Bru Erhiẹn re Cha Vwerhen Jihova Oma

1. Egbabọse vọ yen avwanre eje vwori?

KẸDI KẸDẸ yen avwanre bru erhiẹn. Erhiẹn evo rẹ avwanre brẹ pha lọlọhọ, kerẹ udje oborẹ avwanre cha re vwẹ urhiọke yẹrẹ ọke rẹ avwanre che vwo sherhẹn. Erhiẹn efa sa bẹn avwanre ebro. Erhiẹn nana se shepkahen oma kpokpọ avwanre, omavwerhovwẹn avwanre, ihwo rẹ avwanre vwo ẹguọnọ kpahen yẹrẹ ẹga avwanre. A guọnọre nẹ erhiẹn rẹ avwanre brẹ fierere kẹ avwanre vẹ orua avwanre. Ọ rọ ma ghanre, avwanre rhẹro nẹ erhiẹn avwanre cha ghwa omavwerhovwẹn rhe Jihova.​—Ro 12:1, 2.

2. Iroroẹjẹ vọ yen sa vwẹ ukẹcha kẹ wẹ vwo brorhiẹn rẹ aghwanre?

² Wo se ghini bru omamọ orhiẹn ọ da dianẹ (1) wọ riẹn uyota rẹ erọnvwọn na eje, (2) roro kpahen ẹro ri Jihova vwo nẹ ẹdia na, kugbe ọrerha (3) frẹkotọ roro kpahen obo ri che nẹ obuko rọyen rhe. Uyono nana cha ta ota kpahen iroroẹjẹ erha yena, ọ je cha vwẹ ukẹcha kẹ avwanre kpahen obo re se vwo yono ẹgba ọmrẹvughe rẹ avwanre.​—Isẹ 2:11.

RIẸN UYOTA RẸ ERỌNVWỌN NA EJE

3. Djudje rẹ oboresorọ o vwo fo nẹ wọ riẹn uyota rẹ erọnvwọn eje wo ki brorhiẹn.

³ Iroroẹjẹ rẹsosuọ e se vwo bru omamọ orhiẹn yen a vwọ riẹn uyota rẹ erọnvwọn na eje. Diesorọ ọnana vwọ ghanre? Vwẹ ẹwẹn roro nẹ ohwo ọvo bru idọktọ ra kidie o vwo obẹnbẹn ọgangan ọvo. Idọktọ na che brorhiẹn rẹ obo ro che sivwin ohwo na wan jẹ ọ je rhe nọ enọ kpahen obo ri kpokpo ohwo na je fuẹrẹn nii? Ẹjo kakaka. Wo ji che bru omamọ erhiẹn siẹrẹ wọ da ka guọnọ uyota rẹ erọnvwọn na eje ri shekpahen ẹdia ru wọ hepha na. Mavọ yen wo se ru ọtiọyen?

4. Vwo nene obo rehẹ Isẹ 18:13, mavọ yen wo se vwo vwo imuẹro nẹ wọ riẹn uyota rẹ erọnvwọn eje? (Ni uhoho na.)

⁴ Ọke buebun wọ sa riẹn uyota rẹ erọnvwọn na eje siẹrẹ wọ da nọ enọ. E gbe dje nẹ e durhie uwe kpo akpọẹriọ. Wọ cha ra? Wo rhe vughe ohwo ro durhie uwe na yẹrẹ obo ro che ruu, ofori nẹ wọ nọ enọ evo kerẹ: “Tivọ kugbe ọke vọ yen e che vwo siomakoko vwo ru akpọẹriọ na? Mavọ yen ọ cha rho te? Ono yen cha vwẹrote ọrhuẹrẹphiyotọ na? Ono yen cha ra? Die yen e che ru vwẹ etiyin? A cha ghare idi ri mu ohwo vwẹ etiyin?” Ẹkpahọnphiyọ rẹ enọ nana cha vwẹ ukẹcha kẹ wẹ wo borhiẹn rẹ aghwanre.​—Se Isẹ 18:13.

5. Die yen ofori nẹ wo ru siẹrẹ wọ da riẹn uyota na eje?

⁵ Wọ da riẹn uyota rẹ erọnvwọn na eje nu, gba nabọ roro kpahen ẹdia na. Kerẹ udje, ọ da rha dianẹ wo nyori nẹ ihwo evo re rhọnvwa nene odjekẹ ri Baibool ji che kpo akpọẹriọ na yẹrẹ a cha vwẹ idi ri mu ohwo vwọ ghọ ihwo vwo? Wo vwo oniso sẹ akpọẹriọ na se hirhephiyọ ọ re de ru obo ri je ohwo? (1Pi 4:3) Kẹ, ọ da rha dianẹ akpọẹriọ na che gbowọphiyọ ọke rẹ uyono vẹ aghwoghwo na vwo? Wọ da nabọ riẹn uyota rẹ erọnvwọn na eje nu, kẹ wo se brorhiẹn rẹ aghwanre. Jẹ o vwo orọnvwọn ọfa ru wo se ru. Wọ nabọ riẹn ẹdia na eje re; kẹ ẹro vọ yen Jihova vwo no?​—Isẹ 2:6

