April

Avwanre sa vwọ mrẹ erere vwo nẹ uvwo kugbe ọbara ri Jesu, o fori nẹ e vwo esegbuyota kpahen ọtanhirhe na. (Ẹfe. 1:7) Ofori nẹ ihwo rẹ Jesu seri “igodẹ efa” na nama re ibrẹdi je da iwaini vwẹ Emu Ovwọnvwọn rẹ Ọrovwori re ruẹ kukpe kukpe naa. (Jọn 10:16) Dedena, ayen je mrẹ erere vwo nẹ uvwo vẹ ọbara ri Jesu Kristi. Ayen ruẹ ọnana womarẹ ayen vwo vwo esegbuyota kpahen ẹgba rẹ usivwin rẹ izobo ri Jesu Kristi. (Jọn 6:53) Vwọ fẹnẹ ayen, o fori ihwo re cha re na djephia nẹ ayen usun ihwo rehẹ ọphọ kpokpọ na, re je dia iriuku rẹ Uvie rẹ odjuvwu na. Ọtiọyena, owenẹ avwanre usun rẹ ihwo ra jẹreyọ yẹrẹ igodẹ efa na, o fori nẹ evwo esegbuyota rere e se vwo vwo arhọ ri bẹdi bẹdẹ. w24.12 13 ¶14, 16

Ọke rẹ ayen vwọ re orẹ rẹ Emu Ovwọnvwọn rẹ Ọrovwori Na, Jesu da vwẹ ibrẹdi ro jephuo vwọ kẹ idibo rọyen je vuẹ ayen nẹ ọnana mudiaphiyọ ugboma rọyen. Ọ da vwẹ iwaini kẹ ayen je tanẹ o mudiaphiyọ ‘ọbara rẹ ọphọ na.’ (Mak 14:22-25; Luk 22:20; 1 Kọr 11:24) “Uwevwin rẹ Izrẹl [kọyen Izrẹl rẹ ẹwẹn]” yen e nene re ọphọ kpokpọ na, re dia ihwo re cha dia evunrẹ “Uvie rẹ Ọghẹnẹ.” (Hib. 8:6, 10; 9:15) “Ẹmẹko rẹ igodẹ” na yen Jesu tẹnrovi vwẹ Emu Ovwọnvwọn rẹ Ọrovwori Na. Idibo rọyen re fuevun rọ vẹ ayen gba hẹ ubruwevwin vwẹ ẹdẹ yena, yen a ka vwọ ton ẹmẹko yena phiyọ. Ayen yen ihwo ri che vwo asan rẹ ayen cha dia vẹ Jesu vwẹ obodjuvwu. w24.12 11 ¶9-10

Ugbeyan rọ kẹrẹ Jesu shẹrẹ, e muro, a hanrhe rọ, e gun efian nyẹ, e de rhe brorhiẹn hwe ji gboja kẹ re. Isodje sunro kpo asan re de che hwe, ayen da kanrọ mu urhe rẹ oja. Ọke rọ vwọ fuevun chirakon rẹ oja nana eje, o vwo ohwo rẹ oja na da re mamọ, ọyen Jihova Ọghẹnẹ. O vwo ẹgba rọ vwọ dobọ rẹ oja na ji, ẹkẹvuọvo o ru ọtiọyeen. Diesorọ? Ẹguọnọ. Izobo ri Jesu na ọyen odjephia nẹ Jihova vwo ẹguọnọ wẹn mamọ. O ru erọnvwọn buebun ji chirakon rẹ ọmiaovwẹ o se vwo sivwin uwe vwo nẹ abọ rẹ umwemwu vẹ ughwu. (1 Jọn 4:9, 10) Vwọrẹ uyota, ọ guọnọ vwẹ ukẹcha kẹ avwanre ọvuọvo vwọ họnre vwọso umwemwu ji phio kparobọ! w24.08 6 ¶13-14

A sa nabọ vwo ẹruọ rẹ oborẹ Jihova vwo ẹguọnọ rẹ avwanre siẹrẹ e de roro kpahen oborẹ ughwu rẹ Ọmọ rọyen na darọ te. Eshu tare nẹ, o vwo odibo rẹ Ọghẹnẹ vuọvo rọ cha fuevun kẹ ọ da bẹn ro vwo ru ọtiọyeen. E se vwo dje Eshu phiyọ ọvwọrefian, Jihova da vwẹ uphẹn kẹ Jesu nẹ ọ rioja tavwen o ki ghwu. (Job 2:1-5) Jihova mrẹrẹ ọke rẹ ihwo ẹga re vwọsua vwọ reyọ vwọ jehwẹ, isodje vwọ fa, kugbe ọke ra vwọ kanrọ mu urhe rẹ oja na. Jihova je mrẹ ọke ra vwọ yanjẹ Ọmọ rọyen ọghanghanre vwo nẹ ọ rioja ji ghwu ughwu rẹ osọnọ. (Mat. 27:28-31, 39) Jihova vwo ẹgba rọ vwọ dobọ rẹ erọnvwọn nana eje ji. (Mat. 27:42, 43) Ẹkẹvuọvo, siẹrẹ Ọghẹnẹ de ru ọtiọyen, Jesu rha sa hwosa rẹ ọtanhirhe naa, iphiẹrophiyọ vuọvo rha herọ vwọ kẹ avwanree. Ọtiọyena, Jihova da vwẹ uphẹn kẹ Ọmọ rọyen nẹ o chirakon rioja bẹsiẹ o vwo ku ẹwẹn phiyọ. w25.01 22 ¶7

