Ihwo ri Ghwoghwo Iyẹnrẹn Esiri Na

JIHOVA kẹ avwanre ohwo ọgbagba ọvo re che nene udje rọyen, ọyehẹ Ọmọ rọyen, Jesu Kristi. (1 Pita 2:21) Ohwo da guọnọ dia Onenikristi, ohwo yena ko ji che ghwoghwo iyẹnrẹn esiri na kerẹ ohwo rọ wian kẹ Ọghẹnẹ. Jesu djere nẹ ọnana vọnre vẹ omavwerhovwẹn, rọ vwọ ta: “Bru vwe rhe ihwo rẹ owian kugbe oghwa bẹn, Me kẹ ufuoma. Mu urhekpe mẹ ghwa re wo yono uruemu mẹ; kidie me pha vworovworo fuefu vwe udu mẹ, ke wọ mrẹ ufuoma vwọ kẹ erhi wẹn.” (Mat. 11:28, 29) Ive rọyen na ruẹgba vwẹ oma rẹ ihwo ri rhiabọreyọ edurhie nana!

² Jesu rọ dia Oghwoghwota rọ Marho Kparobọ na, se ihwo evo nẹ ayen dia idibo rọyen. (Mat. 9:9; Jọn 1:43) O yono ayen iruo aghwoghwo na, o de ji ayen nẹ ayen ji ruiruo ro ruẹ na. (Mat. 10:1–11:1; 20:28; Luk 4:43) Ọke vwọ yanran na, o de ji ihwo 70 nẹ ayen re ghwoghwo iyẹnrẹn esiri rẹ Uvie rẹ Ọghẹnẹ. (Luk 10:1, 8-11) Ọke rẹ Jesu vwo ji idibo nana, ọ da vuẹ ayen: “Ọ ro nyo ota rẹ ovwan yo nyo ọmẹ, ọ rọ sen ovwan yọ sen vwẹ, ọ rọ sen vwẹ yọ sen ọ ro ji vwe rhe.” (Luk 10:16) Vwẹ idjerhe nana, Jesu de dje ọghanrovwẹ rẹ iruo rọ vwọ kẹ idibo na. Ayen che mudia kẹ Jesu vẹ Ọghẹnẹ ro me Kpenu na! Ọtiọyen ọ je hepha vwọ kẹ kohwo kohwo ro rhiabọreyọ use ri Jesu nana: “Rhe ri nene uvwe.” (Luk 18:22; 2 Kọr. 2:17) Kohwo kohwo ro nyo use nana vwo owian ro vwo ghwoghwo iyẹnrẹn esiri rẹ Uvie na kẹ kohwo kohwo ji yono ayen.—Mat. 24:14; 28:19, 20.

³ Avwanre rhe “riẹn” Jihova Ọghẹnẹ vẹ Jesu kidie avwanre rhiabọreyọ edurhie ri Jesu na. (Jọn 17:3) Avwanre rhe riẹn idjerhe ri Jihova re. Womarẹ ukẹcha rọyen, avwanre de rhi ru ewene, ku ohwo kpokpọ na phiyọ, ji yeren akpọ nene irhi ri Jihova. (Rom 12:1, 2; Ẹfe. 4:22-24; Kọl. 3:9, 10) Ọdavwaro rẹ avwanre vwori yen mu avwanre vwọ vwomakpahotọ kẹ Jihova ji bromaphiyame. Ọke avwanre vwo bromaphiyame nu, ka rhe riẹn avwanre phiyọ iruiruo rẹ Ọghẹnẹ.

⁴ Karophiyọ nẹ ofori ra vwọ vwẹ ubiudu ọfuanfon vwọ ga Ọghẹnẹ, abọ avwanre me je fon. (Une 24:3, 4; Aiz. 52:11; 2 Kọr. 6:14–7:1) Avwanre se vwo ẹwẹn obrorhiẹn rọ fonro womarẹ esegbuyota re vwo kpahen Jesu. (Hib. 10:19-23, 35, 36; Ẹvwọ. 7:9, 10, 14) Ọyinkọn Pọl bru Inenikristi uche nẹ ayen ru emu eje vwọ kẹ urinrin rẹ Ọghẹnẹ rere e vwo jẹ ekprowọ ẹdia vwọ kẹ ihwo efa. Ọyinkọn Pita kanrunumuo nẹ omamọ uruemu sa nẹrhẹ ihwo kurhẹriẹ vwọ rhe uyota na. (1 Kọr. 10:31, 33; 1 Pita 3:1) Mavọ wọ sa vwọ vwẹ ukẹcha kẹ ohwo vwọ dia oghwoghwota rẹ iyẹnrẹn esiri na?

