UYOVWINROTA 7
Emẹvwa re “Jeje Ohwohwo Oma Vwẹ Ẹguọnọ Kugbe Iruo Esiri”
VWẸ ikpe buebun rhire na, ọyen ihwo ri Jihova vwọ vwoma. Vwẹ ọke rẹ ihwo rẹ Izrẹl, eshare eje yan kpo Jerusalẹm re ru orẹ abọ erha. (Urhi 16:16) Vwẹ ẹgbukpe ujorin rẹsosuọ, Inenikristi vwoma kọke kọke, ọke buebun uwevwin rẹ ohwo ọvo yen a da vwoma. (Filim. 1, 2) Nonẹna, avwanre kpo uyono, isikoko, vẹ eghwẹkoko. Diesorọ idibo rẹ Ọghẹnẹ vwọ vwoma? Kidie ọyena ẹbẹre ọghanghanre rẹ ẹga rẹ avwanre.—Une 95:6; Kọl. 3:16.
2 Emẹvwa je ghwa erere vwo rhe ihwo re rare. Vwọ kpahen Orẹ rẹ Egarivi re ruẹ kẹgbukpe ighwrẹn kẹgbukpe ighwrẹn, a da vuẹ ihwo rẹ Izrẹl na: “Koko ihwo na, eshare, ve eya, kugbe imitete, vẹ erhorha re hẹ irere rẹ ovwan, re ayen nyo vwo yono obo ra djẹ oshọ rẹ Ọrovwohwo rẹ Ọghẹnẹ rẹ ovwan, nabọ ru eta rẹ urhi nana.” (Urhi 31:12) Vwọrẹ uyota, avwanre siomakoko rere “Ọrovwohwo [vwo] yono” avwanre. (Aiz. 54:13) Emẹvwa nẹrhẹ a riẹn ohwohwo, a je mrẹ uchebro vẹ ọbọngan vwọ.
EMẸVWA RẸ INENIKRISTI
3 Idibo ri siomakoko ọke rẹ Pẹntikọst 33 C.E. vwọ wan nu, muomaphiyọ uyono rẹ iyinkọn na, “kẹdẹ kẹdẹ kọye ayen vwo koko vwẹ uwevwi rẹ ẹga.” (Iruo 2:42, 46) Ọke vwọ yanran na, Inenikristi da vwoma vwọ kẹ ẹga, ayen ki se ọbe ọfuanfon na, ji te ileta rẹ iyinkọn na vẹ idibo na. (1 Kọr. 1:1, 2; Kọl. 4:16; 1 Tẹsa. 1:1; Jems 1:1) A je nẹrhovwo. (Iruo 4:24-29; 20:36) Ọkiọvo, e gbikun rẹ oborerhiẹromrẹ vwẹ iruo aghwoghwo na. (Iruo 11:5-18; 14:27, 28) A fuẹrẹn iyono ri Baibol evo kugbe orugba rẹ aroẹmrẹ sansan. A je ta ota kpahen eta ri shekpahen uruemu rẹ Onenikristi kugbe ẹga rẹ Ọghẹnẹ. Oma vwerhen ihwo eje nẹ ayen ihwo ri ghwoghwo iyẹnrẹn esiri na vẹ oruru.—Rom 10:9, 10; 1 Kọr. 11:23-26; 15:58; Ẹfe. 5:1-33.
Vwẹ ọke rẹ oba nana, avwanre guọnọ uchebro vwẹ emẹvwa rẹ avwanre ọkieje
4 Nonẹna, emẹvwa rẹ Inenikristi je pha kerẹ e rẹ ọke rẹ iyinkọn na. Avwanre yan nene uchebro rọhẹ Hibru 10:24, 25: “E gbe jẹ avwanre roro obo re jeje ohwohwo oma . . . , e jẹn avwanre ghwẹ oma koko, a rha hẹriẹ oma kirobo rẹ otu evo ruẹ-ẹ, ẹkẹvuọvo e bru ohwohwo uche, marho kẹ ọke nana rẹ ovwan vwọ mrẹ nẹ Ẹdẹ na si kẹre re.” Vwẹ ọke rẹ oba nana, avwanre guọnọ uchebro vwẹ emẹvwa rẹ avwanre ọkieje rere a sa vwọ sẹro rẹ ọyọnregan rẹ avwanre. (Rom 1:11, 12) Kerẹ Inenikristi, avwanre yerẹn vwẹ uvwiẹ ogugunu rọ pha chọchọ. Avwanre je sen urhurusivwe rẹ akpọ nana. (Fil. 2:15, 16; Tai. 2:12-14) Di roro, o vwo asan ọfa ro yovwin te emẹvwa rẹ ihwo ri Jihova? (Une 84:10) Die yen sa kẹ avwanre erere vwọ vrẹ uyono rẹ Ota rẹ Ọghẹnẹ? E jẹ a fuẹrẹn emẹvwa sansan re muegbe rayen vwọ kẹ avwanre.
