March

Avwanre ji se vwẹ Baibol na kpahen evwata rẹ ihwo re rhoma dia irumwemwu. Kerẹ udje, Ovie Solomọn ọyen ọvo usun rayen. A nabọ yono vwẹ idjerhe rẹ Ọghẹnẹ, Jihova de ji bruphiyọ kẹ gbidiki; ẹkẹvuọvo, ọke vwọ yanran na ọ da ga eghẹnẹ rẹ efian. Ọnana da nẹrhẹ ophu mu Jihova mamọ je nẹrhẹ ẹgborho rẹ Izrẹl rioja ikpe ujorin buebun. Uyota, Baibol na tare nẹ Solomọn “da vwerhẹ kugbe esẹ rọye,” ọtiọyen ji te eshare re fuevun kerẹ Ovie Devid. (1 Ivie 11:5-9, 43; 2 Ivie 23:13) Kẹ, obo re shi Solomọn wan ọyen odjephia nẹ a cha rhọvwọn nushi? Baibol na ta ọtiọyeen. Evrẹnushi ọyen okẹ ro nẹ obọ rẹ Ọghẹnẹ ro vwo ẹguọnọ rhe. Ọ vwọ kẹ ihwo rọ guọnọre nẹ e ga ọyen bẹdẹ. (Job 14:13, 14; Jọn 6:44) Uphẹn yena che te Solomọn obọ? Jihova ọvo yen riẹn ẹkpahọnphiyọ na. Ẹkẹvuọvo, avwanre riẹnre nẹ Jihova che ru obo re gbare. w24.05 4 ¶9

Ọke rẹ avwanre vwọ vwomakpahotọ kẹ Jihova, avwanre ke rhe dia erhorha vwẹ utughẹ rọyen re vwo ru udje na. Ọtiọyena, avwanre vwo erọnvwọn eje ra guọnọre e se vwo sikẹrẹ Jihova phiyọ kugbe oyerinkugbe rẹ avwanre vẹ iniovo avwanre efa vwori re je dia erhorha ri Jihova. Utughẹ rọyen re vwo ru udje na, ọ dia asan ọvo ọyen ọ hephaa. Ọtiọyena, utughẹ na hẹ kasan kasan rẹ ihwo rọyen hepha. (Ẹvwọ. 21:3) Kẹ idibo ri Jihova re fuevun ri ghwure vwo? Kẹ a ghene sa tanẹ ayen erhorha vwẹ utughẹ ri Jihova? E! Diesorọ a sa vwọ ta ọtiọyen? Kidie Jihova karophiyọ ayen kerẹsiẹ a da mrẹ nẹ ayen je herọ yerẹn. Vwọ kpahen irivwin ri che vrẹn, Jesu tare nẹ: “Mosis dede dje ọnana phia vwẹ ikuegbe ro shekpahen umurhe ro vwo inwe na, ọke ro vwo se Jihova ‘Ọghẹnẹ rẹ Ebraham kugbe Ọghẹnẹ rẹ Aizik kugbe Ọghẹnẹ ri Jekọp.’ Ọyen Ọghẹnẹ, ọ dia ọ rẹ ihwo ri ghwuru-u, ẹkẹvuọvo ọ rẹ ihwo ri yerẹn, kidie vwọ kẹ, ayen eje yerẹn.”—Luk 20:37, 38. w24.06 3 ¶6-7

Zadọk choma ji muegbe kẹ ofovwin ọke ro vwo kpo Hebrọn. (1 Ikun 12:38) Ọ guọnọ nene Devid kpo ofovwin je chochọn rẹ Izrẹl vwo nẹ abọ rẹ ivwighrẹn rayen. Ọ sa dianẹ Zadọk tẹn ona rẹ ofovwin kerẹ isodjee, jẹ ọyen ohwo ro fiudugberẹ. Ihwo vọ yen Zadọk yono uduefiogbere mie? Eshare re goma ri ji fiudugberẹ yen riarierẹ phiyọ. Aphro herọọ nẹ o yono vwo nẹ udje rayen. Kerẹ udje, ọ mrẹ obo ri Devid fiudugberi ‘sun ihwo rẹ Izrẹl kpo ifovwin rayen,’ ọnana da nẹrhẹ ihwo rẹ Izrẹl ejobi bicha Devid vẹ udu rayen eje. (1 Ikun 11:1, 2) Ọkieje yen Devid vwọ vwẹroso Jihova nẹ ọ cha vwẹ ukẹcha kẹ ọyen vwọ họnre so ivwighrẹn rọyen. (Une 138:3) Ihwo efa herọ ri Zadọk yono uduefiogbere mie—ihwo kerẹ Jehoyada kugbe ọmọ rọyen Benaya rọ dia ọgbofovwin ji te isun 22 efa ri bicha Devid ọke rẹ ayen vwo phi ofovwin.—1 Ikun 11:22-25; 12:26-28. w24.07 3 ¶5-6

Sọl ri Tasọs ọyen obọdẹn rẹ ukọn vwọ kẹ idibo ri Jesu. Inenikristi buebun niro nẹ o ghwru sheri re, o che se kurhẹriẹ ọfaa. Ẹkẹvuọvo, Jesu riẹnre nẹ o se wene ji kurhẹriẹ. Ọ vẹ ọsẹ rọyen mrẹ erhuvwu rọhẹ oma ri Sọl. Jesu da ta: “Ọshare nana ochẹ re me sanere kẹ oma mẹ.” (Iruo 9:15) Jesu tobọ ru emu igbevwunu rọ nẹrhẹ Sọl kurhẹriẹ. (Iruo 7:58–8:3; 9:1-9, 17-20) Sọl ra rhe riẹn phiyọ ọyinkọn Pọl rhe vwọ dia Onenikristi nu, ọkieje yen o vwo dje ọdavwaro kpahen uruemu esiri vẹ arodọnvwẹ rẹ Jihova vẹ Jesu dje vwọ kẹ. (1 Tim. 1:12-15) Ọke rẹ Pọl vwo nyo kpahen obẹnbẹn rẹ ọfanrhiẹn ro do nene asan eje vwẹ ukoko ri Kọrẹnt, die yen o ruru? Obo ro ruru yono avwanre oborẹ Jihova dje ẹguọnọ phia siẹrẹ ọ da ghwọkuẹ idibo rọyen kugbe obo ro gbe arodọnvwẹ siẹrẹ ayen de kurhẹriẹ. w24.08 13 ¶15-16

