Iniọvo Eshare​—Ovwan Guọnọ Yerin Tedje Kerẹ Odibo Rowian?

1. Mavọ yen oma ruẹ Pọl kpahen idibo rowian?

O VWO iruo eghanghanre rẹ idibo rowian ruẹ vwevunrẹ ikoko sansan. Ọyinkọn Pọl nẹ iniọvo nana re fuevun na ghanghanre. Kerẹ udje, ọke ro vwo siẹ rhe Inenikristi rehẹ Filipae, ọ vwẹ uyeren vwo rhe idibo rowian vẹ ekpako rehẹ etiyin.​—Fil 1:1.

2. Mavọ yen oma ruẹ oniọvo Luis kpahen iruo ra vwọ kẹ kerẹ odibo rowian?

² Iniọvo eshare ri bromaphiyame re re ga kerẹ idibo rowian mrẹ aghọghọ, o torori sẹ ayen ghwore yẹrẹ ayen ighenee. Kerẹ udje, ẹgbukpe 18 yen Devan hepha ọke ra vwọ reyọ vwo mu odibo rowian. Jẹ, ọke rẹ oniọvo Luis vwọ vrẹ ẹgbukpe 50 re yen a vwọ reyọ vwo mu odibo rowian. Ọ vuẹ avwanre oborẹ oma ruro ọke ra vwọ reyọ vwo mu odibo rowian, ọ da ta: “Oma vwerhen ovwẹ siẹrẹ me da ga iniọvo rẹ ukoko na kerẹ odibo rowian, ma rho mi de roro kpahan ẹguọnọ rẹ iniọvo rẹ ukoko na dje kẹ vwẹ.” Ọtiọyen oma je ruẹ idibo rowian efa buebun.

3. Enọ vọ yen a cha ta ota kpahen?

³ Ọ da dianẹ wẹwẹ oniọvo ọshare ro bromaphiyame re, jẹ wọ je rhe dia odibo rowiaan, wo se yerin tedje? Die yen se mu we vwo ru ọtiọyen? Iwan vọ yen Baibol na tare nẹ a guọnọ mie we wo ki se muwan kerẹ odibo rowian? Vwẹ uyono nana, a cha kpahenphiyọ enọ nana. Ẹkẹvuọvo, e jẹ a ka ta ota kpahen ewian rẹ odibo rowian ruẹ vwevunrẹ ukoko na.

EWIAN VỌ YEN IDIBO ROWIAN RUẸ VWEVUNRẸ UKOKO NA?

4. Ewian vọ yen odibo rowian vwori vwevunrẹ ukoko na? (Ni uhoho na.)

⁴ Odibo rowian ọyen oniọvo ọshare ro bromaphiyame re, rẹ ẹwẹn ọfuanfon vwo mu nẹ ọ vwẹ ukẹcha kẹ ekpako na vwọ vwẹrote erọnvwọn buebun ra guọnọre vwevunrẹ ukoko na. Idibo rowian evo davwẹngba ighwoghwota sa vwọ mrẹ ẹbe kugbe ekogho rẹ ayen de ghwoghwo ota. Efa je vwẹ ukẹcha phia vwo ruẹ orufon je vwẹrote Ọguan Ruvie. Idibo rowian evo je vwẹrote echidiotọ kugbe ekuakua rẹ uhworo vẹ ividio vwevunrẹ uyono. Iruo buebun rẹ idibo rowian ruẹ ghwa obo ra ghwa guọnọ vwẹ ukoko na. Jẹ, ọ rọ ma ghanre, idibo rowian eyen ihwo ri vwo ẹguọnọ ri Jihova; re je yan nene iwan rọyen. Vwọba, ayen ji vwo ẹguọnọ rẹ iniọvo na mamọ. (Mt 22:37-39) Mavọ yen oniọvo ọshare ro bromaphiyame re se vwo yerin tedje ji muwan kerẹ odibo rowian?

5. Die yen wo se ru vwo yerin tedje?

⁵ Baibol na djunute iwan ra guọnọ mie ihwo re se vwo mu idibo rowian. (1Ti 3:8-10, 12, 13) Uphẹn rẹ ẹga nana se vwo te we obọ, yono vwọ kpahen iwan nana je davwẹngba wo se vwo vwo ayen. Jẹ ẹsosuọ, o fori nẹ wọ jomaotọ kpahen oboresorọ wọ vwọ guọnọ dia odibo rowian.

DIESORỌ WỌ VWỌ GUỌNỌ DIA ODIBO ROWIAN?