Ọyen ẹdẹ 16 ri Nisan, 33 C.E. Oshọ ro idibo ri Jesu oma, ayen ji muomaphiyọ gangan. Idibo ivẹ usun rayen de vrẹn nẹ Jerusalẹm kpo Emaọs. Ọshare ọvo rẹ ayen vugherii da yan vwa ayen vwẹ idjerhe. Idibo na ki gbikun rẹ obo re phia kẹ Jesu vwọ kẹ. Ọshare na da ta eta efa vwo phurie obo rẹ ayen vuẹ na. Ọ da ka ta ota kpahen “Mosis kugbe Emraro na eje” je vuẹ ayen oboresorọ Mesaya na vwọ rioja ji ghwu. Ọke rẹ eshare erha na vwo te Emaọs, ọshare na da vuẹ ayen oka rẹ ohwo rọyen hepha nẹ ọyen Jesu ra kpare nushi na! (Luk 24:13-35) Jesu vwomaphia vwọ kẹ idibo rọyen abọ buebun vwẹ ẹdẹ 40 re koba rọ vwọ hẹ otọrakpọ na. Vwẹ ọke yena, idibo ri Jesu rẹ oshọ muẹ ri ji muomaphiyọ jovwo na de rhi vwo aghọghọ ji fiudugberi ghwoghwo ji yono ihwo iyẹnrẹn rẹ esiri rẹ Uvie na. w24.10 12 ¶1-3

Ememerha yen ohwo ghwanra te omiragua, ẹkẹvuọvo ọ guọnọ ẹgbaẹdavwọn e se vwo yerin tedje vwẹ ukoko na. Kerẹ udje, iniọvo ri Kọrẹnt rhiabọreyọ iyẹnrẹn esiri na, bromaphiyame, Jihova kẹ ayen ẹwẹn ọfuanfon, ayen je mrẹ erere vwo nẹ uyono rẹ ọyinkọn Pọl rhe. (Iruo 18:8-11) Dedena, ikpe evo vwọ wan rẹ ayen vwo bromaphiyame nu, jẹ buebun rayen ji rhi tedjee. (1 Kọr. 3:2) E se vwo yerin tedje, ẹsosuọ e che vwo owenvwe re vwo ru ọtiọyen. Ivwughẹnghẹn re guọnọ yerin tedjee cha sa yanphiaroo. (Isẹ 1:22) Avwanre guọnọ dia kerẹ ihwo ri te imiragua re, jẹ e je vwẹrosua esẹ vẹ ini rayen nẹ i brorhiẹn kẹ ayeen. Ukperẹ ọtiọyen, avwanre ọvo guọnọ wian kpahen oborẹ avwanre se vwo yerin tedje. Ọ da dianẹ wọ wian kpahan obo ru wo se vwo yerin tedje, rẹ Jihova nẹ ọ kẹ wẹ “owenvwe vẹ ẹgba” wo se vwo ruiruo.—Fil. 2:13. w24.04 4 ¶9-10

Jihova vuẹ avwanre oborẹ oma ruo siẹrẹ o de guẹdjọ rẹ ihworakpọ. (Izi. 33:11) Jihova brokpakpa ghwọrọ ihwo kuẹfia karekaree. O gbe arodọnvwẹ vwẹ kẹdia kẹdia ro de fo nẹ o ru ọtiọyen, kidie ọyen ohwo vẹ arodọnvwẹ. Die yen avwanre riẹnre kpahen ihwo ra cha rhọvwọn nẹ ushii? Baibol na djunute udje rẹ ihwo evo tiọyen. Jesu tare nẹ a cha rhọvwọn Judas Iskariọt nẹ ushii. (Mak 14:21; ji ni Jọn 17:12 kugbe study note.) Judas vwẹ arogba vwo gbevwọso Jihova Ọghẹnẹ kugbe Ọmọ Rọyen. (Ni Mak 3:29 kugbe study notes.) Ọtiọyen Jesu je tanẹ, ilori ẹga evo ri gbevwọso ọyen de ghwu, ayen che vwo iphiẹrophiyọ rẹ evrẹnushii. (Mat. 23:33; ni Jọn 19:11 kugbe study note “the man.”) Ọyinkọn Pọl vwẹ orhọesio phia nẹ ihwo re vwọsua re rhọnvwe kurhẹriẹẹ che vrẹn nẹ ushii.—Hib. 6:4-8; 10:29. w24.05 4 ¶10-11

Avwanre vẹ Jihova de vwo uvi rẹ oyerinkugbe rọ kpẹkpẹre, o vwo emu vuọvo rẹ Eshu che ru rọ sa so omaẹwan ri bẹdẹ vwọ kẹ avwanree. (1 Jọn 3:8) Vwẹ akpọ ọkpokpọ na, ọ dia ughwu ọvo yen Jihova cha sẹro rẹ igbeyan rọyen re fuevun vwo nẹ abọ rọyeen, ẹkẹvuọvo ji te kemu kemu ro se miovwo oyerinkugbe rayen vẹ Jihova. (Ẹvwọ. 21:4) Ọyen okpuphẹn rode ra vwọ dia ọrhorha vwevunrẹ utughẹ ri Jihova—ra vẹ ọyen vwo vwo uvi rẹ oyerinkugbe komobọ bẹdẹ. (Izi. 37:27) Die yen ofori nẹ e ru a da guọnọ dia erhorha rọyen ọkieje? Ọ da dianẹ ohwo durhie uwe kpo uwevwin rọyen, wọ guọnọ riẹn obo rọ guọnọ mie we. Ọtiọyen ọ je hepha nẹ, o ghini fo ra vwọ riẹn obo ri Jihova guọnọ mie ihwo re guọnọ dia erhorha rọyen ọkieje. Ẹguọnọ rẹ avwanre vwo kpahen Jihova yen muẹ avwanre vwọ reyọ ẹgba rẹ avwanre vwo ruẹ “obo ri je vọnvọn.” (Kọl. 1:10) Ofori nẹ a karophiyọ oka rẹ ohwo rọ hepha, nẹ ọyen Ọghẹnẹ ro muẹ udidi. Oka rẹ uruemu tiọyena cha nẹrhẹ a kẹnoma kẹ obo re sa nẹrhẹ ivun miovwo. Eriyin na, avwanre ke “vwẹ oma kpotọ yan nene” Ọghẹnẹ avwanre.—Maika 6:8. w24.06 4 ¶8-9

