Iniọvo Eshare—Ovwan Guọnọ Yerin Tedje Kerẹ Ọkpako?

1-2. Die yen “iruo esiri” rẹ ọkpako churobọ si?

Ọ DA dianẹ wọ ga kerẹ odibo rowian vwẹ ọkiọvo rhire, kọyen wọ davwẹngba wo vwo vwo iwan ra guọnọre wọ sa vwọ ga kerẹ ọkpako. Wọ sa yanphiaro vwo ruiruo “esiri”?​—1Ti 3:1.

² Die yen iruo rẹ ọkpako churobọ si? Ọ ka obaro vwẹ iruo aghwoghwo na, ọ wian gangan vwẹ eyono kugbe ra vwọ kọn bru iniọvo na ra, ọ je vwẹ ọbọngan vwọ kẹ ukoko na womarẹ ota vẹ udje rọyen. Ọnana yensorọ Baibol na vwo se ekpako nana re wian gangan na ‘eshare re vwo ruẹse.’​—Ẹf 4:8.

3. Mavọ yen oniọvo ọshare se vwo muwan je ga kerẹ ọkpako? (1 Timoti 3:1-7; Taitọs 1:5-9)

³ Mavọ yen wo se vwo muwan je ga kerẹ ọkpako? Re vwo muwan kerẹ ọkpako vẹ re vwo muwan rẹ iruo dia ọvuọvoo. Siẹrẹ wọ da guọnọ iruo vwevunrẹ akpọ nana, wo de vwo ena ra guọnọre, a sa reyọ owẹ phiyọ iruo. Jẹ, wọ vwọ ga kerẹ ọkpako fẹnẹre, ena rẹ aghwoghwo vẹ eyono ọvo terii. O fori nẹ wọ yanmu iwan ra guọnọ mie ekpako vwẹ Baibol na re djunute vwẹ 1 Timoti 3:1-7 kugbe Taitọs 1:5-9. (Se.) Vwẹ uyono nana, a cha ta ota kpahen obo ra guọnọ mie ekpako vwẹ ẹdia erha kiriguo: re vwo vwo omamọ odẹ vwevunrẹ ukoko na kugbe obotafe, re vwo phi omamọ udje phiyotọ kerẹ ọgbuyovwin rẹ orua kugbe owenvwe ra vwọ ga vwẹ ukoko na.

RE VWO VWO OMAMỌ ODẸ

4. Die yen o mudiaphiyọ ra vwọ dia “ohwo ro vwo eka-an”?

⁴ Wo se vwo muwan kerẹ ọkpako, ofori nẹ wọ dia “ohwo ro vwo eka-an,” kọyen, ro vwo omamọ odẹ vwevunrẹ ukoko na kidie a guọnọ nẹ e kere uruemu vuọvo rọ brare ba wẹ obọọ. Vwọba, o ji fo nẹ “ihwo rẹ obotafe je ta omamọ rẹ ota” kpahen owẹ. Ihwo re vwẹ ẹga kẹ Jihovaa sa reyọ owẹ vwo guẹdjọ fikirẹ obo ru wo segbuyota ẹkẹvuọvo o fori nẹ ayen reyọ owẹ vwo guẹdjọ nẹ wẹ dia omamọ ohwo yẹrẹ ohwo ruyotaa. (Da 6:4, 5) Nọ oma wẹn, ‘Mi vwo omamọ odẹ vwevunrẹ ukoko na kugbe obotafe?’

5. Mavọ yen wo se vwo djephia nẹ wẹwẹ “ohwo ro vwo ẹguọnọ rẹ emu esiri”?

⁵ Wọ da dia “ohwo ro vwo ẹguọnọ rẹ emu esiri,” wọ cha mrẹ erhuvwu rọhẹ oma rẹ ihwo efa, ji jiri ayen fikirẹ iruemu iyoyovwin rẹ ayen vwori. Vwọba, oma cha vwerhen owẹ wo vwo ru obo ri yovwirin vwọ kẹ ihwo efa, wọ cha tobọ ru vrẹ obo ra guọnọ mie we dede. (1Tẹ 2:8; Tai 1:8)a Diesorọ uruemu nana vwọ ghanre mamọ vwọ kẹ ekpako? Kidie ọmọrhiẹ ọke yen ayen ghwọrọ vwọ kọn bru iniọvo na ra je vwẹrote iruo ra vwọ kẹ ayeen. (1Pi 5:1-3) Dedena, aghọghọ ro no cha siẹrẹ ayen da vwẹ ukẹcha kẹ iniọvo na vrẹ erọnvwọn buebun rẹ ayen vwo ze.​—Iru 20:35.