6. Die yen mu we vwọ vwẹ ukẹcha kẹ iniọvo na vwẹ kidjerhe kidjerhe? (Matiu 20:28; ni uhoho rọhẹ ọbe na.)

⁶ Ẹguọnọ rẹ Ọsẹ rọyen kugbe ẹguọnọ ro vwo kpahen ihwo efa yen mu oniruo avwanre, Jesu Kristi, vwo ru kemu kemu ro ruru. Ẹguọnọ yena yen muro vwọ wian gangan ji ruiruo rẹ ihwo ni fi emuọvoo. (Se Matiu 20:28; Jọ 13:5, 14, 15) Ọ da dianẹ ẹguọnọ yen mu we wo vwo yerin tedje je ga kerẹ odibo rowian, Jihova che bruba kẹ wẹ je cha wẹ uko vwo ru ọtiọyen.​—1Kọ 16:14; 1Pi 5:5.

7. Diesorọ oniọvo ọshare vwọ kẹnoma kẹ uruemu re vwo ni oma gegerege?

⁷ Vwẹ akpọ na, ihwo ri nẹ oma rayen ghanghanre eyen me je ihwo. Jẹ, ọ dia ọtiọyen ọ hepha vwẹ ukoko ri Jihovaa. Oniọvo ọshare ro vwo ẹguọnọ rẹ ihwo efa kirobo rẹ Jesu ruru, nẹ oma rọyen gegeregee yẹrẹ guọnọ ẹdia rode rere o se vwo sun ihwo efaa. Ọ da dianẹ a vwẹ ohwo ọtiọyen rọ guọnọ ẹdia rode vwo mu vwevunrẹ ukoko na, ọ cha rhọnvwe ruiruo re ni fiemuu ra guọnọre a sa vwọ vwẹrote igodẹ ri Jihova re pha ghanghanre na. O se no nẹ ọyen rho vrẹ ohwo rọ wian oka rẹ owian ọtiọyena. (Jọ 10:12) Ihwo ri phuoma yẹrẹ nẹ oma rayen gegerege, cha sa mrẹ ebruba ri Jihovaa.​—1Kọ 10:24, 33; 13:4, 5.

8. Uchebro vọ yen Jesu vwọ kẹ iyinkọn rọyen?

⁸ Ọkievo, ojevwe romobọ yen mu idibo ri Jesu re ma kẹrẹ vwọ guọnọ ẹdia rode. Roro kpahen obo re phia vwọ kẹ idibo ri Jesu ivẹ​—Jems kugbe Jọn. Ayen vuẹ Jesu nẹ ọ kẹ ayen ẹdia rode vwẹ Uvie rọyen. Jesu jiri ayen fikirẹ oborẹ ayen ruru naa. Ọtiọyena, ọ da vuẹ iyinkọn 12 na nẹ: “Kohwo kohwo rọ guọnọ dia ohwo rode vwẹ ohri rẹ ovwan kọ dia odibo rẹ ovwan, kohwo kohwo rọ guọnọ dia ohwo rẹsosuọ vwẹ ohri rẹ ovwan kọ dia ọviẹn rẹ ihwo eje.” (Mk 10:35-37, 43, 44) Iniọvo eshare ri vwo omamọ ẹwẹn kidie ayen vwo owenvwe rẹ ayen vwọ ga ihwo efa, ayen ebruba vwọ kẹ ukoko na.​—1Tẹ 2:8.

DIE YEN SA NẸRHẸ OWENVWE WỌ VWỌ GA IHWO EFA GANPHIYỌ?

9. Mavọ yen owenvwe ru wọ vwọ vwẹ ukẹcha kẹ ihwo efa sa vwọ ganphiyọ?

⁹ Aphro herọọ nẹ wo vwo ẹguọnọ ri Jihova, wọ je guọnọ ga ihwo efa. Dedena, wo se jẹ owenvwe ra guọnọ mie odibo rowian rọ vwọ wian ewian efa evwo. Die yen sa nẹrhẹ wo vwo owenvwe wo vwo ruiruo etiọyena? Diesorọ wo rhe roro kpahan aghọghọ ro no cha siẹrẹ wọ da wian kẹ iniọvo wẹẹn? Jesu tare nẹ: “Omavwerhovwẹn herọ ra vwọ kẹ okẹ vrẹ ra vwọ reyọ.” (Iru 20:35) Jesu ru nene obo rọ tare na. Ọ mrẹ aghọghọ rọ vwọ vwẹ ukẹcha vwọ kẹ ihwo efa, wo ji se ru ọtiọyen.