Jihova vuẹ Ebraham nẹ ọ reyọ ọmọ rọyen Aizik vwo ze izobo. Uyota nẹ oborẹ Jihova vuẹrẹ nẹ o ru na bẹn vwọ kẹ mamọ. Dedena, o de ru obo ra vuẹrẹ. Ukuko na, Ọghẹnẹ da da obọ ji. Ẹkẹvuọvo, udje yena yono ihworakpọ eje uyota ọghanghanre ọvo—nẹ Jihova vwo owenvwe rọ vwọ vwẹ Ọmọ rọyen vuọvo ro vwo ẹguọnọ kpahen vwọ kpahotọ rere o vwo ze izobo. Jihova vwo ẹguọnọ rẹ ihworakpọ mamọ. (Jẹn. 22:1-18) Ikpe ujorin buebun vwọ wan nu, Urhi ra vwọ kẹ ẹgborho rẹ Izrẹl guọnọ izobo rẹ eranvwe rere a sa vwọ reyọ imwemwu rayen vwo ghovwo ayen. (Liv. 4:27-29; 17:11) Izobo tiọyena rionbọ kpo izobo rọ ma rho, ro che sivwin ihworakpọ vwo nẹ abọ rẹ umwemwu kakare. Ẹwẹn ọfuanfon na mu emraro Ọghẹnẹ vwọ nabọ djefiotọ nẹ ọmọ rẹ ive na rọ rhe dia Ọmọ roghẹresan rẹ Ọghẹnẹ cha rioja, e mi ji hwe rere o vwo sivwin ihworakpọ te owẹ vwo nẹ abọ rẹ umwemwu vẹ ughwu!—Aiz. 53:1-12. w24.08 4 ¶7-8

Wo de ru isese ri Baibol wẹn ofori nẹ wọ guọnọ idjerhe sansan vwọ reyọ obo ru wo se na vwo ruiruo. Siẹrẹ wo de se ẹkpo ọvo vwẹ Baibol na, nọ oma wẹn ‘Mavọ yen me sa vwọ reyọ obo ri mi se na vwo ruiruo enẹna yẹrẹ vwẹ obaro na?’ Kerẹ udje, vwẹ ẹwẹn roro nẹ wo se 1 Tẹsalonaika 5:17, 18. Wo de se ẹkpo ri Baibol ivẹ na nu, wọ sa domaji ji roro kpahen uchabọ ru wọ nẹrhovwo kugbe oborẹ ẹrhovwo wẹn ghwotọ te. Wo se roro kpahen erọnvwọn ri se mu we vwo dje ọdavwaro phia. Ọ sa dianẹ wo vworo vwẹ ẹwẹn nẹ wọ cha kpẹvwẹ Jihova fikirẹ erọnvwọn erha kiriguo ro ru kẹ wẹ. Ọ da tọbọ dianẹ ibrẹro evo yen wo vwo roro kpahen obo ro ru kẹ wẹ na, ọnana sa nẹrhẹ wo vwo ẹruọ rẹ Ota rẹ Ọghẹnẹ ji ru nene obo rọ tare. Siẹrẹ wọ da reyọ obo ru wo se vwẹ Baibol na vwo ruiruo ọkieje, ọke vwọ yanran na ku wọ cha dia uvi rẹ odibo ri Jihova! w24.09 4-5 ¶9-10

Jihova ma avwanre vẹ ẹgba rẹ oghẹresan. Dede nẹ oma vwerhen avwanre siẹrẹ e de ruẹse kẹ avwanre, jẹ e de ruẹse kẹ ihwo efa yen a da ma mrẹ uvi rẹ omavwerhovwẹn. Oma nabọ vwerhen avwanre siẹrẹ a da vwẹ ukẹcha kẹ iniọvo rẹ avwanre. Oma je vwerhen avwanre siẹrẹ ayen de dje ọdavwaro phia. Dedena, te ọ dianẹ ihwo rẹ avwanre ruẹse kẹ kpẹvwẹ ẹse yẹrẹ ayen ru ọtiọyeen, oma sa vwerhen avwanre kidie avwanre ru obo ri fori. Wo jẹ ọ chọrọ owẹ ẹroo nẹ kemu kemu wo vwo ruẹse, “Ọrovwohwo sa kẹ wẹ bu nọ tiọna.” (2 Ikun 25:9) Avwanre che se ruẹse vrẹ Jihovaa! A mrẹ vwo dje omavwerhovwẹn ra cha mrẹ siẹrẹ Jihova da hwosa kẹ avwanree. Ọtiọyena, e gbe jẹ a vwẹrokere Ọsẹ rẹ avwanre rọhẹ obodjuvwu rọ kokẹ ghwologhwolo na ọkieje. w24.09 31 ¶20-21

Jihova ọyen ohwo rẹ arodọnvwẹ rọ je re ehrọre. (Une 103:13; Aiz. 49:15) Ọyen ohwo vẹ erorokẹ; siẹrẹ erọnvwọn da miavwẹ avwanre oma, o ji te oma. (Zẹk. 2:8) O ruo lọhọ kẹ avwanre rere e se vwo sikẹrẹ kerẹ Ugbeyan. (Une 25:14; Iruo 17:27) Ọyen ohwo rọ vwomakpotọ; ‘ro nẹ otọ vẹ odjuvwu na, Ọ kpara ovwiogbere nẹ iwurhie.’ (Une 113:6, 7) Kẹ, mavọ yen kohwo kohwo vwo jẹ urinrin ẹ vwọ kẹ Ọghẹnẹ ro me kpenu na? Avwanre vwẹ urinrin kẹ Jihova kidie a guọnọ nẹ ihwo efa riẹn. Ihwo buebun riẹn uyota ro shekpahen Jihovaa. Diesorọ? Kidie Eshu rhuẹro rayen womarẹ ọ vwọ hrahra efian ra ghẹmrẹ vwọ Kpahọn. (2 Kọr. 4:4) Eshu nẹrhẹ ihwo vwo imuẹro nẹ Jihova ọyen ohwo ro muophu djọghrọ djọghrọ, rọ davwerhọọn, rọ je so ojaẹriọ rọhẹ akpọ na eje. Ẹkẹvuọvo avwanre riẹn uyota na kpahen Ọghẹnẹ rẹ avwanre! Avwanre vwo uphẹn a vwọ vwẹ ukẹcha kẹ ihwo vwo vwo ẹruọ oka rẹ ohwo rọ hẹpha je ghwa urinrin bro ra.—Aiz. 43:10. w25.01 3 ¶6-7