Vwẹ ikpe ujorin evo re, Jihova de dje phephẹn ememerha oborẹ irumwemwu rẹ ihworakpọ se vwo sikẹrẹ. Ebẹl rọ dia ọmọ rivẹ rẹ Adam vẹ Ivi, ọyen ohwo rẹsosuọ ro ke se Jihova gbuyota rẹ ayen vwo gbevwọsuọ vwẹ Idẹn nu. Kidie nẹ Ebẹl vwo ẹguọnọ ri Jihova ọ je guọnọ ru obo re vwerhọn oma, o de ze izobo rere o se vwo sikẹrẹ. Kerẹ osuigodẹ, ọ da reyọ imigodẹ rọyen evo ji hwe ayen, ọ da vwẹ ayen vwo ze izobo vwọ kẹ Jihova. Mavọ yen oma ru Jihova? O de “mu ọghọ kẹ izobo rẹ Ebel.” (Jẹn. 4:4) Jihova ji vwo omavwerhovwẹn kpahen ọkpọ rẹ izobo ọtiọyen rẹ ihwo efa ri vwo ẹguọnọ rọyen re je vwẹrosuọ ruru kerẹ Noa. (Jẹn. 8:20, 21) Jihova ji djephia nẹ, ihworakpọ re gbaree sa mrẹ aroesiri rọyen ji sikẹrẹ ọyen womarẹ izobo ọtiọyen ro rhiabọreyọ na. w24.08 3 ¶5-6

Oshenyẹ sa da avwanre mamọ, ọ je sa nẹrhẹ ofu dje ohwo. (Aghwo. 7:7) Idibo ri Jihova re fuevun, kerẹ Job kugbe Habakọk, ji vwo ẹwẹn ọtiọyen. (Job 6:2, 3; Hab. 1:1-3) Re vwo vwo ẹwẹn ọtiọyen dia obo re braree, jẹ o ji fo nẹ a jomaotọ kpahen obo re ruẹ vwẹ ẹdia ọtiọyena, e vwo jẹ obo re chọre eruo rọ sa nẹrhẹ ẹdia na braphiyọ. Siẹrẹ a da mrẹ nẹ ihwo ri shenyẹ ihwo efa e ru ayen emu vuọvoo, avwanre se no nẹ erere herọ e vwo ru obo ri yovwiriin. Roro kpahen ọbuine na, rọ mrẹ evwata re shenyẹ jẹ irumwemwu ri shenyẹ ayen na yen akpọ yovwẹn kẹ. Ọ da ta: “Nighere, enana ihwo umwemwu na; kẹdẹ kẹdẹ ayen dia vwẹ ufuoma.” (Une 73:12) Oshenyẹ rọ mrẹre nẹrhẹ ofu dje te ẹdia ro de roro nẹ erere herọ ra vwọ ga Jihovaa, ọ da ta: “Ẹkẹvuọvo ọke mi vwo roro obo me vwọ sa riẹn ọnana, ọ da rhe dia iruo rẹ oma ẹghwọrọ kẹ vwẹ.”—Une 73:14, 16. w24.11 3 ¶5-7

Avwanre vwẹ urinrin vwọ kẹ Jihova fikirẹ ọghọ okokodo e muẹ vwọ kẹ. O vwo erọnvwọn buebun re sorọ avwanre vwo muọghọ kẹ. Jihova yen ọromevwẹgba na; ẹgba rọyen basaan. (Une 96:4-7) Erọnvwọn rọ mare nabọ dje aghwanre rọyen phia. Obọ rọyen yen arhọ avwanre Nurhe, ọ je vwẹrote avwanre. (Ẹvwọ. 4:11) Ọyen ohwo rọ fuevun. (Ẹvwọ. 15:4) Kemu kemu ro ruẹ eje efẹrọvo, o ji ruẹ nene ive rọyen ọkieje. (Jos. 23:14) A gbe ta ọmraro Jerimaya vwọ ta kpahen Jihova nẹ: “Vwẹ uherevie rẹ ẹgborho rẹ ọvwẹghwanre na ejobi kugbe evun rẹ uvie rayen na ejobi Ọ rọ họhọ owẹ herọ-ọ”! (Jer. 10:6, 7) Ọtiọyena, o vwo erọnvwọn buebun re sorọ o vwo fo nẹ avwanre muọghọ vwọ kẹ Ọsẹ avwanre rọhẹ odjuvwu. Ẹkẹvuọvo, ọ dia ọghọ avwanre ọvo yen Jihova muwan rọyeen—ọ je guọnọ nẹ e vwo ẹguọnọ rọyen. Ọ rọ ma ghanre, avwanre vwẹ urinrin kẹ Jihova kidie avwanre vwo ẹguọnọ rọyen. w25.01 3 ¶5-6

Ihwo re vwọsua Ọghẹnẹ davwẹngba ayen vwo miovwo erhuvwu rẹ ukoko rọyen ruẹ. Kerẹ udje, avwanre yonori vwẹ Baibol na nẹ, Jihova guọnọre nẹ ihwo re vwẹ ẹga kẹ ọyen ru ọtiọyen vwẹ idjerhe rọ rhọnvwephiyọ, dia fuanfon vwọrẹ ugboma kugbe ọ rẹ uruemu. Ọ tare nẹ e si kohwo kohwo ro vwobọ vwẹ uruemu ri jẹfuọn rọ rhọnvwe kurhẹriẹẹ nẹ ukoko na. (1 Kọr. 5:11, 12; 6:9, 10) Avwanre ruẹ nene iji ri Baibol yena. Fikirẹ ọnana ihwo re vwọsua ke tanẹ avwanre vwo ghovwo ihwoo, a vwẹ ayen guẹdjọ, e ji vwo ẹguọnọ rayeen. Ofori a vwọ riẹn asan rẹ ẹvwọsuọ nana nẹ cha. Eshu yehẹ obuko rẹ efian re guẹn nyẹ ukoko na. Ọyen hẹ “ọsẹ rẹ efian na.” (Jọn 8:44; Jẹn. 3:1-5) Ọtiọyena, e jẹ e rhẹro rọyen nẹ Eshu cha reyọ ivwighrẹn avwanre vwo titi ikuegbe rẹ efian rẹ ayen guẹn nyẹ ukoko ri Jihova. w24.04 10-11 ¶13-14