IGHWOGHWOTA KPOKPỌ

⁵ Vwo nẹ ọke wọ ghwa vwọ ton uyono ri Baibol phiyọ vẹ ohwo ro dje omavwerhovwẹn phia, jiro kẹ ohwo na nẹ ọ vuẹ ihwo efa kpahen obo ro yono na. Ọ sa vuẹ ihwo rẹ orua rọyen, igbeyan rọyen, ihwo rọ vẹ ọyen gbe ruiruo, kugbe ihwo efa. Ọnana idjerhe ọghanghanre re se vwo yono ihwo kpokpọ kpahen oborẹ ayen sa vwọ dia idibo ri Jesu Kristi kerẹ ighwoghwota rẹ iyẹnrẹn esiri na. (Mat. 9:9; Luk 6:40) Erianriẹn rẹ ihwo kpokpọ na vwo buẹnphiyọ na, ayen da je rhe tẹn ona rẹ aghwoghwo ri kpregede, kẹ ayen che vwo owenvwe rẹ ayen vwo nene ukoko na kpo iruo aghwoghwo.

YAN MU IWAN NA

⁶ Tavwen wo ki durhie ohwo nẹ o nene uwe kpo aghwoghwo ri nẹ uwevwin kpo uwevwin, vwo imuẹro nẹ ohwo yena yan mu iwan evo. Ihwo cha vwẹ ẹro rẹ Oseri ri Jihova vwo nẹ ohwo tiọyena. Kọyensorọ, o vwo fo nẹ ohwo tiọyena yeren akpọ nene irhi ri Jihova tavwen ọ ke dia oghwoghwota ro ji bromaphiyame-e.

⁷ Wo vwo nene ohwo yono Baibol vẹ odjekẹ rọyen na, omuẹro nẹ wọ riẹn ẹdia rẹ ohwo na re. Ọkiọvo wo niroso nẹ o yeren akpọ nene obo ro yono na. Ẹkẹvuọvo, o vwo ẹdia evo vwẹ akpeyeren rẹ ohwo na rẹ ekpako na che nene uwe vẹ ohwo na ta ota kpahen.

⁸ Ọrọvwẹrote iruo rẹ ekpako na cha vuẹ ekpako ivẹ (ọvo usun rayen hẹ umẹ rọvwẹrote iruo rẹ ẹga rẹ ukoko na) nẹ ayen nene uwe vẹ ohwo wo yono na ta ota kpahen ẹdia nana. Vwẹ ikoko re ekpako rayen ghwe bu-un, ọkpako vẹ odibo rowian ro tedje se ruo. E jẹ iniọvo ra sanere na ru echidiotọ nana kpakpata. Vwọrẹ uyota, ọ da dianẹ evunrẹ Ọguan Ruvie yen ohwo na vwọ vwẹ ota na phia, e se ghwe nene uwe vẹ ohwo na chidia siẹrẹ e de ku uyono phiyọ nu. Ofori nẹ ẹwẹn rẹ ohwo na totọ vwevunrẹ echidiotọ na. Tavwen a ke rhọnvwe kẹ ohwo na nẹ ọ dia oghwoghwota ro ji bromaphiyame-e, ofori nẹ o ruẹ erọnvwọn nana:

1. (1) O vwo imuẹro nẹ Baibol na ghini Ota rẹ Ọghẹnẹ.—2 Tim. 3:16.

2. (2) Ọ riẹn ji vwo imuẹro kpahen iyono ri Baibol na evo kiriguo rere a da nọ enọ, ọ me kpahenphiyọ vwo nene oborẹ Baibol na tare, ọ dia vwo nene iyono rẹ ẹga rẹ efian yẹrẹ iroro romobọ rọye-en.—Mat. 7:21-23; 2 Tim. 2:15.

3. (3) Ọ yọnrọn iji ri Baibol rọ tare nẹ e nene ihwo ri Jihova kpo emẹvwa ọ da dia obo ro se ru.—Une 122:1; Hib. 10:24, 25.

4. (4) Ọ riẹn oborẹ Baibol na ta kpahen ọfanrhiẹn, igberadja egbe, ra vwọ rọvwọn vrẹ ohwo ọvo, ọshare vwo du ọshare yẹrẹ aye vwo du aye, o ji yeren akpọ nene iyono nana. Ohwo na da dia aye ro nene ọshare dia yẹrẹ ọshare ro nene aye dia jẹ ọ dia ohwo rẹ orua rọye-en, ayen ihwo ivẹ na gbe re ru orọnvwe rayen.—Mat. 19:9; 1 Kọr. 6:9, 10; 1 Tim. 3:2, 12; Hib. 13:4.

5. (5) Ọ yọnrọn urhi ri Baibol ro shekpahen udiẹda vroma vẹ ẹreyọ rẹ ihunvwun egangan.—2 Kọr. 7:1; Ẹfe. 5:18; 1 Pita 4:3, 4.

6. (6) Ọ mrẹ ọghanrovwẹ ra vwọ kẹnoma kẹ erharhe ọyankugbe.—1 Kọr. 15:33.