Vwẹ ẹgbukpe ujorin rẹsosuọ, ihwo re ka ẹbẹre rẹ Eshu gun efian buebun nyẹ Ọmọ rẹ Ọghẹnẹ rọ pha gbagba ro ji ru emu rẹ igbevwunu. Kerẹ udje, ilori rẹ ẹga na vuẹ ihwo nẹ “osun rẹ ẹwẹn rẹ Idẹbono na” yen kẹ Jesu ẹgba rọ vwọ djẹ ẹwẹn rẹ Idẹbono nẹ ihwo oma. (Mak 3:22) Ọke ra vwọ vwẹ Jesu vwo guẹdjọ, ilori rẹ ẹga na tare nẹ Jesu ta eta rẹ ẹgua, ayen je riẹriẹ otu na vwọ tanẹ a teyọn hwe. (Mat. 27:20) Ọke vwọ yanran na, idibo ri Kristi vwo ghwoghwo iyẹnrẹn esiri na, ihwo re vwọsua ayen “da kpare ophu rẹ ihwo” rẹ ẹgborho na rere ayen vwọso ayen. (Iruo 14:2, 19) Vwọ kpahen obo rehẹ Iruọ rẹ Iyinkọn Iruo 14:2, Uwevwin Orhẹrẹ ri December 1, 1998, da ta: “Ọ dia ovuẹ na ọvo yen ihwo ri Ju re vwọsua na senree, ayen je ta eta ebrabra kpahen Inenikristi rere Igiye vwo vwo utuoma kpahen ayen.” Nonẹna, Eshu je “phiẹn akpọ na ejobi.” w24.04 11 ¶15-16

Ọ dia ọke rẹ ohwo vwo ghwu yen che djephia nẹ o che vwo iphiẹrophiyọ rẹ evrẹnushii. Jihova ọyen oguẹdjọ rọ pha gbagba ro brorhiẹn ọsoso vẹ ọ rẹ abavo. (Une 33:4, 5) Avwanre vwo imuẹro nẹ “Oguẹdjọ rẹ akpọ na” che ru obo re gbare. Ọhọ herọ a da tanẹ ọ dia asan rẹ ohwo diare yen che djephia nẹ o che vwo iphiẹrophiyọ rẹ evrẹnushii. Ọ dia obo ri shephiyọ Jihova vwọ vwẹ ẹro rẹ “ẹvwe” vwo nẹ iduduru rẹ ihwo ri vwo uphẹn rẹ ayen vwo nyo ovuẹ rẹ Uvie na, fikirẹ ẹkuotọ rẹ ayen hephaa. (Mat. 25:46) Oguẹdjọ rẹ akpọ na vwo ọdavwẹ rẹ ihwo nana ọvuọvo vrẹ avwanre shesheri. Avwanre riẹn obo ri Jihova che ru erọnvwọn wan ọke rẹ ukpokpogho rode naa. Ọ sa dianẹ evo usun rẹ ihwo nana che vwo uphẹn rẹ ayen vwo yono kpahen Jihova, vwo esegbuyota kpahọn, je vwomaba ẹga ri Jihova siẹrẹ o de che ru odẹ rọyen fon vwẹ obaro rẹ ẹgborho na eje.—Izi. 38:16. w24.05 12 ¶14-15

Idibo ri Jihova vwẹ ukẹcha kẹ ohwohwo. (2 Kọr. 8:4) Jẹ, ọ guọnọ uduefiogbere e se vwo ru ọtiọyen ọkievo. Kerẹ udje, ọke re de phi ofovwin, ekpako na riẹnre nẹ iniọvo na guọnọ ọbọngan, obicha, emuọre, Baibol kugbe ẹbe rẹ ukoko na. Kidie nẹ ayen vwo ẹguọnọ rẹ iniọvo na, ekpako na phi arhọ rayen phiyọ ẹdia rẹ imuọsho ayen sa vwọ vwẹ oborẹ iniọvo na guọnọre vwọ kẹ ayen. Ọyen obo re ghanre ra vwọ dia vwọrẹ okugbe ọkieje vwẹ ọke yena. Nene odjekẹ ro nẹ oghọn ukoko rọhẹ ẹkuotọ wọ hepha rhe. (Hib. 13:17) Ọkieje yen o vwo fo nẹ ekpako fuẹrẹn ọrhuẹrẹphiyotọ ro shekpahen egbemuo vwọ kẹ oghwọrọ ri kpregede, ọtiọyen ji te odjekẹ ro nẹ ukoko rhe kpahen obo re ru siẹrẹ emu ri kpregede da vwomaphia. (1 Kọr. 14:33, 40) Fiudugberi wo ji gbẹrophiyotọ. (Isẹ 22:3) Wo gbe ẹkpaa. Wo phi arhọ wẹn phiyọ ẹdia rẹ imuoshọọ. Vwẹroso Jihova. Ọ sa vwẹ ukẹcha kẹ wẹ vwo bicha iniọvo wẹn vwẹ idjerhe ro fori. w24.07 4 ¶8; 5 ¶11

