ọ vwọ hrahra efian ra ghẹmrẹ vwọ Kpahọn. (2Kọ 4:4) Eshu nẹrhẹ ihwo vwo imuẹro nẹ Jihova ọyen ohwo ro muophu djọghrọ djọghrọ, rọ davwerhọọn, rọ je so ojaẹriọ rọhẹ akpọ na eje. Ẹkẹvuọvo avwanre riẹn uyota na kpahen Ọghẹnẹ rẹ avwanre! Avwanre vwo uphẹn a vwọ vwẹ ukẹcha kẹ ihwo vwo vwo ẹruọ oka rẹ ohwo rọ hẹpha je ghwa urinrin bro ra. (Aiz 43:10) Obo ra sa vwọ vwẹ urinrin kẹ Jihova yen Une rẹ Ejiro 96 ta ota kpahen. A cha vwọ fuẹrẹn ẹkpo evo vwẹ Une rẹ Ejiro nana, roro kpahen idjerhe sansan wọ sa vwọ vwẹ urinrin ro fo odẹ ri Jihova vwọ kẹ.

MAVỌ YEN A SA VWỌ VWẸ URINRIN RO FO ODẸ RI JIHOVA VWỌ KẸ?

8. Ọrhọ yen idjerhe ọvo a sa vwọ vwẹ urinrin kẹ Jihova? (Une rẹ Ejiro 96:1-3)

⁸ Se Une rẹ Ejiro 96:1-3. A sa vwẹ urinrin kẹ Jihova womarẹ oborẹ avwanre ta kpahọn. Vwẹ awọreta nana, Jihova vuẹ ihwo rọyen nẹ ayen “so ine kẹ Ọrovwohwo,” “bruphihọ kẹ odẹ rọye,” “gbe ikun rẹ esivwo rọye,” ji “ghwoghwo urinrin rọye vwẹ ohri rẹ ẹgborho na.” Enana eje idjerhe a sa vwọ vwẹ urinrin kẹ Ọsẹ avwanre rọhẹ obodjuvwu. Ihwo ri Ju re fuevun kugbe Inenikristi ẹgbukpe ujorin rẹsosuọ, nama ghwọrọ ọke vwọ vuẹ ihwo kpahen erhuvwu rẹ Jihova ru vwọ kẹ ayen kugbe obo rọ chochọn rẹ odẹ rọyen waan. (Da 3:16-18; Iru 4:29) Mavọ yen a sa vwọ vwẹrokere ayen?

9-10. Die yen wo yono vwo nẹ obo re phia kẹ Angelena rhe? (Ni uhoho na.)

⁹ Roro kpahen obo re phia kẹ Angelena,a oniọvo aye ọvo rọ dia United States. O fiudugberi chochọn rẹ odẹ ri Jihova vwẹ ikọmpini ro de ruiruo. Kidie nẹ a ghwa reyọ Angelena phiyọ iruo obọ, e de durhie kpo echidiotọ rẹ ihwo re ghwa vwomaba ikọmpini na obọ rere ayen se vwo dje oma rayen kugbe asan ayen nurhe vwọ kẹ ihwo efa rehẹ etiyin jovwo. Angelena de muegbe rẹ ifoto sansan rọ cha vwọphia ri dje aghọghọ ro vwori kerẹ Oseri ri Jihova. Jẹ, tavwen e ki se, ọvo usun rẹ ihwo rehẹ etiyin na de dje oma rọyen nẹ a yọnrọn ọyen ghwanre kerẹ Oseri ri Jihova. Ọ ta erharhe eta kpahen avwanre je reyọ oborẹ avwanre segbuyota vwọ jehwẹ. Angelena da ta: “Udu ko bru vwe jẹ oshọ mu vwe, me da ta: ‘Me cha fọ je vwẹ uphẹn kẹ ohwo nana rere o mu efian banre Jihova? Gbanẹ me cha nabọ mudia chochọn rọyen?’”

¹⁰ Ọke rẹ ohwo iruo rọyen na vwọ ta ota nu, Angelena de brokpakpa nẹrhovwo phiyọ evun. Ọtiọyena ọ da ta ota kẹ bọrọ bọrọ nẹ: “Ikuegbe mẹ vẹ ọ wẹn họhọ ọvo. Iseri ri Jihova yen je yọnrọn ovwẹ ghwanre, rhi te nonẹna mẹvwẹ jẹ Oseri ri Jihova.” Dede nẹ ọbagha ro asan eje, Angelena da nabọ vwomakpotọ ji dje ifoto rọ vẹ iniọvo na roro vwẹ osikoko vẹ eghwẹkoko je chochọn rẹ esegbuyota rọyen. (1Pi 3:15) Die kọyen nẹ obuko rọyen rhe? Bẹsiẹ Angelena vwo ku eta rọyen phiyọ nu, jẹ ẹwẹn ọshare na kpotọ re. Ọ tobọ djunute erọnvwọn evo rọ riavwerhen rọyen ọke rọ vwọ hẹ eghene kerẹ Oseri ri Jihova. Angelena da ta: “Jihova fo ohwo ra chochọn rọyen. Ọyen okpuphẹn a vwọ vuẹ ihwo efa kpahen odẹ rọyen.” Avwanre ji vwo uphẹn re vwo jiri Jihova je vwẹ urinrin kẹ ọ da tobọ dianẹ ihwo efa ruẹ ọtiọyeen.