7. (7) O sioma rọyen nẹ ukoko rẹ ẹga rẹ efian eje rọ hepha jovwo. O rhe kpo ẹga raye-en, o rhe ji vwobọ vwẹ irueru rayen vuọvo-o.—2 Kọr. 6:14-18; Ẹvwọ. 18:4.

8. (8) O sioma nẹ kemu kemu ro churobọ si usuon rẹ akpọ na kare kare.—Jọn 6:15; 15:19; Jems 1:27.

9. (9) O vwo imuẹro rẹ oborẹ Aizaya 2:4 ta kpahen irueru rẹ akpọ na, o ji ruẹ nene.

10. (10) Ọ ghene guọnọ dia Oseri ri Jihova.—Une 110:3.

⁹ Ekpako na de vwo ẹwẹn ivivẹ kpahen ẹro rẹ ohwo na vwo ni ẹdia nana ọvo, ofori nẹ ayen nọ kpahọn, ayen sa tobọ vwẹ ẹkpo ri Baibol ra rionbọra na vwọ fuẹrẹn kugbe. Ofori nẹ ọ riẹn nẹ ihwo re vwomaba Iseri ri Jihova vwẹ iruo aghwoghwo na yeren akpọ nene odjekẹ ri Baibol re djunute na. Obo rọ tare cha nẹrhẹ ekpako na mrẹvughe sẹ ọ riẹn obo ra guọnọ mie, o ji muwan te ẹdia ro de vwobọ vwẹ aghwoghwo na.

¹⁰ Ofori nẹ ekpako na fobọ vuẹ ohwo re yono na sẹ o muwan. Vwẹ ọke buebun, e se ru ọnana siẹrẹ e de ghwe ku echidiotọ na phiyọ nu. O de muwan, ekpako na sa nabọ dede ohwo na reyọ kerẹ oghwoghwota. (Rom 15:7) Ekpako na je cha vuẹ ohwo na nẹ o vwobọ vwẹ iruo aghwoghwo na kpakpata ji niyẹnrẹn vwẹ oba rẹ emeranvwe yena. Ekpako na sa vuẹ ohwo na nẹ ohwo ra vwẹ Baibol vwo yono ro muwan rọ vwọ dia oghwoghwota ro ji bromaphiyame-e da niyẹnrẹn rẹsosuọ rọyen rhe, ke che rhie Congregation’s Publisher Record re si odẹ rọyen phiyọ vwọ kẹ, ke che phio phiyọ ifaili rẹ ukoko na. Ekpako na cha reyọ evuẹ nana vwo mie oghwoghwota na rere a sa vwọ vwẹrote iruo rẹ Iseri ri Jihova ruẹ vwẹ akpọneje, rere oghwoghwota na se vwo vwobọ vwẹ iruo rẹ Uvie na je mrẹ obicha. Vwọba, ekpako na sa karophiyọ ighwoghwota kpokpọ nẹ e che ru evuẹ romobọ rayen nene Global Data Protection Policy of Jehovah’s Witnesses rọhẹ jw.org.

¹¹ A da nabọ vwẹ oma te oghwoghwota kpokpọ na ji dje ọdavwaro kpahen obo ro rure, ọ cha nẹrhẹ o ru yovwinphiyọ. Ọnana se muo vwọ niyẹnrẹn kọke kọke je tobọ davwẹngba vwo ru bunphiyọ vwẹ ẹga ri Jihova.—Fil. 2:4; Hib. 13:2.

¹² Ekpako na de brorhiẹn nẹ ohwo ra vwẹ Baibol yono na muwan ro vwo vwobọ vwẹ iruo aghwoghwo na, kọyen o ji muwan ra vwọ vwẹ ọbe rẹ Ukoko ro Ruẹ Ọhọre ri Jihova vwọ kẹ. Ọ da niyẹnrẹn rẹsosuọ rọyen rhe nu, ke che ghwoghwo kẹ ukoko na nẹ oghwoghwota ro ji bromaphiyame-e yen o ruẹ asaọkiephana.

VWẸ UKẸCHA KẸ EMỌ

¹³ Imitete ji se muwan rẹ ayen vwọ dia ighwoghwota rẹ iyẹnrẹn esiri na. Jesu rhiabọdede imitete, ọ da je nẹrhovwo kẹ ayen. (Mat. 19:13-15; 21:15, 16) Dede nẹ emiọvwọn yen vwo oghwa rẹ ẹroevwote rẹ emọ rayen, jẹ ihwo efa vwẹ ukoko na sa vwẹ ukẹcha kẹ emọ ri vwo owenvwe rẹ ayen vwo vwobọ vwẹ iruo aghwoghwo rẹ Uvie na. Wọ da dia ọmiọvwọn, omamọ uruemu wẹn vwẹ iruo aghwoghwo na che phi oruru phiyọ oma rẹ emọ wẹn vwẹ ẹga rẹ Ọghẹnẹ. Ọmọ ro vwo omamọ uruemu de vwo owenvwe rọ vwọ vuẹ ihwo efa kpahen esegbuyota rọyen, ukẹcha vọ yen a sa vwọ kẹ?