Ukpokpogho rode na da tobọ tonphiyọ nu, ọ sa dianẹ ihwo evo re mrẹ oghwọrọ ri “Babilọn Rode” cha karophiyọ nẹ Iseri ri Jihova tarọ jovwo nẹ emu ọtiọyena cha phia. Kẹ ihwo evo re mrẹ obo re phiare na se wene ẹwẹn rayen? (Ẹvwọ. 17:5) Emu ọtiọyen da phia, ọ cha họhọ obo re phiare vwẹ Ijipt vwẹ ọke ri Mosis. Karophiyọ nẹ ọguagua rẹ “ihwo efa buebun” vwomaba ihwo rẹ Izrẹl ọke rẹ ayen vwo vrẹn nẹ Ijipt. Ọ sa dianẹ oborẹ ayen mrẹre ọke rẹ Mosis vwọ reyọ Etiekọ Ihwe na vwọphia yen nẹrhẹ ayen vwo esegbuyota kpahen Jihova. (Ẹyan. 12:38) Ọkpọ rẹ orọnvwọn tiọyen da vwomaphia siẹrẹ a da ghwọrọ Babilọn Rode nu, ivun che miovwo avwanre nẹ ihwo evo vwomaba avwanre ọmọke tavwen oba na ke rhe? Ẹjo kakaka! Avwanre guọnọ vwẹrokere iruemu rẹ Ọse avwanre rọhẹ odjuvwu, rọ dia “Ọghẹnẹ rẹ arodọnvwẹ, rọ re ehrọre, rọ fobọ muophu-u, rọ vọnre vẹ ẹguọnọ ro jẹ rhẹriẹ kugbe uyota.”—Ẹyan. 34:6. w24.05 11 ¶12-13

Die yen sa phia ọ da dianẹ e rhe nene “uwan rẹ eta re vọnre vẹ erere” naa? Roro kpahen udje nana. Vwẹ ẹgbukpe ujorin rẹsosuọ, Inenikristi evo ki guẹn nẹ ẹdẹ ri Jihova na te re. Ọ sa dianẹ o vwo ileta ọvo ri Pọl siri rẹ ayen rorori nẹ ọ ta ọtiọyen. Ukperẹ ayen vwọ nabọ frẹkotọ guọnọ otọ rẹ ota na, Inenikristi evo vwẹ Tẹsalonaika de se efian na gbuyota ayen da je vuẹ ihwo efa kpahọn. Iroro rha phiẹn ayeen ọ da dianẹ ayen karophiyọ obo ri Pọl yono ayen ọke rọ vẹ ayen vwọ herọ. (2 Tẹsa. 2:1-5) Pọl vuẹ iniọvo na nẹ ayen se kemu kemu rẹ ayen nyori gbuyotaa. Rọ sa vwọ vwẹ ukẹcha kẹ ayen vwẹ obaro na, Pọl de ku ileta rivẹ ro si rhe ihwo ri Tẹsalonaika phiyọ vẹ eta nana: “Ọnana uyeren mẹ, rẹ omẹvwẹ ri Pọl vwẹ obọ mẹ vwo si, rọ dia oka rọhẹ kọbe kọbe ri mi siri; enẹ yen mi siẹ ẹbe mẹ wan.”—2 Tẹsa. 3:17. w24.07 12 ¶13-14

Erọnvwọn vwọ braphiyọ braphiyọ vwẹ Judia na, Inenikristi ri Hibru guọnọ akoechiro. Dede nẹ evo usun rẹ Inenikristi ri Hibru ke hirharoku omukpahen ọgangan vwẹ obuko re, jẹ buebun rayen rhiabọdede ẹga rẹ Inenikristi ọke rẹ ayen vwo vwo ufuoma. Ọyinkọn Pọl karophiyọ ayen nẹ, dede nẹ ayen chirakon rẹ edavwini fikirẹ esegbuyota rayen, jẹ ọ rayen te ọ ri Jesuu, ọtiọyena ofori nẹ ayen choma rẹ ayen vwọ fuevun toba kirobo rẹ Jesu ruru. (Hib. 12:4) Ọke rẹ ẹga rẹ Inenikristi vwọ hrabọ ro asan eje re, ophuophu kọyen muẹ ihwo ri Ju re vwọsua na, ọnana kọ nẹrhẹ ayen si ọrhan. Ikpe evo re wanre, ihwo ri Ju re vrẹ 40 “duvwun iyorin kẹ oma rayen nẹ, kpẹsiẹ rẹ ayen hwe Pọl nu-u, ayen cha riemu yẹrẹ da ame-e.” (Iruo 22:22; 23:12-14) Dede nẹ e che vwo utuoma ji mukpahen Inenikristi na, ayen ji che siomakoko vwọ ga ẹga, ghwoghwo iyẹnrẹn esiri na, ji ru esegbuyota rayen gan. w24.09 12 ¶15

Jọn ọyen odibo ri Jesu vwo ẹguọnọ rọyen mamọ. (Mat. 10:2) Jọn nene Jesu ọke ro vwo ruiruo rẹ aghwoghwo rọyen, o rhiẹromrẹ igbevwunu ro ruru ji tinkamuo vwẹ ọke rẹ ebẹnbẹn. Ọ mrẹ Jesu ọke re vwo hwe kugbe ọke ra vwọ kparọ nushi nu. O ji rhiẹromrẹ ọke ra vwọ vwẹ ukoko rẹ Inenikristi na vwo mu obọ rhi te ọke rọ vwọ reyọ awọ vwo muotọ vwẹ ẹgbukpe ujorin rẹsosuọ. Ọ je mrẹ ọke re vwo ghwoghwo iyẹnrẹn esiri na kẹ “ihwo eje rehẹ otọ rẹ odjuvwu na.” (Kọl. 1:23) Ọke ri Jọn vwọ ghwo mamọ kugbe ọke rẹ ughwu rọyen vwo siẹkẹrẹ re, e de brọghọ phiyọ oma nẹ o si ẹbe evo vwẹ Baibol na. O de si ọbe rọ vwerhoma rẹ “ẹvwọphia rẹ Ọghẹnẹ vwọ kẹ Jesu Kristi.” (Ẹvwọ. 1:1) Jọn ji si ọvo usun rẹ ẹbe rẹ ikuegbe rẹ akpeyeren ri Jesu kugbe ileta erha ra vwẹ odẹ rọyen se. O si ileta rerha rọyen vwo rhe oniọvo Gayọs, ro vwo ẹguọnọ kpahen kerẹ ọmọ rọyen. (3 Jọn 1) Oborẹ ọshare nana rọ ghwore rọ je fuevun na siri vwẹ ọbọngan vwọ kẹ idibo ri Jesu vwẹ awanre ji te avwanre re herọ nonẹna. w24.11 12 ¶15-16

