Idibo Rowian Ruiruo Eghanghanre

ỌYINKỌN Pọl si rhe ukoko rọhẹ Filipae: “Ọbe ri Pọl kugbe Timoti, idibo ri Kristi Jesu, si rhe ihwo efuanfon ejobi vwẹ evun ri Kristi Jesu re hẹ Filipae, vi isun kugbe [“idibo rowian,” NW].” (Fil. 1:1) Noso nẹ ọ vwẹ uyeren rhe idibo rowian. O muẹro nẹ eshare nana ruiruo eghanghanre vwọ chọn ekpako na uko vwẹ ọke yena. Ọtiọyen ọ je hepha nonẹna. Idibo rowian ruiruo eghanghanre vwọ chọn ekpako na uko, ọnana nẹrhẹ e ruẹ erọnvwọn nene ọrhuẹrẹphiyotọ vwevunrẹ ukoko na.

² Wo vughe idibo rowian rehẹ ukoko wẹn? Wọ riẹn iruo rẹ ayen ruẹ fikirẹ erhuvwu wẹn vẹ ọ rẹ ukoko na eje? Jihova vwo ọdavwaro kpahen ẹgbaẹdavwọn rayen. Ọyinkọn Pọl de si: “Kidie ayen otu ri ru iruo [“rẹ odibo rowian,” NW] na yoyovwi ji ghwe vwo omamọ rẹ owotọ kẹ oma rẹ ayen kẹ ayen ji vwo udu vwẹ esegbuyota na rọ hẹ evun ri Kristi Jesu.”—1 Tim. 3:13.

IWAN RA GUỌNỌ MIE IDIBO ROWIAN

³ Ofori nẹ idibo rowian yeren akpọ rẹ Onenikristi, ayen dia eshare ri tedje, re je nabọ vwẹrote iruo ra vwọ kẹ ayen. A mrẹ ọnana vughe womarẹ oborẹ Pọl ta kpahen iwan rẹ ayen cha yan mu vwẹ ileta ro si rhe Timoti, rọ vwọ ta: “Otu [“rẹ idibo rowian,” NW] me je dia ihwo rẹ use na nabọ we, ọ ta ota ivẹ-ẹ, o siọgba rẹ udi-i, o vwo urhuru rẹ efe rẹ okpakpa-a; ayen me yọnre igbunu rẹ esegbuyota gan vẹ evun ọfuanfon. A me davwe ayen ni tavwe; ayen rhe she-e kẹsiẹye ayen ki ru iruo [“rẹ odibo rowian,” NW]. E jẹn [“idibo rowian,” NW] rọvwọ ẹsiẹvo goi, e jẹn ayen sun emọ rayen vẹ evwruwevwi rayen yoyovwi.” (1 Tim. 3:8-10, 12) Idibo rowian da yan mu iwan nana, ukoko na sa vrabọ rẹ ekan re sa vwomaphia kpahen oka rẹ ihwo re vwo mu ẹdia oghẹresan nana.

⁴ Tẹ ayen dia ighene yẹrẹ imiragua, idibo rowian muomaphiyọ iruo rẹ aghwoghwo na kemeranvwe kemeranvwe. Kerẹ Jesu, ayen ruiruo rẹ aghwoghwo na vẹ oruru. Womarẹ oruru ọtiọyena, ayen djephia nẹ ayen vwo ọkpọ rẹ owenvwe rẹ Jihova vwori ro vwo sivwin ihworakpọ.—Aiz. 9:7.

⁵ Idibo rowian dje omamọ rẹ udje phia vwẹ osẹnvwe, irhuon, eta kugbe iruemu rayen. Ayen vwo iroro ro fiotọ, ọnana nẹrhẹ e muọghọ kẹ ayen. Vwọba, ayen vwẹ ẹro ọghanghanre vwo ni oyerinkugbe rayen vẹ Jihova kugbe uphẹn rẹ ẹga rayen vwẹ ukoko na.—Tai. 2:2, 6-8.