RORO KPAHEN ẸRO RẸ JIHOVA VWO NẸ ERỌNVWỌN

6. Vwo nene obo rehẹ Jems 1:5, diesorọ o vwo fo a vwọ yare ukẹcha mie Jihova?

⁶ Rẹ Jihova nẹ ọ vwẹ ukẹcha kẹ wẹ vwo vwo ẹruọ rẹ ẹro ro vwo nẹ emu. Jihova veri nẹ ọ cha kẹ avwanre aghwanre ra vwọ riẹn sẹ orhiẹn rẹ avwanre brẹ cha ghwa omavwerhovwẹn rhe. Ọ vwẹ aghwanre tiọyena vwọ kẹ ihwo eje “ghwologhwolo, ọ vwọ wanriẹ ohwo-o.”​—Se Jems 1:5.

7. Mavọ yen e se vwo vughe ẹro rẹ Jihova vwo nẹ emu? Djudje rọyen.

⁷ Siẹrẹ wọ da nẹrhovwo rhe Jihova vwọ kẹ odjekẹ rọyen, nabọ vwo oniso rẹ ẹkpahọnphiyọ rọyen. Kerẹ udje: Ọ da dianẹ wọ yan ghwru wo vwo kpo asan, wọ sa nọ ohwo rọ dia ekogho na nẹ o dje idjerhe kẹ wẹ. Jẹ, wọ cha yanran ọ dianẹ ọ je kpahen kẹ wẹẹ? Ẹjo kakaka. Wọ cha nabọ phi erhọ phiyotọ ro vwo dje idjerhe na kẹ wẹ. Vwẹ idjerhe vuọvo na, wọ da nokpẹn rẹ aghwanre mie Jihova nu, davwẹngba vwọ riẹn ẹkpahọnphiyọ rọyen womarẹ wọ vwọ guọnọ iji ri Baibol vẹ odjekẹ ri shepkahen ẹdia wẹn na. Kerẹ udje, siẹrẹ wo de brorhiẹn sẹ wo che kpo akpọẹriọ ra ta ota kpahen siẹvure na, wọ sa fuẹrẹn obo ri Baibol na ta kpahen erharhe rẹ igbeyan, akpọẹriọ re de ru obo ri je ohwo, kugbe oboresorọ o vwo fo a vwọ vwẹ ọdavwẹ rẹ Uvie na vwọ kobaro kẹ ojevwe romobọ.​—Mt 6:33; Ro 13:13; 1Kọ 15:33.

8. Die wo se ru ọ da dianẹ wọ guọnọ ukẹcha rere wọ sa vwọ mrẹ obo ru wọ guọnọ? (Ni uhoho na.)

⁸ Jẹ, ọkievo, wọ sa guọnọ ukẹcha rere wọ sa vwọ mrẹ obo ru wọ guọnọ. Oniọvo ọshare yẹrẹ aye ro tedje sa vwẹ ukẹcha kẹ wẹ. Ẹkẹvuọvo, wọ cha mrẹ erere siẹrẹ wo de ru ehiahiẹ romobọ wẹn. Evuẹ buebun herọ vwẹ ẹbe rẹ avwanre vwo ruẹ ehiahiẹ, kerẹ Research Guide for Jehovah’s Witnesses kugbe Ẹkpo ri Baibol vwọ kẹ Akpeyeren rẹ Inenikristi. Karophiyọ nẹ ọdavwẹ wẹn: ọyen wo vwo brorhiẹn rọ cha nẹrhẹ oma vwerhen Jihova.

9. Die yen sa kẹ avwanre imuẹro nẹ orhiẹn avwanre cha nẹrhẹ oma vwerhen Jihova? (Ẹfesọs 5:17)

⁹ Mavọ yen avwanre se vwo vwo imuẹro nẹ orhiẹn avwanre cha nẹrhẹ oma vwerhen Jihova? Ẹsosuọ, ofori nẹ avwanre nabọ vughe. Baibol na tare nẹ, “Erianriẹn rẹ Ọfuanfọn Ọvuọvo na ọye orẹmrẹ.” (Isẹ 9:10) Vwọrẹ uyota, avwanre se vwo uvi rẹ ẹruọ siẹrẹ avwanre da riẹn iruemu ri Jihova, ọhọre, vẹ obo ri je kugbe obo ro vwo utuoma kpahen. Nọ oma wẹn, ‘Vwo nene obo re me riẹn Jihova phiyọ, orhiẹn vọ yen mi se bru oma sa vwọ vwerhọn?’​—Se Ẹfesọs 5:17.

