Ukẹcha ra sa Vwọ kẹ Ihwo re Si Nẹ Ukoko Na

1-2. (a) Ẹro vọ yen Jihova vwo nẹ umwemwu arogba? (b) Iphiẹrophiyọ vọ yen Jihova vwo kpahen irumwemwu?

JIHOVA dia Ọghẹnẹ rọ rhọvwọn umiovwoo; ọ vẹ umwemwu gbaa. (Un 5:4-6) Ọ guọnọre nẹ avwanre muọghọ kẹ iwan ephiọnphiọn rọyen, rehẹ evunrẹ Baibol na. Vwọrẹ uyota, Jihova rhẹro rẹ ogbagba mie avwanre ri jẹ ẹgbaa. (Un 130:3, 4) Ẹkẹvuọvo, ọ vwẹ uphẹn kẹ ‘irumwemwu re rhẹriẹ ẹse rọyen re muwan rọye-en phiyọ uphẹn rẹ ayen vwo vwobọ vwẹ uruemu ra ghẹmrẹẹ.’ (Jud 4) Vwọrẹ uyota, Baibol ta ota kpahen “oghwọrọ rẹ ihwo ri jẹ Ọghẹnẹ ẹriẹn” vwẹ ofovwin rẹ Ọghẹnẹ, Amagidọn.​—2Pi 3:7; Ẹvw 16:16.

² Dedena, Jihova guọnọre nẹ ohwo vuọvo ghwọrọ-ọ. Kirobo ra ta ota kpahọn vwẹ uyono rivẹ rọhẹ Uwevwin Orhẹrẹ nana, Baibol na tarọ phephẹn nẹ “ọ guọnọre nẹ ihwo eje kurhẹriẹ.” (2Pi 3:9) Ekpako ukoko na vwẹrokere Jihova vwọ vwẹ ukẹcha kẹ irumwemwu rere ayen vwo kurhẹriẹ je mrẹ aroesiri ri Jihova. Dedena, ọ dia irumwemwu na eje yen kuẹrhẹriẹẹ. (Aiz 6:9) Dede nẹ ekpako na davwẹngba abọ buebun vwọ vwẹ ukẹcha kẹ ayen vwo kurhẹriẹ, evo davwerhọọn. Die kọyen e che ru?

‘SI ORUMWEMWU NA NO’

3. (a) Die yen Baibol tare nẹ e ru siẹrẹ orumwemwu rha rhọnvwe kurhẹriẹẹ? (b) Diesorọ a sa vwọ tanẹ, orumwemwu na yen jẹ ojẹ re vwo sio nẹ ukoko na?

³ Siẹrẹ orumwemwu rhe kurhẹriẹẹ, o rhe vwo oborẹ ekpako na se ru ọfaa, ẹkẹvuọvo, ayen che nene odjekẹ rọhẹ 1 Kọrẹnt 5:13: “Si orumwemwu na vwo nẹ ohri rẹ ovwan.” Kọyen, orumwemwu na yen jẹ ojẹ yena; obo rọa kọnre yen o ji vun. (Ga 6:7) Diesorọ a sa vwọ ta ọtiọyen? Kidie, o se ukẹcha eje rẹ ekpako na vwọ kẹ o se vwo kurhẹriẹ gbemuu. (2Iv 17:12-15) Uruemu rọyen na djephia nẹ ọ guọnọ yan nene iwan ephiọnphiọn ri Jihovaa.​—Urh 30:19, 20.

