Vwo nẹ emeranvwe nana yanran, uyono rẹ uvwre rẹ udughwrẹn rhe che vwo ẹbẹre erha rehẹ ona re se vwo phi ayen phiyọ ada na ọfa-a. Ukperẹ ọyena, Ọbe Uyono rẹ Akpeyeren vẹ Iruo Uvie Na che vwo Obo Wọ Sa Ta ro vwo onọ rẹ ọtonphiyọ, ẹkpo rẹ Baibol, kugbe onọ wọ cha nọ vwọ gbẹn idjerhe phiyotọ vwọ kẹ orhivwinbrura. Ividio rẹ obo wọ sa ta ọvuọvo yen e che hworo kudughwrẹn kudughwrẹn. Oghwoghwota ọvuọvo yen che brorhiẹn rẹ ọbe rọ cha reyọ vwo ruiruo vwẹ Ekpeti rẹ iruo rẹ avwwanre vẹ ọke rọ cha vwọ reyọ ẹbe na vwo ruiruo—owenẹ ọ dia obọ rẹsosuọ yẹrẹ orhivwinbrura. Vwọba, ọbe Uyono na ji che vwo iroro ẹjẹ ivẹ ri shekpahen obo wọ sa ta. Ọnana cha chọn avwanre uko vwọ tẹnrovi eyono rẹ ihwo “buebu re ve arhọ ri bẹdẹ na kẹ.”—Iruo 13:48.
Ẹbẹre rẹ Muomaphiyọ Iruo Aghwoghwo na: Jokpanẹ kẹ a vwẹ odjekẹ ọfa phia, ihwo ri vwo eta vwẹ ẹbẹre nana ru udje rẹ obo ra sa ta.