6. Die yen o mudiaphiyọ ra vwọ “ghọ erhorha”? (Hibru 13:2, 16; ni uhoho na.)

⁶ Wo djephia nẹ wẹwẹ ohwo “rọ ghọ erhorha” siẹrẹ wo de ruẹ erhuvwu vwọ kẹ ihwo efa ọtiọyen ji te ihwo re kẹrẹ owẹẹ. (1Pi 4:9) Ọbe ọvo rọ fan eta ri Baibol tare nẹ ohwo rọ ghọ erhorha dje uruemu esiri vwọ kẹ ihwo rọ tobọ vughee, oma vwerhọn vwo durhie ayen cha uwevwin rọyen. Nọ oma wẹn, ‘Ihwo riẹn vwẹ phiyọ ohwo ro dede erhorha?’ (Se Hibru 13:2, 16.) Ohwo rọ ghọ erhorha nene ihwo efa ghare obo ro vwori, te ihwo ri vwo emuọvoo kugbe idibo ri Jihova re wian gangan vwevunrẹ ukoko na kerẹ iniruo okinriariẹ vẹ etota re ji rhe.​—Jẹ 18:2-8; Isẹ 3:27; Lu 14:13, 14; Iru 16:15; Ro 12:13.

7. Idjerhe vọ yen ọkpako se vwo djephia nẹ ọyen “dia ohwo ro vwo ẹguọnọ rẹ igho-o”?

⁷ “Ọ dia ohwo ro vwo ẹguọnọ rẹ igho-o.” Ọnana mudiaphiyọ nẹ ọ dia ekuakua rẹ akpeyeren yen ma ghanre kẹẹ. Ọdavwẹ rẹ Uvie na yen wọ vwọ ka obaro vwẹ akpeyeren, owenẹ wẹwẹ ọdafe yẹrẹ ovwiogbere. (Mt 6:33) Reyọ ọke, ẹgba, kugbe obo ru wo vwori vwo bicha ẹga ri Jihova, vwẹrote orua wẹn, je vwẹ ukẹcha kẹ ukoko na. (Mt 6:24; 1Jọ 2:15-17) Nọ oma wẹn: ‘Ẹro vọ yen mi vwo nẹ igho? Mi vwo otekẹvwẹ kpahen obo re me ghene guọnọ vwẹ akpeyeren? Gbanẹ me tẹnroviẹ obo ri mi se vwo vwo igho vẹ ekuakua rẹ akpeyeren buebun?’​—1Ti 6:6, 17-19.

8. Erhọ yen idjerhe evo wo se vwo djephia nẹ wo “ruẹ emu vrẹka-a” nẹ wo ji se “suẹn oma” wẹn?

⁸ Wọ da dia ohwo “ro ruẹ emu vrẹka-a” ro ji “se suẹn oma rọyen,” kemu kemu wo che ru vwẹ akpeyeren kọ cha dia kekpe. Kerẹ udje, wọ cha re okpọre yẹrẹ da udi gan nọọ, irhuon vẹ osẹnvwe wẹn kọ cha dia ọ rẹ abavo, ku wọ je cha sane oka rẹ ehẹha ru wọ guọnọ vwomaba. Wọ cha dia ọviẹn kẹ oborẹ akpọ na titẹẹ. (Lu 21:34; Jem 4:4) Ọ da tobọ dianẹ ihwo ta erharhe eta yẹrẹ kpare ophu wẹn, wo che ru dẹndẹn. Wọ “dia ọgbaudi-i”; ihwo je riẹn wẹ phiyọ ohwo rọ da udi mamọọ. Nọ oma wẹn, ‘Obo ri mi yerẹn akpọ wan djephia nẹ mẹvwẹ dia ohwo ro ruẹ emu vrẹkaa ro ji suẹn oma rọyen?’