Ovie Devid riẹn oka rẹ ohwo ri Jihova hepha ọ je vwẹrosuọ. Devid nẹrhovwo rhe Jihova nẹ ọ cha ọyen uko ọke rẹ ivwighrẹn rọyen vwọ reyọ vwọtua, ọtiọyen ji te Ovie Sọl. Ọghẹnẹ vwọ kpahenphiyọ ẹrhovwo rọyen ji sivwon nu, Devid da ta: “Ọrovwohwo herọ!” (Une 18:46) Die yen eta ri Devid Ọrovwohwo herọ na mudiaphiyọ? Vwo nene oborẹ ọbe ọvo ra rionbọra tare, Devid vwẹroso Jihova “kerẹ Ọghẹnẹ rọ herọ yerẹn rọ vwẹ ukẹcha kẹ ihwo rọyen ọkieje.” Aphro herọọ nẹ, vwo nẹ obo ri Devid rhiẹromrẹ vwẹ akpeyeren, ọ riẹnre nẹ Ọghẹnẹ rọyen herọ yerẹn, imuẹro nana ro vwori na kọyen nẹrhẹ o vwo owenvwe ro vwo jiri Jihova je vwẹ ẹga kẹ. (Une 18:28, 29, 49) Imuẹro rẹ avwanre vwori nẹ Ọghẹnẹ herọ yerẹn na sa cha avwanre uko vwọ ga vẹ oruru. Avwanre che vwo ẹgba vwo chirakon rẹ edavwini ji vwo owenvwe ra vwọ wian ganphiyọ vwẹ ẹga ri Jihova. Ọnana je cha nẹrhẹ avwanre sikẹrẹ Jihova ọkieje. w24.06 20-21 ¶3-4

Die yen avwanre se yono vwo nẹ eta rẹ ọyinkọn Pọl vuẹ iniọvo ri Tẹsalonaika? Siẹrẹ avwanre de nyo eta re rhọnvwephiyọ oborẹ avwanre yono nẹ Baibol na rhee yẹrẹ nyo evuẹ rẹ efian ri forii, a guọnọre nẹ avwanre reyọ aghwanre vwo ruiruo. Vwẹ Soviet Union awanre, ivwighrẹn na de si ileta je vwọ kẹ iniọvo na nẹ esiri ukoko yen o nurhe. Ileta na jiriro kẹ iniọvo evo nẹ ayen vwẹ ukoko romobọ rayen vwo mu. Ọ sa dianẹ obo rehẹ ileta na uyota. Ẹkẹvuọvo ayen sa reyọ obo re si phiyọ ileta na vwọ phiẹn iniọvo rẹ avwanre re fuevuun. Ayen mrẹvughe nẹ obo re si phiyọ ileta na vẹ obo re yono ayen rhọnvwephiyọ ohwohwoo. Nonẹna, ivwighrẹn rẹ avwanre davwẹngba ọkievo vwọ vwẹ intanẹti yẹrẹ erọnvwọn re ghwa iyẹnrẹn vwo phiẹ ohra kugbe ohẹriẹ phiyọ ohri avwanre. Ukperẹ avwanre vwọ “fobọ phieghe nẹ iroro rẹ [avwanre],” ofori nẹ avwanre sẹro rẹ oma rẹ avwanre womarẹ a vwọ frẹkotọ roro sẹ obo re nyo vẹ obo re se kugbe uyota rẹ avwanre yonori vwẹ obuko re, rhọnvwephiyọ ohwohwo.—2 Tẹsa. 2:2; 1 Jọn 4:1. w24.07 12 ¶14-15

Orhiẹn rọ ma ghanre rẹ ohwo se bru yen rọ vwọ vwoma kpahotọ kẹ Jihova je dia ọvo usun rẹ orua rọyen re vwẹ ẹga kẹ. Jihova guọnọre nẹ kohwo kohwo ru ọtiọyen. Diesorọ? Jihova guọnọre nẹ ayen vẹ ọyen vwo uvi rẹ oyerinkugbe je dia bẹdẹ. (Diut. 30:19, 20; Gal. 6:7, 8) Ẹkẹvuọvo, Jihova gba ohwo vuọvo nẹ ọ vwẹ ẹga kẹ ọyeen. Ọ vwẹ uphẹn kẹ ohwo ọvuọvo nẹ o brorhiẹn rẹ obo ro che ru. Kẹ, ọ da rha dianẹ Onenikristi ro bromaphiyame re churhi rẹ Ọghẹnẹ ji ru umwemwu ọgangan vwo? O rhe kurhẹriẹẹ, ke sio nẹ ukoko na. (1 Kọr. 5:13) Jẹ, a da tobọ sio nẹ ukoko na dede, Jihova je rhẹro nẹ o che kurhẹriẹ ji rhivwin bru Ọyen rhe. Vwọrẹ uyota, ọnana yen oboresorọ o vwo ru ọrhuẹrẹphiyotọ rẹ ọtanhirhe na, rere o se vwo ghovwo irumwemwu ri kurhẹriẹ. Ọghẹnẹ rẹ avwanre ro vwo ẹguọnọ na jiriro kẹ irumwemwu nẹ ayen kurhẹriẹ.—Zẹk. 1:3; Rom 2:4; Jems 4:8. w24.08 14 ¶1-2

Vwẹ ọke ri Jọn vwo si ileta rerha rọyen, itu evo herọ re hrahra iyono efian je sua ohẹriẹ vwevunrẹ ukoko na. Dedena, ihwo efa je herọ re “yan vwevunrẹ uyota na.” Ayen nyupho ri Jihova ji “nene iji rọyen.” (2 Jọn 4, 6) Ọ dia Jọn ọvo yen Inenikristi nana re fuevun na ghwa aghọghọ rhee, ọtiọyen ji te Jihova. (Isẹ 27:11) Die yen e yono norhe? Evun-ẹfuọn ghwa aghọghọ cha. (1 Jọn 5:3) Kerẹ udje, avwanre vwo aghọghọ kidie a riẹnre nẹ e ruẹ obo re vwerhen Jihova oma. Siẹrẹ avwanre de nene iji rọyen je kẹnoma kẹ obo re brare, ọnana ghwa aghọghọ bro ra. Oma je vwerhen emekashe rehẹ odjuvwu na. (Luk 15:10) Oma je vwerhen avwanre siẹrẹ a da mrẹ iniọvo rẹ avwanre re fuevun. (2 Tẹsa. 1:4) Siẹrẹ akpọ rẹ Eshu nana da wanvrẹ nu, a cha mrẹ vwo dje aghọghọ avwanree kidie a fuevun kẹ Jihova. w24.11 12 ¶17-18