UYONO RẸ OBA RẸ UDUGHWRẸN
5 Ẹbẹre rẹsosuọ rẹ uyono rẹ oba rẹ udughwrẹn na, ọyen ota rotu ri Baibol na ra rhuẹrẹ vwọ kẹ kohwo kohwo, ọ sa dia obọ rẹsosuọ evo usun rẹ ihwo nana vwọ rhe uyono rẹ avwanre. Ota rotu ọyen idjerhe ọghanghanre ra vwọ vwẹ Ota rẹ Ọghẹnẹ vwo yono ihwo kpokpọ vẹ iniọvo ukoko na.—Iruo 18:4; 19:9, 10.
6 Jesu Kristi, iyinkọn rọyen vẹ iniọvo na ru ota rotu rọ họhọ ọ rẹ ihwo ri Jihova riavwerhen rọyen nonẹna. Aphro herọ-ọ, Jesu yen ọtota rọ ma rho kparobọ vwẹ akpọ na. Ọnana yen obo ra ta kpahọn: “A je mrẹ ohwo rọ ta ota kerẹ ohwo nana-a!” (Jọn 7:46) Ọke rẹ ihwo vwọ mrẹ nẹ Jesu ta ota vẹ ogangan, o de gbe ayen unu mamọ. (Mat. 7:28, 29) Ihwo ri rhiabọreyọ eta rọyen mrẹ erere gbidiki. (Mat. 13:16, 17) Iyinkọn na vwẹrokere udje rọyen. Vwẹ Iruo Rẹ Iyinkọn Na 2:14-36, avwanre se kpahen ota rotu rẹ Pita tare vwẹ ẹdẹ ri Pẹntikọst 33 C.E. Ọnana de mu ihwo buebun vwo ru nene obo rọ tare na. Ọke vwọ yanran na, ihwo buebun de kurhẹriẹ ọke rẹ ayen vwọ kerhọ rẹ ota rotu ri Pọl vwẹ Atẹns.—Iruo 17:22-34.
7 Nonẹna, iduduru rẹ ihwo je mrẹ erere vwo nẹ ota rotu ra vwọphia vwẹ ikoko sansan kudughwrẹn kudughwrẹn, ọtiọyen ji te e ra vwọphia vwẹ isikoko vẹ eghwẹkoko. Eta tiọyena chọn avwanre uko vwọ nabọ vwo ẹruọ rẹ iyono rẹ Inenikristi, ọ je bọn avwanre gan vwẹ iruo rẹ Uvie na. Avwanre sa chọn ihwo uko vwọ riẹn iyono ri Baibol na siẹrẹ e de durhie ayen vwọ rhe uyono.
8 A vwẹ iyovwinreta sansan vwọphia vwẹ ota rotu. E sa dia iyono vẹ aroẹmrẹ ri Baibol, odjekẹ vẹ uchebro ri Baibol ri shekpahen akpeyeren rẹ orua vẹ orọnvwe, ẹdia rẹ ighene hirharokuẹ, kugbe uruemu rẹ Onenikristi. Eta evo shekpahen iruo rẹ igbunu ri Jihova. Efa shekpahen esegbuyota, uduefiogbere, vẹ ọyọnregan rẹ ihwo rehẹ Baibol na, vẹ oborẹ avwanre se yono mie ayen nonẹna.
9 Avwanre da guọnọ mrẹ erere nẹ ota rotu, ofori nẹ avwanre nabọ kerhọ, rhie ẹkpo ri Baibol rẹ ọtota na rionbọra, ji no ọke ro vwo se asan na ro ji vwo dje kpahọn. (Luk 8:18) Avwanre da nabọ vwo ẹruọ rẹ ota na, ko che mu avwanre vwo se ota na gbe emu je reyọ vwo ruiruo.—1 Tẹsa. 5:21.