9. Die yen e vwo “vwo iroro ro fiotọ” re ji vwo “nene ọrhuẹrẹphiyotọ” churobọ si?

⁹ Wọ da dia ohwo “ro vwo iroro ro fiotọ,” wọ cha jomaotọ fuẹrẹn odjekẹ ri Baibol kpahen kẹdia kẹdia vwẹ akpeyeren. Wo roro kpahen obo ra vwẹ odjekẹ ri Baibol nana vwo ruiruo re, ọnana da nẹrhẹ wo vwo ẹruọ ji brorhiẹn rẹ aghwanre. Wọ vwẹ okpakpa brorhiẹẹn. Ukperẹ ọtiọyen, wọ nabọ fuẹrẹn erọnvwọn eje ni tavwen sẹ etiọyen e ghene hepha. (Isẹ 18:13) Ọtiọyena, ku wo brorhiẹn rẹ aghwanre ro dje iroro ri Jihova phia. Wọ da dia ohwo “ro nene ọrhuẹrẹphiyotọ,” wọ cha yanmu ọke ji ru erọnvwọn utetemute. Jẹ a riẹn wẹ phiyọ ohwo ro nene odjekẹ ra je vwẹrosua. Iruemu nana che toroba omamọ odẹ ru wo vwori. Asaọkiephana e gbe jẹ a ta ota kpahen iwan ri Baibol ra guọnọ mie ọkpako ọ sa vwọ dia uvi udje kerẹ ọgbuyovwin rẹ orua.

RE VWO PHI OMAMỌ UDJE PHIYOTỌ KERẸ ỌGBUYOVWIN RẸ ORUA

10. Mavọ yen ọshare sa vwọ “nabọ vwẹrote evwruwevwin rọyen vwẹ idjerhe ro shephiyọ”?

¹⁰ Wọ da dia ọshare rọ guọnọ muwan je ga kerẹ ọkpako, a je guọnọ nẹ orua wẹn vwo omamọ rẹ iruemu. Ọtiọyena, kẹ ofori wọ “nabọ vwẹrote evwruwevwin [wẹn] vwẹ idjerhe ro shephiyọ.” Ofori nẹ wọ vwẹrote orua wẹn vwẹ idjerhe rẹ ẹguọnọ ji bru erhiẹn rẹ aghwanre ri che fierere kẹ orua na. Ọnana mudiaphiyọ nẹ wẹwẹ yen cha vwẹrote kemu kemu ro churobọ si ẹga vwevunrẹ orua na. Diesorọ ọnana vwọ ghanre mamọ? Ọyinkọn Pọl da nọ: “Ọ da dianẹ ohwo riẹn obo rọ vwẹrote evwruwevwin rọye-en, kẹ mavọ yen ọ sa vwọ vwẹrote ukoko rẹ Ọghẹnẹ?”​—1Ti 3:5.

11-12. Idjerhe vọ yen uruemu rẹ ohwo ọvo vwevunrẹ orua se vwo gbowọphiyọ uphẹn rẹ ọsẹ na vwọ ga kerẹ ọkpako? (Ni uhoho na.)

¹¹ Wọ da dia ọsẹ ro vwo emọ ri ji te ẹgbukpe 18, re jehẹ otọ rẹ usuon wẹn, ofori nẹ e dia “emọ re vwomakpotọ, ri ji nyẹme.” Ofori nẹ wo yono emọ wẹn vwẹ idjerhe rẹ ẹguọnọ. Vwọrẹ uyota, wọ guọnọre nẹ oma vwerhen ayen, ọtiọyena, ayen cha heha je hwẹ. Ayen che muọghọ, nyẹme, je nabọ riẹn oma ghwa fikirẹ omamọ rẹ uyono ru wọ vwọ kẹ ayen. Vwọba, davwẹngba vwọ vwẹ ukẹcha kẹ emọ wẹn vwo vwo uvi rẹ oyerinkugbe vẹ Jihova, yeren akpọ nene odjekẹ ri Baibol ji muwan vwọ kẹ omaebrophiyame.

¹² “Ro vwo emọ ri segbuyota, ra je tanẹ i ruẹ ogbiru yẹrẹ gbe vwọsua-a.” Ọ da dianẹ ọmọ rẹ ọkpako ro bromaphiyame re ru umwemwu ọgangan, die yen ọnana sa so kẹ ọsẹ na? Ọ da dianẹ ọsẹ na gbẹro kẹ ọmọ na, ọ je ghwọkuoo, ọ cha sa ga kerẹ ọkpakoo.​—Ni Uwevwin Orhẹrẹ ri October 15, 1996, aruọbe 21, ẹko 6-7.