¹⁴ O che yovwin siẹrẹ ọsẹ yẹrẹ oni rọyen de bru ọkpako ọvo ra rọhẹ Umẹ Rọvwẹrote Iruo rẹ Ẹga rẹ ukoko na rere ayen ta ota kugbe sẹ ọmọ na muwan rọ vwọ dia oghwoghwota. Ọrọvwẹrote iruo rẹ ekpako na cha vuẹ ekpako ivẹ (ọvo usun rayen hẹ umẹ rọvwẹrote iruo rẹ ẹga rẹ ukoko na) nẹ ayen vwo echidiotọ vẹ ọmọ na kugbe ọsẹ yẹrẹ oni rọyen, ọsẹ vẹ oni na, yẹrẹ ohwo rọ vwẹrote ọmọ na. Ọmọ na de vwo ẹruọ rẹ iyono ri Baibol evo kiriguo, a da je mrẹ vwẹ oma rọyen nẹ ọ guọnọ vwobọ vwẹ iruo aghwoghwo na, ọnana odjephia nẹ ọ yan obaro. E de roro kpahen enana vẹ erọnvwọn efa ri ji shekpahen ihwo re dia imiragua, ekpako ivẹ na se brorhiẹn sẹ ọmọ na muwan rọ vwọ dia oghwoghwota ro ji bromaphiyame-e. (Luk 6:45; Rom 10:10) Ọke rẹ ekpako na che vwo nene ọmọ na chidia na, a sa kpairoro vrẹ eta evo ri shekpahen imiragua.

¹⁵ Vwevunrẹ echidiotọ na, ofori nẹ ekpako na jiri ọmọ na vwọ kẹ ẹyan obaro rọyen, je vuẹ nẹ ọ tẹnrovi obo ro se vwo bromaphiyame. O ji fo nẹ e jiri emiọvwọn na kidie ayen wianre gangan vwo phi uyota na phiyọ ubiudu rẹ ọmọ na. A sa vwọ vwẹ ukẹcha kẹ emiọvwọn na vwọ chọn emọ rayen uko, ekpako na sa vuẹ ayen nẹ ayen se “Ovuẹ Vwo Rhe Emiọvwọn re Dia Inenikristi,” rọhẹ aruẹbe 179-181.

OMAẸVWỌKPAHOTỌ VẸ OMAEBROPHIYAME

¹⁶ Wọ da yan nene irhi rẹ Ọghẹnẹ ji vwobọ vwẹ iruo aghwoghwo na, ku wọ cha rhe riẹn Jihova ji vwo ẹguọnọ rọyen, ọke yena ko fori nẹ wo ru oyerinkugbe wẹn vẹ ọrọyen ganphiyọ. Vwẹ idjerhe vọ? Womarẹ omaẹvwọkpahotọ vẹ omaebrophiyame.—Mat. 28:19, 20.

¹⁷ Ra vwọ vwẹ orọnvwọn vwọ kpahotọ churobọ si re vwo phi orọnvwọn na phiyọ akọkọ vwọ kẹ iruo ọfuanfon. Ọtiọyena, omaẹvwọkpahotọ kẹ Ọghẹnẹ mudiaphiyọ wo vwo brora vwọrẹ ẹrhovwo ji ve kẹ nẹ wọ cha vwẹ oma wẹn eje kpahotọ vwọ kẹ ẹga rọyen, wọ je cha yan nene idjerhe rọyen ọkieje. Kọyen wọ cha ga bẹdẹ bẹdẹ. (Urhi 5:9) Ọnana obo wo che ru komobọ. O vwo ohwo vuọvo ro se ruo kẹ wẹ-ẹ.

¹⁸ Ẹkẹvuọvo, wo ji che ru orọnvwọn ọfa vwọ vrẹ wọ vwọ vuẹ Jihova nẹ ọyen vwo we. Ofori nẹ wo dje kẹ ihwo efa nẹ wọ vwomakpahotọ kẹ Ọghẹnẹ nure. Wo che ru ọnana womarẹ omaebrophiyame kirobo rẹ Jesu ruru. (1 Pita 2:21; 3:21) Wo de brorhiẹn wọ vwọ ga Jihova ji bromaphiyame, die yen ofori nẹ wo ru? Gba vuẹ ọrọvwẹrote iruo rẹ ekpako na kpahọn. Ọ cha vuẹ ekpako evo nẹ ayen nene uwe ta ota kpahọn sẹ wọ ghene yan mu iwan ra guọnọ mie ihwo re guọnọ bromaphiyame. Wọ da guọnọ mrẹ evuẹ efa, biko fuẹrẹn “Ovuẹ Vwo Rhe Oghwoghwota ro ji Bromaphiyame-e,” rọhẹ aruẹbe 182-184 rẹ ọbe nana, kugbe “Enọ ra Cha Vwọ Fuẹrẹn Ihwo re Guọnọ Bromaphiyame,” rọhẹ aruẹbe 185-207.