4. Diesorọ e vwo ghwoghwo siẹrẹ e de si orumwemwu ro kurhẹriẹẹ nẹ ukoko na?

⁴ E de si orumwemwu ro kurhẹriẹẹ nẹ ukoko na, ke ghwoghwo kẹ ukoko na nẹ ohwo ọtiọyena rha dia Oseri ri Jihovaa.b Ọ dia e ruẹ aghwoghwo na rere a vwọ phọphọ orumwemwu naa. Ukperẹ ọtiọyen, e ruo rere ukoko na se vwo nene odjekẹ ri Baibol rọ tare ne: E nene ohwo ọtiọyena “ruẹ kuẹgbe-e” a vẹ “ọyen tobọ riemu kuẹgbe-e.” (1Kọ 5:9-11) O vwo oboresorọ a vwọ vwẹ odjekẹ na phia. Ọyinkọn Pọl siri nẹ: “Iphuephu tutuno yen nẹrhẹ ọsoso egun rẹ ibrẹdi phuẹ.” (1Kọ 5:6) Irumwemwu ri kurhẹriẹẹ se miovwin iniọvo ri vwo owenvwe ri vwo nene iwan ephiọnphiọn ri Jihova.​—Isẹ 13:20; 1Kọ 15:33.

5. Ẹro vọ yen e vwo ni ohwo re si nẹ ukoko na, diesorọ?

⁵ Ẹro vọ yen e vwo ni oniọvo re si nẹ ukoko na? Dede nẹ a vẹ ọyen rhe ruẹ kuẹgbee, avwanre che no kerẹ ogodẹ ro ghwruru ro ji vwo iphiẹrophiyọ. Ogodẹ ro bo ghwru ji se rhivwin rhe. Karophiyọ nẹ ogodẹ ro ghwruru na vwẹ oma rọyen kpahotọ kẹ Jihova. Ọ da ohwo mamọ nẹ ọ yanmuẹ omaẹvwọkpahotọ rọyen asaọkiephanaa, ọnana che phio phiyọ ẹdia rẹ imuoshọ. (Izi 18:31) Dedena, kidie nẹ Jihova gbe arodọnvwẹ, iphiẹrophiyọ herọ nẹ ohwo na che rhivwin rhe. Mavọ yen ekpako na se vwo djephia nẹ ayen ji si ẹro nẹ orumwemwu re si nẹ ukoko naa?  

OBORẸ EKPAKO NA VWẸ UKẸCHA KẸ IHWO RE SI NẸ UKOKO NA

6. Die yen ekpako na che ru vwọ vwẹ ukẹcha kẹ ohwo re si nẹ ukoko na?

⁶ A kpairoro vrẹ ohwo re si nẹ ukoko na rere ọyen ọvo gbẹn idjerhe ro se vwo rhivwin bru Jihova? Kakaka! Siẹrẹ umẹ rẹ ekpako da vuẹ orumwemwu ro kurhẹriẹẹ nẹ e che sio nẹ ukoko na, ayen nabọ djefiotọ kẹ obo ro che ru o vwo rhivwin rhe ukoko na. Jẹ, ekpako na cha tobọ ru vrẹ ọtiọyen. Vwẹ ọke buebun, ayen cha vuẹ nẹ ayen guọnọ mrẹ emeranvwe evo da wan nu, rere ayen sa riẹn mie sẹ o wene ẹwẹn re. Orumwemwu na de vwo owenvwe rọ vwọ rhoma mrẹ ekpako na, kẹ ayen cha bọrọ vwẹ echidiotọ yena nẹ o kurhẹriẹ rere o rhivwin rhe. Ọ da tobọ dianẹ o ji wene ẹwẹn vwẹ ọke nanaa, ekpako na je cha davwẹngba vwọ mrẹ nọke ra ruọke vwẹ obaro.

7. Idjerhe vọ yen ekpako na vwọ vwẹrokere ehrọre ri Jihova siẹrẹ ayen vẹ ohwo re si nẹ ukoko na de chidia? (Jerimaya 3:12)

⁷ Ekpako na cha davwẹngba vwọ vwẹrokere ehrọre ri Jihova siẹrẹ ayen vẹ ohwo re si nẹ ukoko na de chidia. Kerẹ udje, Jihova hẹrhẹre nẹ ihwo rọyen ri bo ghwru vwẹ Izrẹl awanre jowọ rẹsosuọ vwo bru ọyen rhee. Ukperẹ ọtiọyen, ọyen jowọ rẹsosuọ vwo bru ayen ra dede nẹ ayen dje oka rẹ okurhẹriẹ phiaa. Kirobo rẹ uyono rivẹ rẹ Uwevwin Orhẹrẹ nana djere, Jihova djudje rẹ ehrọre rọyen, ọke rọ vwọ vuẹ ọmraro Hosia nẹ o nene aye rọyen ro yeren akpọ umwemwu rhuẹrẹ kugbe. (Ho 3:1; Mal 3:7) Ekpako Ukoko na da vwẹrokere Jihova, ayen ji che vwo owenvwe rẹ orumwemwu vwo rhivwin rhe, ọtiọyena, kẹ ayen che ruo lọhọ kẹ ro vwo rhivwin rhe.​—Se Jerimaya 3:12.