Bru ọke wọ cha fuẹrẹn ohwo na kri te wọ ke vuẹ nẹ wo vwo ẹguọnọ rọyen? Wo de brokpakpa vuẹ ohwo na, o se no nẹ wọ nabọ roro te tavwen wo ki brorhiẹẹn. (Isẹ 29:20) Ọ da rha dianẹ ohwo na mrẹvughe nẹ wo vwo ẹguọnọ rọyen jẹ wọ rha fobọ vuẹẹ, o se no nẹ wẹwẹ ohwo ro bibe. (Aghwo. 11:4) Karophiyọ nẹ, ọ dia e che vwo imuẹro nẹ a cha rọvwọn ohwo tavwen a ke vuẹẹ. Ẹkẹvuọvo jẹ o muwẹro nẹ wo muegbe vwọ kẹ orọnvwe na, nẹ ohwo ro chekọ na sa dia ohwo ru wọ sa rọvwọn. Kẹ, wo de rhe noso nẹ ohwo ọvo herọ ro vwo ẹguọnọ wẹn vwo? Ọ da dianẹ ohwo na je wee, vwẹ uruemu vwo djephia. Ọyen obo re chọre wọ vwọ nẹrhẹ ohwo na roro nẹ ovwan sa kọnphiyọ ohwohwo jẹ ọ dia ọyen obo ru wọ guọnọree.—Ẹfe. 4:25. w24.05 22-23 ¶9-10

Ihwo ra jẹreyọ re ghene fuevun ọvo yen Jesu che dede ro Uvie rẹ odjuvwu na. Kohwo kohwo ra jẹreyọ rọ rhọnvwe rhẹrẹẹ, e “che koko” ba itu ra jẹreyọ naa. (Mat. 24:31) Vwọba, o ji fo nẹ ihwo ri vwo iphiẹrophiyọ re vwọ dia otọrakpọ na, ni orhọesio rẹ ayen vwọ rhẹrẹ je fuevun ọkieje ghanghanre kidie o ji shekpahen ayen. Avwanre nabọ rhe riẹn Jihova re, ọtiọyena a sa vwẹroso ẹdjọeguo rọyen. Ọ da dianẹ Jihova jẹ ihwo evo reyọ vwẹ ọke rẹ avwanre na, ọyena dia ọdavwẹ rẹ avwanree. E jẹ a karophiyọ obo ri Jesu ta kpahen ewiowian rẹ unọke rẹ 11 vwẹ udje rẹ ogba rẹ ivaini na. (Mat. 20:1-16) Ihwo re ke se nẹ e rhe wiowian vwevunrẹ ogba rẹ ivaini na vẹ i re se kuko, osa vuọvo yen a hwa kẹ ayen. Ọtiọyena, o toro ọke ra vwọ sane ihwo ra jẹre na reyọọ, a cha hwosa rẹ uvie rẹ odjuvwu na kẹ ayen ọ da dianẹ ayen fuevun toba. w24.09 24 ¶15-17

Jesu phi udje ọgbagba rẹ obo re chirakon rẹ oshenyẹ phiyotọ. Roro kpahen oborẹ ihwo rẹ orua vẹ ihwo efa ruro. Ihwo rẹ orua rọyen ri segbuyotaa vuẹrẹ nẹ uyovwin rọyen gbaree, ilori rẹ ẹga na je tanẹ ẹgba rẹ Idẹbono yen ọ reyọ vwo ruiruo, isodje ri Rom vwerọ jehwẹ, ayen gboja kẹ re, ukuotọ rọyen ayen da teyọn hwe. (Mak 3:21, 22; 14: 55; 15:16-20, 35-37) Dedena, Jesu chirakon rẹ oshenyẹ yena eje ababọ rẹ orukeri. Die yen e yono vwo nẹ udje rọyen rhe? (1 Pita 2:21-23) Jesu phi udje ọgbagba rẹ oborẹ avwanre ru phiyotọ siẹrẹ e de shenyẹ avwanre. Ọ riẹn ọke ro fori rọ vwọ ta ota, rọ je vwọ fọ gbiẹi. (Mat. 26:62-64) Ọkievo re vwo mu efian banrọ, ọ kpahen ota vuọvoo. (Mat. 11:19) Ọke rọ vwọ kpahen ota dede, o yivwanro kpahen ihwo re vwọsuọ yẹrẹ djẹ uguegue mu ayeen. w24.11 4-5 ¶9-10

De vwẹ ẹwẹn roro nẹ wọ kẹ ohwo okẹ ọghanghanre ọvo ro ji fo. Mavọ yen oma che ru we siẹrẹ ohwo na de do phiyọ idọrọ je kpairoro vrẹ vwẹ etiyin! Vwọ vrẹ ọyena, oma cha vwerhen owẹ ọ da dianẹ ohwo na reyọ okẹ wọ kẹ rẹ na vwo ruiruo ji dje ọdavwaro kpahọn. Die yen ẹkpo na? Jihova vwẹ Ọmọ rọyen kẹ avwanre. Mavọ yen oma cha vwerhen Jihova te siẹrẹ e de dje ọdavwaro kpahen okẹ rọ vwọ kẹ avwanre na ji te ẹguọnọ rọyen, rọ nẹrhẹ o ru ọrhuẹrẹphiyotọ rẹ ọtanhirhe na! (Jọn 3:16; Rom 5:7, 8) Ọke vwọ yanran na, a sa vwẹ ẹro okueku vwo ni okẹ rẹ ọtanhirhe na. E de ru ọtiọyen, kọ ghwa họhọ nẹ e do okẹ rẹ Ọghẹnẹ na phiyọ evunrẹ idọrọ. Oma vwerhen avwanre a ka vwọ reyọ vwọ kẹ avwanre, jẹ a da kpairoro vrẹ. Rere a sa vwọ vrẹ abọ rẹ emu ọtiọyen, ofori nẹ a vwẹ ọkieje vwo dje ọdavwaro phia kpahen oborẹ Ọghẹnẹ vẹ Kristi ru kẹ avwanre. w25.01 26 ¶1-2