IYẸNRẸN RẸ ẸYAN OBARO RẸ IRUO RẸ UVIE NA

¹⁹ Vwẹ ikpe buebun rhire na, iyẹnrẹn rẹ ẹyan obaro rẹ ẹga rẹ uyota vwẹ akpọneje kẹ ihwo ri Jihova omavwerhovwẹn. Vwo nẹ ọke rẹ Jesu Kristi ka vwọ vuẹ idibo rọyen nẹ e che ghwoghwo iyẹnrẹn esiri na ro akpọneje, Inenikristi rẹ uyota ghini vwo owenvwe ayen vwọ riẹn oborẹ iruo nana se vwo te akpọneje.—Mat. 28:19, 20; Mak 13:10; Iruo 1:8.

²⁰ Vwẹ ẹgbukpe ujorin rẹsosuọ, oma vwerhen idibo ri Jesu ọke rẹ ayen de nyo kpahen ẹyan obaro rẹ iruo aghwoghwo na. (Mak 6:30) Ọbe rẹ Iruo Rẹ Iyinkọn Na vuẹ avwanre nẹ omarẹ ihwo 120 yen herọ ọke re vwo ku ẹwẹn ọfuanfon ku idibo na vwẹ Pẹntikọst 33 C.E. O rhe kri-i, uchunu rẹ idibo na de rhi bun te 3,000, ọke vwọ yanran na o de rhe bun te 5,000. A da niyẹnrẹn nẹ “Ọrovwohwo . . . vwẹ ihwo re sivwi rhọ vwọ ba ayen,” “irherẹn na buebu da rhọvwe esegbuyota na.” (Iruo 1:15; 2:5-11, 41, 47; 4:4; 6:7) Iyẹnrẹn rẹ ebuon nana ghene ghwa omavwerhovwẹn rhe idibo na! Iyẹnrẹn nana che ghini mu ayen vwọ yan obaro vwẹ iruo ra vwọ kẹ ayen na, dede nẹ ayen rhiẹromrẹ omukpahen ro nẹ obọ rẹ ilori rẹ ẹga rẹ ihwo ri Ju rhe!

²¹ Vwẹ omarẹ 60-61 C.E., Pọl da niyẹnrẹn vwẹ ileta ro si rhe ihwo ri Kọlose nẹ iyẹnrẹn esiri na “hrabọ ro akpọ na ejobi,” e ji “ghwoghwo kẹ akpọ na ejobi re.” (Kọl. 1:5, 6, 23) Inenikristi rẹ ẹgbukpe ujorin rẹsosuọ ru nene Ota na, ẹwẹn ọfuanfon na je kẹ ayen ẹgba vwo ruiruo aghwoghwo na bẹsiẹ oba rẹ eyeren rẹ ihwo ri Ju vwo te vwẹ 70 C.E. Ọ kẹ Inenikristi yena omavwerhovwẹn dẹn rẹ ayen vwo nyo iyẹnrẹn rẹ oborẹ iniọvo na ru te!

²² Vwẹ idjerhe vuọvo na, ukoko ri Jihova nonẹna ji vwo iyẹnrẹn rẹ iruo rẹ ayen ruẹ, rọ dia orugba rẹ Matiu 24:14: “Ka cha ta ota rẹ iyẹnrẹ esiri na wan akpọ na ejobi, rere ọ vwọ dia iseri kẹ ẹgborho na ejobi: tavwe rẹ oba na ki rhi te.” Kerẹ idibo rẹ Ọghẹnẹ, avwanre vwo owian rẹ okpakpa rẹ avwanre che ru. Ofori nẹ ọ dia ọdavwẹ rẹ avwanre ra vwọ mrẹ nẹ a nabọ ruiruo nana tavwen oba na ki te. Jihova che ruo rere e se vwo ruiruo nana te oba, e de vwobọ vwọ, ka cha mrẹ ebruphiyọ ri Jihova.—Izi. 3:18-21.

IYẸNRẸN RẸ IRUO AGHWOGHWO WẸN

²³ Die yen a cha niyẹnrẹn rọyen? Ukoko na kẹ avwanre ọmọbe iyẹnrẹn re se Field Service Report ro dje obo ro fori nẹ a niyẹnrẹn rọyen. Ẹkẹvuọvo, evuẹ rehẹ obotọ na sa chọn wẹ uko.

²⁴ Vwẹ asan re si “Placements (Printed and Electronic)” phiyọ na, niyẹnrẹn rẹ ẹbe vẹ erọnvwọn efa ra teyenphia yẹrẹ rehẹ intanẹti wọ vwọ kẹ ihwo re je dia Iseri ri Jihova ri bromaphiyame re-e. Vwẹ asan re si “Video Showings” phiyọ na, niyẹnrẹn rẹ uchabọ wo hworo vidio vwọ kẹ ohwo.