10. Mavọ yen Jesu vwo djephia nẹ oma vwerhọn rọ vwọ ga ihwo efa? (Mk 6:31-34)

¹⁰ Roro kpahen udje rẹ oborẹ Jesu vwo djephia nẹ oma vwerhọn rọ vwọ ga ihwo efa. (Se Mak 6:31-34.) Vwẹ ẹdẹ ọvo, oma bru Jesu vẹ idibo rọyen ku. Ayen hẹ idjerhe kpo asan ro siomanu ayen se vwo rovwoma. Ẹkẹvuọvo ihwo buebun da karo ayen te oboyin, kidie ayen guọnọre nẹ Jesu yono ayen. Ọ rha sa tanẹ ẹjo. Kidie, ọ vẹ idibo rọyen “tobọ vwo ọke rẹ ayen vwo rovwoma je riemu dede-e.” Yẹrẹ Jesu rha sa vuẹ ayen nẹ ayen yanran ro vwo yono ayen erọnvwọn evo nu. Jẹ, kidie nẹ o vwo ẹguọnọ rayen, “ko yono ayen erọnvwọn buebun.” O de yono ayen rhirin bẹsiẹ ọke vwo she. (Mk 6:35) Ọ dia o ru ọtiọyen kidie ọyen obo ro fori nẹ o ruu, ẹkẹvuọvo “aro rayen” dọnrọ. Ọ guọnọ yono ayen kidie o vwo ẹguọnọ rayen. Jesu mrẹ aghọghọ rode rọ vwọ ga ihwo efa.

11. Idjerhe vọ yen Jesu vwọ vwẹ ukẹcha ro fori vwọ kẹ ihwo rọ ta ota kẹ? (Ni uhoho na.)

¹¹ Ọke rẹ Jesu vwo ghwoghwo vwọ kẹ otu na, o ru vrẹ o di vwo yono ayen. Ọ je vwẹrote ọdavwẹ rẹ ugboma rayen. Vwẹ idjerhe rẹ igbevwunu, ọ kẹ ayen emu je vuẹ idibo rọyen nẹ ayen gharọ vwọ kẹ ayen. (Mk 6:41) Womarẹ ọnana, o yono idibo rọyen oborẹ ayen sa vwọ ga ihwo efa. O ji djephia nẹ oka rẹ owian ọtiọna rẹ idibo rowian ruẹ pha ghanghanre. Vwẹ ẹwẹn roro oborẹ oma vwerhen idibo ri Jesu te ayen vẹ Jesu vwọ wian kugbe ọke rọ vwọ reyọ emu vwọ ghẹrẹ ihwo buebun vwẹ idjerhe rẹ igbevwunu bẹsiẹ ayen ejobi vwọ “re evun da vọn ayen”! (Mk 6:42) Vwọrẹ uyota, ọnana dia ọyen obọ rẹsosuọ rẹ Jesu vwọ reyọ ọdavwẹ rẹ ihwo efa vwọ kobaro kẹ ọ rọyeen. Ọ vwẹ akpeyeren rọyen eje vwọ ga ihwo efa ọke rọ vwọ hẹ otọrakpọ na. (Mt 4:23; 8:16) Jesu mrẹ aghọghọ vẹ evunvọnvwẹ ro vwo yono ihwo efa je vwomakpotọ vwẹrote ọdavwẹ rayen. Aphro herọọ nẹ wọ je cha mrẹ aghọghọ siẹrẹ wo de vwo owenvwe ru wọ vwọ ga ihwo efa kerẹ odibo rowian.

12. Diesorọ o vwọ chọ e vwo roro nẹ o vwo obo re se ru vwevunrẹ ukoko naa?

¹² Wo jẹ ofu dje we siẹrẹ wo de roro nẹ wo vwo ona roghẹresan vuọvoo. Aphro herọọ nẹ wo vwo iwan re sa nẹrhẹ wọ vwẹ ukẹcha kẹ ukoko na. Wọ sa mrẹ erere siẹrẹ wọ da rẹ Jihova nẹ ọ cha wẹ uko vwọ reyọ eta ri Pọl rehẹ 1 Kọrẹnt 12:12-30 vwo ruiruo. Eta ri Pọl djere phephẹn nẹ, avwanre eje rẹ idibo ri Jihova vwo ẹkẹn ro te avwanre vwevunrẹ ukoko na. Ọ da dianẹ wo ji rhi muwan ru wọ vwọ ga kerẹ odibo rowiaan, wo jẹ ofu dje wee. Ukperẹ ọtiọyen, diesorọ wo rhe ru obo wo se ru eje wọ vwọ ga Jihova vẹ iniọvo wẹẹn? Jẹ o mu we ẹro nẹ ekpako na riẹn asan rẹ ẹgba wẹn muru, ayen je cha kẹ wẹ owian rẹ ayen riẹnre nẹ wo se ru.​—Ro 12:4-8.

