Obo ra sa Vwọ Reyọ Itrati Vwọ Ton Ota Eghwoghwo Phiyọ

Rhanvwẹ January 2018, ọyen opharo rẹ Ọbe Uyono rẹ Akpeyeren vẹ Iruo Uvie Na vwọ vwẹ obo wọ sa ta vwẹ iruo aghwoghwo na vwọphia. E jiriro kẹ avwanre nẹ a tẹnrovi re vwo nene ihwo ta ota kuẹgbe ukperẹ e di vwo phi ẹbe phiyọ ada. Rere ighwoghwota se vwo wene ona rayen, ividio rẹ obo wọ sa ta na dje obo ra sa vwọ vwẹ Baibol na ọvo vwo nene ihwo ta ota kugbe. Ẹkẹvuọvo, kẹ ọnana mudiaphiyọ nẹ e rhe che phi ẹbe phiyọ ada siẹrẹ e de ru aghwoghwo ri nẹ uwevwin kpo uwevwi-in? Ẹjo, kakaka! Kerẹ udje, itrati sa dia omamọ idjerhe ra vwọ ton aghwoghwo phiyọ. A sa vwẹ kitrati kitrati vwo ruo womarẹ ona nana:

1. Nọ enọ rehẹ opharo rẹ itrati na.

2. Dje ẹkpahọnphiyọ ri Baibol na rọhẹ obenu rẹ aruọbe rivẹ vwọ kẹ ohwo na. Ọke da herọ, wo se se, ji djekpahen evuẹ evo rehẹ evunrẹ itrati na.

3. Vwẹ itrati na vwọ kẹ ọrovwuwevwin na, wọ je vuẹ nẹ o se asan ri chekọ vwẹ ọke ro de vwo uphẹn.

4. Wọ ke yanran, gbe dje onọ rọhẹ asan re si “Obo re Roro Kpahen” phiyọ na kẹ, wọ je vuẹ nẹ wo che djekpahen ẹkpahọnphiyọ ri Baibol na vwẹ ọke ọfa.

Wo da rhoma rhivwin, gbe djekpahen ekpahọnphiyọ rẹ onọ na, wọ me je yanjẹ onọ ọvo vwo rẹ wo che nene ta ota kpahen vwẹ ọke ọfa. Wọ sa sane onọ ọvo vwo nẹ websaiti avwanre yẹrẹ ọbe ra rionbọra rọhẹ obuko rẹ itrati na. Vwẹ ọke ro shephiyọ, ovwan sa ton uyono rẹ ibroshọ rẹ Iyẹnrẹn Esiri Ro Nẹ Obọ Rẹ Ọghẹnẹ Rhe! phiyọ yẹrẹ ọbe ọfa rọhẹ Ekpeti rẹ Uyono na.