²⁵ Wọ da guọnọ niyẹnrẹn rẹ irhivwinbrura, gbe kere uchọke wọ vwọ kọn bru ihwo ri ji bromaphiyame-e ri dje omavwerhovwẹn phia, wo sio phiyọ asan re si “Return Visits” phiyọ. E se kere orhivwinbrura siẹrẹ a da kọn bru ohwo na ra, si ileta vwo rhe, vwẹ ifonu vwo se, si ovuẹ vwo rhe, yẹrẹ vwẹ ọbe vwo rhe. Kọke kọke ra da vwẹ Baibol vwo yono ohwo, e mi ji kere orhivwinbrura. Ọmiọvwọn se kere orhivwinbrura ọvo kudughwrẹn kudughwrẹn o de ru ẹga orua siẹrẹ ọmọ ro ji bromaphiyame-e da hẹ etiyin.

²⁶ Dede nẹ kudughwrẹn kudughwrẹn yen e vwo yono ohwo, jẹ obọ ọvo emeranvwe yen a cha niyẹnrẹn rẹ uyono ri Baibol. Ofori nẹ ighwoghwota si uche ihwo sansan rẹ ayen vwẹ Baibol yono vwẹ emeranvwe na. A sa niyẹnrẹn rẹ uyono ri Baibol siẹrẹ e de yono ihwo ri ji bromaphiyame-e. A sa je niyẹnrẹn rẹ uyono ri Baibol rẹ oniọvo rọ dobọ rẹ iruo rẹ ẹga na ji jovwo siẹrẹ umẹ rọvwẹrote iruo rẹ ẹga na da vuẹ avwanre nẹ e ruo, yẹrẹ ohwo ro bromaphiyame obọ ro ji yono ẹbe na Die Yen Baibol na Se Yono Avwanre? vẹ Dia Evunrẹ Ẹguọnọ rẹ Ọghẹnẹ re-e.

²⁷ Ọ je ghanre ra vwọ niyẹnrẹn rẹ inọke rọ gbare vwẹ asan re si “Hours” phiyọ. Ọnana uchọke wọ ghwọrọre vwo ghwoghwo ota kẹ ihwo re je dia Iseri ri Jihova ri bromaphiyame-e vwẹ iruo ri nẹ uwevwin kpo uwevwin, orhivwinbrura, uyono ri Baibol yẹrẹ kidjerhe kidjerhe re vwo ruiruo aghwoghwo na yẹrẹ ọ ri kpregede. Ighwoghwota ivẹ da wiankuẹgbe vwẹ iruo aghwoghwo na, ayen ihwo ivẹ yen che kere ọke, jẹ ohwo ọvuọvo yen che kere irhivwinbrura vẹ ihwo ra vwẹ Baibol vwo yono. Ọsẹ vẹ oni ri vwobọ vwẹ uyono rẹ emọ rayen vwẹ ẹga orua se kere unọke ọvo vwẹ udughwrẹn ọvo. Iniọvo eshare se kere ọke rẹ ayen vwọ ta ota rotu. Ohwo rọ je fan ota rẹ ọtota na vwọ kẹ otu na ji se kere ọke na. O vwo ẹdia evo e che vwo jẹ ọke ekere, kerẹ e de muegbe vwọ kẹ iruo aghwoghwo na, a da hẹ omẹvwa rẹ iruo aghwoghwo na, a da yan uwevwin kẹ ohwo yẹrẹ oyan romobọ, vẹ ẹdia efa tiọyen.

²⁸ Oghwoghwota ọvuọvo yen cha vwẹ ẹwẹn obrorhiẹn rọyen ra vwẹ Baibol vwo yono na vwo brorhiẹn rẹ ọke ro ghini vwo ruiruo rẹ aghwoghwo na. Ighwoghwota evo ghwoghwo vwẹ asan rẹ ihwo de bun mamọ, efa ghwoghwo vwẹ asan rẹ ihwo de jẹ ebuo, ayen je yan ugbo oshesheri tavwen ayen ki te asan na. Asan re de ghwoghwo fẹnẹ ohwohwo; ẹro rẹ ighwoghwota vwo nẹ oborẹ ayen che kere ọke wan vwẹ iruo aghwoghwo na je fẹnẹ ohwohwo. Ẹko Rọvwẹrote na ji urhi vuọvo kpahen obo re che kere ọke wan vwẹ iruo aghwoghwo na-a, yẹrẹ ọ je vwẹ ohwo vuọvo vwo mu nẹ o guẹdjọ rẹ ihwo kpahen ẹdia nana-a.—Mat. 6:1; 7:1; 1 Tim. 1:5.