Ohwo ro kurhẹriẹ obọ che se muwan je ga kerẹ ọkpakoo. Dede nẹ ọ dia ikpe rẹ ohwo vwo bromaphiyame re yen e nẹ a ke vwẹ ohwo muẹ ọkpakoo, wọ je guọnọ ọke wo se vwo yerin te Onenikristi ro tedje. Tavwen a ke vwẹ owẹ vwo mu ọkpako, o fori nẹ wo djephia kerẹ Jesu nẹ wẹwẹ ohwo rọ vwomakpotọ, rọ hẹrhẹ Jihova vẹ erhiorin nẹ ọ kẹ wẹ kiruo kiruo vwevwunrẹ ukoko na. (Mat. 20:23; Fil. 2:5-8) Wo se djephia nẹ wẹwẹ ohwo rọ fuevun womarẹ wo vwo tinkamuẹ Jihova vẹ iwan rẹ ọvwata rọyen ji nene odjekẹ rẹ ukoko rọyen vwọphia. Baibol djere phephẹn nẹ iniruo dia ihwo ri muwan rẹ ayen vwo yono. Kẹ, ọnana mudiaphiyọ nẹ wọ nabọ tẹn ona obo ra ta ota vwẹ azagba? Ẹjo. Dede nẹ ekpako buebun ghwa tẹn ona rẹ obo ra ta ota vwẹ azagbaa, ayen nabọ tẹn ona rẹ obo re ruẹ uyono vwẹ aghwoghwo na kugbe ọke rẹ ayen da kọn bru iniọvo na ra. w24.11 23-24 ¶14-15

Ọ da dianẹ wọ mrẹ ẹkpo ọvo vwẹ Baibol na ru wo vwo ẹruọ rọyeen, ru ehiahiẹ. Ọtiọyena, gba vwẹ ẹdẹ na eje vwo roro kpahen obo ru wọ mrẹre kugbe obo ro yono uwe kpahen Jihova, Ọmọ rọyen, kugbe ẹguọnọ rayen kpahen owẹ. (Une 119:97) Wo jẹ ofu dje we wọ rha mrẹ orọnvwọn kpokpọ yẹrẹ ọ rọ vwerhoma kọke kọke wo de chidia se yẹrẹ ruẹ ehiahiẹẹ. Ọ ghwa họhọ nẹ wọ pha kerẹ ohwo rọ guọnọ oro. Ihwo re guọnọ oro vwẹ erhiorin ghwọrọ inọke yẹrẹ ẹdẹ buebun tavwen ayen ke mrẹ oro ro te emuọvoo. Dedena, oma bẹn ayeen, ayen nabọ frẹkotọ guọnọ kidie ayen riẹn oborẹ oro tutuno ghanre te vwọ kẹ ayen. Eriyin ọ je hepha nẹ orọnvwọn kpokpọ re yono mrẹ vwẹ Baibol na ghanre vrẹ oro dibidibi! (Isẹ 8:10) Ọtiọyena, vwo erhiorin wo ji tinkamu ọrhuẹrẹphiyotọ rẹ isese ri Baibol wẹn.—Une 1:2. w25.01 25 ¶14-15

Jihova guọnọre nẹ e vwo owenvwe ra vwọ reyọ vwo ghovwo ihwo ri gbe avwanre ku. (Une 86:5; Luk 17:4; Ẹfe. 4:32) Ivun se miovwo avwanre mamọ fikirẹ oborẹ ohwo tare yẹrẹ obo ro ru avwanre, ma rho ọ da dianẹ ọyen ohwo rẹ orua yẹrẹ ugbeyan rọ kẹrẹ avwanre mamọ. (Une 55:12-14) Ọkievo, a sa reyọ ọmiaovwẹ rẹ avwanre rioja rọyen vwo dje adjara re vwo duvwun ohwo. (Isẹ 12:18) Ọkievo, avwanre sa davwẹngba vwo dion phiyọ oma yẹrẹ kpairoro vrẹ ivun miovwe na. Jẹ e de ru ọtiọyen, ọ pha kerẹ ohwo ra vwẹ aphia vwo duvwun rọ je yanjẹ aphia na vwo vwẹ asan re duvwun ru na. Vwẹ idjerhe vuọvo na, avwanre rhẹro rọyen nẹ ọmiaovwẹ na che no siẹrẹ e de gbobọnyẹẹ. Siẹrẹ ohwo de gbe avwanre ku, ophu yen ke mu avwanre. Baibol na tare nẹ e se muophu. Ẹkẹvuọvo, o si avwanre orhọ nẹ e jẹ ophu na krẹ gan nọọ. (Une 4:4; Ẹfe. 4:26) Diesorọ? Kidie ophu ghwa erhuvwu chaa. (Jems 1:20) Ọ bẹn re vwo sun ophu ro muẹ ohwo, ẹkẹvuọvo avwanre eje vwo ẹgba re vwo si ophu nẹ evun kidie oborẹ emu da ohwo te sa nẹrhẹ e ruẹ obo ri je fo. w25.02 15 ¶4-6