Ọshare ro vwo ẹguọnọ rẹ aye rọyen vwẹrote ji no ghanghanre. O no kerẹ okẹ ro nẹ obọ ri Jihova rhe. (Isẹ 18:22; 31:10) Ọtiọyena, o muọghọ ji dje uruemu esiri kẹ, tobọ te ọke rẹ ayen ihwo ivẹ de nene ohwohwo vwerhẹn. Ọ cha gba vwo vwobọ vwẹ ehware rọ guọnọree, rọ cha nẹrhẹ o nẹ oma rọyen kueku yẹrẹ rọ che kpokpo ẹwẹn rọyeen. Ọshare na je cha davwẹngba vwọ sẹro rẹ ẹwẹn obrorhiẹn rọ fonro vwẹ obaro ri Jihova. (Iruo 24:16) Eshare, ovwan se vwo imuẹro nẹ Jihova mrẹ, o ji vwo ọdavwaro kpahen kemu kemu ovwan ruẹ vwo muọghọ kẹ eya rẹ ovwan vwẹ kẹdia kẹdia rẹ akpeyeren. Davwẹngba vwo brọghọ phiyọ oma womarẹ wo vwo dje ẹguọnọ, ọghọ kugbe uruemu esiri vwọ kẹ, wọ je kẹnoma kẹ erọnvwọn ri dje ọghọ phiaa. Wo de ru ọtiọyen jẹ wo djephia nẹ wo vwo ẹguọnọ rọyen, nẹ wo ji no ghanghanre. Wo de muọghọ kẹ aye wẹn, ku wọ cha sẹro rẹ oyerinkugbe rọ ma ghanre—rọ dia oyerinkugbe wẹ vẹ Jihova vwori.—Une 25:14. w25.01 13 ¶17-18

Orọnvwọn ọvo re vwo vughe ofẹnẹ rẹ idibo ri Jihova vẹ Inenikristi rẹ efian yen oruru rayen kpahen iruo aghwoghwo na. Die yen sa cha avwanre uko vwọ sẹro yẹrẹ ru oruru avwanre vwọ kpahen iruo aghwwoghwo na ganphiyọ? E se yono vwo nẹ udje ri Jesu kpahen obo re se vwo vwo oruru vwẹ iruo aghwoghwo na. Ọke ro vwo ruiruo rẹ aghwoghwo na, ọ vwẹ uphẹn kẹ oruru rọyen nẹ o shekpotọọ. Vwọrẹ uyota, ọke vwọ yanran na, o de muomaphiyọ iruo aghwoghwo na kpobarophiyọ. Kerẹ ohwo rọ vwẹrote ivaini rọ ghwọrọ ẹgbukpe erha soso vwọ vwẹrote urhe rẹ ifigi rọ rhọnvwe mọ ubi vuọvoo, ọtiọyen Jesu je ghwọrọ omarẹ ẹgbukpe erha vwo ghwoghwo kẹ ihwo ri Ju, buebun rayen rhọnvwe nyoo. Ẹkẹvuọvo, kirobo rẹ ohwo rọ vwẹrote ivaini na kpairoro vrẹ urhe rẹ ifigi na naa, ọtiọyen Jesu je kpairoro vrẹ ihwo naa yẹrẹ siobọ rẹ iruo aghwoghwo na kpotọọ. (Luk 13:6-9) E de yono nẹ obo ro yonori je vwẹrokere obo ro ruru, ọ cha vwẹ ukẹcha kẹ avwanre vwo vwo oruru nonẹna. w25.03 14-15 ¶1-4

Kẹ, wo de rhe no nẹ ohwo ọvo herọ rọ sa dia ọrivẹ rẹ orọnvwe vwo? Ofori wọ vwọ vuẹ ugege yena nẹ wo vwo ẹguọnọ rọyen? Baibol na tare nẹ ọvwaghwanre ohwo roro emu te tavwen o ki ruẹ. Ọtiọyena ọyen emu rẹ aghwanre wo vwo gbẹrophiyotọ vughe obo ro ruẹ erọnvwọn vẹ obo ro nene ihwo efa yerẹn wan tavwen wọ ke vuẹ nẹ wo vwo ẹguọnọ rọyen. Mavọ yen wọ sa vwọ reyọ aghwanre vwo vughe ohwo ochekọ na o vwo jẹ ẹriẹn? Wo se vwo oniso rẹ oka rẹ ohwo rọ hepha, iruemu rọyen kugbe oyerinkugbe rọ vẹ Jihova vwori vwẹ emẹvwa yẹrẹ asan ra da riakpọ kuẹgbe. Amono yen igbeyan rọyen, kẹ die yen ọ ta ota kpahan? (Luk 6:45) Obo rọ vwọ tua vẹ ọ wẹn shephiyọ ọvo? Wọ sa nọ ekpako ukoko rọyen yẹrẹ iniọvo ri tedje re nabọ vughe oka rẹ ohwo rọ hepha. (Isẹ 20:18) Wọ sa nọ kpahen iruemu rọyen. (Rutu 2:11) Ru wo vwo vughe ohwo na phiyọ ye, kẹnoma kẹ obo re cha nẹrhẹ oma vuọ. Ọtiọyena, muọghọ kẹ, wo siẹkẹrẹ ganọọ, wo ji gbugbon rọyeen. w24.05 22 ¶7-8