10. Diesorọ odjekẹ ri Baibol vwọ ghanre vrẹ ẹkuruemu rẹ asan re nurhe yẹrẹ obo re ruẹ vwevunrẹ orua?

¹⁰ Rere e se vwo ru obo re vwerhen Jihova oma, ọkievo e se ku ihwo re kẹrẹ avwanre phiyotọ. Kerẹ udje, emiọvwọn evo se si isiesi nẹ ọmọtẹ rayen rọvwọn ọshare ro vwo igho yẹrẹ ọshare rọ sa nabọ ghwọrọ igho vwo bremu rọyen, dede nẹ ọ ganre vwevunrẹ ukoko naa. Uyota nẹ, ayen guọnọ ohwo rọ sa nabọ vwẹrote ọdavwẹ rẹ ọmọtẹ rayen, kẹ ọshare na sa vwẹ ukẹcha kẹ vwọ rho tedje vwevunrẹ ukoko na? Ẹro vọ yen Jihova vwo nẹ ota na? Ẹkpahọnphiyọ rẹ onọ na hẹ evunrẹ Matiu 6:33. E jiriro kẹ Inenikristi vwẹ etiyin nẹ ayen “rha guọnọ Uvie na . . . ẹsosuọ.” Dede nẹ avwanre muọghọ kẹ esẹ vẹ ini avwanre kugbe ihwo ra vẹ ayen gba dia ekogho ọvo, jẹ obo re ma ghanre kẹ avwanre yen re vwo ru obo re vwerhen Jihova oma.

FRẸKOTỌ RORO KPAHEN OBO RI CHE NẸ OBUKO RỌYEN RHE

11. Uruemu vọ yen a ta ota kpahen vwẹ Filipae 1:9, 10 rọ sa cha wẹ uko vwọ riẹn obo ri che nẹ obuko rẹ orhiẹn wẹn rhe?

¹¹ Wo de roro kpahen odjekẹ ri Baibol ri shekpahen orhiẹn wẹn na nu, o ji fo wo vwo roro kpahen obo ri che nẹ obuko rọyen rhe. (Se Filipae 1:9, 10; ni study note “full discernment.”) Ọmrẹvughe cha nẹrhẹ wọ riẹn obo ri che nẹ obuko rọyen rhe. Ọkievo, re vwo brorhiẹn ghwa bẹẹn. Jẹ, ọ dia erhiẹn eje yen e se brẹ phiọguun. Ọtiọyena ọmrẹvughe cha vwẹ ukẹcha kẹ wẹ vwo brorhiẹn rẹ aghwanre ọ da tobọ dianẹ ẹdia na pha gangan.

12-13. Mavọ yen ọmrẹvughe sa vwọ vwẹ ukẹcha kẹ wẹ vwo brorhiẹn aghwanre kpahen oka rẹ iruo ro fori nẹ wo ru?

¹² Roro kpahen udje nana. Wọ guọnọ iruo ru wọ sa vwọ vwẹrote orua wẹn. Wọ da mrẹ iruo ivẹ. Wọ da nabọ fuẹrẹn iruo ivẹ na, je jokaphiyọ oborẹ iruo na hepha, ọrhuẹrẹphiyotọ ru wo che nene vwẹ iruo na, ọke rọ cha reyọ owẹ wo ki se te iruo na kugbe erọnvwọn efa etiọyen. Vwẹ ẹdia ivẹ na, o vwo ọvuọvo rọ vwọso odjekẹ ri Baibool. Ọ sa dianẹ ọvo je we vrẹ ọ ro chekọ kidie igho ra cha hwa kẹ wẹ vwẹ ọyena bunru mamọ. Dedena, o ji vwo erọnvwọn efa ro fori nẹ wo roro kpahen tavwen wo ki brorhiẹn.

¹³ Kerẹ udje, ọvo usun rẹ iruo na che gbowọphiyọ ọrhuẹrẹphiyotọ rẹ uyono wẹn? Ọvo usun rẹ owian na cha reyọ ọke ro fori wọ vwọ vwẹrote orua wẹn kugbe ọke ovwan vwọ ga Jihova? Enọ tiọyena cha vwẹ ukẹcha kẹ wẹ vwọ reyọ “erọnvwọn re ma ghanre” vwọ kobaro kerẹ ẹga wẹn kugbe ọdavwẹ rẹ orua wẹn, ukperẹ ekuakua rẹ akpeyeren. Ọtiọyena, ku wo se brorhiẹn rẹ Jihova che ku ebruphiyọ rọyen ku.