10 Etota da herọ, a cha ta ota rotu vwẹ ukoko na kudughwrẹn kudughwrẹn. Ọke buebun, e se durhie etota efa vwo nẹ ikoko efa rhe. Etota rhe bu-un, a sa vwẹ eta rotu vwọphia vwẹ uchọke rẹ ayen se ruo.
11 Ẹbẹre rivẹ rẹ uyono rẹ oba rẹ udughwrẹn na ọyen Uyono rẹ Uwevwin Orhẹrẹ, enọ-vẹ-ẹkpahọnphiyọ yen e vwo ru uyono rẹ Uwevwin Orhẹrẹ re yono na. Jihova yono avwanre vwẹ ọke ro fori womarẹ Uwevwin Orhẹrẹ na.
12 Iyovwinreta re yono vwevunrẹ Uwevwin Orhẹrẹ na shekpahen obo ra sa vwọ vwẹ uchebro ri Baibol na vwo ruiruo vwẹ akpeyeren. Ayen vwẹ ukẹcha kẹ Inenikristi vwọ sen “[“ẹwẹn,” NW] rẹ akpọ na” vẹ iruemu ebrabra. (1 Kọr. 2:12) Uwevwin Orhẹrẹ na nẹrhẹ a nabọ vwo ẹruọ rẹ iyono vẹ aroẹmrẹ ri Baibol na phiyọ, ọ je nẹrhẹ a dia evunrẹ idjerhe rẹ ọvwata na. (Une 97:11; Isẹ 4:18) E de vwobọ vwẹ uyono rẹ Uwevwin Orhẹrẹ na, ọ sa chọn avwanre uko vwọ ghọghọ fikirẹ iphiẹrophiyọ rẹ akpọ kpokpọ rẹ Jihova muegbe rọyen phiyotọ. (Rom 12:12; 2 Pita 3:13) Emẹvwa rẹ avwanre chọn avwanre uko vwo vwo omamọ rẹ ẹwẹn ọfuanfon na, ọ je kpuriẹn phiyọ oruru rẹ avwanre vwọ ga Jihova. (Gal. 5:22, 23) E chọn avwanre uko vwo chirakon rẹ edavwini je “tọn uchivwo kokoroko hẹrhẹ akpọ rọ cha” rere a sa vwọ “yọnrọn arhọ na rọ dia uvi rẹ arhọ na.”—1 Tim. 6:19; 1 Pita 1:6, 7.
13 Mavọ yen avwanre sa vwọ mrẹ erere vwo nẹ uyono rẹ Uwevwin Orhẹrẹ na? Ofori nẹ e muegbe rẹ uyono na phiyotọ, e se ru ọnana komobọ yẹrẹ kerẹ orua, ji ni ẹkpo ri Baibol ra rionbọra, a me je vwẹ eta romobọ vwọ kpahenphiyọ enọ. Ọnana cha nẹrhẹ uyota na te ubiudu rẹ avwanre, ihwo efa je cha mrẹ erere vwo nẹ ẹkpahọnphiyọ rẹ avwanre. A da nabọ kerhọ rẹ ẹkpahọnphiyọ rẹ ihwo efa, a cha mrẹ erere vwo nẹ uyono na rhe.
UYONO RẸ UVWRE RẸ UDUGHWRẸN
14 Ukoko ọvuọvo vwoma kudughwrẹn kudughwrẹn vwẹ Ọguan Ruvie vwọ kẹ uyono re se Uyono rẹ Akpeyeren Avwanre vẹ Iruo Ruvie Na. Uyono nana vwo ẹbẹre erha ri “ru avwanre vwọ dia” igbodibo vwọ kẹ Ọghẹnẹ. (2 Kọr. 3:5, 6) E mu ọrhuẹrẹphiyotọ rẹ uyono na kpahen Ọbe Uyono rẹ Akpeyeren Avwanre vẹ Iruo Ruvie Na, ra vwọphia kemeranvwe kemeranvwe. Ọbe Uyono rẹ Akpeyeren vẹ Iruo Ruvie Na ji vwo ena rẹ obo re se vwo ruiruo aghwoghwo na.