²⁹ Inọke yen a niyẹnrẹn rọyen vwẹ iruo aghwoghwo na. Ẹkẹvuọvo, oghwoghwota ro se vwobọ vwẹ iruo aghwoghwo na-a fikirẹ ọghwo yẹrẹ ọga sa niyẹnrẹn rẹ ibrẹro 15, 30 yẹrẹ 45 siẹrẹ ọ da dianẹ ọyena yen ẹgba rọyen muru. E ji che kere phiyọ oghwoghwota rọ niyẹnrẹn kemeranvwe kemeranvwe. Ọrhuẹrẹphiyotọ nana ji shekpahen ihwo ri se kpo iruo aghwoghwo na vwẹ uvwre rẹ ọke evo-o, ọ sa dianẹ vwẹ uvwre rẹ emeranvwe ọvo yẹrẹ vrẹ ọtiọyen dede ọ sa ya-an fikirẹ omaẹwan yẹrẹ okpọga ọvo. Ọrhuẹrẹphiyotọ nana shekpahen ihwo rọ ghene bẹn vwọ kẹ rẹ ayen vwo vwobọ vwẹ iruo aghwoghwo na. Umẹ Rọvwẹrote Iruo rẹ Ẹga rẹ ukoko na yen che brorhiẹn sẹ oghwoghwota na muwan vwọ kẹ ọrhuẹrẹphiyotọ nana.

IKADI RE SE CONGREGATION’S PUBLISHER RECORD

³⁰ E si iyẹnrẹn wọ nẹ kemeranvwe kemeranvwe phiyọ ikadi re se Congregation’s Publisher Record. Ukoko ọvuọvo yen vwo iyẹnrẹn nana. Wọ da guọnọ kpo ukoko ọfa, gba vuẹ ekpako na kpahọn. Osiọbe rẹ ukoko na che vwo imuẹro nẹ a vwẹ evuẹ wẹn vwo te ukoko kpokpọ na obọ. Ọnana cha nẹrhẹ ekpako na nabọ rhiabọdede uwe ji kẹ wẹ obicha ra guọnọre. Ọ da dianẹ wo kpo asan jẹ wọ cha dia vrẹ emeranvwe erha-a, biko ji niyẹnrẹn wẹn vwo rhe ukoko wọ hepha jovwo.

OBORESORỌ O VWO FO NẸ A NIYẸNRẸN RẸ IRUO AGHWOGHWO NA

³¹ Ọ chọrowẹro wọ vwọ niyẹnrẹn ọkiọvo? Aphro herọ-ọ, avwanre eje guọnọ ẹkarophiyọ nọke ra ruọke. Ẹkẹvuọvo, e de vwo omamọ ẹwẹn kpahen iyẹnrẹn ẹnẹ ji vwo ẹruọ rẹ obo rọ ghanre te, kọ cha lọhọ avwanre vwọ karophiyọ niyẹnrẹn.

³² Ihwo ke nọ: “Ọ da dianẹ Jihova riẹn obo mi ruẹ vwẹ ẹga rọyen, kẹ diesorọ me vwọ rhoma niyẹnrẹn?” Uyota, Jihova riẹn oborẹ avwanre ruẹ, ọ je riẹn sẹ ubiudu avwanre eje yen a vwọ ga yẹrẹ ọ dia ubiudu avwanre eje-e. Ẹkẹvuọvo, karophiyọ nẹ Jihova si uche ẹdẹ rẹ Noa ghwọrọre vwẹ okọ na vẹ ikpe rẹ ihwo rẹ Izrẹl vwọ yan vwẹ aton na phiyotọ. Ọghẹnẹ si ikuegbe rẹ uche ihwo re fuevun kẹ vẹ i ri gbevwọsuọ. O ji si iyẹnrẹn rẹ ophikparobọ rẹ otọ ri Kenan vẹ oborẹ iguẹdjọ rẹ Izrẹl ruru vwẹ ọke yena. O si erọnvwọn buebun phiyotọ kpahen iruo rẹ idibo rọyen. Ẹwẹn ọfuanfon rọyen yen mu ihwo vwo si iyẹnrẹn nana phiyotọ, ọnana nẹrhẹ a riẹn ẹro ro vwo nẹ iyẹnrẹn ọgbagba rẹ siẹ phiyotọ.

³³ Ikuegbe sansan ra niyẹnrẹn rọyen vwẹ Baibol na djerephia nẹ ihwo ri Jihova niyẹnrẹn rọ gbare. Vwẹ ẹdia buebun, a ke sa vwẹ ọghanrovwẹ rẹ ikuegbe ri Baibol na vwọphia, ko fori nẹ a vwẹ ukeri rọ gbare je vwọphia. Roro kpahen idje nana: Jẹnẹsis 46:27; Eyanno 12:37; Iguẹdjọ 7:7; 2 Ivie 19:35; 2 Ikun Rivie 14:9-13; Jọn 6:10; 21:11; Iruo Rẹ Iyinkọn Na 2:41; 19:19.