Ekpako na brokpakpa brorhiẹn nẹ orumwemwu che se kurhẹriẹẹ. Ihwo evo se kuẹrhẹriẹ vwẹ echidiotọ rẹsosuọ rayen vẹ ekpako na, jẹ vwọ kẹ ihwo efa ọnana sa reyọ ọke. Ọtiọyena, ekpako na sa rhuẹrẹ ọke phiyọ ayen vẹ ọyen se vwo chidia vrẹ obọ ọvo. Ọ sa dianẹ echidiotọ rẹsosuọ rayen na da wan nu, oniọvo ro ru chọ na cha nabọ frẹkotọ roro kpahen obo ra vuẹrẹ na. Ọ sa vwomakpotọ nẹrhovwo rhe Jihova. (Une 38:18) Ọtiọyena, vwẹ echidiotọ efa rẹ ayen che ru, ohwo ro ru umwemwu na se vwo ẹwẹn rọ fẹnẹ ọ ro vwori vwẹ echidiotọ rẹsosuọ na. Ekpako na che dje ẹguọnọ vẹ erorokẹ phia ayen sa vwọ vwẹ ukẹcha vwọ kẹ orumwemwu na vwo kurhẹriẹ. Ayen rhẹro je nẹrhovwo nẹ Jihova che bruba ẹgbaẹdavwọn rayen rere orumwemwu na se vwo brevun kpiroro ji kurhẹriẹ.—2 Tim. 2:25, 26. w24.08 22-23 ¶12-13

Jihova guọnọre nẹ ohwo vuọvo ghwọrọọ! Ọ guọnọre nẹ ọyen vẹ irumwemwu rhuẹrẹ kugbe. (2 Kọr. 5:20) Kọyensorọ, vwẹ ikuegbe rẹ ihworakpọ, abọ buebun yen Jihova bọrọ ihwo rọyen nẹ ayen kurhẹriẹ ji rhivwin rhe. Ọyen okpuphẹn rode ekpako rẹ ukoko vẹ Jihova vwọ wian kugbe vwọ vwẹ ukẹcha kẹ irumwemwu vwo kurhẹriẹ. (Rom 2:4; 1 Kọr. 3:9) Vwẹ ẹwẹn roro aghọghọ rọhẹ odjuvwu siẹrẹ irumwemwu de kurhẹriẹ! Kọke kọke Ọsẹ avwanre rọhẹ odjuvwu vwọ mrẹ aghọghọ siẹrẹ ogodẹ ro bo ghwru de rhivwin rhe ukoko na. Siẹrẹ avwanre de roro kokodo kpahen arodọnvwẹ, ehrọre kugbe ẹse ri Jihova re muwan rọyeen, ẹguọnọ rẹ avwanre vwo kpahọn ko kodophiyọ.—Luk 1:78. w24.08 31 ¶16-17

Jesu da vwẹ uphẹn kẹ ihwo na nẹ ayen vwẹ ọyen vwo mu ovie, jẹ o phi oma phiyọ oseghe rẹ usuon rẹ ihwo ri Ju rehẹ otọ rẹ usuon ri Rom. Jesu de “siomareyọ kpo ugbenu na.” Jesu vwobọ vwẹ oseghe rẹ usuoon, dede nẹ ihwo vuẹrẹ nẹ o ru ọtiọyen. Ọnana uvi rẹ uyono vwọ kẹ avwanre! Vwọrẹ uyota, ihwo cha sa vuẹ avwanre nẹ a vwẹ ibrẹdi vwọ ghẹrẹ ihwo buebun yẹrẹ sivwin ihwo vwọrẹ igbevwunuu; yẹrẹ davwẹngba vwọ vwẹ avwanre mu ovie yẹrẹ osun rẹ ẹgborhoo. Ẹkẹvuọvo ayen sa vuẹ avwanre nẹ a vwomaba oseghe rẹ usuon womarẹ e vwo votu yẹrẹ bicha ohwo rẹ ayen guọnọre nẹ o sun. Jẹ, udje ri Jesu phẹnre. Ọ tobọ tanẹ: “Uvie mẹ dia ẹbẹre ọvo rẹ akpọ nana-a.” (Jọn 17:14; 18:36) Nonẹna, Inenikristi davwẹngba vwọ vwẹrokere iruemu ri Jesu je davwẹngba vwo vwo iroro rọyen. Avwanre biẹcha, soseri kpahan je nẹrhovwo kpahen Uvie yena.—Mat. 6:10. w24.12 4 ¶5-6

Wo vwo yono na, gbẹn idjerhe rẹ obo wọ sa vwọ reyọ obo ru wo yono na vwo ruiruo. Kerẹ udje, vwẹrokere orhiẹn ọsoso ri Jihova womarẹ wo vwo jẹ ihwo e no ruẹ. Vwẹrokere ẹguọnọ rẹ Jesu vwo kpahen Ọsẹ rọyen kugbe ihwo efa vẹ owenvwe ru wọ vwọ rioja fikirẹ odẹ ri Jihova je vwẹ oma ze vwọ kẹ iniọvo na. Vwọba, vwẹrokere Jesu womarẹ wo vwo soseri kẹ ihwo efa rere ayen ji se vwo vwo uphẹn vwo rhiabọreyọ okẹ rẹ ọtanhirhe ri Jihova na. E vwo vwo ẹruọ ji dje ọdavwaro kpahen ọtanhirhe na phiyọ ye, ẹguọnọ rẹ avwanre kpahen Jihova vẹ Ọmọ rọyen kọ cha rha ganphiyọ. Ọtiọyena, ẹguọnọ rayen kpahen avwanre kọ je cha ganphiyọ. (Jems 4:8) E gbe jẹ a reyọ kemu kemu rẹ Jihova vwọ kẹ avwanre vwo yono kpahen ọtanhirhe na ọkieje. w25.01 25 ¶16-17

A je sa fan eta rẹ isese re kẹdi kẹdẹ ri nonẹna nẹ: Wẹwẹ yen “si imwemwu mẹ eje vwo nẹ obaro wẹn.” Udje nana djerephia nẹ Jihova do imwemwu rẹ ihwo ri kurhẹriẹ kufia, ọ rha karophiyọ ayeen. A sa rhoma vwanriẹn eta ri Hẹzikaya na vwẹ idjerhe ọtiọna: “Wo ru [imwemwu mẹ] kerẹsiẹ a da mrẹ nẹ e phiaree.” Baibol na je rhoma djisẹ rẹ ẹkpo nana fiotọ vwẹ Maika 7:18, 19. Etiyin na tare nẹ Jihova do imwemwu rẹ avwanre phiyọ evunrẹ abadi. Vwẹ ọke rẹ awanre, a vwọ rhoma mrẹ orọnvwọn ra kpare do phiyọ evunrẹ abadi pha bẹnbẹn. Womarẹ idje nana ra ta ota kpahen na, Baibol na vuẹ avwanre nẹ Jihova de vwo ghovwo avwanre, o si imwemwu rẹ avwanre no karekare, i rhe kpokpo avwanre ẹwẹn ọfaa. Devid tare nẹ, “omavwerhovwẹn dia vwọ kẹ ihwo ra vwẹ irueru ri jurhi ẹyọnrọn rayen vwo ghovwo, re ji phoro imwemwu rayen.” (Rom 4:7) Vwọrẹ uyota ọyena ghini evwoghovwo re karekare! w25.02 9 ¶7-8