15 Ẹbẹre rẹsosuọ rẹ uyono na re se Efe Rọhẹ Ota rẹ Ọghẹnẹ, chọn avwanre uko vwọ nabọ riẹn ikuegbe ri Baibol na vẹ obo re phiare ọke yena, ọtiọyen ji te obo re se yono nẹ ayen rhe. Vwevunrẹ uyono na, a ta ota, e ru isese, a je fuẹrẹn isese ri Baibol kudughwrẹn kudughwrẹn. Vwẹ Ọbe Uyono rẹ Akpeyeren Avwanre vẹ Iruo Ruvie Na, a vwẹ obo re rhiẹromrẹ vẹ ihoho vwo yono erọnvwọn nana. Ẹfuẹrẹn ri Baibol na vwẹ ukẹcha kẹ avwanre vwẹ akpeyeren avwanre vẹ iruo aghwoghwo na “rere ohwo rẹ Ọghẹnẹ vwọ gba, ra vwọ rhuẹrẹ kpahe kẹ iruo esiri.”—2 Tim. 3:16, 17.
16 Ẹbẹre rivẹ rẹ uyono na re se Muomaphiyọ Iruo Aghwoghwo Na, vwẹ uphẹn vwọ kẹ kohwo kohwo vwo muegbe vwọ kẹ iruo rẹ Uvie na, je tẹn ona rẹ aghwoghwo vẹ eyono. Vwọba eta ra ghara kẹ iniọvo na, e ji ni ividio rẹ obo ra sa ta vwẹ iruo aghwoghwo na. Ẹbẹre rẹ uyono nana chọn avwanre uko vwo vwo “ẹrẹnvwe rẹ ihwo re yonori” rere a “vwọ riẹn obo ra sa vwẹ ota yọnrọn ohwo rẹ oma rhọ.”—Aiz. 50:4.
17 Ẹbẹre rerha re se Akpeyeren rẹ Inenikristi, djekpahen obo ra sa vwọ reyọ uchebro ri Baibol vwo ruiruo vwẹ akpeyeren. (Une 119:105) Uyono ri Baibol Rukoko ọyen uyono ọvo kiriguo vwẹ ẹbẹre nana. E ru Uyono ri Baibol Rukoko na kerẹ Uyono rẹ Uwevwin Orhẹrẹ womarẹ enọ-vẹ-ẹkpahọnphiyọ.
18 A vwẹ Ọbe Uyono rẹ Akpeyeren vẹ Iruo Uvie Na vwọphia kemeranvwe kemeranvwe, ọrọvwẹrote iruo rẹ ekpako na, yẹrẹ ọkpako rọ vwẹ ukẹcha kẹ, nabọ fuẹrẹn ọbe uyono na kọ je ghare eta na. Kudughwrẹn kudughwrẹn, ọkpako rọ tẹn ona rẹ uyono, rẹ ekpako na je rhọnvwe kẹ yen cha dia ochidiagbara rẹ uyono na. Ọkpako nana che vwo imuẹro nẹ uyono na tonphiyọ ji kuphiyọ vwẹ ọke ro fori, ọ je vwẹ ujiri vẹ uchebro vwọ kẹ ihwo ri vwẹ Isese ri Baibol vẹ eta rehẹ Muomaphiyọ Iruo Aghwoghwo Na.
19 E de muegbe ji vwobọ vwẹ Uyono rẹ Akpeyeren vẹ Iruo Ruvie Na kọke kọke, ke che vwo erianriẹn ri Baibol na ji vwo ẹruọ rẹ odjekẹ rọyen, ke ji che fiudugberi vwo ghwoghwo iyẹnrẹn esiri na ji ru idibo. Ihwo re je tobọ dia ighwoghwota dede-e, je mrẹ erere vwo nẹ oyerinkugbe rẹ iniọvo vẹ eta ra vwọphia vwẹ uyono nana. Erọnvwọn sansan herọ re sa chọn avwanre uko vwo muegbe vwọ kẹ uyono nana vẹ efa, erọnvwọn kerẹ Watchtower Library, JW Library®, Ilaibri Rọhẹ Intanẹti™ (ọ da herọ vwẹ ejajẹ wẹn), kugbe ilaibri rọhẹ Ọguan Ruvie. Ẹbe sansan yen evunrẹ ilaibri rọhẹ Ọguan Ruvie na kerẹ Watch Tower Publications Index yẹrẹ Research Guide for Jehovah’s Witnesses, ọtiọyen ji te efanfan ri Baibol sansan, concordance, ọbe rọ fan eta, kugbe ẹbe efa. Kohwo kohwo sa vwẹ ilaibri na vwo ruiruo tavwen e ki ru uyono yẹrẹ e de ru uyono nu.