8. Idjerhe vọ yen itẹ rẹ ọmọ osoghoro rẹ Jesu kperi vwọ cha avwanre uko vwo vwo ẹruọ rẹ ehrọre vẹ arodọnvwẹ ri Jihova? (Luk 15:7)

⁸ Karophiyọ itẹ rẹ ọmọ osoghoro rẹ Jesu kperi re djunute vwẹ uyono rivẹ rẹ Uwevwin Orhẹrẹ nana. Rọ vwọ kparo mrẹ ọmọ rọyen ro rhivwin cha, ọsẹ na “da djẹ yanran, ọ da gbanọ, ọ da fiọnfiọn vwọrẹ ẹguọnọ.” (Lu 15:20) Noso nẹ ọsẹ na hẹrhẹre nẹ ọmọ na rẹ ọyen tavwen o ki vwo ghovwoo. Ukperẹ ọtiọyen, ọyen jowọ rẹsosuọ kirobo rẹ ọsẹ ro vwo ẹguọnọ ruẹ. Ọna yen uruemu ra je guọnọ mie ekpako kpahen ihwo ri bo ghwru. Ayen guọnọre nẹ igodẹ ri ghwruru na “rhivwin rhe uwevwin.” (Lu 15:22-24, 32) Aghọghọ dia vwẹ obodjuvwu siẹrẹ orumwemwu de rhivwin rhe, ọtiọyen ọ je hepha vwẹ otọrakpọ na!​—Se Luk 15:7.

9. Die yen Jihova jiri vwọ kẹ irumwemwu nẹ ayen ru?

⁹ Vwo nẹ obo re yonori re na, o fiotọ dẹn nẹ Jihova vwẹ uphẹn kẹ ihwo re rhọnvwe kurhẹriẹ nẹ umwemwu rayeen nẹ e dia ukoko rọyeen. Dedena, o chuko kuẹ irumwemwuu. Ọ guọnọre nẹ ayen rhivwin rhe. A sa mrẹ ẹro ri Jihova vwo nẹ irumwemwu vwẹ Hosia 14:4: ‘Mi sivwi jẹ esegbuyota evwo rayen, ke me guọnọ ayen odedede, kidie ophu mẹ fun nure.’ Siẹre ekpako da mrẹ oka rẹ okurhẹriẹ, ẹwẹn nana yen ji mu ayen vwọ vwẹ ukẹcha phia. Ọnana ji se mu ẹwẹn rẹ ihwo re yanjẹ Jihova vwo rere ayen rhivwin rhe kpakpata.

10-11. Mavọ yen ekpako na sa vwọ vwẹ ukẹcha kẹ ihwo re si nẹ ukoko na krire?

¹⁰ Kẹ, ihwo re si nẹ ukoko na krire, ọ da tobọ dia nẹ ikpe buebun re wanre vwo? Ọkiọvo, ayen rha tobọ vwobọ vwẹ umwemwu rọ nẹrhẹ e si ayen nẹ ukoko naa. Ọ je sa dianẹ ayen rha tobọ karophiyọ oboresorọ re vwo si ayen nẹ ukoko naa. Obo rọ wanre eje, ekpako na cha davwẹngba vwọ guọnọ ayen je kọn bru ayen ra. Siẹrẹ ekpako na de bru ayen ra, ayen se nene ihwo ọtiọyena nẹrhovwo je bọrọ ayen nẹ ayen rhivwin rhe ukoko na. Ọ da dianẹ ohwo na nẹ ukoko na kri mamọ re, oyerinkugbe rọyen vẹ Jihova che dogho mamọ. Ọtiọyena, o de dje owenvwe phia ro vwo rhivwin rhe ukoko na, ekpako na se ru ọrhuẹrẹphiyotọ ra vwọ vwẹ Uyono ri Baibol mu kẹ, dede nẹ a je reyọ rhivwiin. Obo rọ hepha eje, ekpako na yen che ru ọrhuẹrẹphiyotọ rẹ Uyono ri Baibol na.

