Oborẹ Avwanre sa Vwọ Reyọ Obo Wọ Sa Ta Vwo Ruiruo

Iniọvo na wian gangan vwo muegbe rẹ ẹbẹre rẹ obo wọ sa ta na, ighwoghwota buebun rhe mrẹvughe re nẹ e wian vwẹ ekogho rayen. Ẹkẹvuọvo, ro vwọ dianẹ ofẹnẹ herọ vwẹ ekogho sansan vwẹ akpọ na, ighwoghwota se ru ewene phiyọ oborẹ ayen sa vwọ reyọ ena na vwo ruiruo yẹrẹ tobọ wene uyovwinrota na vwo nene ọdavwẹ rẹ ihwo rehẹ ekogho rayen vwẹ iruo rẹ aghwoghwo na. Dedena, ofori nẹ ihwo eje nene odjekẹ rẹ egbada-ẹdjẹ rẹ ogheresan. Obo ra guọnọre yen e vwo ruiruo rẹ aghwoghwo rẹ iyẹnrẹn esiri rẹ Uvie na rẹ Jesu vwo kẹ avwanre na.—Mat. 24:14.

A da vwẹ iruo kẹ wẹ vwẹ ẹbẹre rẹ muomaphiyọ iruo aghwoghwo na, ofori nẹ wọ vwẹ uyovwinrota rẹ obo wọ sa ta rọhẹ aruọbe 16 rẹ Ọbe Uyono rẹ Akpeyeren vẹ Iruo Ruvie Na vwo ruiruo. Ẹkẹvuọvo, jokpanẹ ke djerephia, wọ sa sane onọ, ẹkpo ri Baibol, oborẹ wọ cha ta vwẹ ọke ọfa, yẹrẹ obo re che ruo wan vwo nene ọdavwẹ rẹ ekogho ru wo de ghwoghwo. Ọnana wene odjekẹ ra vwọphia vwẹ aruọbe 8 rẹ ọbe uyono ri June 2020.