OMẸVWA RẸ AGHWOGHWO
20 Vwẹ ọke sansan vwẹ udughwrẹn na vẹ oba rẹ udughwrẹn, ẹko rẹ ighwoghwota ru omẹvwa rẹ aghwoghwo. E ru omẹvwa nana vwẹ iwevwin rẹ iniọvo yẹrẹ asan efa ri shephiyọ. E ji se ruo vwẹ Ọguan Ruvie. Ẹmẹko rẹ iniọvo da vwoma vwẹ asan sansan vwẹ ekogho rẹ ayen de ghwoghwo, ọ cha nẹrhẹ ighwoghwota na fobọ te asan ra da cha vwoma na vẹ asan rẹ ayen de che ghwoghwo. Ọ je cha nẹrhẹ a fobọ ghare iniọvo na je fobọ te ekogho rẹ ayen che ghwoghwo na. Oniruo rọ vwẹrote ẹko aghwoghwo na sa nabọ vwẹrote ihwo rehẹ ẹko rọyen. Dede nẹ erere herọ ẹko ọvuọvo vwọ vwoma komobọ rayen, jẹ fikirẹ ẹdia evo ẹko sansan sa vwoma kugbe. Kerẹ udje, ighwoghwota ri kpo iruo aghwoghwo vwẹ uvwre rẹ udughwrẹn rhe bu-un, e se ku ẹko sansan kugbe yẹrẹ ihwo eje sa vwoma kugbe vwẹ Ọguan Ruvie yẹrẹ asan ọfa ro shephiyọ. Vwẹ idjerhe nana, ighwoghwota na ki se vwo ohwo rẹ ayen che nene wian. Ukoko na je sa vwoma vwẹ Ọguan Ruvie vwẹ ọke re de ru erẹ rẹ akpọ na. Yẹrẹ ukoko na sa vwoma kugbe vwọ kẹ iruo aghwoghwo na siẹrẹ e de ghwe ku Uyono rẹ Uwevwin Orhẹrẹ na phiyọ nu.
21 Ẹko ọvuọvo da vwoma, oniruo rọ vwẹrote ẹko aghwoghwo na yen cha vwẹrote omẹvwa na. Ẹkẹvuọvo, nọke ra ruọke oniruo rọ vwẹrote ẹko aghwoghwo na sa vuẹ ọ rọ vwẹ ukẹcha vwọ kẹ yẹrẹ oniọvo ọshare ọfa nẹ ọ vwẹrote omẹvwa na. Ofori nẹ ọ rọ cha vwẹrote omẹvwa na nabọ muegbe ro vwo djekpahen obo ri che fierere vwẹ iruo aghwoghwo na. E de ru ọrhuẹrẹphiyotọ na nu, ohwo ọvo vwevunrẹ ẹko na kọ cha nẹrhovwo. Ugege yena, ayen ki che kpo asan rẹ ayen de che ghwoghwo. Ibrẹro iyorin fiẹ ighwrẹn yen e vwo ru omẹvwa na, ẹkẹvuọvo ofori nẹ ọ krẹn vrẹ ọtiọyen ọ da dianẹ e ghwe ku uyono phiyọ nu. Ofori nẹ ayen vwẹ ọbọngan, uchebro, vẹ odjekẹ vwọ kẹ ihwo ri che kpo aghwoghwo na. Ihwo kpokpọ yẹrẹ ihwo efa re guọnọ ukẹcha se nene ighwoghwota ri tedje wiankugbe rere ayen sa vwọ tẹn ona rẹ iruo na.
ỌRHUẸRẸPHIYOTỌ RẸ UYONO VWỌ KẸ IKOKO KPOKPỌ YẸRẸ E RẸ IGHWOGHWOTA RAYEN GHWE BU-UN
22 Idibo na vwo buẹnphiyọ na, ikoko na ji ghwe buẹnphiyọ. Oniruo okinriariẹ yen cha ghwobọphiyọ ọbe ra cha vwọ vwẹ ukoko kpokpọ vwo mu. Ẹkẹvuọvo, vwẹ ẹdia evo, erere buebun se norhe siẹrẹ ẹko evo da vwomaba ukoko rọ kẹrẹ ayen.