OWENVWE RA VWỌ GA VWẸ UKOKO NA

13. Mavọ yen wo se vwo djephia nẹ wẹwẹ “ohwo rọ nuẹ,” ro ji “ruẹ ọ robọ rọyen ọvo-o”?

¹³ Iniọvo eshare ri vwo omamọ iruemu rẹ Onenikristi ayen obọdẹn rẹ ukẹcha vwọ kẹ ukoko na. “Ohwo rọ nuẹ” nene ihwo efa yerẹn vwọrẹ ufuoma. Wọ da guọnọ nẹ a riẹn wẹ phiyọ ohwo rọ nuẹ, kerhọ kẹ ihwo efa wo ji vwo ẹruọ rẹ oborẹ ayen ta. Vwevunrẹ echidiotọ rẹ ekpako, ọ da dianẹ ekpako ri me bun brorhiẹn rọ vwọso odjekẹ yẹrẹ iji ri Baibol vuọvoo, wo che bicha orhiẹn na? Ra vwọ dia “ohwo ro ruẹ ọ robọ rọyen ọvo-o” mudiaphiyọ nẹ wo che si ọrhan nẹ a vwẹ ọ wẹn ọvo vwo ruu. O fori nẹ wo nẹ uchebro rẹ ihwo efa vwọ phia ghanghanre. (Jẹ 13:8, 9; Isẹ 15:22) Wọ ‘dia ohwo rẹ ẹghwọ’ rọ je “fobọ muophu-u.” Ukperẹ wo vwo ru gbagbagba ji nene ihwo phraphro, dia ohwo dẹndẹn je ta ota vwẹ idjerhe rẹ aghwanre. Kerẹ ohwo rẹ ufuoma, jowọ wọ vẹ ihwo efa vwọ rhuẹrẹphiyọ vwọrẹ ufuoma ọ da tobọ dianẹ ẹdia na pha bẹnbẹn. (Jem 3:17, 18) Eta rẹ avwerhe wẹn sa nẹrhẹ ophu ihwo efa kpotọ tobọ te ihwo re vwọsua.​—Igu 8:1-3; Isẹ 20:3; 25:15; Mt 5:23, 24.

14. Die yen o mudiaphiyọ ra vwọ dia “ohwo rọ fuevun” je “dia . . . ohwo ro kurhẹriẹ obọ-ọ?

¹⁴ ‘Ohwo ro kurhẹriẹ obọ’ che se muwan je ga kerẹ ọkpakoo. Dede nẹ ọ dia ikpe rẹ ohwo vwo bromaphiyame re yen e nẹ a ke vwẹ ohwo muẹ ọkpakoo, wọ je guọnọ ọke wo se vwo yerin te Onenikristi ro tedje. Tavwen a ke vwẹ owẹ vwo mu ọkpako, o fori nẹ wo djephia kerẹ Jesu nẹ wẹwẹ ohwo rọ vwomakpotọ, rọ hẹrhẹ Jihova vẹ erhiorin nẹ ọ kẹ wẹ kiruo kiruo vwevwunrẹ ukoko na. (Mt 20:23; Fil 2:5-8) Wo se djephia nẹ wẹwẹ “ohwo rọ fuevun” womarẹ wo vwo tinkamuẹ Jihova vẹ iwan rẹ ọvwata rọyen ji nene odjekẹ rẹ ukoko rọyen vwọphia.​—1Ti 4:15.

15. Ofori nẹ ọkpako nabọ tẹn ona obo ra ta ota vwẹ azagba? Djekpahọn.

¹⁵ Baibol djere phephẹn nẹ iniruo dia ihwo ri ‘muwan rẹ ayen vwo yono.’ Kẹ, ọnana mudiaphiyọ nẹ wọ nabọ tẹn ona obo ra ta ota vwẹ azagba? Ẹjo. Dede nẹ ekpako buebun ghwa tẹn ona rẹ obo ra ta ota vwẹ azagbaa, ayen nabọ tẹn ona rẹ obo re ruẹ uyono vwẹ aghwoghwo na kugbe ọke rẹ ayen da kọn bru iniọvo na ra. (Ni 1 Kọrẹnt 12:28, 29 kugbe Ẹfesọs 4:11.) Dede nẹ wọ dia oyono rọ tẹn onaa, o ji fo nẹ wo ru yovwinphiyọ vwẹ ena wẹn kerẹ oyono. Mavọ yen wo se vwo ru ọtiọyen?