11. Idjerhe vọ yen idibo ri Jihova nẹ awanre rhe vwo nene odjekẹ rọhẹ Une rẹ Ejiro 96:8?

¹¹ Se Une rẹ Ejiro 96:8. Avwanre sa vwẹ urinrin kẹ Jihova womarẹ ekuakua rẹ avwanre vwori. Idibo ri Jihova vwẹ urinrin kẹ vwẹ idjerhe tiọna. (Isẹ 3:9) Kerẹ udje, ihwo rẹ Izrẹl ru itetoro vwọ kẹ ebanbọn kugbe ẹroevwote rẹ uwevwin ẹga na. (2Iv 12:4, 5; 1Ik 29:3-9) Idibo ri Kristi ri vwo ọdavwẹ rọyen “vwẹ ekuakua rẹ ayen vwori” vwo gbe odibo kẹ vẹ iyinkọn rọyen. (Lu 8:1-3) Inenikristi ẹgbukpe ujorin rẹsosuọ ji ru itetoro vwo bicha iniọvo rayen. (Iru 11:27-29) Nonẹna, a je sa vwẹ urinrin kẹ Jihova womarẹ itetoro avwanre ruẹ.

12. Mavọ yen itetoro avwanre sa vwọ ghwa urinrin rhe Jihova? (Ni uhoho na.)

¹² Ji roro kpahen udje ọvo ro dje oborẹ itetoro avwanre ghwa urinrin rhe Jihova. Vwẹ ukpe ri 2020, a niyẹnrẹn rẹ obẹnbẹn rẹ ọkanrovwẹ osio ghwa rhe Zimbabwe ọke grongron. Owẹnvwe dino hwe iduduru rẹ ihwo buebun ghwu ji te oniọvo aye Prisca. Dede nẹ ọkanrovwẹ osio na je hẹ otọ, jẹ Prisca je vwẹ Wednesday vẹ Friday ri kudughwrẹn kudughwrẹn vwo ruiruo aghwoghwo na, tobọ te ọke ra vwọ kọn ekankọn. Irivẹ rọyen ke reyọ vwọ jehwẹ je vuẹ nẹ, “Owẹnvwe che hwe ukara nẹ uwe ẹro” kidie o kpo iruo aghwoghwo na ukpe ro vwo kpo aghwa rọyen. Prisca me vuẹ ayen, o ji “vwo ọke vuọvo rẹ Jihova vwọ kpairoro vrẹ idibo rọyeen.” Okririi, ọ da mrẹ ukẹcha vwo nẹ emu rẹ ukoko na mu rhe iniọvo na. E se ru ọrhuẹrẹphiyotọ yena fikirẹ itetoro rẹ avwanre. Obo re phiare na gbe irivẹ rọyen unu, ayen da vuẹ nẹ, “Ọghẹnẹ je rhe kpairoro vrẹ wẹẹ, ọtiọyena avwanre je guọnọ yono kpahọn kpobarophiyọ.” Ihwo ighwrẹn vwẹ usun rayen da ton uyono ẹra phiyọ.

13. Mavọ yen uruemu avwanre sa vwọ ghwa urinrin rhe Jihova? (Une rẹ Ejiro 96:9)

¹³ Se Une rẹ Ejiro 96:9. Avwanre sa vwẹ urinrin kẹ Jihova womarẹ uruemu rẹ avwanre. Ofori nẹ irherẹn re ga vwẹ uwevwin ẹga ri Jihova dia fuanfon vwọrẹ ugboma. (Ey 40:30-32) Dede nẹ omaẹfuọn rẹ ugboma ghanre, jẹ a vwọ fon vwọrẹ uruemu yen ma ghanre kparobọ. (Un 24:3, 4; 1Pi 1:15, 16) Ofori nẹ a davwẹngba mamọ vwo ku “uruemu rẹ awanre na” nu​—kọyen ẹkuruemu kugbe irueru ri jẹfuọn, rere e se vwo ku “uruemu ọkpokpọ na phiyọ”​—vwo nene oborẹ avwanre roro ji ruẹ erọnvwọn wan a sa vwọ vwẹrokere omamọ iruemu rẹ Jihova vwori. (Kọl 3:9, 10) Womarẹ ukẹcha ri Jihova, inogbozighi vẹ evwọfanrhiẹn re ma bra kparobọ dede ji se kurhẹriẹ ji ku uruemu ọkpokpọ na phiyọ.