¹¹ Ekpako na vwọ vwẹrokere ehrọre ri Jihova, ayen ki bru ihwo rẹ ayen se bru ra eje ra vwẹ ukẹcha kẹ, nẹ uphẹn rhiephiyọ ayen vwo rhivwin rhe. Orumwemwu de djephia nẹ ọyen kurhẹriẹ je yanjẹ umwemwu rọyen vwo, a sa reyọ rhivwin kpakpata.​—2Kọ 2:6-8.

12. (a) Ẹdia vọ yen a da guọnọ nẹ ekpako jomaotọ? (b) Diesorọ ọ vwọ chọ ra vwọ tanẹ irumwemwu evo cha sa mrẹ arodọnvwẹ ri Jihovaa? (Ni eta rehẹ obotọ na.)

¹² Vwẹ ẹdia evo, ofori nẹ ekpako na nabọ frẹkotọ fuẹrẹn ohwo na tavwen a ke rhoma reyọ rhivwin. Kerẹ udje, ọ da dianẹ ohwo na gbe omotete ẹgua, o she nẹ uyota na kọ vwọsuọ yẹrẹ o hworo ona vwọ fan orọnvwe rọyen, ọtiọyena, ofori nẹ ekpako na vwo imuẹro nẹ o ghini kurhẹriẹ. (Mal 2:14; 2Ti 3:6) Ofori nẹ ayen sẹro rẹ uchuru na. Vwẹ idjerhe vuọvo na, ofori nẹ e vwo imuẹro nẹ Jihova che rhiabọreyọ orumwemwu ro kurhẹriẹ nẹ ẹwẹn rhe, nẹ ọ je dobọ rẹ erharhe iruemu ro vwori ji re. Dede nẹ, ekpako na cha jomaotọ kpahen ihwo ri hworo aghwanre vwọ phiẹn ihwo efa, ofori nẹ ayen kẹnoma kẹ uruemu ra vwọ tanẹ ihwo tiọyena cha sa mrẹ arodọnvwẹ ri Jihovaa.c​—1Pi 2:10.

OBORẸ UKOKO NA SE RU

13. Die yen ofẹnẹ rẹ oborẹ avwanre nene ohwo ra ghwọku vẹ ohwo re si nẹ ukoko na yerẹn wan?

¹³ Kirobo ra ta ota kpahen vwẹ uyono rọ wanre na, ọkievo e ghwoghwo nẹ a ghwọku ohwo ọvo. Ọ da dia ọtiọyen, avwanre vẹ ọyen se ru kugbe, kidie ohwo na kurhẹriẹ ji gbobọnyẹ orharhe uruemu rọyen re. (1Ti 5:20) Ọyen jẹ ọvọ usun rẹ iniọvo avwanre, ọ guọnọ ọbọngan mie iniọvo rẹ ukoko na. (Hib 10:24, 25) Ẹkẹvuọvo, ẹdia nana fẹnẹ ohwo re si nẹ ukoko na. Avwanre vẹ ohwo tiọyena “ruẹ kuẹgbe-e” yẹrẹ “tobọ riemu kuẹgbe-e.”​—1Kọ 5:11.

14. Mavọ yen Inenikristi sa vwọ vwẹ ẹwẹn obrorhiẹn rayen ra vwẹ Baibol yono vwo nene ihwo re si nẹ ukoko na yerin? (Ni uhoho na.)