16. Mavọ yen wọ sa vwọ dia omamọ rẹ oyono? (Ni uhoho na.)

¹⁶ “Ohwo rọ nabọ yọnrọn ota rẹ uyota.” Wọ sa vwọ nabọ tẹn ona kerẹ oyono, ofori nẹ wo muẹ obo ru wọ ta vẹ ọkpọvi wọ vwọ phia kpahen Baibol na. Nabọ riẹn obo rehẹ Baibol na kugbe ẹbe rẹ ukoko na. (Isẹ 15:28; 16:23) Siẹrẹ wo de ruẹ uyono, jokaphiyọ obo ri Baibol reyọ ẹkpo ọvuọvo vwo ruiruo. Wo de ji yono, davwẹngba rere obo ru wo yono se vwo te ubiudu rẹ ihwo ru wọ ta ọta kẹ na. Wo se ru yovwinphiyọ siẹrẹ wọ da nokpẹn je reyọ iroroẹjẹ rẹ ekpako ri tedje vwo ruiruo. (1Ti 5:17) Ofori nẹ ekpako je dia ihwo ri “se . . . phiuduphiyọ” iniọvo rayen awọ; jẹ o ji vwo ọkiọvo rẹ ekpako na vwọ ‘ghwọkuẹ’ iniọvo na yẹrẹ vwẹ uchebro kẹ ayen. Vwẹ ẹdia ivẹ na, ofori nẹ ekpako dia dẹndẹn. Siẹrẹ wo de vwo ẹguọnọ je dia dẹndẹn, wo de mu uyono wẹn kpahen Ota rẹ Ọghẹnẹ, ku wọ cha dia omamọ rẹ oyono kidie wọ vwẹrokere Jesu rọ dia Oyono Rode na.​—Mt 11:28-30; 2Ti 2:24.

YAN OBARO ỌKIEJE

17. (a) Die yen sa vwẹ ukẹcha kẹ idibo rowian vwọ yanphiaro ọkieje? (b) Die yen ofori nẹ ekpako vwo vwẹ ẹwẹn siẹrẹ ayen da fuẹrẹn oniọvo re se vwo mu ọkpako? (Ni ekpeti na ““Ofori nẹ Ekpako Vwo Ẹro Abavo Siẹrẹ Ayen da Fuẹrẹn Ihwo Efa.”)

¹⁷ Ọke rẹ idibo rowian evo vwọ fuẹrẹn iwan ri Baibol guọnọre nẹ ekpako yanmu nu, kẹ ayen roro nẹ ayen che se muwaan. Ẹkẹvuọvo karophiyọ nẹ ọ dia Jihova vẹ ukoko rọyen rhẹro nẹ wo che nene iwan nana gbagbaa. (1Pi 2:21) Wo se vwo vwo iwan nana, ẹwẹn ọfuanfon ri Jihova yen cha vwẹ ukẹcha kẹ wẹ. (Fil 2:13) O vwo iwan ọvo ru wọ da guọnọ ru yovwinphiyọ? Nẹrhovwo rhe Jihova kpahọn. Ru ehiahiẹ kpahen iwan nana, wọ je nokpẹn rẹ ukẹcha mie ọvo usun rẹ ekpako na kpahen obo ru wo se vwo ru yovwinphiyọ.

18. Die yen e jiri kẹ idibo rowian eje nẹ ayen ru?

¹⁸ E jẹ avwanre eje, te iniọvo re ga kerẹ ekpako re davwẹngba vwo vwo iwan ra ta ota kpahen vwẹ uyono nana. (Fil 3:16) Wẹwẹ odibo rowian? Yanphiaro! Rẹ Jihova nẹ o yono uwe ji ru we phiyọ ohwo rọ sa reyọ vwo ruiruo vwevunrẹ ẹga rọyen ji te ukoko na. (Aiz 64:8) E jẹ Jihova bruba phiyọ ẹgbaẹdavwọn ru wo vwo muwan je ga kerẹ ọkpako.