13. Die yen a sa ta kpahen buebun rẹ iwan ra guọnọ mie eshare re vwo mu?

¹³ Roro kpahen emu ọfa rọ sorọ wo vwo yerin tedje ji muwan kerẹ odibo rowian: Buebun rẹ iwan na eje re djunute na shekpahen Inenikristi eje. Vwọrẹ uyota, o fori nẹ Inenikristi eje sikẹrẹ Jihova, mrẹ aghọghọ ro no cha siẹrẹ a da kokẹ, ji yeren akpọ rọ cha ghwa omavwerhovwẹn rhe Jihova. Ọrhọ yen orọnvwọn kiriguo rẹ oniọvo ọshare se ru o se vwo yerin tedje?

OBORẸ WO SE VWO YERIN TEDJE

14. Die yen o mudiaphiyọ re vwo “se emu gboja”? (1 Timoti 3:8-10, 12)

¹⁴ Asaọkiephana e jẹ a fuẹrẹn iwan evo re djunute vwẹ 1 Timoti 3:8-10, 12. (Se.) E jẹ odibo rowian dia ohwo ro “se emu gboja.” Vwọba, a je sa fan ota yena phiyọ “ohwo ro fo ọghọ,” “re vwo brọghọ phiyọ ohwo oma,” yẹrẹ “re vwo muọghọ kẹ ohwo.” Ọ dia ọnana mudiaphiyọ nẹ a rha cha sa hwẹ yẹrẹ nene ihwo jehwẹẹ. (Agh 3:1, 4) Ẹkẹvuọvo, a guọnọre nẹ wo se kiruo kiruo ra vwọ kẹ wẹ eje gboja. Ọ da dianẹ wẹwẹ ohwo ra sa vwẹrosua ra je sa djẹ brẹ ra, iniọvo rẹ ukoko na ki che muọghọ kẹ wẹ.

15. Die yen o mudiaphiyọ re vwo jẹ ‘ẹrẹnvwe ivẹ’ yẹrẹ ‘urhuru rẹ erere rẹ ọghware’ evwo?

¹⁵ “Ri vwo ẹrẹnvwe ivẹ-ẹ” mudiaphiyọ nẹ wẹwẹ ohwo rẹ uyota ra vwẹrosua. Wẹwẹ ohwo ro ruẹ nene obo ru wọ tare, wọ je phiẹn ihwo efaa. (Isẹ 3:32) “Vwo urhuru rẹ erere rẹ ọghware-e” mudiaphiyọ nẹ wẹwẹ ohwo rọ ta uyota vwẹ ekiẹchuọ yẹrẹ siẹrẹ wọ da vwẹrote igho. Wọ reyọ ọriẹnvwẹ vwọ ghwa iniọvo rẹ ukoko na riaa.

16. (a) Re vwo jẹ ‘idi ẹda gan nọ’ die yen o mudiaphiyọ? (b) Die yen o mudiaphiyọ re vwo vwo “ẹwẹn obrorhiẹn rọ fonro”?

¹⁶ “Da idi gan nọ-ọ” mudiaphiyọ nẹ wẹwẹ dia ohwo rọ da udi vroma yẹrẹ ra riẹn phiyọ ọgbaudii. Re vwo vwo “ẹwẹn obrorhiẹn rọ fonro” mudiaphiyọ nẹ wo yeren akpọ nene iwan ri Jihova. Dede nẹ wẹwẹ ohwo rọ gbaree, wo vwo ẹwẹn ri dọe kidie wẹ vẹ Ọghẹnẹ vwo uvi rẹ oyerinkugbe.

17. Mavọ yen oniọvo ọshare se vwo djephia nẹ ọyen ohwo ra vwẹrosua a da davwọn ni ‘sẹ o muwan’? (1 Timoti 3:10; ni uhoho na.)