³⁴ Dede nẹ ọ dia kemu kemu rẹ avwanre ruru vwẹ ẹga ri Jihova yen a niyẹnrẹn rọye-en, jẹ iyẹnrẹn na vwo iruo ọghanghanre ro ruẹ vwẹ ukoko ri Jihova. Vwẹ ẹgbukpe ujorin rẹsosuọ, ọke rẹ iyinkọn na vwo nẹ iruo aghwoghwo rhe, ayen da niyẹnrẹn “rẹ obo rẹ ayen ruru kugbe obo rẹ ayen yonori ejobi” kẹ Jesu. (Mak 6:30) Ọkiọvo, iyẹnrẹn na sa nẹrhẹ a riẹn ẹdia evo ro fori nẹ a tẹnrovi vwẹ iruo aghwoghwo na. Iyẹnrẹn na ji se djephia nẹ dede nẹ ẹyan obaro herọ vwẹ ẹdia evo, jẹ ofori nẹ a wian kpahen ẹdia efa kerẹ udje ọ sa dianẹ uchunu rẹ ighwoghwota na rhe ghwe buẹn kirobo ri jovwo-o. Ọ sa dianẹ a guọnọ uduephiophiyawọ, yẹrẹ ofori nẹ a rhuẹrẹ ebẹnbẹn yena phiyọ. Iniọvo re vwo mu cha jokaphiyọ iyẹnrẹn na je davwẹngba vwọ rhuẹrẹ ẹdia na phiyọ rere iniọvo na yẹrẹ ukoko na vwọ yan obaro.

³⁵ Iyẹnrẹn je vwẹ ukẹcha kẹ ukoko na vwọ riẹn asan ra da guọnọ ighwoghwota rẹ Uvie na. Ẹdia vọ yen e de ruẹ yovwẹn? Ẹdia vọ yen e de shekpotọ? Ẹbe vọ yen sa vwẹ ukẹcha kẹ ihwo re guọnọ yono uyota na? Iyẹnrẹn je nẹrhẹ ukoko na riẹn oka rẹ ẹbe re che vwo ruiruo aghwoghwo na vwẹ asan sansan vwẹ akpọ na, a me je yan mu ẹdia nana.

³⁶ Iyẹnrẹn phiuduphiyọ avwanre awọ. Oma vwerhen avwanre siẹrẹ e de nyo kpahen iyẹnrẹn rẹ iruo aghwoghwo na rẹ iniọvo avwanre ruẹ vwẹ akpọneje? Iyẹnrẹn rẹ ẹyan obaro rẹ iruo na nẹrhẹ a riẹn oborẹ iruo rẹ ukoko na hẹrabọ tere. Ikuegbe rẹ oborerhiẹromrẹ kẹ avwanre omavwerhovwẹn, o ji mu avwanre vwo vwobọ vwẹ iruo aghwoghwo na vọnvọn vẹ oruru. (Iruo 15:3) Ọ pha ghanghanre ra vwọ fobọ niyẹnrẹn, o ji djephia nẹ avwanre vwo ọdavwẹ rẹ iniọvo na vwẹ kasan kasan. Vwẹ idjerhe nana, jẹ avwanre djephia nẹ e nene ọrhuẹrẹphiyotọ rẹ ukoko ri Jihova.—Luk 16:10; Hib. 13:17.

BRU ẸKẸN KẸ OMA WẸN

³⁷ O ghwe fo ra vwọ vwẹ iyẹnrẹn rẹ iruo aghwoghwo rẹ avwanre vwọ vwanvwen ọ rẹ ohwo ọfa-a. (Gal. 5:26; 6:4) Ẹdia rẹ ohwo vuọvo fẹnẹre. Ẹkẹvuọvo, a sa mrẹ erere gbidiki siẹrẹ e de bru ẹkẹn kẹ oma avwanre, a sa vwọ riẹn ẹyan obaro rẹ avwanre vwẹ iruo aghwoghwo na. A da sa yan mu ẹkẹn nana, ọ cha kẹ avwanre omavwerhovwẹn.

³⁸ O muẹro nẹ Jihova brokpakpa vwo koko ihwo rọ cha sẹro rọyen vwọ wan “ukpokpogho rode na.” Avwanre yerẹn vwẹ ọke rẹ orugba rẹ aroẹmrẹ rẹ Aizaya nana: “Unuwevwi ọvo ko hirhe phihọ ẹgborho, ọ rọ ma havwe ejobi kẹ ẹgborho rode; Mẹvwẹ hẹ Ọrovwohwo na; vwẹ ọke rọye ki Mi ruo kpata kpata.” (Ẹvwọ. 7:9, 14; Aiz. 60:22) Ọnana okpuphẹn rode ra vwọ dia ighwoghwota rẹ iyẹnrẹn esiri na vwẹ ọke rẹ oba nana!—Mat. 24:14.