Obo Re Se Vwo Ru Uyono

Brorhiẹn rẹ Obo re ma Ghanre wo Che Yono

Ọke rẹ avwanre eje vwo ruẹ uyono romobọ ghwe te emuọvo-o. Mavọ yen a sa vwọ reyọ ọke na vwo ruiruo vọnvọn? Ẹsosuọ, ghwọrọ ọke phiyọ oborẹ wo se. Wọ cha mrẹ erere siẹrẹ wọ da frẹkotọ se ẹmẹkpo krẹn ukperẹ wo vwo bru okpakpa se asan na eje re ẹsiẹvo.

Ọtiọyena, tẹnrovi obo re ma ghanre. (Ẹf 5:15, 16) Enana iroroẹjẹ evo:

Se Baibol na kẹdẹ kẹdẹ. (Un 1:2) A sa vwẹ ọrhuẹrẹphiyotọ rẹ isese ri Baibol ri kudughwrẹn kudughwrẹn re ruẹ vwẹ uyono vwọ tonphiyọ.
Muegbe rẹ uyono rẹ Uwevwin Orhẹrẹ kugbe Uyono rẹ Akpeyeren Avwanre vẹ Iruo Ruvie Na. Muegbe wọ vwọ kpahenphiyọ enọ.—Un 22:22.
Ọke da herọ, davwẹngba vwo ni yẹrẹ se erọnvwọn kpokpọ rẹ ukoko na vwọ phia, kerẹ imagazini re phiẹ phiyọ ada, ividio, kugbe ẹbe efa rehẹ jw.org.
Ru ehiahiẹ. Wo se ru ehiahiẹ kpahen ebẹnbẹn ru wo hirharokuẹ, onọ ru wo vwori yẹrẹ uyovwinrota ri Baibol ru wọ guọnọ vwo ẹruọ rọyen phiyọ. Wọ vwọ mrẹ iroroẹjẹ evo, ni ẹbẹre rẹ “Bible Study Activities” rọhẹ jw.org.