¹⁷ A cha ‘davwen owẹ ni tavwen sẹ wo muwan’ mudiaphiyọ nẹ wẹwẹ ohwo ra sa vwẹroso rọ nabọ ruiruo kiruo ra vwọ kẹ eje fiotọ. Ọtiọyena, siẹrẹ ekpako na da vwẹ ewian kẹ wẹ, nene iji rayen kugbe odjekẹ rẹ ukoko na vwọphia. Davwẹngba vwo vwo ẹruọ rẹ obo ra guọnọre nẹ wo ru kugbe ọke ra guọnọre nẹ wo vwo ruo re. Wo de gbẹrophiyotọ ruiruo ra vwọ kẹ wẹ, iniọvo rẹ ukoko na ki che dje ọdavwaro phia ji vwo oniso nẹ wọ yanphiaro. Ekpako, ovwan davwẹngba vwo yono iniọvo eshare ri bromaphiyame re. (Se 1 Timoti 3:10.) O vwo iniọvo eshare ri bromaphiyame re vwevunrẹ ukoko wẹn rehẹ ẹgbukpe 15 kpotọ? Ayen riẹn obo re ruẹ uyono romobọ ji muegbe kẹ emẹvwa? Ayen kpahanphiyọ enọ ji vwobọ vwẹ iruo rẹ aghwoghwo na? Ọ da dia ọtiọyen, kẹ ayen iruo ro fo edje kugbe ẹdia rayen. Ọtiọyena, ka sa “davwen ayen ni . . . sẹ ayen muwan.” Bẹsiẹ ayen vwo te ẹgbukpe 17 fiẹ ẹgbukpe 19, jẹ ayen muwan rẹ ayen vwọ ga kerẹ idibo rowian re.

18. Die yen o mudiaphiyọ ra vwọ “vrabọ rẹ ekan”?

¹⁸ Ra vwọ “vrabọ rẹ ekan” mudiaphiyọ nẹ e che se kere obo re brare ba wẹ obọọ yẹrẹ ohwo vuọvo cha sa vwẹ owẹ guẹdjọ nẹ wo ruẹ obo re chọree. Vwọrẹ uyota, e se mu efian banre Onenikristi. E gun efian nyẹ Jesu abọ buebun, ọ je tanẹ idibo rọyen che hirharoku ẹdia ọtiọyen. (Jọ 15:20) Ẹkẹvuọvo, wo de dje omamọ rẹ uruemu phia kirobo rẹ Jesu ruru, wo che vwo omamọ rẹ odẹ vwevunrẹ ukoko na.​—Mt 11:19.

19. Die yen “ọshare ro vwo aye ọvo” mudiaphiyọ?

¹⁹ “Ọshare ro vwo aye ọvo.” Ọ da dianẹ wọ rọvwọnre, o fori nẹ wo nene iwan ri Jihova kpahen orọnvwe​—aye ọvo ọshare ọvo. (Mt 19:3-9) O fori nẹ Ọnenikristi rọ dia ọshare gbe igberadjaa. (Hib 13:4) Ọnana ji churobọ si erọnvwọn efa buebun. O fori nẹ wọ fuevun kẹ aye wẹn, wọ nama djephia nẹ wo vwo urhurusivwe rẹ ehware kpahen eya efaa.​—Job 31:1.

20. Mavọ yen ọshare sa vwọ vwẹrote evwruwevwin rọyen “vwẹ idjerhe ro shephiyọ”?

²⁰ “Rọ nabọ vwẹrote emọ kugbe evwruwevwin rọyen vwẹ idjerhe ro shephiyọ.” Wọ da dia ọgbuyovwin rẹ orua, vwẹ ẹro ọghanghanre vwo ni eghwa ri te we. Ru ẹga orua ọkieje. Wọ vẹ ihwo rẹ evwruwevwin wẹn ọvuọvo vwobọ vwẹ iruo rẹ aghwoghwo na nọke ra ruọke. Vwẹ ukẹcha kẹ emọ wẹn ayen vẹ Jihova vwo vwo uvi rẹ oyerinkugbe. (Ẹf 6:4) Ọshare rọ vwẹrote orua rọyen je sa vwẹrote ukoko na.​—Ni 1 Timoti 3:5.

21. Die yen wo se ru ọ da dianẹ wọ je rhe dia odibo rowiaan?

²¹ Iniọvo eshare, ọ da dianẹ wọ ga kerẹ odibo rowiaan, nabọ frẹkotọ se uyono nana je nẹrhovwo rhe Jihova kpahọn. Nabọ fuẹrẹn iwan ra guọnọ mie idibo rowian wọ je davwẹngba vwọ yanmu ayen. Roro kpahen obo ru wo vwo ẹguọnọ ri Jihova te vẹ iniọvo na. Jẹ owenvwe ru wọ vwọ ga ayen ganphiyọ. (1Pi 4:8, 10) Mrẹ aghọghọ ro no cha siẹrẹ wọ da ga iniọvo rẹ ukoko na. E jẹ Jihova bruba ẹgbaẹdavwọn wẹn wo vwo muwan kerẹ odibo rowian!​—Fil 2:13.