14. Die yen wo yono vwo nẹ obo re phia kẹ Jack? (Ni uhoho na.)

¹⁴ Roro kpahen obo re phia kẹ Jack, rọ dia onogbozighi ro muoshọ re ji se amakashe rẹ Idẹbono. Fikirẹ erọnvwọn ebrabra ro ruru, e de brorhiẹn rẹ ughwu hwe. Ẹkẹvuọvo, rọ vwọ hẹrhẹ ọke re che vwo hwe, Jack da rhọnvwephiyọ uyono ri Baibol nẹ oniọvo ọshare rọ kọn cha uwodi na yono ọyen. Dede nẹ Jack ru erọnvwọn ebrabra vwẹ obuko re, o de ku ohwo rẹ awanre na nu, ọke vwọ yanran na o de muwan kẹ omaebrophiyame. Jack ru ewene mamọ te ẹdia rẹ ẹdẹ re che vwo hwe na, evo usun rẹ ihwo re vwẹrote uwodi na ki kpogho obọ kẹ jẹ ayen viẹ. Ọlọkpa ọvo rọ wian vwẹ uwodi na da ta: “Jack ọyen ohwo rọ ma bra kparobọ vwẹ uwodi na jovwo. Enẹna ọyen ọvo usun ihwo ri me yovwin kparobọ.” Udughwrẹn rọ vwọ kpahọn re vwo hwe Jack nu, iniọvo ri ruẹ uyono rẹ kudughwrẹn kudughwrẹn vwẹ uwodi na da mrẹ ohwo ọvo usun rẹ ihwo re mu phiyọ uwodi na rọ vwomaba ayen vwẹ obọ rẹsosuọ. Die yen nẹrhẹ ọ vwomaba ayen? Ewene rẹ Jack ruru vwẹ akpeyeren rọyen vwerherọ oma, ọ je guọnọ riẹn obo ra guọnọ mie ọ sa vwọ vwẹ ẹga kẹ Jihova. Aphro herọọ, uruemu avwanre sa ghwa urinrin rhe Ọsẹ avwanre rọhẹ obodjuvwu!​—1Pi 2:12.

MAVỌ YEN JIHOVA CHA VWỌ VWẸ URINRIN KẸ ODẸ RỌYEN VWẸ OBARO NA?

15. Mavọ yen Jihova cha vwẹ urinrin kẹ odẹ rọyen kakare vwẹ obaro na? (Une rẹ Ejiro 96:10-13)

¹⁵ Se Une rẹ Ejiro 96:10-13. Awọreta re koba vwẹ Une rẹ Ejiro 96 djisẹ ri Jihova kerẹ Ovie kugbe Oguẹdjọ rẹ ọvwata. Mavọ yen Jihova cha vwọ vwẹ urinrin kẹ odẹ rọyen vwẹ obaro na? Womarẹ ẹdjọeguo rọyen. Kẹrẹkpẹ, ọ cha ghwọrọ Babilọn Rode kidie ọ ghwa ekan rhe odẹ ọfuanfon rọyen. (Ẹvw 17:5, 16; 19:1, 2) Ihwo evo re cha mrẹ oghwọrọ ri Babilọn Rode sa vwomaba avwanre vwẹ ẹga rẹ uyota. Ukuotọ rọyen, vwẹ Amagidọn, Jihova cha ghwọrọ eyeren rẹ Eshu eje, ọ cha ghwọrọ kohwo kohwo rọ vwọsuọ ji miovwo odẹ rọyen, ẹkẹvuọvo o che sivwin ihwo ri vwo ẹguọnọ rọyen ri ji muọghọ kẹ, te ihwo rẹ oma vwerhan rẹ ayen vwọ vwẹ urinrin kẹ. (Mk 8:38; 2Tẹ 1:6-10) Siẹrẹ ọdavwini rọ koba ro che nene Usuon Ẹgbukpe Uriorin ri Kristi na de re nu, jẹ Jihova ru odẹ rọyen fon kakare nure. (Ẹvw 20:7-10) Vwẹ ọke yena, “otọ na cha vọn vẹ erianriẹn rẹ urinrin rẹ Ọrovwohwo na, kirobo rẹ ame phoro abadi na.”​—Hab 2:14.

16. Die yen wo brorhiẹn wo vwo ru? (Ni uhoho na.)

¹⁶ Mavọ yen ọ cha vwerhoma te siẹrẹ ihworakpọ eje re herọ yerẹn da cha reyọ urinrin ro fo odẹ ri Jihova vwọ kẹ! Bẹsiẹ ọke yena ki te, e jẹ e ru ẹkẹn ro te avwanre womarẹ a vwọ reyọ kuphẹn kuphẹn ro rhiephiyọ vwọ vwẹ urinrin kẹ Ọghẹnẹ rẹ avwanre. A sa vwọ riẹn oborẹ ọnana ghanre te, Ẹko Rọvwẹrote na sanẹ Une rẹ Ejiro 96:8 vwo ru uyovwinrota rẹ ukpe ri 2025: “Vwẹ urinrin ro fo odẹ rẹ Ọrovwohwo vwọ kẹ.”