23 Ọkiọvo, iniọvo eya ọvo yen evunrẹ ikoko itete. Ọ da dia ọtiọyen, oniọvo aye rọ cha nẹrhovwo je vwẹrote uyono vwẹ ukoko na, cha phare uyovwin rọyen kirobo rẹ Baibol na tare. (1 Kọr. 11:3-16) Vwẹ ẹdia buebun, o che chidia hirhopharo ku otu na. Iniọvo eya ta ota rotu-u. Ukperẹ ọtiọyen, ayen se se ẹbe rẹ ukoko na vwọphia ayen me ta ota kpahọn, yẹrẹ ayen se ruo womarẹ otaẹtakuẹgbe yẹrẹ udje. Oghọn ukoko na cha sane oniọvo aye ọvo rọ cha vwẹ ovuẹ rhe ayen je vwẹrote uyono na. Ọke vwọ yanran na, iniọvo eshare de rhi muwan re, ayen ke sa vwẹrote iruo nana.
OSIKOKO RẸ OKINRIARIẸ
24 Kukpe kukpe, ọrhuẹrẹphiyotọ herọ rẹ ikoko rehẹ okinriariẹ ọvuọvo vwo ru osikoko rẹ ẹdẹ ọvo abọ ivẹ. Ọke rẹ omavwerhovwẹn nana nẹrhẹ otu na “rhie udu [rayen] phihọ” womarẹ oyerinkugbe rayen. (2 Kọr. 6:11-13) Ukoko ri Jihova muegbe rẹ uyovwinrota na vẹ eta na vwo nene edavwẹ rẹ iniọvo na. A vwẹ evuẹ na vwọphia womarẹ eta, udje, ẹvwanriẹnruo, otaẹtakomobọ, vẹ ẹriẹnmie. Enana bọn otu na gan. Isikoko nana je vwẹ uphẹn kẹ idibo kpokpọ re vwomakpahotọ kẹ Jihova vwo bromaphiyame.
ỌGHWẸKOKO
25 E ru ọghwẹkoko obọ ọvo ẹgbukpe. Ẹdẹ erha yen e vwo ruo, ikoko ri nẹ ikinriariẹ sansan rhe eyen kpo ọghwẹkoko vuọvo. Vwẹ eghọn ukoko re pha hanhanvwe, ikoko rehẹ oghọn na eje se koko vwẹ asan ọvo. Vwẹ ẹkuotọ evo, ọrhuẹrẹphiyotọ rẹ eghwẹkoko se wene nene odjekẹ rẹ ukoko na. Nọke ra ruọke, e ru eghwẹkoko rẹ akpọeje vẹ e rẹ oghẹresan vwẹ ẹkuotọ evo, iniọvo ri te uriorin buebun ri nẹ ẹkuotọ sansan rhe yen kpo eghwẹkoko nana. Vwẹ ikpe buebun rhire na, ihwo buebun riẹn kpahen iyẹnrẹn esiri rẹ Uvie na fikirẹ eghwẹkoko rẹ Iseri ri Jihova nana.
26 Eghwẹkoko, eyen ọke rẹ omavwerhovwẹn rẹ idibo ri Jihova vwo kuomakugbe ga ẹga. A womarẹ ayen vwo phi elo phiyọ uyota ri Baibol na. Vwẹ eghwẹkoko evo, e siobọnu erọnvwọn kpokpọ re se vwo ru uyono romobọ, a je sa vwẹ ayen ruiruo vwevunrẹ ukoko na yẹrẹ vwẹ aghwoghwo na. E bru ihwo phiyame vwẹ eghwẹkoko. A je mrẹ ọbọngan vwevunrẹ eghwẹkoko. Eghwẹkoko na nẹrhẹ a riẹn nẹ ihwo ri Jihova ghini vwo iniọvo vwẹ akpọneje ri vwo oka re vwo vughe idibo ri Jesu Kristi.—Jọn 13:35.
27 Avwanre mrẹ ọbọngan re vwo ru ọhọre ri Jihova siẹrẹ e de kpo uyono ọkieje ọtiọyen ji te isikoko vẹ eghwẹkoko rẹ ihwo ri Jihova. Avwanre je mrẹ ochọnvwe vwo nẹ iruemu rẹ akpọ nana ri se miovwo esegbuyota rẹ avwanre. Emẹvwa nana ghwa urinrin vẹ ujiri bru Jihova. (Une 35:18; Isẹ 14:28) Oma vwerhen avwanre nẹ Jihova vwo ọrhuẹrẹphiyotọ nana eje rere ihwo rọyen sa vwọ yọnre gan vwẹ ọke rẹ oba nana.