¹⁴ Vwo nene obo ra ta cha na, kẹ o mudiaphiyọ nẹ avwanre cha ghwa kpairoro vrẹ ohwo re si nẹ ukoko na kakare? Ẹjo. Vwọrẹ uyota, avwanre vẹ ọyen che ru kugbee. Jẹ, Inenikristi sa reyọ ẹwẹn obrorhiẹn rayen ra vwẹ Baibol yono vwo brorhiẹn sẹ ayen che durhie ohwo re si nẹ ukoko na​—ọ sa dia ohwo orua yẹrẹ ohwo rẹ ayen vẹ ọyen gba riẹn yerẹn jovwo rhe uyono. Ọ da rhe vwo? Vwẹ obuko re, avwanre yeren ohwo ọtiọyenaa. Jẹ enẹna, Onenikristi ọvuọvo yen cha vwẹ ẹwẹn obrorhiẹn rọyen ra vwẹ Baibol yono vwo ruiruo vwẹ ẹdia nana. Ihwo evo se vwo ẹwẹn rẹ ayen vwo yeren ohwo na ji rhe dede siẹrẹ ọ da rhe uyono. Dedena, avwanre cha ghwọrọ ọke yẹrẹ nene ta ota ọke grongroon.

15. Oka rẹ irumwemwu vọ yen e djisẹ rayen vwẹ 2 Jọn 9-11? (Ni ekpeti na “Oka rẹ Umwemwu Ọvo Yen Jọn vẹ Pọl ta Ota Kpahen?”)

¹⁵ Evo se no nẹ, ‘Ọ dia Baibol na tare nẹ, siẹrẹ Onenikristi de yeren ohwo tiọyena o ji vwobọ vwẹ imwemwu rọyen?’ (Se 2 Jọn 9-11.) Ẹkpo ri Baibol efa re riariẹ owọrota nana phiyọ rionbọ kpo ihwo ri she nẹ ukoko na re vwọsua kugbe ihwo efa ri titẹ orharhe rẹ uruemu. (Ẹvw 2:20) Ọtiọyena, siẹrẹ ohwo de titi iyono rẹ efian yẹrẹ erharhe rẹ iruemu efa, ekpako na che ru ọrhuẹrẹphiyotọ rẹ ayen vwo bro raa. Uyota nẹ, iphiẹrophiyọ herọ nẹ o che brevun kpiroro. Bẹsiẹ o ki ru ọtiọyen, avwanre che yeren yẹrẹ durhie ohwo tiọyena rhe uyonoo.

VWẸROKERE ARODỌNVWẸ KUGBE EHRỌRE RI JIHOVA

16-17. (a) Die yen Jihova guọnọre nẹ irumwemwu ru? (Izikiẹl 18:32) (b) Mavọ yen ekpako na vẹ Jihova sa vwọ wian kugbe vwọ vwẹ ukẹcha kẹ irumwemwu vwo kurhẹriẹ?

¹⁶ Die yen avwanre yonori vwẹ iyono iyorin nana? Jihova guọnọre nẹ ohwo vuọvo ghwọrọọ! (Se Izikiẹl 18:32.) Ọ guọnọre nẹ ọyen vẹ irumwemwu rhuẹrẹ kugbe. (2Kọ 5:20) Kọyensorọ, vwẹ ikuegbe rẹ ihworakpọ, abọ buebun yen Jihova bọrọ ihwo rọyen nẹ ayen kurhẹriẹ ji rhivwin rhe. Ọyen okpuphẹn rode ekpako rẹ ukoko vẹ Jihova vwọ wian kugbe vwọ vwẹ ukẹcha kẹ irumwemwu vwo kurhẹriẹ.​—Ro 2:4; 1Kọ 3:9.

¹⁷ Vwẹ ẹwẹn roro aghọghọ rọhẹ odjuvwu siẹrẹ irumwemwu de kurhẹriẹ! Kọke kọke Ọsẹ avwanre rọhẹ odjuvwu vwọ mrẹ aghọghọ siẹrẹ ogodẹ ro bo ghwru de rhivwin rhe ukoko na. Siẹrẹ avwanre de roro kokodo kpahen arodọnvwẹ, ehrọre kugbe ẹse ri Jihova re muwan rọyeen, ẹguọnọ rẹ avwanre vwo kpahọn ko kodophiyọ.​—Lu 1:78.