Jesu dje ughẹnghẹn rọ herọ re vwo koko igho jẹ e ‘feri vwẹ ẹro rẹ Ọghẹnẹẹ.’ (Luk 12:16-21) Ohwo vuọvo riẹn oborẹ odẹ cha ghwa rhee. (Isẹ 23:4, 5; Jems 4:13-15) Kerẹ idibo ri Jesu avwanre se hirharoku oka rẹ obẹnbẹn ọvo. Jesu tare nẹ a ke dia idibo rọyen, e muegbe re vwo “siobọnẹ” kemu kemu rẹ avwanre vwori. (Luk 14:33) Inenikristi rẹ ẹgbukpe ujorin rẹsosuọ vwẹ Judia vwo owenvwe rẹ ayen vwo siobọnẹ kemu kemu rẹ ayen vwori vẹ aghọghọ. (Hib. 10:34) Vwẹ ọke rẹ avwanre na, ekuakua akpeyeren va iniọvo avwanre buebun abọ kidie ayen rhọnvwe bicha usuon rẹ akpọ naa. (Ẹvwọ. 13:16, 17) Die yen vwẹ ukẹcha kẹ ayen vwo ru ọtiọyen? Ayen vwẹroso ive ri Jihova kakare rọ tare nẹ: ‘O vwo ọke vuọvo me cha vwọ yanjẹ uwe vwoo, o vwo ọke vuọvo me cha vwọ kpairoro vrẹ wẹẹ.’ (Hib. 13:5) Ọtiọyena, avwanre davwẹngba rẹ avwanre eje vwọ jiroro kpahen obaro na, ọ da tobọ dianẹ obo re rhẹro rọyeen te avwanre oma, imuẹro herọ nẹ Jihova che bicha avwanre. w25.03 29 ¶13-14

Jihova rhẹro rọyen nẹ avwanre ọvo yen che ru obo re se vwo yerin tedjee. Iniọvo re ga kerẹ isuigodẹ kugbe iyono muegbe rẹ ayen vwọ vwẹ ukẹcha kẹ avwanre vwọ “dia imiragua” vwẹ ukoko na “bẹsiẹ iruemu rẹ avwanre sa vwọ dia kerẹ ọ rẹ ohwo ro tedje, kerẹ Kristi.” (Ẹfe. 4:11-13) Jihova je vwẹ ukẹcha vwọ kẹ avwanre womarẹ ẹwẹn ọfuanfon rọyen rere avwanre se vwo vwo “iroro ri Kristi.” (1 Kọr. 2:14-16) Vwọba, Ọghẹnẹ je vwẹ ẹwẹn ọfuanfon rọyen vwo mu ihwo ri si ẹbe ẹne rẹ Ikuegbe rẹ Akpeyeren ri Jesu, vwo dje obo ri Jesu rorori, obo rọ tare kugbe obo ro yeren akpọ wan kẹ avwanre, ro vwo ruiruo rẹ aghwoghwo rọyen vwẹ otọrakpọ na. Wọ da vwẹrokere obo ri Jesu roro emu ji ruẹ erọnvwọn wan, ku wọ sa yanmu ẹkẹn wo bru kẹ oma ru wo vwo yerin tedje kerẹ Onenikristi. Jẹ, e ki se yerin tedje, ofori nẹ e “yerin vrẹ uyono rẹsosuọ ro shekpahen Kristi” na. w24.04 4-5 ¶11-12

Kẹdi kẹdẹ yen avwanre bru erhiẹn. Erhiẹn evo rẹ avwanre brẹ pha lọlọhọ, kerẹ udje oborẹ avwanre cha re vwẹ urhiọke yẹrẹ ọke rẹ avwanre che vwo sherhẹn. Erhiẹn efa sa bẹn avwanre ebro. Erhiẹn nana se shepkahen oma kpokpọ avwanre, omavwerhovwẹn avwanre, ihwo rẹ avwanre vwo ẹguọnọ kpahen yẹrẹ ẹga avwanre. A guọnọre nẹ erhiẹn rẹ avwanre brẹ fierere kẹ avwanre vẹ orua avwanre. Ọ rọ ma ghanre, avwanre rhẹro nẹ erhiẹn avwanre cha ghwa omavwerhovwẹn rhe Jihova. (Rom 12:1, 2) Iroroẹjẹ ọghanghanre re se vwo bru omamọ orhiẹn yen a vwọ riẹn uyota rẹ erọnvwọn na eje. Diesorọ ọnana vwọ ghanre? Vwẹ ẹwẹn roro nẹ ohwo ọvo bru idọktọ ra kidie o vwo obẹnbẹn ọgangan ọvo. Idọktọ na che brorhiẹn rẹ obo ro che sivwin ohwo na wan jẹ ọ je rhe nọ enọ kpahen obo ri kpokpo ohwo na je fuẹrẹn nii? Ẹjo kakaka. Wo ji che bru omamọ erhiẹn siẹrẹ wọ da ka guọnọ uyota rẹ erọnvwọn na eje ri shekpahen ẹdia ru wọ hepha na. w25.01 14 ¶1-3

Die yen avwanre riẹn kpahen arodọnvwẹ ri Jihova? Idjerhe vọ yen o vwo djephia nẹ “ọ guọnọre nẹ ohwo vuọvo ghwọrọ-ọ”? (2 Pita 3:9) Roro kpahen obo ro gbe arodọnvwẹ kẹ ihwo evo ri ru imwemwu egangan. Ovie Devid ru imwemwu egangan, o gbe igberadja je dẹ ozighẹ. Dedena, Devid vwo kurhẹriẹ Jihova de gbe arodọnvwẹ kẹ ji vwo ghovwo. (2 Sam. 12:1-12) Ovie Manasse ru erọnvwọn ebrabra vwẹ akpeyeren rọyen vwẹ ikpe buebun. Dede nẹ imwemwu rọyen pha gangan, jẹ Jihova gbe arodọnvwẹ kẹ ji vwo ghovwo ọke ro vwo kurhẹriẹ. (2 Ikun 33:9-16) Idje nana karophiyọ avwanre nẹ Jihova gbe arodọnvwẹ vwẹ kẹdia kẹdia ro de fo nẹ o ru ọtiọyen. Ọ cha rhọvwọn ihwo tiọyena nẹ ushi kidie ayen riẹnre nẹ ayen ru imwemwu egangan ji kurhẹriẹ. w24.05 4 ¶12