O vwo iparadaisi ọvo vwẹ otọrakpọ na nonẹna rọ vọnre vẹ ihwo ri ruẹ obo ri yovwirin. Ọ vọnre vẹ iduduru rẹ ihwo rẹ oma vwerhan ri ji vwo ufuoma. Ihwo rehẹ evunrẹ iparadaisi nana brorhiẹn nẹ ayen che vrẹn noo. Ayen je guọnọ nẹ ihwo buebun rhe vwomaba ayen vwẹ asan rẹ oghẹresan nana. Ọrhọ yen asan yena? Ọyen iparadaisi re vwo ru udje na! Dede nẹ Eshu hirhe akpọ na phiyọ asan rọ vọnre vẹ imuoshọ rẹ ihwo de vwo utuoma kpahen irivẹ rayen rọ je vọn vẹ umwemwu, jẹ ọ vwerhoma nẹ Jihova rhuẹrẹ asan phiyọ rẹ ihwo rọyen de yerẹn kuẹgbe vwọrẹ ufuoma kugbe ẹguọnọ. (1 Jọn 5:19; Ẹvwọ. 12:12) Ọghẹnẹ rẹ avwanre rọ vọnre vẹ ẹguọnọ na mrẹ erọnvwọn ebrabra re phia vwẹ akpọ na, kọyensorọ o vwo ruo rere ihwo re vwẹ ẹga kẹ vwo vwo ofuvwegbe je ga vẹ omavwerhovwẹn. Baibol na djisẹ rẹ iparadaisi re vwo ru udje na kerẹ asan rẹ “odjahọ” kugbe “ogba re ku ame ku.” (Aiz. 4:6; 58:11) Womarẹ ukẹcha ri Jihova, oma vwerhen ihwo rehẹ iparadaisi nana, ayen ji yerẹn vwọrẹ ofuvwegbe vwẹ ọke rẹ oba nana rọ pha gangan na.—Aiz. 54:14; 2 Tim. 3:1. w24.04 20 ¶1-2

Ọ da dianẹ wọ guọnọ ọrivẹ rẹ orọnvwe, aphro herọọ nẹ, wọ nẹrhovwo kpahọn re. Vwọrẹ uyota, Jihova veri nẹ ọyen cha guọnọ ọrivẹ rẹ orọnvwe kẹ ohwo vuọvoo. Ẹkẹvuọvo, ọ cha vwẹrote we ji te ọdavwẹ wẹn, ọ je cha cha wẹ uko ru wọ vwọ guọnọ ọrivẹ rẹ orọnvwe na. Ọtiọyena rha vuẹ oborẹ oma ru we kugbe obo ru wọ guọnọre. (Une 62:8) Nẹrhovwo nẹ ọ kẹ wẹ edirin vẹ aghwanre. (Jems 1:5) Ọ da tobọ dianẹ wọ je mrẹ ọrivẹ rẹ orọnvwee, Jihova veri nẹ ọyen che vwo ẹguọnọ wẹn je vwẹrote ọdavwẹ wẹn. (Une 55:22) Dedena, ofori nẹ a jomaotọ: Wo jẹ oyan rẹ ọrivẹ orọnvwe ru wọ yan na mu we rọọ. (Fil. 1:10) Ọ dia a rọvwọnre yẹrẹ a hẹ ẹdia ri kpogono yen ghwa omavwerhovwẹn chaa, ẹkẹvuọvo oyerinkugbe ru wọ vẹ Jihova vwori. (Mat. 5:3) Ọ vwọ dianẹ wọ hẹ ẹdia ri kpogono na, wo se vwo uphẹn ru wo vwo ru bunphiyọ vwẹ iruo rẹ aghwoghwo wẹn. (1 Kọr. 7:32, 33) Reyọ ọke nana vwo ruiruo vọnvọn. w24.05 21 ¶4; 22 ¶6

Mavọ yen ovwan kọnphiyọ ohwohwo kri te? E de brokpakpa brorhiẹn erọnvwọn se shechọ. (Isẹ 21:5) Ọtiọyena, ofori nẹ oyan rẹ ovwan na kri te asan rẹ ovwan da nabọ vughe ohwohwo. Ẹkẹvuọvo, ofori nẹ ovwan reyọ oyan rẹ ovwan na vwo siotọọ. Baibol na je tanẹ: “Emu rẹ phi ẹro phihọ nu ra da kparọ ọ nẹrhẹ udu rẹ ohwo mwa ọga.” (Isẹ 13:12) ‘Die yen ihwo efa se ru siẹrẹ ihwo ivẹ da kọnphiyọ ohwohwo? Avwanre se durhie ayen nẹ ayen vwomaba avwanre vwẹ udemu, ẹga rẹ orua, yẹrẹ ehaẹha. (Rom 12:13) Ayen guọnọ ohwo ọfa rọ sa vwomaba ayen, vwẹ ukẹcha kẹ ayen vwọ jẹ ofa, yẹrẹ asan rẹ ayen da sa ta ota vwọrẹ odjahọn? Ọ da dia ọtiọyen, a sa vwẹ ukẹcha phia? (Gal. 6:10) Ọ da dianẹ ihwo re kọnphiyọ ohwohwo vuẹ wẹ nẹ wọ vwomaba ayen, ọyena rha dia okpuphẹn? Wọ yanjẹ ihwo ivẹ re kọnphiyọ ohwohwo na ọvo vwoo, ẹkẹvuọvo reyọ aghwanre vwọ riẹn ọke ro vwo fo nẹ ayen ihwo ivẹ ọvo ta ota kugbe. w24.05 30 ¶13-14