⁶ Eshare nana, a “davwe ayen ni tavwe.” A ke tobọ vwẹ ayen vwo mu, eshare nana djerephia nẹ ayen ihwo re vwẹ oma vwo ze. Ayen vwẹ ọdavwẹ rẹ Uvie na vwọ kobaro vwẹ akpeyeren rayen, ayen je pharha vwọ kẹ uphẹn rẹ ẹga eje ro rhiephiyọ vwọ kẹ ayen. Ayen ghini uvi rẹ udje vwọ kẹ ihwo efa vwẹ ukoko na.—1 Tim. 3:10.

IRUO RẸ AYEN RUẸ

⁷ Idibo rowian ruiruo sansan fikirẹ erhuvwu rẹ iniọvo rayen, ọnana nẹrhẹ ekpako na mrẹ ọke buebun vwo yono je vwẹrote ukoko na. Tavwen a ke vwẹ iruo vwọ kẹ ayen, ekpako na roro kpahen ẹgba rẹ ayen ọvuọvo vwori kugbe ọdavwẹ rẹ ukoko na.

⁸ Di roro kpahen iruo evo rẹ ayen ruẹ: Odibo rowian ọvo sa vwẹrote ẹbe rẹ ukoko na rere iniọvo na sa vwọ reyọ vwo ruiruo komobọ yẹrẹ vwẹ iruo rẹ aghwoghwo na. Efa vwẹrote igho rẹ ukoko na vẹ asan re de ghwoghwo. Efa je vwẹrote echidiotọ na, imaikrofonu, ekuakua rẹ uhworo yẹrẹ vwẹ ukẹcha kẹ ekpako na vwẹ idjerhe efa. Owian buebun herọ re che ru vwẹ ẹroevwote rẹ Ọguan Ruvie kugbe orufon rọyen, ọke buebun, idibo rowian yen vwẹ ukẹcha phia vwẹ ẹdia nana.

⁹ Vwẹ ikoko evo, a sa vwẹ iruo ọvo vwọ kẹ odibo rowian ọvo. Vwẹ ikoko efa, odibo rowian ọvo sa vwẹrote iruo sansan. Ọkievo, idibo rowian ivẹ yẹrẹ e re vrẹ ọtiọyen sa vwẹrote owian vuọvo. Jẹ, idibo rowian re cha vwẹrote iruo nana rhe bu-un, ekpako na sa vwẹ iruo nana kẹ iniọvo eshare ri bromaphiyame ri tedje. Ọnana cha nẹrhẹ ayen tẹn ona rẹ ayen sa reyọ vwo ruiruo vwẹ ọke rẹ ayen de muwan vwọ kẹ ẹdia rẹ odibo rowian. Iniọvo eshare rha herọ-ọ, oniọvo aye ro tedje sa vwẹ ukẹcha phia vwẹ iruo evo dede nẹ a cha sa reyọ vwo mu odibo rowia-an. Ohwo ro tedje, ọyen ohwo ra sa vwẹrokere uruemu vẹ ẹga rọyen. Ofori nẹ ọ dia omamọ rẹ udje vwẹ uyono ẹra, iruo aghwoghwo, akpeyeren orua, erọnvwọn ra vwọ diotọ, osẹnvwe, irhuon, vẹ efa tiọyen.

¹⁰ Vwẹ ikoko ri ghwe vwo ekpako bu-un, a sa vuẹ idibo rowian ri tedje nẹ ayen nene ohwo rọ guọnọ bromaphiyame fuẹrẹn enọ ri shekpahen iyono ri Baibol. Enọ nana hẹ Apẹndisi, “Ẹbẹre 1: Oborẹ Inenikristi Segbuyota.” Ọ vwọ dianẹ “Ẹbẹre 2: Akpeyeren rẹ Onenikristi” churobọ si eta odjahọn romobọ na, ko fori nẹ ọkpako fuẹrẹn ẹbẹre nana.

¹¹ O de shephiyọ, nọke ra ruọke ekpako na se phren iruo rẹ idibo rowian rehẹ ukoko na. Ẹkẹvuọvo, erere herọ siẹrẹ iniọvo evo de ruiruo ọvo vwẹ uvwre ọke evo rere ayen sa vwọ tẹn ona rẹ iruo na je dia ewena.

