Obo ra sa Vwọ Reyọ Obo Wọ Sa Ta Vwo Ruiruo

Rhanvwẹ January 2018 yen obo wọ sa ta vwọ vwomaphia vwẹ opharo rẹ Ọbe Uyono rẹ Akpeyeren Avwanre vẹ Iruo Ruvie Na. Mavọ yen a sa vwọ reyọ ayen vwo ruiruo?

A da Ghare Ota kẹ Wẹ: Reyọ enọ, ẹkpo ri Baibol vẹ asan re si ọke ọfa phiyọ na vwo ruiruo. Ẹkẹvuọvo, ọ dia ọnana mudiaphiyọ nẹ wọ cha ghwa ta eta ra ta phiyọ evunrẹ ividio na eje-e. Wọ sa reyọ ona ọfa, ọtonphiyọ ọfa, yẹrẹ eta efa vwo ruiruo. Wọ je sa reyọ ọbe ọvo vwẹ Ekpeti rẹ Uyono avwanre vwọ kẹ ohwo na, ọ da tobọ dianẹ e djunute vwevunrẹ odjekẹ na-a.

Wọ da hẹ Iruo Aghwoghwo Na: E muegbe rẹ obo wọ sa ta na ọ sa vwọ chọn avwanre uko. Ọ da dianẹ ohwo dje omavwerhovwẹn phia, ọ je guọnọ riẹn kpobarophiyọ, wo se rhivwin brora, ọkiọvo wọ sa reyọ ẹbẹre rẹ orhivwinbrura na vwo ruiruo. Wo se wene obo wọ sa ta na yẹrẹ reyọ ona ọfa rọ fẹnẹ ọyena dibidibi vwo ruiruo. Uyovwinrota ra vwọphia vwẹ emeranvwe rọ wanre na yẹrẹ ẹkpo ri Baibol ọfa sa nabọ shephiyọ ọdavwẹ rẹ ihwo rehẹ ekogho wẹn? Ihwo rehẹ ekogho wẹn guọnọ nyo iyẹnrẹn rẹ obo re phiare okrinọ-ọ na yẹrẹ obo re phiare vwẹ ekogho na? Otoro oborẹ wọ cha reyọ obo wọ sa ta na vwo ruiruo wa-an, jẹ ọdavwẹ wẹn dia ọ rẹ wo vwo “ru ayen ejobi fiki rẹ iyẹnrẹ esiri na, rere [wo] vwo se vwo ẹkẹn vwẹ ẹrhovwo rọye.”—1 Kọr. 9:22, 23.