Ekpako na davwẹngba vwọ fuẹrẹn obo re nẹrhẹ ohwo na shephiyọ umwemwu. Kerẹ udje, ememerha yen oyerinkugbe oniọvo na vẹ ọ ri Jihova shekpotọ kidie nẹ ọ kpairoro vrẹ uyono romobọ vẹ iruo aghwoghwo na? Ọ rha nẹrhovwo rhe Jihova ọkieje? Gbanẹ o gbe nene urhurusivwe ọchọchọ? O mu erharhe rẹ igbeyan ji nẹ erọnvwọn ra vwọ diotọ ri forii? Die yen erọnvwọn ọtiọyena se ru vwẹ oma rọyen? O vwo ọmrẹvughe rẹ ẹro ri Jihova vwo nẹ obo ro ruẹ kugbe erhiẹn ro brẹ? Ekpako na sa nọ enọ vwọ cha uko vwo roro kpahen oboresorọ oyerinkugbe rọyen vẹ ọ ri Jihova vwo dogho obọ rọ nẹrhẹ o ru umwemwu na, ẹkẹvuọvo ayen gbugbon rẹ eta ri te ayeen. (Isẹ 20:5) Vwọba, ayen sa reyọ idje vwọ vwẹ ukẹcha kẹ vwọ mrẹvughe nẹ obo ro ruru na chọre. Ọ sa dianẹ vwẹ echidiotọ rayen rẹsosuọ, oniọvo na tobọ viẹ diekpọvwẹ kpahen obo ro ruru na re. Ọ sa dianẹ o kurhẹriẹ re. w24.08 22 ¶9-11

Jesu ghwoghwo “iyẹnrẹn esiri rẹ Uvie” na vẹ oruru, kidie ọ riẹnre nẹ ọyen owian Ọghẹnẹ guọnọre nẹ ọyen ru. Iruo aghwoghwo na yen Jesu ma vwọ karo vwẹ akpeyeren. Tobọ vwẹ emeranvwe re koba rẹ iruo aghwoghwo rọyen, o nẹ “orere kpo orere, nẹ ọko kpo ọko,” ro vwo yono ihwo efa. (Luk 13:22) O ji yono idibo efa ri che nene wian kerẹ ighwoghwota. (Luk 10:1) Nonẹna, iruo aghwoghwo rẹ iyẹnrẹn esiri na yen Jihova vẹ Jesu guọnọre nẹ avwanre vwọ kobaro. (Mat. 24:14; 28:19, 20) E se ru oruru rẹ avwanre kpahen iruo aghwoghwo na ganphiyọ siẹrẹ a da vwẹ ẹro rẹ Jihova vwo nẹ ihwo vwo nẹ ayen. Ọ guọnọre nẹ koka koka rẹ ihwo nyo iyẹnrẹn esiri na ji rhiabọreyọ. (1 Tim. 2:3, 4) Ọtiọyena, ko yono avwanre rere a sa vwọ tẹn ona rẹ obo re se vwo ghwoghwo ovuẹ nana ro che sivwin arhọ rẹ ihwo na. Ọ da tobọ dianẹ ihwo rhọnvwe kerhọ enẹnaa, ayen vwẹ uphẹn ayen se vwo ru ọtiọyen tavwen ukpokpogho rode na ki vwo oba. w25.03 15-16 ¶5-7

Onenikristi ọvuọvo yen cha vwẹ ẹwẹn obrorhiẹn rọyen ra vwẹ Baibol yono vwo ruiruo sẹ ọ che yeren ohwo re si nẹ ukoko na. Ihwo evo se vwo ẹwẹn rẹ ayen vwo yeren ohwo na ji re dede siẹrẹ ọ da rhe uyono. Dedena, avwanre cha ghwọrọ ọke yẹrẹ nene ta ota ọke grongroon. Evo se no nẹ, ‘Ọ dia Baibol na tare nẹ, siẹrẹ Onenikristi de yeren ohwo tiọyena o ji vwobọ vwẹ imwemwu rọyen?’ (2 Jọn 9-11) Ẹkpo ri Baibol efa re riariẹ owọrota nana phiyọ rionbọ kpo ihwo ri she nẹ ukoko na re vwọsua kugbe ihwo efa ri titẹ orharhe rẹ uruemu. (Ẹvwọ. 2:20) Ọtiọyena, siẹrẹ ohwo de titi iyono rẹ efian yẹrẹ erharhe rẹ iruemu efa, ekpako na che ru ọrhuẹrẹphiyotọ rẹ ayen vwo bro raa. Uyota nẹ, iphiẹrophiyọ herọ nẹ o che brevun kpiroro. Bẹsiẹ o ki ru ọtiọyen, avwanre che yeren yẹrẹ durhie ohwo tiọyena rhe uyonoo. w24.08 30-31 ¶14-15

Ọke rẹ Jesu vwọ ghẹrẹ otu na nu, ọ da vuẹ idibo rọyen nẹ ayen vrẹn nẹ ekogho na ji ro okọ kpo Kapanọm, o de siomareyọ kpo enu rẹ ugbenu, womarẹ ọnana o de siomanu kẹ otu na re guọnọ reyọ vwo mu ovie. (Jọn 6:16-20) Ọke rẹ idibo na vwo biẹ yanran, ogiribo rode ko djuẹ, rọ so ọgbogho kugbe odju ọgangan. Jesu da yan vwẹ enu rẹ ame na bru ayen ra. Ọ da je vuẹ ọyinkọn Pita nẹ ọ yan bru ọyen rhe vwẹ enu rẹ ame na. (Mat. 14:22-31) Ugege rẹ Jesu ghwa vwọ ro okọ na, ogiribo na da fọ. Ọnana de mu idibo na vwọ tanẹ: “Wẹwẹ ghene Ọmọ rẹ Ọghẹnẹ.” (Mat. 14:33) Dedena, ayen vwo ẹruọ rẹ oborẹ igbevwunu nana vẹ ọ ro ruru vwẹ obuko re rọ vwọ vwẹ ibrẹdi ghẹrẹ ihwo buebun vwọrẹ igbevwunu vwo churobọ si ohwohwoo. Vwọ kpahen obo re phiare na Mak da ta: “Ọnana de gbe [iyinkọn na] unu mamọ, kidie ayen je rhe riẹn oborẹ ibrẹdi na mudiaphiyọ-ọ.” (Mak 6:50-52) Vwọrẹ uyota, ayen se vwo ẹruọ rẹ ẹgba rẹ Jihova vwọ kẹ Jesu nẹ o vwo ru igbevwunuu. w24.12 5 ¶7