¹² Fikirẹ oborẹ ikoko evo hepha, a sa vwẹ iruo efa vwọ kẹ idibo rowian ra “mrẹ erhuvwu rẹ iruo [rayen] vughe.” (1 Tim. 4:15) Ekpako na rhe bu-un, a sa vuẹ odibo rowian nẹ ọ vwẹ ukẹcha kẹ oniruo rọvwẹrote ẹko aghwoghwo yẹrẹ, vwẹ ẹdia evo, e se vwo mu odibo rọvwẹrote ẹko aghwoghwo, rọ cha wian vwẹ otọ rẹ ekpako na. A sa ghare eta evo vwẹ Uyono rẹ Akpeyeren vẹ Iruo Ruvie Na vwọ kẹ idibo rowian, ji te ẹroevwote rẹ Uyono ri Baibol Rukoko o de fo, kugbe ota rotu. Uphẹn ẹga efa ji se rhiephiyọ vwọ kẹ idibo rowian siẹrẹ ọ da dia obo ra guọnọre, ayen da je yan mu iwan ra guọnọre vwọ kẹ iruo na. (1 Pita 4:10) Ofori nẹ idibo rowian vwomakpahotọ vwọ vwẹ ukẹcha kẹ ekpako na.

¹³ Iruo rẹ idibo rowian fẹnẹ e rẹ ekpako na, dedena, iruo rayen na ẹbẹre ọvo rẹ ẹga ra vwọ kẹ Ọghẹnẹ, ọ je nẹrhẹ ọrhuẹrẹphiyotọ rẹ ukoko na nabọ yan obaro ghwraghwraghwra. Ọke vwọ yanran na, idibo rowian re nabọ ruiruo rayen, je yan mu iwan ra guọnọ mie isuigodẹ vẹ iyono, ka sa vwẹ ayen vwo mu ekpako.

¹⁴ Wọ da dia oniọvo ọshare ro ji te ẹgbukpe uje-e, yẹrẹ wo bromaphiyame obọ, wọ sa pharhe wo se vwo muwan rẹ ẹdia rẹ odibo rowian? (1 Tim. 3:1) Ihwo buebun vwo rhurie ro ukoko na kẹdẹ kẹdẹ na, a guọnọ iniọvo eshare ri tedje re cha vwẹrote ewian rẹ ukoko na. Wo se muwan siẹrẹ wo de vwo owenvwe wọ vwọ chọn ihwo efa uko. Idjerhe ọvo wo se vwo ru ọnana yen wo vwo roro kpahen omamọ rẹ udje rẹ Jesu phi phiyotọ. (Mat. 20:28; Jọn 4:6, 7; 13:4, 5) Owenvwe wẹn cha ganphiyọ wọ vwọ mrẹ aghọghọ rọ herọ siẹrẹ a da vwẹ ukẹcha kẹ ihwo. (Iruo 20:35) Ọtiọyena, gba vwẹ ukẹcha kẹ ihwo efa, vwobọ vwẹ ẹroevwote rẹ Ọguan Ruvie, yẹrẹ wo mi ji muegbe vwọ kẹ ota ri kpregede siẹrẹ ohwo ra vwẹ ota na kẹ rha rhe-e. A vwọ pharhe ji churobọ si e vwo vwo iruemu rẹ Onenikristi womarẹ uyono romobọ rẹ ọkieje. (Une 1:1, 2; Gal. 5:22, 23) Vwọba, oniọvo tiọyena me je dia ohwo ra vwẹrosua, ro ji mu ẹwẹn kpahen iruo ra vwọ kẹ vwevunrẹ ukoko na.—1 Kọr. 4:2.

¹⁵ Womarẹ ẹwẹn ọfuanfon na yen a vwọ vwẹ idibo rowian vwo muẹ fikirẹ erhuvwu rẹ ukoko na. Ihwo eje rehẹ ukoko na se dje ọdavwaro phia kpahen owian ọgangan rẹ idibo rowian siẹrẹ ayen da yan nene odjekẹ rẹ ayen vwọphia vwẹ iruo rayen. E de ru ọtiọyen, jẹ avwanre vwẹ ẹro ọghanghanre vwo ni ọrhuẹrẹphiyotọ ri Jihova rọ nẹrhẹ e se ru emu eje utute vwẹ evwruwevwin rẹ esegbuyota na.—Gal. 6:10.