14. Mavọ yen avwanre vwo jẹ ekprowọ ẹsuọ kẹ ihwo efa siẹrẹ a da reyọ ọmrẹvughe vẹ ẹguọnọ vwo ruiruo?

¹⁴ Ọmrẹvughe ji se mu avwanre vwo roro kpahen oborẹ orhiẹn avwanre sa so vwẹ oma rẹ ihwo efa, rere e vwo jẹ “ekprowọ ẹsuọ kẹ” ayen. (Fil 1:10) Ọnana ghanre mamọ siẹrẹ e de bru erhiẹn ri shekpahen irhuon vẹ osẹnvwe. Kerẹ udje, oka rẹ ewun yẹrẹ osẹnvwe ọvo se je avwanre. Jẹ, kẹ ọ da rha dianẹ o je ihwo evo vwevunrẹ ukoko na yẹrẹ obotafee vwo? Ọmrẹvughe cha vwẹ ukẹcha kẹ wẹ vwo muọghọ kẹ ọdavwẹ rayen. Ẹguọnọ che mu avwanre vwọ guọnọ erhuvwu rẹ ‘ihwo efa’ je sẹn osẹnvwe rẹ ọghọ. (1Kọ 10:23, 24, 32; 1Ti 2:9, 10) Ọtiọyena, avwanre che brorhiẹn ro djephia nẹ e vwo ẹguọnọ ji muọghọ kẹ ihwo efa.

15. Ọrhuẹrẹphiyotọ vọ yen a guọnọre tavwen e ki brorhiẹn ọghanghanre?

¹⁵ Ọ da dianẹ wọ guọnọ brorhiẹn ọghanghanre, roro kpahen obo ra guọnọre wo se vwo ru nene orhiẹn ru wo bruru na. Jesu vuẹ avwanre nẹ e “roro uchunu” rẹ obo ra cha ghwọrọ. (Lu 14:28) Ọtiọyena, roro kpahen ọke ru wọ cha ghwọrọ, igho kugbe ẹgbaẹdavwọn rọ cha reyọ mie we rere orhiẹn na sa vwọ wian. Ọkievo, wọ sa nọ orua wẹn vwọ riẹn oborẹ ohwo ọvuọvo se ru vwo bicha orhiẹn na. Diesorọ ọrhuẹrẹphiyotọ nana vwọ ghanre? Ọ sa nẹrhẹ wọ riẹn sẹ o ji vwo ewene ro fori nẹ wo ru vwẹ orhiẹn wẹn na yẹrẹ iroroẹjẹ ọfa herọ ro me yovwin. Siẹrẹ wọ da vuẹ orua wẹn nu, gba kerhọ kẹ iroroẹjẹ rẹ ayen vwọ phia, ọnana kọ cha nẹrhẹ ayen vwo owenvwe rẹ ayen vẹ owẹ vwọ wian kugbe rere orhiẹn na sa vwọ dia ọ rẹ erhuvwu.​— Isẹ 15:22.

BRORHIẸN RO CHA GHWA ERHUVWU RHE

16. Erhọ yen iroroẹjẹ evo re sa vwẹ ukẹcha kẹ wẹ vwo bru omamọ rẹ orhiẹn? (Ni ekpeti na “Obo re se Vwo Bru Omamọ Erhiẹn.”)

¹⁶ Ọ da dianẹ wo nene iroroẹjẹ re djunute vwẹ obenu na, kọyen wo muegbe wo vwo brorhiẹn aghwanre. Wọ riẹn uyota rẹ erọnvwọn na eje re, wọ je fuẹrẹn odjekẹ ri Baibol rọ cha vwẹ ukẹcha kẹ wẹ wo se vwo brorhiẹn rọ cha vwerhen Jihova oma. Enẹna wọ sa rẹ Jihova nẹ ọ vwẹ ukẹcha kẹ wẹ vwo brorhiẹn rọ cha ghwa erhuvwu rhe.

17. Die yen orọnvwọn ọvo kiriguo rọ sa nẹrhẹ wo bru omamọ erhiẹn?

¹⁷ Ọ da tobọ dianẹ wo bru omamọ erhiẹn vwẹ obuko re, karophiyọ nẹ orọnvwọn ọvo kiriguo rọ sa nẹrhẹ wo bru omamọ rẹ erhiẹn yen aghwanre ro nẹ obọ ri Jihova rhe, ọ dia ọhọ yẹrẹ erianriẹn romobọọ. Ọyen ọvo yen sa kẹ wẹ uvi rẹ erianriẹn, ẹruọ kugbe ọmrẹvughe​—re dia uchivwo rẹ aghwanre. (Isẹ 2:1-5) Jihova sa cha wẹ uko vwo bru erhiẹn re vwerhọn oma.​—Un 23:2, 3.