Avwanre se dje ọdavwaro kpahen ẹguọnọ ri Jihova womarẹ a vwọ reyọ uvwre ọke rẹ Ẹkarophiyọ na vwo dje kẹ Jihova oborẹ ọtanhirhe na ghanre kẹ avwanre te. Re vwo muegbe re vwo kpo Ẹkarophiyọ na, e ji se durhie ihwo efa nẹ e rhe. Nabọ dje kẹ ihwo ru wo che durhie na obo re che ru vwẹ Ẹkarophiyọ na. O che yovwin siẹrẹ wo de dje ividio rẹ Diesorọ Jesu Vwo Ghwu? kugbe Karophiyọ Ughwu rẹ Jesu vwọ kẹ ayen vwẹ jw.org. O ji fo nẹ ekpako durhie ihwo re dobọ rẹ uyono ẹra ji. Vwẹ ẹwẹn roro aghọghọ rọ cha dia odjuvwu vẹ otọrakpọ siẹrẹ ogodẹ ri Jihova ọvo ro bo ghwru de rhivwin rhe uchuru rọyen! (Luk 15:4-7) Vwẹ ẹdẹ Ẹkarophiyọ na, e jẹ avwanre yeren omoma rẹ avwanre ọvoo ẹkẹvuọvo e je yeren ihwo kpokpọ kugbe ihwo re rhe krire. E je dje kẹ ayen nẹ oma vwerhen avwanre ra vwọ mrẹ ayen!—Rom 12:13. w25.01 29 ¶15

Dede nẹ ọtanhirhe na nẹrhẹ e vwo ẹruọ rẹ oborẹ orhiẹn ọsoso ri Jihova hepha, ma rho ọ nẹrhẹ e vwo ẹruọ rẹ obo ro vwo ẹguọnọ avwanre te. (Jọn 3:16; 1 Jọn 4:9, 10) Uyono rẹ ọtanhirhe na djerephia nẹ ọ dia Jihova de guọnọ nẹ avwanre vwo arhọ ri bẹdẹ ọvoo, ọ je guọnọ nẹ a dia usun rẹ ihwo rehẹ orua rọyen. Di roro: Ọke rẹ Adam vwo ru umwemwu, Jihova da djẹ nẹ orua rẹ ihwo rọyen re vwẹ ẹga kẹ. Ọtiọyena, avwanre rha hẹ orua rẹ Ọghẹnẹ ọke re vwo vwiẹ avwanree. Ẹkẹvuọvo, fikirẹ ọtanhirhe na, Jihova de vwo ghovwo imwemwu rẹ avwanre, ọ je cha vwẹ avwanre vwọba orua rọyen siẹrẹ e de vwo esegbuyota ji nyẹme rọyen. Enẹna, e ji se vwo uvi oyerinkugbe vẹ ọyen kugbe iniọvo rẹ avwanre. Vwọrẹ uyota, avwanre eje mrẹ erere vwo nẹ ẹguọnọ ri Jihova rhe!—Rom 5:10, 11. w25.01 21 ¶6

Vwọrẹ uyota, wọ cha rhọnvwe nẹ ọtanhirhe na ọyen okẹ ọghanghanre! (2 Kọr. 9:15) Kidie nẹ Jesu vwẹ arhọ rọyen vwọ kpahotọ, ọnana kọ nẹrhẹ owẹ vẹ Jihova Ọghẹnẹ se vwo uvi rẹ oyerinkugbe ọkpẹkpẹkpẹ. Wo ji se rhẹro nẹ wo che vwo arhọ ri bẹdẹ. Mavọ yen ọ vwerhoma te re vwo dje ọdavwaro kpahen ọtanhirhe na ji te Jihova rọ dia ohwo ro ruẹ ọrhuẹrẹphiyotọ na! (Rom 5:8) Rere e se vwo dje ọdavwaro phia, e vwo jẹ ọtanhirhe na e no phovwin, Jesu da vwẹ iji mu nẹ e ru Ẹkarophiyọ rẹ ughwu rọyen kukpe kukpe. (Luk 22:19, 20) Vwẹ enukpe na, e che ru Ẹkarophiyọ rẹ ughwu ri Jesu vwẹ Thursday, April 2, 2026. Aphro herọọ, nẹ avwanre eje muegbe ra vwọ ra. Avwanre cha mrẹ erere gbidiki siẹrẹ a da rhuẹrẹ ọke phiyọ vwo roro kokodo kpahen oborẹ Jihova vẹ Ọmọ rọyen ru kẹ avwanre uvwre ọke rẹ Ẹkarophiyọ na. w25.01 20 ¶1-2

Wọ sa vwẹ ọkieje yono kpahen ẹguọnọ rẹ Jihova Ọghẹnẹ kugbe Jesu Kristi vwo kpahen avwanre siẹrẹ wo de roro kokodo kpahen oborẹ ayen ru kẹ avwanre. Ọkiọvo vwẹ uvwre rẹ ọke Ẹkarophiyọ na, wọ sa frẹkotọ se ọvo yẹrẹ ivẹ usun rẹ ẹbe ẹne rẹ ikuegbe akpeyeren ri Jesu. Wo brokpakpa se ẹkpo buebun ofuọvoo. Ukperẹ ọtiọyen, ememerha se, wọ je guọnọ erọnvwọn efa re sorọ o vwo fo avwanre vwo vwo ẹguọnọ ri Jihova vẹ Jesu. Ọ dianẹ wẹ hẹ ukoko na vwẹ ikpe buebun re, wo se roro sẹ a je sa mrẹ ọhọ kpokpọ vwẹ iyovwinreta rẹ avwanre riẹnre jovwo kerẹ orhiẹn ọsoso rẹ Ọghẹnẹ, ẹguọnọ rọyen kugbe ọtanhirhe na. Vwọrẹ uyota, ọkieje yen e che vwo yono erọnvwọn kpokpọ kpahen iyovwinreta nana vẹ efa. Ọtiọyena, reyọ uphẹn nana vwọ guọnọ evuẹ efa ra sa mrẹ vwẹ ẹbe rẹ ukoko na. w25.01 24-25 ¶13-15