EMU OVWỌNVWỌN RẸ OROVWORI NA
28 Vwẹ akpọneje, ikoko sansan rẹ Iseri ri Jihova ru Ẹkarophiyọ rẹ Ughwu ri Jesu yẹrẹ Emu Ovwọnvwọn rẹ Orovwori Na obọ ọvo ẹgbukpe. (1 Kọr. 11:20, 23, 24) Omẹvwa nana yen ma ghanre kparobọ vwọ kẹ ihwo ri Jihova. A kẹ avwanre iji nẹ e ru Ẹkarophiyọ na.—Luk 22:19.
29 Ẹdẹ re ru Ẹkarophiyọ na shephiyọ vẹ ẹdẹ re vwo ru orẹ rẹ Ọwanvrẹ vwẹ ọke awanre kirobo rẹ Baibol na tare. (Eyan. 12:2, 6; Mat. 26:17, 20, 26) Orẹ rẹ Ọwanvrẹ na ọyen ẹkarophiyọ rẹ ọke rẹ ihwo rẹ Izrẹl vwo nẹ Ijipt vwẹ ukpe rẹ 1513 B.C.E; e ruo kukpe kukpe. Vwẹ ọke yena, Jihova tare nẹ vwẹ ẹdẹ 14 rẹ emeranvwe rẹsosuọ, ayen re omogodẹ rẹ Ọwanvrẹ na ji vrẹn nẹ ẹdia rẹ eviẹn rẹ ayen hepha vwẹ Ijipt. (Eyan. 12:1-51) A sa vwọ riẹn ẹdẹ na, ọke rẹ ason vẹ uvo da dia abavo vwẹ Jerusalẹm nu, ka cha hẹrhẹ ọke rẹ emeranvwe kpokpọ che vwo lo ji kere ẹdẹ 13 rọ vwọ kpahọn. Kọyen, e ruẹ Ẹkarophiyọ na vwẹ ọke rẹ emeranvwe na da nabọ dia ghorie ghorie vwo nẹ ọke rẹ ason vẹ uvo vwọ dia abavo nu, a mrẹ ọnana vwẹ emeranvwe ri March yẹrẹ April.
30 Matiu 26:26-28 djunute oborẹ Jesu tare nẹ e ru Ẹkarophiyọ na wan. Ọnana họhọ irueru rẹ edjọẹgọ-ọ, ẹkẹvuọvo ọnana emu rẹ udje rẹ ihwo ri che nene Jesu sun vwẹ odjuvwu cha re. (Luk 22:28-30) E jiriro kẹ Inenikristi eje vẹ ihwo ri dje omavwerhovwẹn phia nẹ ayen rhe Emu Ovwọnvwọn rẹ Orovwori Na. Ẹcha rayen djerephia nẹ ayen vwo ọdavwaro kpahen oborẹ Jihova Ọghẹnẹ ruru vwọ kẹ ihworakpọ womarẹ Ọmọ rọyen Jesu Kristi. Tavwen Ẹkarophiyọ na ki te, a ta ota rotu rẹ oghẹresan rọ cha nẹrhẹ e ru irueru nana vẹ oruru je kpare urhurusivwe rẹ ihwo kpahen uyono ri Baibol.
31 Iseri ri Jihova nabọ kpo emẹvwa vẹ omavwerhovwẹn, asan rẹ ayen da “jeje ohwohwo oma vwẹ ẹguọnọ kugbe iruo esiri.” (Hib. 10:24) Odibo rọ fuevun rọ je ghwanre na vwẹ emẹvwa nana vwọ kẹ avwanre kirobo rẹ avwanre ghwa guọnọ. E jiriro kẹ idibo ri Jihova eje vẹ ihwo re cha emẹvwa avwanre nẹ ayen vwobọ vwẹ emẹvwa nana vọnvọn ọkieje. E de dje ọdavwaro phia kpahen oborẹ Jihova ruẹ kẹ avwanre womarẹ ukoko rọyen, o che si avwanre koko vwevunrẹ oyerinkugbe vuọvo. Ma rho kparobọ, avwanre vwẹ ujiri vẹ urinrin vwọ kẹ Jihova.—Une 111:1.